TITUS
Svan (Lashx) Texts ed. A. Oniani
Part No. 24
Previous part

Text: 11 
Page: 80 
Line: 1 
XI. ნაცარქექია̄ჲ ციგინ.


Line: 2       ალე ჯამზჷრახ ღერთემ-ი̀ ლჷმარდე̄ლი ეშხუ ნაცარქექჲაჲ. იშგენს
Line: 3    დე̄სამამ ლჷმჩომინ ი ხაბმინა ციცჳარს ლაჴანს-ი̀ ლჷმჴანინ ტჷტს.
Line: 4    ოხჴი̄დახ ეჯნარ ჲეხჳ-ი̀ ეში̄ ტჷტს ლჷმჴანინ. ოხჴი̄დახ მე̄რმე ჲეხჳ ი ეში̄
Line: 5    ტჷტს ლჷმჴანინ. ჟახჟარე̄ნახ ცუდდ ი მჷმქადჳნად ეჩა ლისე̄ლჳე ი ქო̄ხკჳარახ
Line: 6    ყო̄რქა. ლახტე̄ნა ღოშდ-ი̀ ხო̄ქჳა: "ეშხუ ქიჳუ̄ლ ლოქ ე̄სა ლახო̄მხ,
Line: 7    მახე ნაყე̄ლ ი ტჷტჷ̄ლ ი სარგისე̄ლ". ქა ლახო̄მხ ალჲარ ი ენჷნგზარჳა̄ნ
Line: 8    ნაცარქექჲა ი აჩად შუკს. აჴად ეშხუ ნიცნუნ ი̀ ეჩხენ ლექჳა დაჳ ესღრი.
Line: 9    და̄ჳემ ლახტუ̄ლე ეჩხენისა ერე ჯეჲ ლოქ ერ მუქოხს ადბუღჳი̄რნე, სი
Line: 10    ლოქ ემოშ ათბუღჳი̄რნე ამჟი. ენკიდ და̄ჳემ ხოშა მუქოხ, ლოხთჷლჷ̄რე
Line: 11    ტოტ ი ჩჳადბუღჳი̄რე მუქოხ. ენკიდ ნაცარქექჲად ტჷტ ი ჩჳადბუღჳი̄რე.
Line: 12    აჯაღ ლახტუ̄ლე და̄ჳემ, ერე ჯეჲ ლოქ ერ მუქოხს ლჷჯას ათფიშჳდნი,
Line: 13    ჯეჲ ლოქ ემოშ ათფიშჳდნი ეჲჟი. ენკიდ და̄ჳემ ხოშა მუქოხ,
Line: 14    ლოხთჷლჷ̄რე ი ლჷჯე ათფიშჳდნე. ამეჟი ენკიდ ნაცარქექჲად, ქიჳ ი ლჷჯე
Line: 15    ათწჳირჳნე. ალახ დოშ ათსერე და̄ჳემ ნაცარქექჲაჲს, ლახტუ̄ლე და̄ჳს
Line: 16    ერე ქა̄ჳ ლოქ ანჩად ლიც ქა ამხენთე ი ქა̄ჳ ლოქ ადჲე ეჩხენთე. ქა̄ნჴად
Line: 17    და̄ჳ ამხენთე̄ ი ჟი ლეჲსგურე შიყჟი̄, ოსყა ლიც ქა. ნაცარქექჲად ხე̄ქჳ
Line: 18    ერე "ჯეჲ ლოქ დეცს ხოგდური, ოდო ჯეჲ ლოქ დეშმამ აჲეს ამე ქა".
Line: 19    ჩუჳუღენ აფიშჳდ ჲაღო დეცს, და̄ჳემ ხე̄ქჳ. ეჩქა̀ ლეჲწა̄ნე ნაცარქექჲაჲდ
Line: 20    სარგის ი ჟესჴალე კი̄ნჩხ ლექჳა. ე̄ჲ ბატო, სგა̄ჳ ლოხგუდურდა
Line: 21    მახან დეცს, ოდო̀ დეშ ლოქ ჯაწრე. ჟენტიხ ამნე̄მ სარგის კი̄ნჩხხენ
Line: 22    ჟი-ი̀ ქა̄დჲე ეჩქა̀ და̄ჳემ ეჩხენთე პილთე-ი̀ ადჲე მიჩა ლარდათე და̄ჳემ.

