TITUS
Svan Prose Texts II (Lower Bal)
Part No. 26
Previous part

Text: 26 
Page of edition: 25 
Line of edition: 1 
ზღაპრები
Line of edition: 2 
XXVI. ლჷქა̈დ მახეღვაჟრე ლიკვჰურე


Link to spto2g
Line of edition: 3       აშხვ სოფელისგა ა̈ნთენანხ ჲორი ლჷქა̈დ მახეღვაჟა̈რ. ჩი ლაკვჰურალისგა
Line of edition: 4    მინე ლაცლას ხა̈სრახ ი ტოველდ და̈რმოშ ხოჴდენიდახ.
Line of edition: 5    ამეჟი ეჯჲა̈რ ჩუ ლა̈ჲლაქდანხ ი ლიფშვდიელ ლა̈ჲბინეხ: მინს ესერ
Line of edition: 6    ტოველდ ქოხჴედნი ნალმარგაჲსგა, ეჯკა̈ლიბ მარე ირდი იმეგა?
Line of edition: 7    ეშხუ მეჩი მარემ სოფელისგა ალ რაგა̈დ ა̈ნსიმნე. ხოლამდ ლახბაჟჷნ
Line of edition: 8    ალა̈რე ამჟი ლიფშვდიელ ი ხა̈ქვე: ალ ი ალ ა̈დგის ესერ ა̈რი ეშხუ
Line of edition: 9    მარე, ეჩავოვ აჩადხ ი მინე ლაკვჰურას ეჯი როქვ ლახთონისგ.

Link to spto2g
Line of edition: 10       ალი ა̈დდეხ გუთე ალ მახეღვაჟა̈რდ ი ახსგურდახ ჩაჟა̈რს ი აჩადხ
Line of edition: 11    ეჯ სოფელთე. ამეჩუ ლა̈ჭვდიალშვ ჟ'ა̈ნთხეხ ეჯ მარემ ქორ ი სგა
Line of edition: 12    ლა̈ხმუშგვარხ. ბაზი ეჯნემ ხოჩა სიკცხავ ხა̈ყერ ი ლა̈ხჭვედდა დემგვაშ.

Link to spto2g
Line of edition: 13       მერმა ი მესმა ლადეღ ალა̈რ არდახ ეჩეჩუ. ალ ქვეყანას მა̈ნკდ
Line of edition: 14    ხემჷნკანხ: სამ ლეთ-ლადეღ მუშგვრიდ იყდა̈ნიდახ მარა ი ლიჴედიშ
Line of edition: 15    მიზეზიშ ლიჭვდიელ შგურდ ხებჟჷნხ. სამ ლეთ-ლადეღუნღო ლახ
Line of edition: 16    მეჴედ ჩუიდ სედნიდა, ეჩქას წეს ლა̈სვ მა̈ნძელ ლა̈ხჭვედნოლ ლიჴედიშ
Line of edition: 17    მიზეზს. ალ მარე ხოჩა მარე ლა̈სვ ი ელწესდ იმვა̈ჲჟი ხემთქუნხ,
Line of edition: 18    ამჟი სამ ლეთ-ლადეღუნღო ლა̈ხჭვედდა ნაქამა̈რს ლიჴედიშ
Line of edition: 19    მიზეზს ი: -- ეგებს ესერ, ერე მიჩა სამსახურ იმოლონოშ მინეშდ
Line of edition: 20    ლეწიხ ლესეს ი ქავ ხა̈ქვეხ. ემმ' ესერ ჩუ ხემედი, თხუმ ესერ დემ
Line of edition: 21    ათმედვნისგ.

Link to spto2g
Line of edition: 22       ეჩქას ალა̈რდ ხა̈ქვეხ: -- მინე ჴევისგა მინე მეტოვალ ნალმარგაჲსგა
Line of edition: 23    და̈რმოშ ესერ ახთხენახ, ერე მინ თხუმ ჩვადკუჰურასგვხ ი
Line of edition: 24    გვის ქა̈დულჴუვასგვხ. ი ამღა ეშხუ მეჩი მარა ესერ ლოხთონა მინე
Line of edition: 25    თხუმემ ლაკვჰურა მიჩეშმჷყ ი ეჯღა ესერ ომჴედელიხ მიჩა
Line of edition: 26    ლავჟა̈შნათე

Link to spto2g
Line of edition: 27       ალ მარემ ხა̈ქვე: -- ჲერვა̈ჲ ესერ ლჷმა̈რ მიჩეშთე მუთვრი, ეჯის
Line of edition: 28    მინეშდ ოთღორვა. მიჩ ესერ მა̈ჲ ხემედი მინე ლიკვჰურე, მარე
Line of edition: 29    ლახე ამოგვ ომჴედელიხ, გუვშ ესერ ა̈ხერი, ემეგმოშ მინე ლაკვჰურას
Line of edition: 30    ჟ'ანსახთისგ მოშ.

