TITUS
Svan Prose Texts II (Lower Bal)
Part No. 33
Previous part

Text: 33 
Page of edition: 48 
Line of edition: 13 
XXXIII. მაჰრენე ვიდილ


Link to spto2g
Line of edition: 14       აღო ხოჩემიშ გარუ ლამბვალ ლი, იმეგ ა̈რი ეშხუ მარე. ალის
Line of edition: 15    ხორი სემი დინაგეზალ. აშხვ ლადეღ ალ მარე ცხეკხენ ანტახ ნებოზს.
Line of edition: 16    ქორს ესხვიდდახ მიჩა დინოლ ი ხა̈ქვე: -- ჯ' ესერ მა̈ფშა̈რ
Line of edition: 17    ლი ი ჲა̈რ ესერ აკდჷრეხ მიჩ?

Link to spto2g
Line of edition: 18       მაშენე დინად მანესგჷრეს ხა̈ქვე: -- ჯინემ ესერუ ადკჷდჷრე.

Link to spto2g
Line of edition: 19       მანესგჷრემ მაჰრენამ ხა̈ქვე: -- აუ, ჯინემ ესერუ ადკჷდჷრე.

Link to spto2g
Line of edition: 20       ანჴად მაჰრენე დინა ი აკდჷრე მინე მუს. ეშხუ (\ აშხვ) ზჷთჴა̈რს
Line of edition: 21    ხაკედდა, ეჩქას ზჷთჴა̈რხენქა ვისგ ანშყად. ალის ხეწადხ ხოშა ლავდილა
Line of edition: 22    ი ხა̈ქვეხ, ერე მერმე ზჷდჴა̈რს ესერ მინ ხაკედხ, მარე მინე
Line of edition: 23    მუდ მად ჩვემინ: -- ლახ ესერ ვისგ მადმა ა̈ნშყდენოლ ზჷდჴა̈რხენქა,
Line of edition: 24    ეჩქას ესერ დემის ლჷმკჷდჷრინხ. აღო ამჟი ესერ გვი ე ხარხ ვისგდ,
Line of edition: 25    მჷხა̈რ ესერ ოთჴერდახუ მიჩ ცხეკთე ი ეჩეჩუ ესერ ხოცჷხ ეშხუ
Line of edition: 26    ვისგ ი ჩუ ესერ ხოფთხჷნე მინს.

Link to spto2g
Line of edition: 27       დინოლს მასა̈რდ ათჩონხ ი ჩინემ ხა̈ქვეხ: -- ა̈დჴერნე ესერუ.

Link to spto2g
Line of edition: 28       მინე მუდ ხა̈ქვე, ერე მჷხა̈რ ესერ ჯი გარ ღჷრი ი მჷხა̈რეჩხენ
Line of edition: 29    მინს ესერი ა̈დჴერნის.

Link to spto2g
Line of edition: 30       მერმა ლადეღ აჩად მინე მუ ცხეკთე ი ვისგ ჩუქან ჩვადბჷრჯე
Line of edition: 31    ხოშა ფათქ, ჟიქაქა მოლა̈რ ათლაფრე.

Link to spto2g
Line of edition: 32       მესმა ლადეღ ა̈დჴერნე დინოლ, ხა̈ქვე: -- ვოდოდ ესერ ჯი ჟ'აჩეს
Line of edition: 33    ვისგთეჟი ი ჩვანფჷთხნას, ეჩქად ესერ ვისგ ჩუქანთე ნომავ აჩადხ.
Line of edition: 34    ჟ'აჩად ვისგთეჟი ი ჩვანფჷთხნე. დინოლ სგათშჷდდახ ვისგიშ გორევს.
Line of edition: 35    ფათქ ჩვაძგვაბ ი დინოლ მა̈გ ჩვაშჷდდახ. მინე მუდ ვისგ,
Line of edition: 36    მა̈ჲ ზჷსდა ჟიქაქა, ეჯი მა̈გ ჩოთჰარე ფათქთეჲსგა, ჯი სგანტახ

Link to spto2g
Page of edition: 49 
Line of edition: 1    ქორთე ი რა̈ქვე: -- აშხვ ნაგზანღო ესერ ა̈ტხენი ფათქთე ი, ერვა̈ჲ
Line of edition: 2    ესერ ქვინმეგნე ესხოლიხ, ეჯ' ესერ მართა̈ლ ირიხ.

