TITUS
Svan Prose Texts II (Lower Bal)
Part No. 28
Previous part

Text: 28 
Page of edition: 30 
Line of edition: 16 
XXVIII. ალექსანდრე


Link to spto2g
Line of edition: 17       იმეგ არდახ ხელწიფ ი მიჩა ხეხვ. ალა̈რს ხორდახ სემი ნაღვჟურგეზალ.
Line of edition: 18    ალ ნაღვჟურგეზლირს თვით ჩაჟემ ჯჷლყჷ ხორდახ თვით
Line of edition: 19    ლახვისგა. ალ ხეხვ-ჭა̈შ ღერმათ ხეჴჷრალდახ: "ღერმეთ, იმჟი დო
Line of edition: 20    ლესეს დინაგეზალ ა̈ნწეს" ი ღერთემ ნაჴჷრალ ქუთულა̈რჟი ჩეჲა̈შ
Line of edition: 21    ტკეჩა̈რ ხოგანხ.

Link to spto2g
Line of edition: 22       აშხუნღო ა̈დსიმნე ღერთემ ალ ხეხვ-ჭა̈შიშ ლიჴჷრალ ი ოხწესე
Line of edition: 23    დინაგეზალ. ამიშ ლა̈ხედალდ ეშდჲორი თეთნე გიცა̈რ ი ჲეშდ
Line of edition: 24    თეთნე ჴა̈ნ ადჷჲესნეხ. ლა̈ხედალთე ობა̈შ მარე ხა̈წჰეხ. ტაბა̈გს
Line of edition: 25    ხასგურდახ, ეჯჟი ანჴად ხოშა გეზლა̈შ (\ მუხვბემ) ჩაჟრე ანდავ ი
Line of edition: 26    ხექე ხოშა ნაღვჟურგეზალს: "ისგუ ჯჷლყჷ მოლემ ლეთი ჩუ ლალემ".
Line of edition: 27    ათხე მანესგრე მუხვბა ვა̈რკ ლახადდა. სგა ლა̈იბ დაშნა̈ჲ ი თვეფ,
Line of edition: 28    აჩად მიჩა ჯჷლყჷა̈შ ლა̈ლჩათე. ისგლათდ ილჩა, ეჩქანღო ჩუ ლა̈ხუჟდა.
Line of edition: 29    ჰამს ანჷგან ი ეშხუ ჩა̈ჟილდ გარ ხასიდდა, ეჩჷნქა მა̈გ ჩუ
Line of edition: 30    ლოხმამა მოლა. ალი ქორთ'ანტახ ი ქანჷმბავე.

Link to spto2g
Line of edition: 31       ათხე ანჷგან მაჰრენე მუხვბე ი აჩად მიჩა ჯჷლყჷა̈შ ლა̈ლჩათე.
Line of edition: 32    ისგლათდ ილჩა, ეჩქანღო ჯჷლყჷთეისგა მოლე თეთნე ლა̈ხდუწან.
Line of edition: 33    ათხე ალ მახეღვა̈ჟდ დაშნა̈ჲ ა̈ნშგვინ. დაშნა̈ჲშ ჟი ლიშგვნალდ ხჷნსგა
Line of edition: 34    ჯჷლყჷ ეჯღა̈ჲ ჩუ ლა̈ლემ. ეჩქანღო ოხსვილე დაშნა̈ჲ ი ცერ ქათქვიც
Line of edition: 35    ი პლატუკს (\ ლა̈კვცანა̈რს) ლახჭვენ.

Link to spto2g
Line of edition: 36       მერმე ლადეღ ნაღვჟურ ქორთ'ანტახ ი მიჩა დის ხექე:

Link to spto2g
Page of edition: 31 
Line of edition: 1    -- დია, მა̈დილ ჯერი, მიშგვა დაჩვრემ სეუდ მარ ი ლამწვენ!

Link to spto2g
Line of edition: 2       -- ჩათთჷრ, ხოლა ბუშ! ისგვა ბედჟი იმჟი ოხვეჲცხვნის მიშგვა დინას?!