Link to spto2g
Line of edition: 31       მერმა ლადეღ ჰამს ანჰინგრეხ ჩაჟა̈რ ალ მახეღვაჟა̈რდ ი ჯინემი
Line of edition: 32    ი აჩადხ ჯოდია შუკვს ი სგა̈თჴედჷნხ აშხვ ხოშა უდუნბური ტვიბთეჲსგა.
Line of edition: 33    ამეჩუ ალ მარე ლჷჩაჟდ სგაჩად ი ალ მახეღვაჟა̈რ ლჷჩაჟდ

Link to spto2g
Page of edition: 26 
Line of edition: 1    მადე-ჲ ჭჷშხშვი დეშ ლა̈ხჭამხ სგა. ალი ღვეშგდ ლა̈ჲსგიდდა ი ლახე
Line of edition: 2    ალა̈რ დეშ ჴედნიდახ მინოვშ, მიჩა ჩა̈ჟ ჩვათა̈ბ ი ქა ლა̈ხტახ ალა̈რს
Line of edition: 3    ი ჩიქი მინ ანჴიდ სგა ლაბჷრგშვ ი ეჩქანღო ჩაჟა̈რ ეჯჲა̈რე.
Line of edition: 4    ტვიბისგა ეშხუ ხოშა ფოქ ხად ი სგაშხენ ლა̈ლმასგვმჷყ ეშდჲორი
Line of edition: 5    ლჷმჷრყვიჯ ზამ ხაგან ჟი. ამეჩუ ალ მახეღვაჟა̈რს მოლე ჰა̈რკვ
Line of edition: 6    ლახადხ, მარე ქა დეშ ლა̈ჲთენეხ ალ მარაცახა̈ნ. ალ მარემ ჩაჟა̈რ
Line of edition: 7    ლაჩახვს ლახფიშვდ ი ჯი ხოჩა ლჷშიდბუნად ჩვესგურდა.
Line of edition: 8    ნებოზს ანჴადხ ეშდჲორი და̈ვ. თვით ბიკ აშხვხენჩუ ხა̈ცუდახ ი
Line of edition: 9    თვით ღვაშ მერმახენჩუ. ნაქამა̈რს აქა̈ნი ოხკიდხ ი ქაფა̈რ ჩვადკვა̈რხ.
Line of edition: 10    ჲერხიდ ბიკა̈რ ადფენყურეხ ი ჟ'ოსჩიდხ, ჲერხიდ ღვაშა̈რ
Line of edition: 11    ადძენძურეხ ი სგათა̈გხ ხოშა ზამთეჲსგა. ალ მახეღვაჟა̈რს მაყალშვ
Line of edition: 12    მაჯჯგუნა ოხშყადხ ი უშდილ ალ მარა ხაჭთახ აშთეჲსგა ნა̈ნჴრინიერ,
Line of edition: 13    მარე ქა დეშ ითნახ. ალ მარა აშ ხოხალდა ალა̈რე მაყალ ი
Line of edition: 14    გუჲსგა გარ ხაჩონ. სამ ლეთ-ლადეღ ამჟი არდახ ამეჩუ ი და̈ვა̈რ
Line of edition: 15    ხესკიცხავდახ. ალა̈რ უშდილ ალ მარა ამხენქა ლიზის ხაკფუნახ,
Line of edition: 16    მარე ალ მარე დემ იჩმუდა ჩიქი ლიზის.
Line of edition: 17    სამ ფანუნღო და̈ვა̈რდ ხა̈ქვეხ: -- ლიმშგვარა̈შ დრევ ესერ ქომჩედელი
Line of edition: 18    ი ათხე მინდ ესეროვი ხა̈სკიცხვეხ.