Link to spto2g
Line of edition: 3       ალ დინოლს ვისგ ჲარვ ლადეღ გარ ათხადხ. მესმა ლადეღ მა̈იდშვ
Line of edition: 4    იდგა̈რიხ. ანჴადხ ი ა̈დბინეხ ლიბჷრჯე. აბჷრჯეხ, აბჷრჯეხ ი აშხუნღო
Line of edition: 5    ჩვა̈თჴედჷნხ კესა̈რშე{რ} ჩაჟვემ ლა̈ლდიართეჲსგა. კესა̈რშერ ჩა̈ჟს
Line of edition: 6    დია̈რს გარ ხამნახ ი ალ დინოლ ხოქვთერდახ ჩაჟვ დია̈რს.

Link to spto2g
Line of edition: 7       აშხვ ლადეღ მაჰრენე ვიდილ ჩვადირმ მჷჩჟჷრიდ ი ა̈დჴერნე ხელწიფხეშთე.
Line of edition: 8    ხელწიფხე (\ ხემწიფე) ქა ხამბვალნე, იმხენ ა̈ხჴედჷნ
Line of edition: 9    მიჩ ამთეჲსგა.

Link to spto2g
Line of edition: 10       ალ დინად ოხუმბავე, იმჟი მინე მუეშ ლიკდჷრეს იცლავალდახ
Line of edition: 11    ი ეჩქანღო მინე მუდ იმჟი ადკვა̈რ ფათქთეჲსგა.

Link to spto2g
Line of edition: 12       -- აღო ათხე მიჩა ლავდილა ჩვავ ა̈ნჴერნე.

Link to spto2g
Line of edition: 13       ჟ'აჩად ი ჩვა̈ნჴერნე. ხეწიფედ ხოშა ლავდილა მოა̈ხლდ ესყედნე
Line of edition: 14    ი მაჰრენე ვიდილ ხახვდ ადჲე. ხოშა ლავდილას ხაურცვეფხ ხოხრა
Line of edition: 15    ვიდლა̈შ ხოჩამდ ლირდე.

Link to spto2g
Line of edition: 16       ქაჩად ეშხუ ზა̈ჲ ი მაჰრენე ვიდილს ა̈ხთავან ჲორი ნაღვჟურგეზალ.
Line of edition: 17    ანჴადხ ხოშა ლავდილა ი ალ გეზლირ (ჩინჩვლა̈რ) ქოთქვითხ
Line of edition: 18    ი ლაჩჟჷრთეჲსგა ადკვა̈რხ: ჩაჟა̈რ ესერ ემის ჩვადბუჭკურისხ. მინე
Line of edition: 19    დის ნაღვჟურრე მჷქაფდ ფეკვნა̈რ ლოხგენეხ ლა̈ჩიგვს. ანჴადხ ხოშა
Line of edition: 20    ლავდილა ი ხემწიფეს ხა̈ქვეხ: მიჩა ხახვ ესერ ფეკვნა̈რ ოხთავა.
Line of edition: 21    ალი ხემწიფეს მასა̈რდ ათუვშგედჷნ ი ხა̈ქვე, ერე ჟავ ა̈ნკიდხ მიჩა
Line of edition: 22    ხეხვ ი ლაგა̈გიჟ' ესერუ ესგენეხ მიჩა ფეკვნა̈რცახა̈ნ, ყორისგა
Line of edition: 23    მეჴედ მარემ ესერ ჩინემ ჭჷშხა̈რ ესერუ ლახკვეცნე ი ნა̈შხუ
Line of edition: 24    ლახტჷბნე.

