TITUS
Svan (Lashx) Texts ed. A. Oniani
Part No. 22
Previous part

Text: 9 
Page: 68 
Line: 11 
IX. ბელხანჯარი ციგინ.



Line: 12       კე̄სარს დე ჲეხჳ ეთღა̄ნჳა̄ნ ი დე ჩა̄ჟ ეთჲაშთქა̄ნ. ათა̄და ლჷმჯა̄რჳად
Line: 13    ერე მიშგჳა ღე̄რბათს ლოქ ხჳადგარი ჩუ. ენკიდ ბერჟა კეტ-ი̀
Line: 14    ეშ ლეხქარჳა̄ნ მიჩა ღერდა ლათხე̄ლთე ი ღო ჟი ემოშ ითხე̄ლდა,
Line: 15    ჩჳადგარდა კეტჳშ. სგობინ ლახხჳი̄და ჯგჷრა̄გ. ამთე ესღრი ლოქ კე̄სარ.
Line: 16    იმთე ლოქ ესღჳრი̄ მიშგჳა ღერთა ლათხე̄ლითე, ჟი ლოქ ემოშ
Line: 17    ოხთხე̄ლნე, ჩუ ლოქ ოდგარნე. ჯგრა̄გდ ხე̄ქჳ ერე მი ლოქ ხჳი ჲაღო
Line: 18    ისგჳი ღე̄რბეთ. ოხქჲო̄ლე კე̄სარდ კეტ, მარა̀ დეშმა ხაჴიდ. ეჩქა̀
Line: 19    ჯგჷრა̄გდ ხე̄ქჳა ღჷრდ ლოქ აგითე ი ჲეხჳი̄ ღა̄ნაჳ-ი̀ ჩა̄ჟი̄ აშთქე
Line: 20    ი̄რი. ბობშს ლოქ ბელხანჯარ ესჟახედ ი ჩა̄ჟს შაჳჩიტ ი ჳოდ
Line: 21    ბობშდ ჩა̄ჟი მიჩაჳშ ლიფშჳდეჲ ლილსგურა̄ლ დო ლეჲმბეცჳას,
Line: 22    ეჩქა̀დ ნო̄რდ ლოქ ანფუშდად. ანტახ კესარ აგითე-ი̀ ჲეხჳი̄ ღა̄ნაჳ
Line: 23    ესხჳი̄და ი ჩა̄ჟი̄ აშთქე ლას. ახრაგჷ̄ნ ხან ი ჲეხჳემ კე̄სრიშ ქა̄ნთაჳე
Line: 24    ბობშ, ჟესჟახეხ ბელხანჯარ. ჩა̄ჟემ ანთაჳე სა̄ბელ ი ჟესჟახეხ შაჳჩიტ.
Line: 25    ლახრა̄გჷ̄ნ ჳობა ხან-ი-ჟამ ი ბობშემ ბელხანჯარდ ჟილეჲნბეცჳე ჩა̄ჟი
Line: 26    ლიჴმარი. სგა̄ჩად მაჩუ̄ბთე, ხეწად ხოჩა ჩა̄ჟს ი ხოჩა დაშნაჲ ჟიხორაკ.
Line: 27    ბელხანჯარი მუე კე̄სრი ლახჳისა ხამთქჳე̄ნა მაჲღენ ნადირ.