Link to spto2g
Line of edition: 3       მიჩა დიდ ნაღვჟურს მად ლახწვენე. ნაღვჟურ ანჴად ი უშდილ
Line of edition: 4    დინა ჟ'ანგენე ი ხეშდრალდა. ამ დრევჟი ხეწად დინას, ცერ ქა
Line of edition: 5    მექვცე ხად. ჟ'ა̈ნკიდ მიჩა პლატოკხენჟი ცერიშ ნა̈ქვიც ი დინას
Line of edition: 6    ცერს ლახზჷმე. ცერიშ ნა̈ქვცუა̈რ უშხვარ ლა̈ხტახხ. ანჴად ი დინა
Line of edition: 7    ტა̈ხდჟი ჩადკვა̈რ, მიჩა დის ხექე:

Link to spto2g
Line of edition: 8       -- ხედ ალ დინა ათკვა̈რდ ქორხენქა, მადე-ჲ მი ჯიქა̈ბი.

Link to spto2g
Line of edition: 9       -- ჩაქუც, ხოლა თრა̈ვ! -- ხექე მიჩა დიდ: -- სი იმთვა̈ჲთე ჯეკვეს,
Line of edition: 10    ეჩხავ ათთჷრ, ი მი ალის ხოჩამდ ოხურდინე.

Link to spto2g
Line of edition: 11       ათხე ჟ'ანჷგან ალ ნაღვჟურ, ანჰინგრე ფა̈რვ ჩა̈ჟ, ფა̈რვ აბგოლ
Line of edition: 12    ჟოსრეკ ჰინგირს ი აჩად. ესღრი, ესღრი, ვობა̈შ შუკვს აჩად ი გვა̈მიდ
Line of edition: 13    ახჲიდჷნ. ხეწად ჯოდია მინდორისგა ქორჷლდ ლჷგ, სგაჩად
Line of edition: 14    აშთეჲსგა ი ლოხფხჷკნე. ალ ქორხენქა ეშხუ მეჩი დადა ა̈ნსგიდდა.

Link to spto2g
Line of edition: 15       -- დადა, მა̈დილ ჯერი, მოლე ლეზვებ ჯედიხ ი ეჯი მამინ!

Link to spto2g
Line of edition: 16       -- მადმაგვეშ ნიზ, კაკჷნქა.

Link to spto2g
Line of edition: 17       -- ეჯი ლა̈იდ ხოჩა, ეჯიჲ ჩუ მაკუ.

Link to spto2g
Line of edition: 18       დადად კაკ მასა̈რდ ლახვემ. კალქა ესღჷრდა, ეჯჟი ღვეშგიმხენისგა
Line of edition: 19    ეშხუ ფა̈რვ ფეკვნულ ლა̈ხვაჭ.

Link to spto2g
Line of edition: 20       -- დადა, ალის სი ქა დო მაჩქვა̈რი!

Link to spto2g
Line of edition: 21       -- ლერსგვანთევ ჯისიპ! -- დადად ხექე.

Link to spto2g
Line of edition: 22       ჟა̈ნკიდ ალ ნაღვჟურდ ფეკვნა ი აბგილთე ესგენე. აჩად. ესღრი,
Line of edition: 23    ესღრი ი კაკ ჩოთშდახ. ეშხუ კაკ ხასიდდა, ჩაკვიშ ალი, ხჷნსგა
Line of edition: 24    ნა̈კვიშ ჩოთშყად. ჟ'ესნაკვ ამიშ ლაკადთე ი კაკა̈შ ნა̈კვიშდ ხექე:
Line of edition: 25    "მი ნჷმა ა̈მკჷდე ი შომალე ლადეღ ა̈ჯმა̈რგი." ჩაცვირ ალი ნაღვჟურდ
Line of edition: 26    ჟი უკიდად.

