TITUS
Svan Prose Texts II (Lower Bal)
Part No. 32
Previous part

Text: 32 
Page of edition: 44 
Line of edition: 18 
XXXII. ჲორი ლახვბა


Link to spto2g
Line of edition: 19       აშხვ უდუმბურ ცხეკისგა ა̈რიხ ხეხვ-ჭა̈შ. ალა̈რს ხორიხ ეშხუ
Line of edition: 20    ნაღვჟურგეზალ. ჭაშვემ ნადგარუნღო ზურალს ლახლატჷნდა ეშხუ
Line of edition: 21    და̈ვ ი გეზალ ა̈ხთენან ამხენქა. ალი ლახვბა ეჯჟი ხაჯეშდახ უშხვარ,
Line of edition: 22    ერე ჩუ დეშ აყვრულა მარე. ზურალს და̈ვხენქა ხორდან, ეჯი
Line of edition: 23    ნაღვჟურ ხოშილ ხალა̈ტდან ი ხაკუჩდან, ერე ალი ნაღვჟურ
Line of edition: 24    ჩოთდაგრენს.

Link to spto2g
Line of edition: 25       ლანა̈დირთე ლახ ესღჷრდახ, ეჩქას და̈ვხენქა ხორდან, ეჯ
Line of edition: 26    ნაღვჟურს ფექს ხაჰვდიდან, ი ჭაშვხენქა ხორდან, ეჯის -- გა̈ტს. ალის,
Line of edition: 27    ჭაშვხენქა ხორდან, ეჯი ნაღვჟურ გუდ აჴად ი ხოლა გუჟი გარ
Line of edition: 28    არდა ჩიგარ. მიჩა დი ქა იმ ხაჰვდიდან გა̈ტს, ეჯის ბადღვთეჲსგა
Line of edition: 29    შიდა ი ჯი ნანა̈დირშვ ისელვიდა.

Link to spto2g
Line of edition: 30       აშხუნღო ლა̈ხჭვედდა მიჩა მუხვბე: -- იმღ' ესერ ა̈რი ამჟი
Line of edition: 31    ხოლა გუჟი? -- ამნემ მამაგვეშ ხექე.

Link to spto2g
Line of edition: 32       აშხვ ლადეღ, შომა̈ჲ ლანა̈დირთ' ესღჷრდახ, ამნემ ხექე მიჩა
Line of edition: 33    მუხვბა: -- ლათოფისგ' ესერუ ა̈ხმჷქრან. ნიშა̈ნდ ეჯი ბადღვ
Line of edition: 34    ლახთონე, ხედვა̈ჲთე ჯი გა̈ტს შიდა.

Link to spto2g
Line of edition: 35       ა̈ხფიშვდხ. ექდად ქა ხაჴიდხ. ბადღვდ პურსან ლა̈ჲფიშვდ.
Line of edition: 36    ათჷნბაჟჷნ ათხე ალი ეჩა მუხვბა ი ხექე: -- იმღ' ესერ ლოხფიშდა
Line of edition: 37    ალის პურსან?

Link to spto2g
Page of edition: 45 
Line of edition: 1    ამნემ ლახტიხ, ერე ჩვ ესერუ ადსჷნჯავეხ.

Link to spto2g
Line of edition: 2       აჩადხ ქა ი ალი გა̈ტშვ გვეში ლა̈სვ.

Link to spto2g
Line of edition: 3       ხოშა მუხვბე ლა̈ხჭვედდა: -- ჲარ ესერ ა̈შდა ამთეჲსგა გა̈ტს?

Link to spto2g
Line of edition: 4       ამნემ ხექ', ერე მინე დი 'სერ მიჩ ფექს ხაჰდუნა, მიჩ ესერ --
Line of edition: 5    გა̈ტს.

Link to spto2g
Line of edition: 6       ამნემ მა̈გ ჩვა̈ცხირ, ეჩქას ალიჲ ხოლა გუჟი ა̈დჷრდან. ეჯ ლეთ
Line of edition: 7    ჩუ მად ა̈დდირან. მიჩა დის ლახსაყვედურე: -- იმღ' ესერ
Line of edition: 8    ლუმჩომინ ალის?

Link to spto2g
Line of edition: 9       ამღა მიჩა დი ხა̈დურდ ხოშილიდ ა̈დბრაზან.