Line: 28    ლჷმა̄ზნ კე̄სარ მიჩა ჯარშჳ ეჯ ნადირი ლადგარდ, მარა̀ ნადირ ჩი̄ს
Line: 29    ჟი ლუმხჳიტინ ი დეშერს მა ხოყრა ეჩაშჳდ. ეშხჳინ წყაროჟი ზურა̄ლაშდ
Line: 30    ბელხანჯარს ლიც მა̄დ ოთნება ლეკედდ, ეჩქა̀ ეჯ ზურა̄ლს ხო̄ქჳა,
Line: 31    სი ლოქ ე ამთან მა̄რე ხი, ისგჳა მუე ლახჳისა ლოქ ერ ნადირ
Line: 32    ხამთქჳა, ეჯი ლოქ ადაგრ. ბელხანჯარდ ჟესჭო̄ნე შიშდ აგითე ი
Page: 69  Line: 1    მიჩა დის ი მუს ლახა̄და ლაცჳა̄ლს. აშიშდ ლოქ ხექჳხ, მაჲღენა მინე
Line: 2    ლახჳისა ხამთქჳა ნადირ. აჩად ნადირი ლათხე̄ლიდ ლახჳთე, ჟეთლაკა̄ნ
Line: 3    ი ჩჳადგარ ნადირ. ერ ატფუ̄რდა ნადირს, ენკიდ მიჩა დაშნაჲ ი
Line: 4    ეჩეჟი ხეწად ზურა̄ლა ნახატს. ჩჳესგუ̄რდა-ი̀ ლიგჳნი ედბინე. ჯეჲ
Line: 5    ლოქ ამშა უთხე̄ლად დეშ იგნი, ჲედ დაგრა ჲედ ამშა ლითხე̄ლი,
Line: 6    ესლაღდე მიჩა გუ̄ისა, მარა̀ დო̄უ ლოქ ლჷდგარ ე̄სა ლესეს ი ამშა
Line: 7    ღედ ხა̄და. ჩუ სგუ̄რდა ი გჳა̄ნდა. იშგენს ხოხა̄ლდახ ერე ეჯ ნადირ
Line: 8    დეშ ლოქ მჷრჷ̄ს ადგარ ი ამღა ლოქ მჷრე̄ს იგჳნი. ეშხუ ლე̄თ
Line: 9    ესგენეხ მუჳნარი, იმნარიღენ ლოქ იგჳნუდეს. ჟი ერ ენკიდ ბელხანჯარდ
Line: 10    დაშნა̄ჲ ნახატ ლაწედდ ი ლეგჳნიდ, ეჩქა̀ ქახეწად მუჳნარი
Line: 11    დაშნაჲჟი ზურა̄ლა ნახატს-ი̀ ეჯი̄ ჩჳანშყად დე̄ფანხენჩუ. ეჩქა̀ სერ
Line: 12    ჟენმეჴრე მიჩა მუ კე̄სარდ, იმნარი̄ ღენ იგნუდა ბელხანჯარ მეჲად.
Line: 13    კე̄სარდ ხე̄ქჳ მიჩა გეზალ ბელხანჯარს ერე ეჩა ლათხე̄ლიდ მიჩი̄ ლოქ
Line: 14    ხჳა̄ჲდინ ხო̄ზნა, მარა̀ დეშ ლოქ ხოთხა, ეჯის ლოქ და̄ჳარ ხაცხიპ
Line: 15    გირგტანდ ი ჲესჳა̄ჲ ლოქ ქა ხეწდენიხ, ბეჩდ ლოქ ასპეხ. აჩადუ
Line: 16    ლოქ ი ემოშ მამ იჩო, ეზარ, დო̄რიღო̄ჲ მიჩი̄ ლოქ ჩჳადგარნეხ ი
Line: 17    ეჯი ლოქ ი̄რი. ჟი ლახსგუ̄რდა ბელხანჯარ მიჩა ჩა̄ჟს-ი აჩად მიჩა გუე
Line: 18    ლეჲხური̄ ლათხე̄ლითე. ჳო̄ბა ხანუნღო ლა̄ზჟი შუკჳდ ეღლაკა̄ნდა გიმე
