TITUS
Svan Prose Texts II (Lower Bal)
Part No. 27
Previous part

Text: 27 
Page of edition: 27 
Line of edition: 31 
XXVII. მჷსკა̈დ


Link to spto2g
Line of edition: 32       ხენწიფხეს ხორი ეშხუ ნაღვჟურგეზალ. ალი ლი მჷლდევ. მიჩა დიდ
Line of edition: 33    ხექე ხენწიფხეს: -- ლა̈იდ დემთე ლალკვიჰედა გვიშგე გეზალს?

Link to spto2g
Line of edition: 34       ხენწიფხემ ხექე: -- ლაღვჭართე ოლთონად.

Link to spto2g
Line of edition: 35       ოთთონეხ ათხე, ლახვემხ აშირ მანა̈თ. მერმა ლადეღ ანტახ ი
Line of edition: 36    ეშხუ მარა ფეკვნა ლაკვანათე ესყა ი ხოქვა ამნა̈რ: -- ალი სი
Line of edition: 37    ნომა ათკვა̈რი ი მი ლამო ი მი ლა̈ჯცა̈დნე აშირ მანა̈თს!

Link to spto2g
Page of edition: 28 
Line of edition: 1    ეჩქას ეჯის ათხიდჷნ ი ქა ლახვემ. მა̈ხჲადა̈რ აჩად ქორთე.

Link to spto2g
Line of edition: 2       მესმა ლადეღ ნაღვჟურ აჩად მიჩა ქორთე ი მიჩა ბაბად ხექე:

Link to spto2g
Line of edition: 3       -- მა̈ჲ ახღვაჭა̈რ აშირ მანა̈თღა?

Link to spto2g
Line of edition: 4       -- მა̈ჲ-ი ამგვა̈რ ფეკნოლ ონჴუ.

Link to spto2g
Line of edition: 5       მიჩა დედეს ი ბაბას დემეგ ლოხცხონხ ალი, მარე იმ იჩმუდახ.
Line of edition: 6    ამუნღო ეჯა̈რდ აშირ მანა̈თ ქაიდ ლახვეხ. ესღრი. ამჟი
Line of edition: 7    ეშხუ მარა ცვიც ესყადდა ლაკვანათე. ალისი ამჟი ხექე, ერე: "ალ
Line of edition: 8    ცვიც მი ლამო ი აშირ მანა̈თ სი ათხა̈ჲ!" ციცვიშ ფუსდდ მა̈ხჲადა̈რ
Line of edition: 9    ლახვემ ი აშირ მანა̈თ ცვიციშ ფუსდდ ადჲე.

Link to spto2g
Line of edition: 10       მესმაშჟი ადა̈იდ ატახ ქორთე ნაღვჟურ. მიჩა ბაბად ხექეიდ:
Line of edition: 11    "ბაბაჯო, ისგუ ნაღვჭარ ლამწენ!" ათხე ამნემ ცვიც ქა ლახწენე.
Line of edition: 12    მამა ლოხცხონხ მიჩა დედეს ი ბაბას, მარე იმ იჩმუდახ.

Link to spto2g
Line of edition: 13       მესმა ლადეღ ადა̈იდ ქა ლახვემხ აშირ მანა̈თ ი ეშხუ მარე ჰერწემს
Line of edition: 14    ხაღვიჭდა ლადგა̈რის, ხექე ნაღვჟურდ: "ალის ნომ ხადგა̈რი
Line of edition: 15    ი აშირ მანა̈თს მი ჯიცა̈დი!" ათხე ამნემ აშირ მანა̈თ ქა ლოხცა̈დ
Line of edition: 16    ი ალ ჰერწემდ გიმი ჴურუჩუ აშ სხვიპ ა̈ნკიდ. ამელექვა ნაღვჟური
Line of edition: 17    ჩა̈თჭამ. გიმ ჩუქვან ალ ჰერწემ ხოჩა სიმაქდ ოლსიპელი ი
Line of edition: 18    ეშთჲსგა ლა̈ხჴედჷნ ნაღვჟურს. სიმაქდ ხექე: "სი ათხე მიშგუ დედეშ
Line of edition: 19    ი ბაბაშთე ადერ". ეჯჲა̈რ ჩი ხაჭრა̈ჟიდახ, მამაგვეშ იკვდუნე,
Line of edition: 20    ეშხუ კიბდონისგა მჷსკა̈დ ხოსდახ, ეჩჷნქა. ამიშ ლიჰვდი ეჯჲა̈რსი,
Line of edition: 21    ლახმა̈ჭინდახ, მარე იმ იჩმუდახ, ეჯღა̈ჲ ქა ლახვემხ. აჩად სიმაქთექა
Line of edition: 22    ი ხექე: -- ისგვა დედედ ი ბაბად ალი მაჩქვარეხ.

