TITUS
Svan (Lashx) Texts ed. A. Oniani
Part No. 23
Previous part

Text: 10 
Page: 76 
Line: 8 
X. გარდატყუა̄ჲ ციგინ


Line: 9       ჯამზჷრახ ღერთემ. ამეჩუ არი გარდატყუაჲ (გარდატყუაჲს
Line: 10    მერტყულჲაჲს ხაყლეხ), მა̄ჲდა̄რ ლი, დე̄სამა ხუა ლეზობო̄რა.
Line: 11    ემჩედე̄ლი სოფელთე̄-ჲ ჩხარა მეზგას ჩჳეთჲაქა̄ნ ი ჩხარა მეზგას
Line: 12    ჩჳეთკჷრზან. ანჴად აგითე ი ჩჳედჩერჳა̄ნ ეშხუ ხანსი ატახ აჯაღ-ი̀
Line: 13    ხაშგმინ მიჩა კერძალს ჩი̄ს. თჳით ჴანუ ლახწეჳნეხ ჩიემ, ათხე̀
Line: 14    ლოქ ხაწჷხ მინე თხუმ ჩი̄მიშ. ალ ნადჲა̄ნ ჴანარ მაგ ჩულალე̄მ
Line: 15    გარდატყუაჲდ. ანჴადხ გარდატყუა̄ჲ კერძალ-ი̀ ხაშგმინხ მინე
Line: 16    ჴანარ, მარა̀ გარდატყუაჲდ ხე̄ქჳ ეჯჲარს ერე მაჲ ლოქ ხა̄რა მინე
Line: 17    ლიკერძ-ლიმა̄რე, ჴანარს ქა დოშ ხაწჳანნახ მიჩ. ეჯჲარ მაგ ლოქ
Line: 18    ჩუ ლოხმამა მიჩ. აჩადხ კერძალ ი ქა იშჩი̀ჳარეხ. ანზჷზეხ ჩუ მჷრმი
Line: 19    მა̄რე̄ლ მოსმართლად ჲეშჳა̄ჲ ცახან იშჩიჳარეხ გარდატყუა̄ჲ კერძალდ
Line: 20    ი ალე ჩუ ხოხალ გარდატყუაჲს, ერე მიჩ აჲესხ, ანჩად ი სგა
Line: 21    ლე̄ჲქჳე მიჩა ჲეხჳე ლერქჳალ, ჩჳესსგუ̄რდა ი ენბინე ლინჩრე. ჲეხჳ
Line: 22    ლამჳორთე ადზჷზე. ანჴადხ ლჷზჷზ მა̄რე̄ლ ი ლახტუ̄ლეხ ქორთე
Line: 23    გარდატყუაჲს. ქორხენ ლახტიხ ერ მიჩ ლოქ მაჲ ხომჴერა, იმე̄ჲღენ ლოქ
Line: 24    არი გარდატყუაჲ. ჯეჲ ლოქ მატყს ანჩრე, ოდო̀ ეჩა̀ ლოქ მაჲ
Line: 25    ხომჴერა მიჩ. აჯაღუდ ანტახხ ი ხე̄ქჳხ ერე სი ლოქ ჯა̄რ ლეჴედ ათხე,*
Line: 26    ალახ გარდატყუაჲ ლოქ მოდ არი აგის. ადჲეხ გარდატყუაჲ მიჩა
Line: 27    ჲეხჳე ლერექჳშ ლჷრექჳ, გარდატყუა̄ჲ ჲეხჳ ხაბჟახ ი ჩუ ჯეჲ ლი
Line: 28    გარდატყუაჲ. სგა̄დჲეხ გარდატყუაჲ სემი ზითუნახაჳთე-ი̀ ჩჳადგენეხ
Line: 29    ეშჩუ ეჯჲარე მომსახურდ. არი გარდატყუაჲ ზითუნახაჳარცახან
Line: 30    ჳო̄ბა ხანს ი ლეხჭოდდა ეშხჳინ ეჯჲარს ერე "მინს ლოქ ღჳაჟმა̄რე̄მიშ