Link to spto2g
Line of edition: 10       აშხვ ლადეღ ალი ბოფშა̈რ ლანა̈დირთე ლა̈სვხ მეჩდე, ეჩქას
Line of edition: 11    მიჩა ჭა̈შ-და̈ვს ხექე, ერე ეჯი ესერ ჩუვ ადგა̈რ, ე, მიჩა გეზლა̈შ
Line of edition: 12    მუხვბე.

Link to spto2g
Line of edition: 13       ამნემ ანჴიდ შირადოლებ ი ყორჟი ოთდარჯე ჩუ ბოფშა̈რს.
Line of edition: 14    და̈ვა̈შ გეზალ გუდმეცა̈რ ლა̈სვ ი ალის გუდ აჴად. ჟ'ესსგვირე
Line of edition: 15    მიჩა მუხვბე კინჩხა̈რჟი ი ეჯჟ' ანჴიდ ქორთე სგა.

Link to spto2g
Line of edition: 16       მიჩა მუხვბედ ქახქვიც, ერე ალ ქორხენქ' ესერ ღჷრი.

Link to spto2g
Line of edition: 17       აშხვ ლადეღ ლა̈ნადირთ' აჩადხ, ეჩქას მიჩა მუხვბეს ხექე: -- ჯი
Line of edition: 18    ესერ ალი შუკვს ღჷრი ი ჯი ესერ ეჯი შუკვსუ აჩად. ბეჭდა̈რ ესერ
Line of edition: 19    ჩუვ ადცადუნეხ. გაჭირებ' ესერ ხერიხ, ეჩქას ლაბრალა̈რ ესერ
Line of edition: 20    ხეგნიხ ი უშხვარ ესერ ა̈ხთხელნიხ ი ლა̈ხმეშდა̈ლიხ.

Link to spto2g
Line of edition: 21       ალა̈რ ჩვა̈დყურულანხ ი ეშხუ აშხვ შუკვს აჩად ი მერმე --
Line of edition: 22    მერმა.

Link to spto2g
Line of edition: 23       ესხრი ალი, ა ხოშა მუხვბე, ი ათასდდა მჷდჴჷლა̈რის. ეჯ ლეთ
Line of edition: 24    ეჯა̈რმჷყ ადჷგან, ეჯა̈რდ ხექეხ, ერე ალ შუკვს ესერ ერვა̈ჲ ქა
Line of edition: 25    მეჩდელი, ღვეშდ ესერ და̈რმოშ ლი მეტხე.

Link to spto2g
Line of edition: 26       ეჩქას ალი ნაღვჟურ ლა̈ხჭვედდა: -- იშ' ესერ მჷდჴჷლა̈რი ლიხ
Line of edition: 27    მინ?

Link to spto2g
Line of edition: 28       ეჯა̈რდ ოსტიხხ, ერე ეჯის ესერ, მინეშხენქა ჯოდიას ხამრე
Line of edition: 29    ანდავ ესერ ა̈რიხ, ეჯა̈რ ესერ ხექინეხ.

Link to spto2g
Line of edition: 30       ათაგან ალი შუკვს ი სგაჩად მჷხმჷრათეჲსგა. ეჯ ლეთ ეჯა̈რმჷყ
Line of edition: 31    არდა. ეჯა̈რსი ლა̈ხჭვედდა: -- იშ ესერ მჷხმჷრა ლიხ მინ?

Link to spto2g
Line of edition: 32       ეჯა̈რდი მჷდჴჷლაშალ ოსტიხხ: -- ქ ესერუ აჩად ქახი ი, ფურრე
Line of edition: 33    ანდავ ესერ ირდიხ, ეჯა̈რ ესერ ხექინეხ.

Link to spto2g
Line of edition: 34       აჩად ალი ი სგა̈თჴედჷნ ფურრე ანდავათეჲსგა. ალა̈რსი ამჟი
Line of edition: 35    ქახჭოდრელე. ეჯა̈რდ ხექეხ: -- ხოჩ ესერ ამსვალდ, ამექ ესერ ქა
Line of edition: 36    ერვა̈ჲ მეჩდელი, ღვეშდ ესერ და̈რმოშ ლი მეტხე ი მიჩ ესერ იმღა
Line of edition: 37    ხაკუ თხუმემ ლიღვპა̈ვი?

Link to spto2g
Page of edition: 46 
Line of edition: 1    -- ეჯღ' ესერ მინ ესერ ნომავ ანფაშხ აღო. მინდ ესერ ქ' ესერუ
Line of edition: 2    ხექეხ, იშა ფურრე ანდავა ლიხ, ეჯი.