Link to spto2g
Line of edition: 27       ესღრ' ათღე, ესღრი, ახჲიდჷნდა ადა̈იდ. ხეწად ჯოდია მინდორს
Line of edition: 28    აშხვ ქორჷლდს, სგაჩად აშთეჲსგა ი ლოხფხჷკნე. ამეჩუ დადა
Line of edition: 29    ა̈ნსგიდდა.

Link to spto2g
Line of edition: 30       -- დადა, მა̈დილ ჯერი, მოლე ლეზვებ ჯედიხ ი ეჯი მამინ!

Link to spto2g
Line of edition: 31       -- მადმაგვეშ ნიზ, გვიჯჷნქა.

Link to spto2g
Line of edition: 32       -- ეჯი ლა̈იდ ხოჩა!

Link to spto2g
Line of edition: 33       დადა სგაჩად ქორთე ი ქორხენქა გვიჯ მასა̈რდ ოხჴიდ. ნაღვჟურდ
Line of edition: 34    მაჴვამ ხექე ი კალქა ლიზი ა̈დბინე. ღვეშგიმ ფა̈რვ ფეკნულიდ
Line of edition: 35    ლა̈ხღვაჭ.

Link to spto2g
Line of edition: 36       -- დადა, ალის სი ქა დო მაჩქვა̈რი!

Link to spto2g
Page of edition: 32 
Line of edition: 1    -- ალ ფეკნულ ლერსგვანთევ ჯისიპ! -- ხექე დადად.

Link to spto2g
Line of edition: 2       ჟ'ა̈ნკიდ ალ ფეკნულ ნაღვჟურდ ი აბგილთ'ესგენე ი აჩად. ესღრი, ესღრი
Line of edition: 3    ი ეშხუ გვიჯ გარ ესსად. ჩაკვიშ ალი, ხჷნსგა ნა̈კვიშ გიმთეჩუ
Line of edition: 4    ოთშყად. ჟ'ესნაკვ ი გვიჯიშ ნა̈კვიშდ ხექე: "მი ნჷმა ა̈მკჷდე, შომალე
Line of edition: 5    ლადეღ მოლად ა̈ჯმა̈რგი". გვიჯიშ ნა̈კვიშ ჩაცვირ ნაღვჟურდ.

Link to spto2g
Line of edition: 6       ესღრი ნაღვჟურ, ესღერი, მასა̈რდ ახჲიდჷნ. ხეწად აშხვ ქორს,
Line of edition: 7    სგაჩად აშთეჲსგა. ამეჩუ ბაბა ა̈ნსგიდდა ყორთექა. ბაბას მასა̈რდ
Line of edition: 8    ათხიდჷნ ამიშ ლიწედ. ჩაჟვ ჩახქეხნე, სგა̈თჴერნე ქორთე ი მასა̈რდ
Line of edition: 9    პა̈ტივ ხა̈ყერ. არა̈ყ ოხჴიდ, ოსგვეშ სტაქანთექა ი ქა ლახვემ. ითრე
Line of edition: 10    ალ ნაღვჟურ არა̈ყს, ეჯჟი ჟიბოვ დეცქა ქორს ხეწად. ალი მასა̈რდ
Line of edition: 11    ათჷმბაჟჷნ ი ობა̈შ ხა̈ნს ჟიბოვ ხოსგიდდა. ალი ბაბას ათჷმბაჟჷნ ი
Line of edition: 12    ლა̈ხჭვედდა:

Link to spto2g
Line of edition: 13       -- ხოჩა ნაღვჟურ! მი ერდვა̈ჲ მუშგვრი სგა მა̈ჴდა , ეჯი ჩუი
Line of edition: 14    ითრა არა̈ყს, შიშდ სტაქანს ქა მა̈ტხახ, ი სი ჰა̈რი სტაქან მა̈ზუ
Line of edition: 15    ხა̈ნჷნღო შჷნ ჯუღვა ი ქა დემ მა̈ტხე.