Line: 31    დე̄სამა ლოქ ხომჴერახა̄?" დე̄სამა ლოქ, ალჲარდ ხე̄ქჳხ. "ჲაღო
Line: 32    ღჳაჟმა̄რას ლოქ ერ ჴჳემ ხა̄რ, ეჯი მა̄მ ლოქ ჯიხალხა̄ მინს? "მა̄მა ლოქ
Page: 77  Line: 1    გჳიმჴერა ეჩა, დე ლოქ გჳიწჳა", ზითუნახაჳარს ათა̄დახ ი "ქა ლოქ ჳერდ
Line: 2    ხაწჳე̄ნეხ იმკალიბუ ლოქ ლე̄სეს ჴჳემ". გარდატყუაჲდ ლე̄ქჳ ერე "მიჩ
Line: 3    ლოქ ჩუ ხოხალ ეჯკალიბ ჟაგარ, ერე ჴჳემ ლოქ ახზჳებნას ზურა̄ლს
Line: 4    ი ქა ლოქ ლეწდენიდ ეჩქა". ალ გარდატყუაჲ ზურა̄ლ ხაბჟახ ალჲარს
Line: 5    მაჲ საკჳრელ ლი ეჩა, ჲეხჳე პირობჟი ხაყახ ამეჩუ. ანჩად ალ გარდატყუაჲ,
Line: 6    ახჴიდჳნე მეწხელდ, ჩჳადძიე, გულჩონჩხ ქო̄ხკიდ ი ჟი ლოხრეკე
Line: 7    ჟიხიქა, სერ ლე̄ქჳ ერე "ჲერჳაჲ ლოქ ალეს (გულჩონჩხს) ჟი
Line: 8    ლეხპერნ-ი̀ ჩჳახგილე, ეჯის ლოქ ხოჴდენი ჴჳემ". ლეხპარ ხოშა უდილ
Line: 9    ზითუნახაჳ-ი̀ დეშმა ახგილ გულჩონჩხ, ლეხპარ მე̄რმე უდილ ზითუნახაჳ-ი̀
Line: 10    დეშმა ახგილ ეჯნე̄მი̄. ლეხპარ მესმე, მარა̀ ეჯნე̄მ-ი̀ დეშმა ახგილ
Line: 11    ჩუ. ლეხპარ ათხე̀ სერ გარდატყუაჲ. დეშმა ჩომინ, დეშ ლეხი̄და
Line: 12    ჟი. ლეხპარ მე̄რმან ი ქო̄ხრეკე ცხა̄ლჷ̄ლ. ალას ცხა̄ლჷ̄ლ ქო̄ხრეკე
Line: 13    გარდატყუაჲდ, ქა̄ჩად ი ენწჳე̄ნე, ნო̄თი ლოქ ქა̄ხჴედა̄ნ მიჩ ი ლე̄ქჳ ერე
Line: 14    "ამზუმე̄ლ ლოქ ხეჴე̄დურა̄ლ მიჩ ცხა̄ლჷ̄ლ ლოქ, ერ ლოხფედა, კოჭო̄ლუ̄ლ
Line: 15    ნიშანე̄ლ ლოქ ჟი ხეთრა მიჩ ჴჳემიშ. ა̄ ბატო, აჯაღუ ლოქ
Line: 16    ლეხპარ ჲაღო,* ნო̄თი ლოქ ქო̄ჴეს ჲაღო̀. ლეხპარ მესმა̄მდ ი სგა
Line: 17    ხაფხიჭე ათხე̀ ეზარდ. ათხე̀ ლე̄ქჳ გარდატყუაჲდ ერე "ეზარდ
Line: 18    ლოქ ოხცხა ჟი, ქა ლოქ ახჴედა მაბჟა თელდ. აჯაღუ ლოქ ლეხპარ
Line: 19    ი ნო̄თი ჩუ ლოქ ახძგუბის ი ქა ლოქ ოხჴეს თელდ. ლეხპარ
Line: 20    აჯაღ ი ჩჳახძგჳიბ გულჩონჩხ. ათხე̀ ლე̄ქჳ ამნე̄მ ერე "ძღჷდ
Line: 21    ლოქ ოხცხა ათხე̀ ი ქა ლოქ ახჴედა თელდ, ეჲჟი ლოქ ლოხთი̄რა".