Link to spto2g
Line of edition: 25       ჩინჩვლა̈რ ლაჩჟჷრითეჲსგა ერ ადკვა̈რხ, ალის ხეწად ეშხუ დადა
Line of edition: 26    ი ქა̈დქვით. აშხვ ზაუნღო ალ ბოფშა̈რ ლადეღისგა ეშხუ კამინს
Line of edition: 27    ესერ ლჷმცხემინხ, ხოჩამდ ლჷმშდირალინხ.

Link to spto2g
Line of edition: 28       აშხვ ლადეღ დადა აჩად ხემწიფეშთე ი ხა̈ქვე: -- მიჩ ესერ ხორი
Line of edition: 29    ჲორი ნაღვჟურ ი გუნ ესერ ხოჩამდ იღრალხ ი იშდრალხ. ემმ' ესერ
Line of edition: 30    ხაკუ, ინჴრჷნ' ესერ.

Link to spto2g
Line of edition: 31       ხემწიფედ ხა̈ქვე: -- აღო მჷხა̈რ ესერუ ა̈ნჴერნე.

Link to spto2g
Line of edition: 32       ყორქა ლაზჟი დადა ხეწად ხემწიფეშ ხეხვს, ხედვა̈ჲს ერე მა̈გ
Line of edition: 33    ნა̈შხვს ხატბჷნა. ალ დინა ხაჯიშ ეჯ ბოფშა̈რს.

Link to spto2g
Line of edition: 34       მერმა ლადეღ დადად ა̈ნჴერნე ალ ჲორი ლახვბილა̈რ ი ყორისგა
Line of edition: 35    ლაზჟი ხეკვეს ჭიშხ ხოძგრენხ ხემწიფეშ ხეხვდ ი ნა̈შხ ლოხტჷბნენეხ,
Line of edition: 36    მარე ალ ბოფშა̈რდ დ' ეშხუ ჩვემინხ ი დე მერმე. მინე დიდ ჩვათირ
Line of edition: 37    მიჩა გეზლი ი ხა̈ქვე ხემწიფს, ერე: -- მიჩ' ესერ გეზლირ ფეკვნა̈რ
Line of edition: 38    მადე ლიხ ი ალა̈რ ესერ ლიხ.

Link to spto2g
Page of edition: 50 
Line of edition: 1    ხემწიფედ დადას ქახუმბავნე: -- იმხენ ესერ ოხჴიდა მიჩ ალ
Line of edition: 2    ბოფშა̈რ?

Link to spto2g
Line of edition: 3       დადად მა̈გ ქა ხა̈ქვე, იმჟი ლაჩჟჷრითეჲსგა ადკვა̈რხ ი ეჩხენქა
Line of edition: 4    ჯინემ ა̈დქვით.

Link to spto2g
Line of edition: 5       ანჴად ხემწიფე ი ჟ'ანჷნზორე სემი ლავდილა მა̈გ. ჩვადქჷნთრინე
Line of edition: 6    ჩეია̈შ კა ი ხა̈ქვე: -- მინ სამ ლავდილაჲსგა ესერ ტკიც ესერ ერვა̈ჲ
Line of edition: 7    ლესეხ, ეჯი ნომავ ესერ ოლშიხელი; ერვა̈ჲ ესერ ბა̈ქ ლესეხ, ეჯი
Line of edition: 8    ქა̈მილდა̈რ გარუ ომსედელი!

Link to spto2g
Line of edition: 9       ლჷქჷნთრინე კაჟი ჩვესგურდახ სემი მა̈გ. მაჰრენე ვიდილჷნქა მა̈გ
Line of edition: 10    ქა̈მ გარ ასადხ, მაჰრენამ ხა̈დურდ მადმაგვეშ ხეყარ. ხემწიფედ მიჩა
Line of edition: 11    ქორთე ადჲე ხეხვ ი მიჩა გეზლირი ი ხოჩა ლირდე აჰიე.

Link to spto2g
Line of edition: 12       ვოდოდ ეჯა̈რ ანჴეხ, ეჩქადუ ლა̈რიდ.


(ერმენტო კვიციანი. დოლ. ვ. თოფურია. 3.XI.1939)



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.