Link to spto2g
Line of edition: 3       ეჩქას ეჯა̈რდ ხექეხ: -- ეში ესერ დემ იგნი ე, ქ' ესერ ხექინეხ
Line of edition: 4    აღო, იშ' ესერ ანდავა ლიხ, ეჯის.

Link to spto2g
Line of edition: 5       ეჯა̈რდ ოხუმბავეხ: -- მინ ესერ ლიხ ეშხუ და̈ვა̈შ ანდავა. ეჯი
Line of edition: 6    და̈ვს ესერ ხორი ეშხუ ხოჩა დინაგეზალ. [ვ]ოქრა̈შ ესერ ლუსდგვა̈რ
Line of edition: 7    ხაგ ი ჰაგვთეჩუ ესერ ხეჰოლიხ. მარე ეჯი და̈ვა̈შ მურყვამთეჲსგა
Line of edition: 8    და̈რმოშ ესერ ესხრი სგა. ყორისგ' ესერ ლახ ესღჷრნი მარე, ეჩქას
Line of edition: 9    დეცხენჩუ ესერ ვორბა̈რ პერნიხ ი თხვიმს ესერ ეჯა̈რ ა̈ჲნეხ ჟიბოვ,
Line of edition: 10    ეჩქანღო თხეროლ ესერ იქინეხ ეჩხენ-ამხენისგა ი ლესგა̈რს ესერ
Line of edition: 11    ეჯა̈რ ა̈ჲნეხ.

Link to spto2g
Line of edition: 12       ალი ქოხუმბავეხ ეჯა̈რდ ი ამნემ ადსკორე ი ანდავას ხა̈ქვე:

Link to spto2g
Line of edition: 13       -- ხამემ თხვიმ ი ლესგა̈რ ესერუ ლახვემხ. თხვიმს ესერ ეჯი თხვიმჟი
Line of edition: 14    ესგემნე, ლესგა̈რს ესერ ეჩხა̈ნ-ამხენისგა ლა̈ჲლა̈ჯნე. თხვიმს ესერ
Line of edition: 15    ვერბ ადა̈ჲნე, ლესგა̈რს თხეროლ ი ჯი ესერ სგადრჷნე
Line of edition: 16    მურყვამთეჲსგა.

Link to spto2g
Line of edition: 17       ალის წელ ოჰინგრეხ, თხვიმ ი ლესგა̈რ ჟ'ოსდეხ ეჩეჟი ი
Line of edition: 18    ქადჷნგზარვეხ. სგაჩად ალი ი მურყვმა̈შ სგვებინჩუ ჩვესჷგან. ხამემ თხვიმ
Line of edition: 19    თხვიმჟი ესლა̈ჯ, ლესგა̈რ ეჩხენ-ამხენისგა ლა̈ჲლა̈ჯ ი სგაჩად
Line of edition: 20    ყორთეჲსგა.

Link to spto2g
Line of edition: 21       ანსკინე ჟიქაშხენჩუ ვერბდ ი ხამემ თხვიმ ეჯნემ ადჲე. ლესგა̈რ
Line of edition: 22    თხეროლდ ადჲეხ. ჯი სგაჩად მურყვამთეჲსგა. ჟ'აჩად დინაშ
Line of edition: 23    ლარდათეჟი ი ხეწად ალი დინას ქა ი ხია̈რედო ჩვა̈დჰალმან.
Line of edition: 24    ლა̈ხბჷრგან ვოქრა̈შ ლუსდგვა̈რს სგა ი სამ ვორკა̈ცდ ქა ლა̈ჲჭვენ მეჴრაქა.
Line of edition: 25    დინას ჩუ ხევჟა. ოხბიდ ეშხუ ქა ლუსდგვა̈რს ი დეშ ანეცხვნე,
Line of edition: 26    დეჲ მერმად მოშ, მესმად ოხბიდ, ეჩქას დინა ჟი ა̈ნეცხვნან ი
Line of edition: 27    ეჯგვა̈რ ესკილ, ერე ღო ნაღვჟურ ხია̈რედო ჭვედთე ლახხიპ.

Link to spto2g
Line of edition: 28       -- ქ' ესერუ აფიშვდ ლუსდგვა̈რს ი დემგვაშვ ესერ ხეჩო,
Line of edition: 29    -- ხექე: -- ქ' ესერუ აფიშვდ.