Line: 22    "ქე̄ხცხაპხ გირგ-ი-მურგვალდ ი ხაშგმინხ ერე ქა̄ჳ ხა წჳე̄ნე ჲაღო
Line: 23    მინს ბატო̄ლუ ლოქ. ამნე̄მ ქა ხაწჳე̄ნე ალჲარს ი ათსაკჳრელჷ̄ნხ
Line: 24    მე̄ჳარ ი ისკჳრელა̄ლხ, იმჟი ლოქ ხეკჳდი ალეს ლიჴმარი. "ლიჴმარი
Line: 25    იმჟი̄ღენ ლოქ ხეკჳდი, ეჯი ჩუ ლოქ ხოხალ მიჩ ი ქა ლოქ ხათო̄ნნე
Line: 26    ჯეჲ". ჲაღო ქა̄ჳ ხათო̄ნე, იმშა მჷღლი ლოქ ლი. ჩჳადყჳინე ეშხუ,
Line: 27    ჟანკანკაჳე ი ხაძგა̄რჲელე ბჷგი-ბჷგიდ. ათხე̀ სერ ლჷჩოშდ ხე̄ქჳ მე̄რმა
Line: 28    ლაჳდილას ერე "ამთა̄ნ ლოქ დე̄სამა ლჷმა̄რ. ჳოჲ ხიადუ̄ლ" ლოქ. სერ
Line: 29    იშგენდ ადკჳჲალჳნეხ ი ჩი̄ს ამჟი ლახსჲამჷ̄ნდახ. არი ალჲარცახან ი
Line: 30    ხეშჩჳი. სემე̄და ლაჳდილას ჩიგარ. აჩად ალ ზითუნახაჳარე მუ ი ჩჳეთჲა̄ქა̄ნ
Line: 31    მე̄რმა ხელწიფს, ჲეხჳდ ხა̄ჳდი მიჩა ასუშ-ზითუნახაჳს. ანზჷზე
Line: 32    ლეჩი̄ჟჷ̄რი ხენწიფდ კუტალ. "ჲერჳა̄ჲ ალ კუტალთე̄ჲსა ეჲჟი ლოქ
Line: 33    სგე̄სსე̄ნი, ერე ქა̄მენჩუ ეშხუ კჳიფხი̄ლ ლოქ დო̄სა აბჷ̄დეს, ეჯი ლოქ
Line: 34    გარ ხაკუ მიჩ ჲეხჳდ". ლე̀ჲხელე კუტალ ხოშა ჳუდილდ ი მაგ ქა̄მენჩუ
Page: 78  Line: 1    ანბიბ, ეშხუ კჳიფხ დეშსა ადზჷზე სგა კუტალთე̄ჲსა, ალახ ნაჩოშ
Line: 2    ლას. მე̄რმა̄მდი̄ ამჟი ჩომინ ი მესმა̄მდი̄. სერ მაჲ ლოქ ჩომნახ
Line: 3    ხენწიფი ცჳერას, იმთე ლოქ ოთჩეხ მინ. ჲაღო ხჳაჲ ხან ლოქ ხა̄რ
Line: 4    ღჳაჟმა̄რაულ ამეჩუ გარდატყუა̄ჲ ჲეხჳს ი ეჩისუ ლოქ ღენ ლოხხელეხ
Line: 5    ჲაღო ალ კუტალ, ნოთი ლოქ სგაჩეს, ჲედ მაჲ ლოქ ჩომნას.