Line: 23       სადილ ანმა̄რე და̄ჳემ, ნაცარქექჲაჲს ხე̄ქჳ ღჳინელი ლიჴდე, მარა̀
Line: 24    ამნე̄მ ხე̄ქჳ ერე "ხირკაჲჳშ ლოქ დეშ ჴჷდე̄ჲ კეცჳშ ლოქ ანჴდე". "ჲაღო
Line: 25    დიარალ ნომაჳ ედშიხა̄ნდა! ი ჯეჲ ლოქ ანჴდე ხირკაჲჳშ". ქა̄ჩად და̄ჳ-ი
Line: 26    ნაცარქექჲაჲ დიარი ლასპაჟი ჩჳენნახე დიარდ. ანჴად და̄ჳ ი ხე̄ქჳ: "იმ
Line: 27    რუ̄ნყს ლოქ ხიჩო?" იმ ლოქ იჩო ი ჴადარ ლოქ ახზიგე̄ნა ი დიარ ლოქ
Line: 28    ოსდა ათჳიათჳი-ი̀ ხოჩა ლეხე̄რი, მარა̀ ჟი̄ჳუ ლოქ ოხკიდ სერ სურუ ათჳი
Line: 29    ლოქ ლახა̄რა". ჟოხკიდ და̄ჳემ ჴადხენ ჟი დიარ-ი̀ ჩჳესსგუ̄რდახ სადილდ.
Line: 30    და̄ჳს ათა̄და ერე "ლიპუ̄ლიელუ ლოქ ახა̄დახ მინს ი მა̄ნკჳი ჯეჲუ ლოქ
Line: 31    აპუ̄ლდა", ნაცარქექჲა ჲსხე̄ქჳ. აპუ̄ლდა ნაცარქექჲაჲ, მარა̀ დეშსამა ჩომინ
Line: 32    ეჩა პუემ. აპუ̄ლდა და̄ჳ ი ნაცარქექჲაჲ ეჩა უშუ̄შდ ლიყა̄რი დი̄რალს
Line: 33    ლახჩიხნე ჟი̄ბ. და̄ჳ ლეხჭოდდა. "იმ რუ̄ნყს ხიჩო, ნაცარქექჲაჲ?" "იმ
Page: 81  Line: 1    ლოქ იჩო ი ქორა დი̄რ ლოქ ხაკუჩ შამფურდ ი ჟი ლოქ ანცო̄ლე ამეჟი
Line: 2    მიჩ-ი̀ ჟი ლოქ ატყბი ლემესჟი". ჩჳენშგიბ და̄ჳემ ფაყჳ ი ეშ ლეხქარჳა̄ნდა.
Line: 3    ნაცარქექჲაჲ ხატუ̄ლი ღოშგინისა: "იმაჳ ლოქ ოთჩედნი მიჩ,
Line: 4    იმაჳ?" ესღრი და̄ჳ ი ლახხჳი̄და მა̄ლჷ̄ლ ი ხე̄ქჳ ერე ხემა ლოქ აჯყალუ̄ნდა
Line: 5    ნაცარქექჲა̄ჲშდ, ეჯის დე̄სამა ლოქ ხა̄ჲმედა, ნინდ ლოქ გარ ხოგად.
Line: 6    სგო̄ხგუდურდა და̄ჳ მა̄ლჷ̄ლს ი ანჩადხ. ჩუ ე̄სა ადქადჳნინა, ღო ჩჳაწჷწჷ̄რე
Line: 7    მა̄ლს. ანჴადხ მინე ლაზგანუნ-ი ნაცარქექჲაჲ ლჷყა̄რჟი არი.
Line: 8    ა̄ ბატო მიჩა მა̄ლჷ̄ლ! ჯეჲ ეჯღა ხალტე̄ნა ამჟი ერე მიჩაშჳდ ოხჴი̄და
Line: 9    ყო̄რთეჟი და̄ჳ. ხაფხიჭე და̄ჳემ მა̄ლს ი ჩჳადწჷწჷ̄რე. და̄ჳემ ლეჲბინე
Line: 10    ლიქნე ი ეშ ლეხქარჳა̄ნდა. ნაცარქექჲაჲ ხატუ̄ლი ერე "იმაჯ ლოქ ოთჩედნი,
Line: 11    იმაჳ?" ნაცარქექჲაჲ ჩუ სგურ და̄ჳა ლაზგა̄ჲსა-ი̀ ლეზობ-ლეთრას
Line: 12    მიჩაჳშ იმა̄რე ი იზბი, ხა̄ლმოშ, ე̄ჲჟი. მიჩა არგლი̄შარ მაგ ეჩეჩუ
Line: 13    ანჴიდ-ი̀ ხოჩა ლირდე ედჴიდხ-ი ჯამზჷრახ ღერთემ.

Line: 14       ნესტორი ნა̄მბაჳ ლი ალ ციგინ ჯაბაშა.



Next part


This text is part of the TITUS edition of Svan (Lashx) Texts ed. A. Oniani.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.