Link to spto2g
Line of edition: 23       ეჩქას სიმაქდ ხექე: -- ამიშ ლიჴმა̈რი ნიშგეშჷნქა, ჟი ედო ჲა̈ს
Line of edition: 24    ოხთონისდ, ეჯურ და̈ს ხოხალ.

Link to spto2g
Line of edition: 25       ეჩქას ნაღვჟურდ ხექე: -- მა̈დილ ჯერი, აღო ჟ'ამთონ ამიშ ლიჴმა̈რი!

Link to spto2g
Line of edition: 26       -- ლახა ემაგვეშ ჯეკვეს, ეჩქას ხაყლა̈ს, ერე "მჷსკა̈დ, ისგვა
Line of edition: 27    მუჰვდია̈შ თერაჯო, ალი მა̈ყრ!", ეჩქას სი მა̈ჲ ჯეკვდენი, ეჯის ჯეჩო
Line of edition: 28    ალ მჷსკა̈დ.

Link to spto2g
Line of edition: 29       ეჩქას ნაღვჟურდ ხექე მჷსკა̈დს: -- ისგვა მუჰვდია̈შ თერაჯო,
Line of edition: 30    მიშგუ დედეშ ი ბაბაშ ლარდათეჟი ამსკინავინ!

Link to spto2g
Line of edition: 31       ათხე ამნემ ეშხუ მინუტისგა მიჩა დედეშ ი ბაბაშ ლარდაჟი
Line of edition: 32    ესგენე ი მიჩა დედეს ი ბაბას "ხოჩა ლადეღ" ხექე. ეჩქას მიჩა
Line of edition: 33    დედედ ი ბაბად ხექეხ პასუ̈ხდ: -- მა̈დილ ჯერიხ, ლანხვიედ: ნაჲ
Line of edition: 34    მა̈ზუ ხა̈ნუნღო ჩუ მეთვფე ნარ ნიშგე გეზალ.

Link to spto2g
Line of edition: 35       ეჩქას ნაღვჟურდ ხექე: -- დეშ მჷთერდა ისგე გეზალს? მი ისგე
Line of edition: 36    გეზალ ხვი! ამჟი-ამჟი გიმ ჩუქვან ხვარდ, ეჩეჩუ ქამრაგჷნ ი ათხე გარ
Line of edition: 37    ა̈მჴედჷნ აშთეჲსგა.

Link to spto2g
Page of edition: 29 
Line of edition: 1    ეჩქას მიჩა დიდ ი ბაბად ლა̈ხედალ აჩვმინხ ი მინე სა̈ხელწიფისგა
Line of edition: 2    მარე იმგვა̈ჲ ჩარდა, მა̈გ ხა̈წჰეხ. ეჩქას ეჩეჩუ ხოშ-ხოშა ღვაჟა̈რ
Line of edition: 3    მინე-მინე ჰარკა̈რს იმბვალდახ. ეჯის ნაღვჟურ იჰვნა̈რიდა.