Link to spto2g
Line of edition: 30       ნაღვჟურდ ხექე: -- მიჩა გიგა ელენეშ ქვინ ესერ ჩუვ ა̈დღვენე,
Line of edition: 31    ერე დემგვაშვ ხეჩო ი' ხახვდ ესერი ქა ხენჴრენი, ეჩქას ესერ ქა
Line of edition: 32    ფიშვდე, მადეი-ი' დემეგ.

Link to spto2g
Line of edition: 33       ამნემ ჩვა̈დღვენე მიჩა გიგაშ ქვინ, ეჩქას ნაღვჟურდი ქაფიშვდ
Line of edition: 34    ლუსდგვა̈რს. ნაღვჟურიშ ვიშკვს ხეწად, ეჩქას მასა̈რდ ლახლატჷნ
Line of edition: 35    ალი ი ხექ', ერე ხეხვდ ესერ ქა ხენჴრენი. ალ დინად ნაღვჟურ
Line of edition: 36    ჩვა̈დჴერნე მიჩო მეშთე ი მიჩო მუსი ლახლატჷნ ალ ნაღვჟურ. დინა
Line of edition: 37    ჩვა̈დუჟდან. ლივჟუნალა̈შ სგვებინჩუ ხექე ნაღვჟურს: -- ჯ' ესერ, ვოქრა̈შ
Line of edition: 38    ტობ ლჷგ, ეჩეჲსგ' ესერუ იშდრალდა, ჟ' ესერ ლახ ახჟანდეს,

Link to spto2g
Page of edition: 47 
Line of edition: 1    ეჩქასი ლეჟავ ესერ ნომეგუ აჩად ლაროლ ლეჟა, მა̈ჲ ესე[რ] დო
Line of edition: 2    ლესეს.

Link to spto2g
Line of edition: 3       დინა ჩვა̈დუჟდა. ნაღვჟურ ჩიქე ტობისგა იშდრალდა, ეჩქანღო
Line of edition: 4    ჟ'ახჟანდან, ეჩქას ლაროლ ლეჟ' აჩად ლასჷნჯა̈ვითე. აჩად აშხვ
Line of edition: 5    ტვიბთეჲსგა ი ეშხუ ნა̈პვრს ხეწად. ა̈ხფიშვდ ალის ცხვი-ცჷჴემედ
Line of edition: 6    ი ჩვადგა̈რ ალი. ჟ'ანტყაბე ი იზბუდან, ამჟი ღუჰდ ლახტვილ მეგამხენჩუ:
Line of edition: 7    -- ხოჩ' ესერ მარე, ეშხუ ესერუ ნა̈პუ ლოხკილტე.

Link to spto2g
Line of edition: 8       -- ჩვ ესერუ ა̈ნთჷრდა, მუქვნია ღუჰ, ი ისგ' ესერ
Line of edition: 9    ლოხკილტისგ.

Link to spto2g
Line of edition: 10       ჩვანჴად ალი ი ხოშა და̈ვდ ესსიპდან. ხა̈ფხეჭ ალ ნაღვჟურს სგა
Line of edition: 11    ი ჩვადირტყვ. ალი ჩვადირტყვ, ეჩქას მიჩა ხოხვრა მუხვბე, და̈ვა̈შ
Line of edition: 12    გეზალ, ლა̈თხვარს არდან ი ლაბრალა̈რ ესაგან. ეჩქა გუდ ანჴად,
Line of edition: 13    ერე მიჩა მუხვბ' ესერ გაჭირვებაჲსგ' ა̈რი. ახაგან შუკვს ი იმგვა̈ჲ
Line of edition: 14    მიჩა მუხვბ' აჩად, ეჩექა ესღჷრდა ჩჲა̈გ. მჷდჴჷლა̈რის, მჷხმჷრის ი
Line of edition: 15    ფურრე ანდავას ჩი ქოთქა̈ბ. ალა̈რს ეჯი მარე ხოხალდახ, ეჯზუ ხაჯეშდახ
Line of edition: 16    ალა̈რ უშხვარ ი ხოჩა პა̈ტივს ხეჩმუდახ ჩიგარ. ამნოშ ალიჲ
Line of edition: 17    გუდ აჴად, ერე მიჩა მუხვბ' ესერ ამექ' ომჩედელი.