Link to spto2g
Line of edition: 16       ალ ნა̈ღვჟურდ ოსცა̈დ: -- მი ეშხუ ლემბა̈ჟს ხვეწდ, ალი ქა მექარ:
Line of edition: 17    მა̈ჲ ლი დეცქა ქორ ლჷგ?

Link to spto2g
Line of edition: 18       -- ამხავ ლაზს სი ნომეგ ლა̈ჰკვეჰე, მა̈დილ ჯერი, -- ხექე ბაბად,
Line of edition: 19    -- ედო ამხავ მეზი ლჷა̈რ და̈რ მეტხელი. ამეჩუ იზგე ქრისტეშ
Line of edition: 20    ლჷპრისტე.

Link to spto2g
Line of edition: 21       -- ეჯღა სი ნჷმა ანფეშე, სი ლამთონ, მჷშკდა̈რ ა̈რიხ იმეგ
Line of edition: 22    ამექა.

Link to spto2g
Line of edition: 23       ბაბად ხექე: -- მოლე შუკვს ქადრჷნე, ჲეშდ და̈ვ ხასგურხ ლა̈შკდა̈შს
Line of edition: 24    (\ ლა̈შკდა̈ს).

Link to spto2g
Line of edition: 25       ბაბა ნაღვჟურს ჟახა ლა̈ხჭვედდა. ნაღვჟურდ ოსცა̈დ: -- მი ალექსანდრე
Line of edition: 26    მაჟხა.

Link to spto2g
Line of edition: 27       ნაღვჟურ ახსგურდა ჩაჟვ ი აჩად. შუკვს ლახხვიდდა, მიჩეშშალ
Line of edition: 28    ფა̈რვ ჩაჟვ ხასგურდა ი ფა̈რვ ფეკვნილა̈რ ხეყად, ეჯ მახეღვა̈ჟ. თვით
Line of edition: 29    ვერს ქა ლოხქა̈ბხ (\ ქოლოხქა̈ბხ), ეჩქანღო ექჷრდაშემ ა̈ნსკორეხ:
Line of edition: 30    "ნა̈ჲ ეჯღა ხვაჯეშდ უშხვარ, ერე უშხვარ ხეკვეს ლოხვნაბნენედ".
Line of edition: 31    ჟ'ესჭო̈ნხ ალა̈რდ ექჷრდაშემ ი უშხვართე ანჴადხ. ხექეხ უშხვარ:
Line of edition: 32    "ნა̈ჲ ლახვბად ლა̈ლნაბნენედ უშხვარ!" ალა̈რ უშხვარ ლა̈ხნაბნანხ
Line of edition: 33    ი ხექეხ: "შომა̈ჲ ნა̈ჲ გაჭირება გვადეს, ეჩა გუდ ლაჴადდ გვიშგე
Line of edition: 34    აბგოლ ზისხშუ ოლგორშლელიხ", ი ში ი ში ლახვემხ უშხვარ ი
Line of edition: 35    ჩა̈დყურულანხ.

Link to spto2g
Line of edition: 36       ალექსანდრე სგაჩად მჷშკდა̈რთეჲსგა, "ხოჩა ლადეღ" ხექე,
Line of edition: 37    ეჯჲა̈რდი' პასუ̈ხდ "ხოჩა ლადეღ" ლახტიხხ.

Link to spto2g
Line of edition: 38       -- დეშ ახშკა̈დნედა, დეცთეჟი ჟ'ა̈თჰოლი, ეჯ კიბს?

Link to spto2g
Page of edition: 33 
Line of edition: 1    -- მა̈ჲ ირი მიზეზ, -- ხექეხ მჷშკდა̈რდ, -- მარე აშხვ ზავ ჟი
Line of edition: 2    ხვაკუდ.

Link to spto2g
Line of edition: 3       -- ეზერ. აშხვ ზავ ჟი ა̈ხკვადდ, ეჩქად მი მეჩი ბაბაშ ქორისგა
Line of edition: 4    ეჯღელნი.