Link to spto2g
Line of edition: 4       აშხვ მარა ათხადდა: -- აშხვ ქვეყანაჲსგა ეშხუ ხენწიფხე-ჲ მიჩა
Line of edition: 5    ხეხვ ა̈რიხ მურყვამჟი ი ხორიხ მჷჟემ უწდუნა სიმაქ. ამგვა̈რ დემეგ
Line of edition: 6    ა̈რი დეც ჩუქვან.

Link to spto2g
Line of edition: 7       ალი ნაღვჟურს ათსჷმდა ი ხექე მიჩა მჷსკა̈დს: "ისგვა მუჰვდია̈შ
Line of edition: 8    თერაჯო, ალი ი ალ სიმქა̈შ ლარდაჟი ემგენ!" ათხ'ალ მჷსკა̈დდ ალ
Line of edition: 9    ლარდაჟი ესგენე ი სიმაქ ღვეშგიმჩუ ა̈დსიპდან ამიშ მა̈სისგშვ ი
Line of edition: 10    ხექე: "ღერმეთ ხია მა̈ჲ, ერე ალ მურყვამთეჟი მამაგვეშ ლი მეჴდე!"
Line of edition: 11    ლარდაჲსგა ადყვინეხ ი ყორა̈რ ქა̈ნკილხ. ჩვადყურდახ მა̈გ, ეჯჟი
Line of edition: 12    ალ ნაღჟურდ ხექე მიჩა მჷსკდილს: "ისგვა მუჰვდია̈შ თერაჯო,
Line of edition: 13    ალ მურყვამ ლჷძირდ ჟი ა̈ხიკდ ი მიშგვა დედეშ ი ბაბაშ ქორს
Line of edition: 14    ლახაგ ჟიქაშხენჩუ!"

Link to spto2g
Line of edition: 15       ათხე მჷსკა̈დდ ჟი ლა̈ჲკიდ ალ მურყვამ ი მიჩა დედეშ ი ბაბაშ
Line of edition: 16    ქორს ლახა̈გ ჟიქან, ჰამს სიმაქ ა̈ნსგიდდა ლაჴვრაქა ი ლიგვნ' ა̈დბინე,
Line of edition: 17    ერე: "მა̈ჲ ქა̈ჯდ ანჴიდ ალ მურყვამ ამხავ?" ათხე აშხუნღო
Line of edition: 18    ალ სიმაქ გუდ აჴად, ერე ალი ამჟი ხაყლე მიჩა მჷსკა̈დს.

Link to spto2g
Line of edition: 19       აშხვ ლეთ ჩვაყვრეხ, ამჟი ლა̈ხცადდა მიჩა ჭაშვ ი მჷსკა̈დ ქახყვიფ
Line of edition: 20    შჷხენქა ი ხექე სიმაქდ ალ მჷსკა̈დს: "მიჩა მუჰვდია̈შ თერაჯო,
Line of edition: 21    ალ ნაღვჟურ ჟი ლა̈ხიკდ ი იმგვალეგ ხოლა ტვიბისგა ათაკვრ!"
Line of edition: 22    ამნემ ჟი ლა̈ჲკიდ ი ტვიბისგა ჩვადკვა̈რ თერა̈რ ლჷხპჷრე. ათხე ამჟი
Line of edition: 23    მჷსკა̈დ სგანჴად სიმაქთეჲსგა ი ხექე სიმაქდ მჷსკა̈დს: "ისგვა მუჰვდია̈შ
Line of edition: 24    თერაჯო, ალ მურყვამ იმგვა̈ჲ ლჷგან, ეჩეჩუ ესგენ!" ამნემ ჟი
Line of edition: 25    ლა̈ჲკიდ ი იმგვა̈ჲ ლჷგან მა̈ნკუშჟი, ეჩეჩუ ესგენე (\ ესიგ).

Link to spto2g
Line of edition: 26       ნაღვჟურიშ დედე ი ბაბა ჩოლმეჩელიხ. ალ ნაღვჟურდ [ერ] ა̈ნყიდ
Line of edition: 27    ჟეღ ი ფეკვნა, ალა̈რ ხოჩამთექა მეჴდელიხ.