Line: 19    ხელწიფს. გიმე ხელწიფ ხატსჷდ გიმს მათრახს ერე ხოჩა ლეზობ ი
Line: 20    ნამშაჳ ი ბალახუ ლოქ ანჴიდ გიმდ. ბელხანჯარდ ხე̄ქჳ გიმე ხელწიფს:
Line: 21    ნატჲელ ლოქ ა̄ქჳა, გიმსი ლოქ ხაგა̄ზდილე, ამჷნ ხოჩა ლიმა̄რ
Line: 22    მაჲ ლოქ ხაკუ სერ. გიმე ხელწიფდ ლახტიხ ერე ხოჩა მარე
Line: 23    ბელხანჯარ ლოქ ლი, იშგენ ლოქ და̄რ. ბელხანჯარდ ხე̄ქჳ ერე
Line: 24    "მი ლოქ ხჳი ბელხანჯარ ი აღერ ლოქ მიშგჳაცახან. ჟი ლეჲთქებნე
Line: 25    მიჩა ჩა̄ჟჟი-ი აჩადხ. ესზელა̄ლეხ ჳობა ხან-ი-ჟამს ი ეთლაკა̄ნდახ ძუღჳა̄
Line: 26    ხელწიფს. ხატსჷდა მადრახს ძუღჳას, კალხმარს ხეცჳა̄ლდა, ნომა̄ჳ
Line: 27    ლოქ იცხუ̄ლიელხ ხოლა̄მდ. ბელხანჯარდ ხე̄ქჳ ერე ნატიელ ლოქ
Line: 28    ჯა̄ქჳა, ძუღჳა̄ მახჳში ლოქ ხი ი ხოჩა ლიმა̄რი̄ აშ ლოქ ხაკუჩ. ძუღჳა̄
Line: 29    ხელწიფდ ხე̄ქჳ ერე ნატიელ ლოქ ბელხანჯარს ხა̄ქჳა, ხოჩა
Line: 30    მა̄რე ეჯი გარ ლოქ ლი. ჲაღო ბელხანჯარ მი ლოქ ხჳი, ჟი
Line: 31    ლოქ ლემთქებნენ ჩა̄ჟჟი-ი̀ აღერ ლოქ მიშგჳაცახან. ჟი ლეჲთქებნე-ი̀
Line: 32    ადჲე. ესზელა̄ლეხ აჯაღ ჳობა ხანს ი ეთლაკა̄ნდახ დეცე ხელწიფს.
Line: 33    ანტყჳსგარს ხეცჳა̄ლდა ერე დეც ჟი ნომაჳ ლოქ იცხუ̄ლჲელხ ხოლა̄მდ.
Line: 34    ბელხანჯარდ ნატიელ ლახშიდ დეცე ხელწიფს, მარა̀ ეჯნემ
Page: 70  Line: 1    ხე̄ქჳ ერე ნატჲელ ლოქ ბელხანჯარს ხა̄ქჳა ი ხოჩა̄ჲ ეჯი გარ
Line: 2    ლოქ ლი. ჲაღო̀ ბელხანჯარ მი ლოქ ხჳი, ჟი ლოქ ლემთქებნენ
Line: 3    ჩა̄ჟჟი-ი̀ აღერ ლოქ მიშგჳაცახან, ჟი ლეჲთქებნე ჩა̄ჟჟი დეცე
Line: 4    ხელწიფ ი ადჲე მიჩაცახან. ჳობა ხანჷნღო ლა̄ზჟი ბელხანჯარდ ესწჳე̄ნე
Line: 5    და̄ჳა სასახ ძღჷდ ჯო̄დჲათე ი ეჩაჳ ესწჳე̄ნე ზითუნახაჳი̄, ეჯი
Line: 6    ლოხხა̄ლდა მიჩა დაშნაჲჟი̄ნა ნახატ ი მიჩა ლეჲხუ̄რი. ჟენკიდ დაშნაჲ,
Line: 7    ლახსინჯჳე ეჯის, მა̄რა ალ ზითუნახაჳ დეშ ხაჯო̄ნ ეჯის ი დემოშ ლას
Line: 8    ეჩთა̄ნ. აჴადხ სასახნუნ, მარა ამეჩუ ზითუნახაჳდ ხე̄ქჳ: არიქა თხუმსუ