Link to spto2g
Line of edition: 5       აჩად ეშხუ ზა̈ჲ ი და̈ვა̈რდ ჟ'ანშკა̈დხ კიბ. აჩად ალექსანდრე
Line of edition: 6    ლა̈შკდა̈შთეჲსგა ი კიბ ლჷშკა̈დ ესხვიდდა. ჟ'ა̈ნკიდ კიბ ი სგა ლოხვეგ
Line of edition: 7    (\ სგოლოხვეგ), დეცჟი ლჷგან, ეჯ ქორს. ბაბას ჩესცვირ მიჩა
Line of edition: 8    ჩა̈ჟ ი ფეკვნილა̈რ ჟი ლერდიდ, ჯი ჟ'აჩად კიბჟი. ჰა̈ზვა̈შ ყორჟი
Line of edition: 9    ჲეშდჲორი კჷლ ხორიკდა. ალ კჷლა̈რცახა̈ნ ხაგან: "ეშდეშხუ ლარდა
Line of edition: 10    ჩუვ ადკარე, მეეშდჲორი ნომავ ადკარე!" ანჴად ალექსანდრე, აკრე
Line of edition: 11    ლარდოლს, ეშდეშხუ ლარდა ჩუჲ ადკარე, ეჯგვა̈რ დინას ხეწად
Line of edition: 12    ამეჲსგა, ერე უშხვარიშ მალატშვ ეჩხენ-ამხენჩუ ადსიპდახ. ეჩქანღო
Line of edition: 13    ჟ'ანჷგანხ ი უშხვარ ლახსგურდახ. ობა̈შ ლირგა̈დიჷნღო ლიხეხვჭა̈შ
Line of edition: 14    ხექეხ უშხვარ. ალა̈რ ექჷრდა უშხვარიშ თანახმას ანჴადხ. დინად
Line of edition: 15    ხექე: "მი ჲორი ანგლოზ მაყა მოსიპდ. ეჯჲა̈რ ჩი ლადეღ ჲარვ მარემ
Line of edition: 16    ხა̈რჯს მიჴდეხ. სი ჩა̈თეპჟ მიშლადეღთექა. მიშლადეღ მიშგუ
Line of edition: 17    პა̈პი ქრისტე ა̈ნჴდენი ი ეჯის ლოხჭვედნი". ნაღვჟურ ჩა̈თპაჟ. მიშლადეღ
Line of edition: 18    ანჴად ქრისტე ი დინად ქა ხექე: "ოთწვილენე მო?" ქრისტედ
Line of edition: 19    ნა̈ბ ლახვემ ი ჩადგურგვინე ალექსანდრე-ჲ ალ დინა. ეჩქანღო
Line of edition: 20    ქრისტე აჩად. ალექსანდრე ჩვაჩად მეჩი მარათე ი ჟეღა̈რ ჟ'ა̈ნჴერნე.
Line of edition: 21    ამეჩუ ეზერ ხა̈ნს არდახ უშხუდ ი ალექსანდრეს მიჩა ხეხვ
Line of edition: 22    აშგურანა: -- მეეშდჲორი ყორ ნომეგ ათკარა, გვიშგე ხოლამდ გვი ედო
Line of edition: 23    ჯარ!

Link to spto2g
Line of edition: 24       აშხვ ლადეღ ალექსანდრე მიჩა ბაღთექა აჩად. ამეჩუ მოლა̈რ
Line of edition: 25    რაგდიდახ. ეშხუ ყჷლა: "მი მარა ჰა̈ბს ხვა̈ტხე", მერმე ყჷლა: "მი
Line of edition: 26    ნა̈ქვიცს უშხვარ ხვა̈ტხე". ალი ალექსანდრედ ლა̈ჲრთეჲსგა ა̈დჲირე
Line of edition: 27    ი ჯიბთ' ესდე.