Line: 6    "ლოლხელედ ლოქ ი ნოთი მორჭმილდ ესსე̄რდეს სგა, ხჳაჲ ხან ლოქ
Line: 7    ხარ, ამეჩუ ღჳაჟ-მა̄რაცახან ნარდჳ ლოქ მა̄ლი". ლოხხელეხ კუტალ ი
Line: 8    ეჲჟი მორჭმილჲანდ ლამაზო̄ლდ სგე̄სსე̄რდა ერე კჳიფხი̄ლ მა̄ მეშყედ
Line: 9    ქა̄მენჩუ ი ოთზჷზეხ ხენწიფს ალ გოში კუტალ. ეჯ ხენწიფს
Line: 10    მე̄ჳარ ათხი̄დჷ̄ნ, ალახ ჩუ უბი̄ბად ანგოშლე მიჩა ლეჲხუ̄რიდ კუტალ,
Line: 11    სერ ჩუ ხაკუ ალე ჲეხჳდ. ანჴადხ ზითუნახაჳი ლაჲესთე ი ოსყახ
Line: 12    გარდატყუაჲ ზითუნახაჳი მჷ̄ქაფ. ჩი̄ჟა ხენწიფს ხონჴრი ცახანჩუ ხოჩა
Line: 13    ლელატ ბლუჳ ჲეხჳე ლაჲესჟი. ბლუჳდ ლახსინჯჳე ხელწიფი ლეჲხუ̄რი
Line: 14    გარდატყუაჲს. გარდატყუაჲდ ლა̄ზჟი ჟენშგიბ კინკხენჟი ჴჳემ, ჩჳესდე
Line: 15    გაკ უნგირი კოტოტჟი, ხაჴიდ მჷბრიქ ჴჳემ ი ჩჳაკჳიშ გაკ. ალეს ერ
Line: 16    ხეწად ბლუჳ ქა̄ჩად, მიჩა ხენწიფიშთე, ლახა̄გა̄ნ სგობინისა ი ხეჩო,
Line: 17    ხაწჳე̄ნე მეჴერს ი ტოტს, "ამზუმ ლოქ ხა̄რ ისგჳა ჲეხჳს". ხენწიფს მიჩა
Line: 18    ჲეხჳე მორჲალა̄ლ ხაბჟა ალ ბლუჳ ი ჩჳადმჷდრაჴე ბლუჳუ̄ლ. აჯაღ
Line: 19    ესღრიხ შუკჟი-ი̀ ხა̄ლ ლახსინჯჳე გარდატყუაჲს აჯაღუდ, ეჲჟი ჩომინ
Line: 20    გარდატყუაჲდ, ბლუჳუ̄ლდ ქაუდ ხაბჟი̄ნე ტოტარშჳ ხენწიფს, მარა̀
Line: 21    ჩუჳუდ ადმადრაჴეხ ი სერ მა̄მა ჩომინ თე ეჩხა̄ჳ ბლუჳუ̄ლდ. აჩადხ-ადჴადხ
Line: 22    ეჩე-ი̀ სგალე̄ჲგჳირგჳნე გარდატყუაჲ, მარა̀ ეჯ ლე̄თ ხაშგმინ დაჲს, მიჩა
Line: 23    თხუმ ბა̄ზი ქაჳ ხაპატიჳე მიჩ ი ქა ხაპატიჳეხ. ჩჳადყუ̄რდა დაჲცახან ეჯ
Line: 24    ლე̄თ გარდატყუა-ი̀ ხეშჩუდა ეჯ ლე̄თ დაჲს. მე̄რმა ლე̄თ ხეკჳეს ლახყჳინე̄ნ
Line: 25    მიჩა ჭაშ ხენწიფ, მარა̀ ეჯ ლე̄თ მიჩა დიმთილს ლეხჴჷ̄რა̄ნ, "ბა̄ზი ლოქ
Line: 26    ქა მიპატიჳ ჭაშცახან ლიყჳნეხენ". ქა იპატიჳე დიმთილდ ი სგალე̄ჲყჳინე
Line: 27    მიჩაცახან. ეჯ ლე̄თ ხეშჩუდა დიმთილს ლირჳა̄ლნუნ გარდატყუაჲ.