Link to spto2g
Line of edition: 19       -- მინდ ესერ მა̈ჲ ხა̈სკიცხვახ? -- ალ მარემ ხა̈ქვე: -- ჩაჟა̈რ ესერ
Line of edition: 20    ხაყახ, ეჩჷნქა მადმაგვეშ ხუღვახ ამეჩუ მინე ნა̈სკიცხუნ.

Link to spto2g
Line of edition: 21       ეჩქას და̈ვა̈რ ანჴადხ ი ეშხუ ჩა̈ჟ ჟ'ა̈ნირმხ ი ჩვა̈ზიხხ. ამჟი ხერასდ
Line of edition: 22    ლა̈ჲკვა̈რხ ი ალა̈რე ჩაჟა̈რ ქახშდიხხ ი ადა̈იდ ალა̈რე ხერას
Line of edition: 23    ანჴად, ეჩქას ალა̈რს იშგენ ლახე მადმაგვეშ ხესადხ, და̈ვა̈რ ანჴადხ
Line of edition: 24    ი აშხვ მახეღვა̈ჟს სგა ხა̈ფხეჭხ ი ჩვა̈ნდეხ ლა̈ჲსენის. გა̈ჩ ქა ლა̈ჭმინათე
Line of edition: 25    ლუსვილ ხად მჷჲსენის, ეჩქას ალ მარემ (ალა̈რე მჷნჴრინე მარემ)
Line of edition: 26    ხა̈ქვე: -- ჩოვ ესჷგან აშხვ წა̈მს. აგრა̈ჲ და̈ვა̈რ ესერ ლიხ, ედო
Line of edition: 27    მინ მინე ლეზობდ ესერ მად ომჴედელიხ, მინეშდ ჴევს ესერ ოხთონა
Line of edition: 28    მინეშთე აშხვ ამბვიშ ლა̈ცხრად.

Link to spto2g
Line of edition: 29       ეშხუ ბუღვა ესერ ლჷმა̈რდლი. სგვებნე ჭჷშხა̈რ ძუღვაშ აშხვ
Line of edition: 30    ძგიდჟი ხა̈გნენა ი ღვეშგე ჭჷშხა̈რ მერმა ძგიდჟი, ეჯზუ ლჷმა̈რ.
Line of edition: 31    ომჴედელი ვერბ, ალ ბუღვა ჟ'ოხკიდა ი ამიშ ლაზობ ხოჩა ნაკ ა̈დგის
Line of edition: 32    ხა̈თხელინა ი დემეგმოშ ოხთხა, აშხვ მეჯვეგიშ ფიკვს ეშხუ მიჭვ ჟი
Line of edition: 33    მექვცე ხარენა კა̈ცხთე, ეჩეჟიშჷნქა. ალ ფიკვიშ ვერა ჩუქვაჲსგა უჩხაჟი
Line of edition: 34    ჯვეგ ი მეჯვეგ მა̈გ სგა ხა̈სმენახ ი შომა̈ჲ მეჯვეგ დეცთე ოლსგიდნელი,
Line of edition: 35    უჩხა ესერ ჩუ მექვცე ემმა ხერი, ამ დრო̈ვს ვერბს ქა
Line of edition: 36    ლჷჴშდა̈ნ ფხჷტლა̈ნ ახშყედა ჩუ ი მეჯვეგს თეთე ათშყედა. მეჯვეგს
Line of edition: 37    თე ლოხბურგვინა ი ხოქვა მიჩა ტყუბა̈რდ: თეთ' ესერ მოლ' ათშყედა
Line of edition: 38    ი ქოვ ოხკიდხ! ეჯჲა̈რს კა̈ვა̈რშვ ვედდ გარ ოხკიდახ ფხჷტლა̈ნ