Link to spto2g
Line of edition: 28       აშხვ ლადეღ ალექსანდრეშ ხეხვ ჩუ ივჟა. ანჴად ალექსანდრე,
Line of edition: 29    მეეშდჲორი ყორ ჩადკარე. ამეჲსგა ხორიკდა ვოქრა̈შ კაბ. -- ალი
Line of edition: 30    'სერ მა̈ჲ ლემყა̈ლ იროლ?! -- რექე ალექსანდრედ. სგაჩად ი კაბა̈შ
Line of edition: 31    კალთა̈ჲს ლა̈ხბჷრგან. კაბდ ეშხუ გარ ესცეცხ ყორქა. ხოსგდი ალექსანდრე
Line of edition: 32    ალ კაბს ი ალ კაბ ძუღვათეჲსგა აშყად. ჩვაბშხენ ხელწიფიშ
Line of edition: 33    მჷკჷლმახად ქა̈ნტიხხ კაბ ი სგოთჴიდხ ხელწიფხს. ათხე ალექსანდრეშ
Line of edition: 34    ხეხვი ჟ'ანაცხ ი ხექე ალექსანდრეს: "ალექსანდრე, იმნა̈რ
Line of edition: 35    ათღუპა̈ვ გვიშგვე თხვიმ, მა̈ჲ ლეზი ჯად ეჯ ლარდათეჲსგა?"
Line of edition: 36    ალექსანდრედ მადმაგვეშ მოშ ლახტიხ.

Link to spto2g
Line of edition: 37       ხელწიფხდ ანგაცხდე: -- ერდვა̈ჲ ალ კაბა̈შ მუქვემს სგა̈მჴიდე,
Line of edition: 38    ეჯის ვოქრისგა გარ ხვა̈მჩე.

Link to spto2g
Page of edition: 34 
Line of edition: 1    დადად ხექე: -- მი ლეჰჷნწა̈ლის დემის ამყიჩე, ედო ამიშ მუქვემს
Line of edition: 2    შიშდ ა̈ჯჴიდე.

Link to spto2g
Line of edition: 3       ხელწიფედ გვა̈მიდ იმედ ხექე.

Link to spto2g
Line of edition: 4       -- ჲაღო ჲორი ჭკჷტ, ეშხუ ლა̈ხნისგი სპირტ ი ალმა̈ს ქა ლამემდ!

Link to spto2g
Line of edition: 5       ხელწიფედ ალა̈რ ქა ლახვემ. დადა აჩად, სგაჩად კიბის ხუნთეჲსგა,
Line of edition: 6    ხედვა̈ჲ ალექსანდეშ ქორს ხოგან. ალექსანდრე-ჲ მიჩა
Line of edition: 7    ხეხვ კიბიშ თხუმ სგურდახ. ლოხბინე ალა̈რს ლიჴჷრალ: -- მა̈დილ
Line of edition: 8    ჯერიხ, მი ჟ'ა̈მიყედ ისგე მოსიპდ!

Link to spto2g
Line of edition: 9       ალექსანდრედ ხექე მიჩა ხახვ: -- ჟ'ა̈ლიყად (\ ჟ'ა̈ლიყედ), მოსიპდ
Line of edition: 10    ოგმა̈რგი.

Link to spto2g
Line of edition: 11       ალექსანდრეშ ხეხვ დემ იჩმუდა, მარე ალექსანდრედ ეჯღა̈ჲ
Line of edition: 12    ჟ'ა̈დიყე. ამეჩუ დადა ირბიელდა ი ლჷც ხოჴდა ალ ხეხვ-ჭა̈შს.

Link to spto2g
Line of edition: 13       აშხუნღო ლეგლირდე ლა̈ჲმიზეზე ი ჩადყურდა. აშხვ ლეთ
Line of edition: 14    ხეხვ-ჭა̈შს გუნ ახჲიდჷნხ ი ხექეხ: -- დადა, მა̈დილ ჯერი...


(არაა დამთავრებული)

(ოთარ დადეშქელიანი. მაზერი. ვ.თოფურია. 14.VIII.1955)



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.