Line: 28    მესმა ლე̄თ ეში̄ სგა ლეყჳნე ხა̄და ჭაშდ, მარა̀ მა̄ნკჳი ჯეჲ ადყუ̄რდა
Line: 29    ლაყჳრა̄ჲსა. ბა̄ზი სერ და̄რ ხაყა სგა ლჷჴჷ̄რა̄ლ ი ქა მჷპატიჳე ჭაში
Line: 30    ლიყჳნეხენქა. სგა ლოხყუ̄რდა ჭაშ, მარა̀ გარდატყუაჲდ ხე̄ქჳ ერე "ტანი
Line: 31    ტანდ ლიყჳნე ამჟი სი ლოქ ერ ხამურჯი̄ხი, მა̄ ლოქ ლი გუშგჳე წეს
Line: 32    გჳარობშ. გჳარდ ლოქ მა̄დ ოგგად ამჟი ტანი ტანდ ლიყჳნა̄ლ ნაჲ,
Line: 33    მი̄ ლოქ დეშ ხჳიჩო". "ჲაღო იმჟი" ლოქ? "იმჟი ლოქ-ი̀ ისგჳა̄ჲ მიშგჳა
Line: 34    ნე̄სგა ფიცარ ლოქ ახკაჩ, ეჯი ნე̄სგაქა ქამეფტე ლოქ ხეკჳეს ლე̄სეს
Page: 79  Line: 1    ჴჳემი ლაქჳჭენ". ითხე ხენწიფდ ფიცარ, ქა̄ფიტ ნე̄სგაქა, ქა̄დყიე ჴჳემ ი
Line: 2    ხამურჯი ეჲჟი ლიშჩჳჲელს, მარა̀ სგა ხაფხიჭე გარდატყუაჲდ ჴჳემს,
Line: 3    ქა̄ნგჷძნე ჩიქე მიჩა̄შთე ნაღალდ, ეჩჷნღო ჟი ლო̄ხკოშდე ჟიბოჳ-ი̀
Line: 4    სგა ლახშკა̄დე ლუსმანშჳ ფიცარს ჴჳემ. გარდატყუაჲდ ქა̄ნსკინე ი აჩად.
Line: 5    ქორს მერდა̄ლა იღლიხ-იღლიხ ი და̄რ ანჴად ქა სადგომხენქა. სგა̄ჩადხ
Line: 6    ლაწედთე-ი̀ სგა ხაშკა̄და ჴჳემშჳ ხენწიფ ფიცარს ლჷდგარ. ემჩედე̄ლი
Line: 7    ალ ხენწიფი მუ-ი̀ ოთზჷზა ქაღალთ ეჯ ხენწიფიშთე, ხედნე̄მი̄ სგა
Line: 8    ლახღორჳე ზითუნახაჳი მჷქაფდ ალჲარს გარდატყუაჲ. ათხე̀ გარ აჴადხ
Line: 9    გუდ ერე ლჷღროჳე ლასხ გარდატყუაჲხენქა. ქაღალთისა ხე̄ჲრა̄ნ
Line: 10    ერე ხემა ლოქ ოთღორჳა მინეშჳდ ი ხემა ლოქ ოსდა მინე წორ,
Line: 11    ზითუნახაჳი მჷქაფ გარდატყუაჲ ხემა ლოქ ლოხღორჳახ. ამხენისა
Line: 12    ლახტიხხ ამბაჳ ქაღალდშჳ ერე მინეშდ ლოქ ხოდრა გჳეშ ხოყრა
Line: 13    გარდატყუაჲს. სემი ზითუნახაჳ ლოქ მაგ ჩოთჩოშა̄ლა ი ჩოთღა̄ნჳა̄ლა
Line: 14    მაგ. დეშმა ხაყერხ სერ ზითუნახაჳარე მუს, წორს ერ ხეშგმჷდახ ეჩა.