Link to spto2g
Page of edition: 27 
Line of edition: 1    თეხენქა ი გა̈ნთე ოთკვარახ. ალ ფხჷტლა̈ნჟი ეშხუ სოფელ ესზიგენა.
Line of edition: 2    ფხჷტლა̈ნს თხუმმჷყ ჯა̈რღულდ ხა̈სდა ი ეჯის მალ ახმითქვენა ი
Line of edition: 3    ლაჴშდა̈ნიჟი ლჷმსვიპნინ ფხჷტლა̈ნს ი სოფლა̈რს აშხვ ლადეღ აშხვთე
Line of edition: 4    ხარენახ ყორ-ლაჴვრა ი მერმა ლადეღ მერმათე. ხამბჟჷნხ: ალ'
Line of edition: 5    ესერ მა̈ჲ ირი ი ოთდარჯახ ჩუ ამიშ ლა̈ცხრაღა. ჩუ ლახ ოთცხირახ,
Line of edition: 6    ერე მალ ხეჩო ლაჴშდა̈ნიჟი, ოთდარჯეხ ჩუ ი მალ ჩვადგა̈რხ.
Line of edition: 7    ჟიბოვ მა̈ჲ ხად, ეჯ ლესგხენ ტუფ ქახტვიმხ ი ეჯ ხჷნსგა
Line of edition: 8    ტუფს ეჯ სოფლიშ ლეღვჟმა̈რია̈შ ხოშემ ი ხოხვრემ ჩიმიშ ფაყვ
Line of edition: 9    ქა̈ხფას. ჩუბოვ ხად, ეჯ ლესგ ჟიბჩუ დეშ ესსიპეხ ი სგა ლა̈ხსად ტუფ.

Link to spto2g
Line of edition: 10       ეჩელეჟა ეშხუ ვობელ ჯჷმილ-დაჩვირ ახასდახ ი ქა უტმურა
Line of edition: 11    მალს ხეწადხ, ეჩქას დინად ჩერი ლოხრეკ ი მალ ჟიბჩუ ესსიპე ი
Line of edition: 12    ხჷნსგა ტუფ ამნემ ახტვიმ ი მიჩა ჯჷმლადს ფაყვჲაქდ ლახზჷმე,
Line of edition: 13    მარე ისგთექა დეშ ა̈ჰიდდა. ათხე ჴევს ლიცლავალ ხარხ: ჲა̈რ
Line of edition: 14    როქ ირიხ ალა̈რისგა ხოშა: ბუღვაჲა, ვერბა, ფიკვა, ანდავა, მალა, დინაჲა,
Line of edition: 15    ა ნაღვჟურ? მარე ლაგას დეშ ხოგნახ, ჲა̈რ დო ლიხ ხოშა.

Link to spto2g
Line of edition: 16       ამიშ ლა̈ცხრათე ი ლა̈ჭვდიალთე ესერ ოხთონახ მინეშთე, ედო
Line of edition: 17    მინე ლეზობდ მადე.

Link to spto2g
Line of edition: 18       ალი ქა ხასჷმდახ, ეჩქას და̈ვა̈რდ ლა̈ჲბინეხ ლიცლაველ, ჲერს
Line of edition: 19    ჲა̈რ ხებჟჷნხ ხოშა ი ჲერს ჲა̈რ ი უშხვარ ჩუ და̈რ ხეჯრა̈ვდახ ი
Line of edition: 20    ა̈თჩჷდდახ უშხვარ ი ამჟი ლაცლავალშვ აჩადხ ტვიბ ლექვა ი ლეჲსენი
Line of edition: 21    მახეღვა̈ჟ ჩვა̈თეშდჷნხ. ალა̈რ ლა̈წვევს სგაჲ ლა̈ხთვაფხ, ალ
Line of edition: 22    მახეღვაჟა̈რ ჩვექს ეშშყადხ ალ მარა ი ხეჴჷრალდახ ამხენქა ქა
Line of edition: 23    ლიზის და̈ვრე ლიტხალდ. ალ მარემ ჩიქ'ეშხუ ა̈დიყე ტვიბხენქა, ღო
Line of edition: 24    მერმე ი ადჲე ქორთე.

Link to spto2g
Line of edition: 25       და̈ვა̈რდ უშხვარ მა̈გ ყა̈ლდ ლახგენეხ ლაცლაველჟი ი აშხუნღო
Line of edition: 26    ბაჟდ ანჴადხ, ეჩქას უშხვარ ხა̈ქვეხ: ალა̈რს ესერ მინეშდ ოთღორვახ
Line of edition: 27    ი ლეჟოვ აჩადხ, ეჯჲა̈რ ესერ ჩოვ ა̈ზიხხ ი ჩოვ ლა̈ლემხ. მარე
Line of edition: 28    ლეჟ'ანჴადხ ი ალა̈რ დემეგ ესხვიდდახ ეჩეჩუ.

Link to spto2g
Line of edition: 29       ამჟი გვა̈რიშდ ლჷქა̈დ მახეღვაჟა̈რ ადკუჰურე ეჯ მარემ.


(თენგიზ დადეშქელიანი. მაზერი. ვ.თოფურია. 14.VIII.1927)



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.