Link to spto2g
Line of edition: 28       აშხვ ლადეღ ცვიცვდ ხექე ჟაღვ:

Link to spto2g
Line of edition: 29       -- ვო ჟეღ! ი

Link to spto2g
Line of edition: 30       -- მა̈ჲ ლი?

Link to spto2g
Line of edition: 31       -- მა̈ჲა? ამჟი გვერდია გვიშგე ფუსდ თერა̈რ ლჷხპჷრე?

Link to spto2g
Line of edition: 32       -- აღო იმ ლიჩოდ?

Link to spto2g
Line of edition: 33       -- იმა? იმ-ი მინჴერ ი იმოლაჟი ჟი ალხერხისდ (ჲალჴერჴისგდ).

Link to spto2g
Line of edition: 34       ათხე ესღრიხ ი ათასდახ ძუღვას ი ხექე ცვიცდ: "ამექა ჟი ლა̈მფოთინ".
Line of edition: 35    ეჩქას ჟი ლა̈ჲფოთინე ცვიც ი ძუღვაქა ქადჲე. ძუღვა
Line of edition: 36    ეჩხენ ცვიცდ ხექე: "სი ამეჩუ ჩა̈თეპჟ ი მი ჰა̈დურდ შდუგვრე

Link to spto2g
Page of edition: 30 
Line of edition: 1    მათხვმის ოთჷრმინე". ათხე ჟეღ ჩაშდიღვ ი ხექე: "მიშგვა ლიჴდალდ
Line of edition: 2    სი ეჯგვა̈რ-ამგვა̈რ მა̈ჲ ლესეს, ნომეგ ა̈ხწონენე ჟიბოვ!"


Link to spto2g
Line of edition: 3       ათხე ცვიცდ შდუგვრე მათხვმი ადირმ ი ყიას ოხთილ: -- ჰედი
Line of edition: 4    შდუგვ იმგვა̈ჲ ჩარდეს, მა̈გ ჟ'ა̈ხჷნჭურ, მადე-ჲ ათხე ჯა̈ყმე!

Link to spto2g
Line of edition: 5       ათხ'ამნემ იმგვა̈ჲ შდუგვ არდა, მა̈გ ჟ'ა̈ნჷნჭურე ი ხექე, ერე: --
Line of edition: 6    ისგე ჟიქან ეშხუ სიმაქს კიბდონისგა მჷსკა̈დ ხოზ, ამიშ ლა̈ქვთართე
Line of edition: 7    ჟ'აჩადდ! -- ათხე სემი ხოჩა მუქვჩი შდუგვ ქა̈ნთიშ: -- სგა̈ჲ ჩვაკვიშდ
Line of edition: 8    კიბდონულ ი ეჩეჲსგა მჷსკა̈დ ზჷ, ეჯი ჩა̈მჴიდდ!

Link to spto2g
Line of edition: 9       ათშჷდდახ მა̈გ ი ალ მჷსკა̈დ ჩოხჴიდხ ი ქა ლახვემხ ცვიცს.
Line of edition: 10    ათხე ახაგან ცვიც ქა ქორთე, მინდორ ლექვა ანღრი, ამჟი ჟეღი
Line of edition: 11    ამეჩუ ესხვიდდა ი უშხუდ სგანჴადხ ქორთე ი ხექეხ მჷსკა̈დს: "ისგვა
Line of edition: 12    მუჰვდია̈შ თერაჯო, ისგუ ფუსდ ხოჩა შვიდებდ სგანჴჷ!" ალ მჷსკა̈დდ
Line of edition: 13    სგანჴიდ მიჩა ფუსდ ი ხოჩა ლირდე ანსყეხ.

Link to spto2g
Line of edition: 14       ვოდ ეჯჲა̈რს ლეწედ, ეჩქადუ ლა̈რიდ.


(რევაზ შამფრიანი. მაზერი. ვ.თოფურია. 15.VIII.1927)



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.