Line: 15    აჩად ალ ხენწიფ ზითუნახაჳარე მუ ი ჩჲაგ სგა ღჷრი საყდართე ი
Line: 16    ხეჴჷ̄რა̄ლ ღე̄რბათს ერე გარდატყუაჲსუ ათთხანე სგა იმჳა̄ლე ი ხეთხე̄ლი
Line: 17    გარდატყუაჲს. მიჩა ლითხე̄ლი ჟენმეჴრე გარდატყუაჲდ ი ანჩად ი სგა̄ჩად
Line: 18    საყდართე, ღო ტრაბეზთე ეჯი ჩუ ხოხალ, ერე საყდრალისა ხეთხე̄ლი
Line: 19    ეჯ ხენწიფ მიჩ. ლეხჴე̄დუნა̄ნ ეჯ საყდართეჲსა ხენწიფს იმეჲ გარდატყუაჲ
Line: 20    არი. ხეჴჷ̄რა̄ლ ღე̄რბათს ხენწიფ: ღე̄რბეთ, სგაუ ათთხანე ეჯ გარდატყუაჲს
Line: 21    ი მადილ ლოქ ხე̄რი. "ღო მაჲ ლოქ ხა̄რ მიჩ გარდატყუაჲ,
Line: 22    ლახტიხ ღერთა მჷქაფ გარდატყუაჲდ. მაჲ ლოქ ხა̄რ-ი̀ ამჟი, ამჟი
Line: 23    ლოქ ოთღორჳა მიჩაშჳდ ეჯის ი ჩუ ლოქ ადგარი, მარა̀ სგა̄ნ ლახტუ̄ლე
Line: 24    ტრაბეზხენ გარდატყუაჲდ ერე ფხულო̄ლ ლოქ ნო̄სავ ლახფედე ეჯის,
Line: 25    ოდო̀ შიშდ ქუნს ლოქ ოხქჳიცე მიჩ, ჩუჳ ლოქ ესდე ამეჩუ პირობ
Line: 26    ერე დო̄სამა ლოქ ოხრჷკის გარდატყუაჲს ი მაჩე̄ნე გეზალ სგა̄ჳ
Line: 27    ლოხგჳირჳნე, ოდო ჯიქჳცე ლოქ ქუნს, ჯეჲ ლოქ ღე̄რბეთ ლი. ხენწიფს
Line: 28    გაცხაჲდ ღე̄რბეთ ლეხბაჟა̄ნ ი ჩჳესდე ეჩა პირობ. ქა̄ნჴად ხენწიფ ი
Line: 29    ესღრი შუკს. გარდატყუაჲდ ქანსკინე საყდარხენქა ი გა̄ნ ლოხქჳიც შუკს-ი̀
Line: 30    სგა ლახხჳი̄და სგობინისა ხენწიფს. "ჲარ ლოქ ლი ჯეჲ?" "ჯეჲ ლოქ ლი
Line: 31    გარდატყუაჲ". "ა̄ მიჩა მაზიგუ ლახჴედა, მიჩ ლოქ ხეთხე̄ლ-ი̀ ანჩადუ
Line: 32    მიჩაცახან აგითე!" ადჲე აგითე ი სგა ლოხგჳირგჳნე მაჩე̄ნე ხოხრა უდილ
Line: 33    ჲეხჳდ. მიჩა სახენწიფ ჩოთტკიცე ეჯის-ი̀ ჯამზჷრახ ღერთემ მაგ ხოჩა.

Line: 34       ალ ცჷგინ ანა̄მბჳე თაფუდ ჯაბაშა.



Next part


This text is part of the TITUS edition of Svan (Lashx) Texts ed. A. Oniani.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.