Link to spto2g
Line of edition: 18       სგაჩად და̈ვა̈შ კალთეჲსგა ი ვერბა̈რდ ი თხეროლდ ჩვათირხ
Line of edition: 19    ალი მარე. სგა ნაზვ ხოხალდახ ი მამაგვეშ ხა̈ყერხ. ჟ'აჩად დინათეჟი
Line of edition: 20    ი ალის ძაძა̈რ ხა̈ქუდა. ეჯის მიჩა ჭა̈შ ლოხხალდა ი მასა̈რდ
Line of edition: 21    ა̈დჷლხინე. ჩვადჴერნე მიჩო მეშთე ი ეჯის ჩა̈რჩ ჭჷშხა̈რთეჩუ ხეხოლიდა.
Line of edition: 22    ეჯისი მიჩა ჩიჟე ლოხხალდა ი ხექე: -- ათხეუნღო ესერ
Line of edition: 23    ადრჷნე მა ამელეჟა ჯი?

Link to spto2g
Line of edition: 24       ეჩქას ალ ნაღვჟური გუდ აჴად, ერე მიჩა მუხვბ' ესერ ამელეჟა
Line of edition: 25    ლი ლუდვაშე.

Link to spto2g
Line of edition: 26       ეჯ ლეთ მიჩა მუხვბემიშ ხეხვდ ლა̈ჲყვინე სგა, მიჩა ჭა̈შ ხოხალდა.
Line of edition: 27    ამნემ კა̈ნჭოლჷნქა სგა მამაგვეშ ლახთილ. მერმა ლადეღ ლეჟ' აჩად
Line of edition: 28    მიჩა მუხვბემ ნაზვ ლეჟა ი სგაჩად ტვიბთეჲსგა. ამეჩუ ხეწად ალიჲ
Line of edition: 29    ეშხუ ნა̈პვრს. ა̈ხფიშვდ ალის ი ჩვადგა̈რ. ჟ'ა̈ნტყაბე ი იზბუდან,
Line of edition: 30    ამჟი ღუჰდ ლახტვილ მეგამხენჩუ:

Link to spto2g
Line of edition: 31       -- ეშხუ ესერ ნა̈პუ სგავ
Line of edition: 32    ლოხკილტე.

Link to spto2g
Line of edition: 33       ამნემ ხექე: -- ჩვ ესერუ ანჴად, მუქვნია ღუხ, ი სგ' ესერ
Line of edition: 34    ლოხკილტისგ.

Link to spto2g
Line of edition: 35       ღუხდ ხექეიდ: -- დაშნა̈ჲ სგ' ესერუ ესდე, ედო ამჟი ესერ
Line of edition: 36    ხაყვლენი.

Link to spto2g
Line of edition: 37       დაშნა̈ჲშვ ესერ დემგვაშ ხეჩო. ჩვ ესერუ ანჴად ი ქ' ესერ
Line of edition: 38    ლახვედნე.

Link to spto2g
Page of edition: 48 
Line of edition: 1    ჩვანჴად ღუხ ი ეშდჲორი ლუთხვიმ და̈ვდ ესსიპდა. ხა̈ფხეჭხ სგა
Line of edition: 2    უშხვარ ი ნაღვჟურდ ჩვა̈ნყვინე და̈ვ. ჟ'ახქვიც ეშდეშხუ თხვიმ
Line of edition: 3    ი ეშდჲორის ხა̈ქვცა, ეჯჟი და̈ვდ ხექე: -- ეშხუ თხვიმილდ ესერ
Line of edition: 4    სგავ ლახცვირ ი მიჩა მუხვბეს ესერ ქა ხა̈ტხე. ჴადვისგ' ესერ
Line of edition: 5    კოლფჷდ ხოგ. ჩვ ესერუ ადკარე ეჯი კოლფჷდ ი ეჩხენქ' ესერ
Line of edition: 6    ლჷდგა̈რ მიჩა მუხვბ' ესერუ ქანჴიდ. ეჯის პირსახოც ესერუ ლახჭემ
Line of edition: 7    ი ჟ'ანცოცხლე.

Link to spto2g
Line of edition: 8       მიჩა მუხვბედ რექე: -- უჰ, მა̈ჲ ესერ ხვა̈ჲ ხოვჟა!

Link to spto2g
Line of edition: 9       ეჩქას ამნემ ქოხუმბავე მა̈გ, მა̈ჲ იმჟი ლჷმა̈რ.

Link to spto2g
Line of edition: 10       სგანჴადხ ალა̈რ და̈ვა̈შ ქორთე. და̈ვდ მა̈გ ჩვა̈ცხირ, ეჩქას
Line of edition: 11    ჩვადმეზრე ალი ლახვბა ი ხოჩა ქვერწილ ათყერ.


(ქიშვარდ კვიციანი. უშხვანა̈რ. მ. ქალდანი. 16.VIII.1955)



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.