Line: 9    ლოქ ხოწა̄დახ, ოდო და̄ჳაშ ლოქ ლი ალ სასახ-ი̀ ერ ლოქ ენმეჴრი
Line: 10    ისგჳე ლიჴედს, შიშდ ჟი ლოქ აჲხჳტეხ. ბელხანჯარს ათა̄და ერე
Line: 11    ეჩაშჳდ ლოქ მა̄მ ხაყლუ̄ნი მიჩ-ი̀ სგა̄ჩადხ სასახთე. და̄ჳა ლიჴდა̄ლე
Line: 12    დროჲჟი ბუქდ ანყირ. ზითუნახაჳდ ხაბჟი̄ნე ერე ათხე̀ ლოქ ანღრი
Line: 13    და̄ჳ. და̄ჳი̄ ანჴად ყო̄რალთექა, ჩა̄ჟ ხებგა̄ლ სგა ლი̄ზის, იმ ლოქ
Line: 14    ხიბგა̄ლ, ისგჳი ლირდეღჳარა, ბელხანჯარ დო̄სა ლოქ ოგხჳი̄დეს
Line: 15    ამეჩუ. ჳო̄, ბელხანჯარ ლოქ არი ამეჩუ, ჩა̄ჟემ ხე̄ქჳ. "ღო მაჲ? ხეჳს
Line: 16    ლოქ ხე̄რი ამეჩუ." სგა̄ჲ აჩად და̄ჳ-ი̀ სგა̄ჲ ხეძგარხ უშხჳა̄რ ბელხანჯარ
Line: 17    ი და̄ჳ. ჩჳენნახე ბელხანჯარდ და̄ჳ-ი̀ ჩუ̄ჲ ადგარ. ეჩა ჲეხჳ ზითუნახაჳ
Line: 18    ჟი ლეჲსგურე ჩა̄ჟჟი-ი̀ ანჲე. აჯაღუდ ესწჳე̄ნე ჯოდჲათე და̄ჳა
Line: 19    სასახ ი ალე ხოხალ ეშიეში̄ მიჩა ლეთხე̄ლი ზითუნახაჳი სასახ. ენკიდ
Line: 20    ჟი დაშნაჲ, მარა̀ ალე̄ჲ მა̄მა ხაჯო̄ნდა მიჩა ლეჲხუ̄რი ზითუნახაჳს.
Line: 21    აჴადხ ეჩაუ̀ნ. ეჩხენ ლახტუ̄ლეხ ერე ამექა ნეპო̄ლსი̄ დე̄მ ლოქ
Line: 22    აპე̄ნე ამეჩუ̄ნა ფუსდ და̄ჳ ი ხოწა̄დად ლოქ თხუმს, ოდო დეშ ლოქ
Line: 23    ლი წყჷლჲანდ ისგჳე გჳეშ ლადი̄შ. ბელხანჯარს ათა̄და ერე "ეჯნარ
Line: 24    ლოქ მა̄მ ხაყლუ̄ნი მიჩ". სგა̄ჩადხ სასახთე̄ჲსა. ნებჳზა პილდი̄ ანყირ-ი̀
Line: 25    და̄ჳა ჳოშჲორდი̄ ანყირ. ქახაბჟი̄ნე ზითუნახაჳდ ბელხანჯარს და̄ჳა
Line: 26    ლიჴედ. ყო̄რალთეჟი ერ ანჴად და̄ჳ, ჩა̄ჟემ ლიბგა̄ლ ედბინე, ხამჭირ
Line: 27    სგა ლი̄ზი სასახთე. და̄ჳემ ხე̄ქჳ ჩა̄ჟს ერე მიჩა ლირდეღჳარა ამეჩუ
Line: 28    ბელხანჯარ ლოქ დო̄სა ოსხჳი̄დეხ. მა̄ჲღენ ლოქ ხამჭირ სგა
Line: 29    ლი̄ზი. "ჳო̄, ბელხანჯარ ლოქ არი ამეჩუ", ჩა̄ჟემ ხე̄ქჳ. ჩა̄ჟიშდ და̄ჳს
Line: 30    ეშხჳხენ ბიკ ხო̄ცუდა ი მე̄რმახენ ნათხჳჲარე, სგა̄ჩადხ სგა̄ნთე სასახთე.
Line: 31    ეჩე ესხჳი̄დახ ბელხანჯარი, სგა̄ჲ ხეძგარხ უშხჳა̄რ, მარა̀ ჩჳენნახე
Line: 32    ბელხანჯარდ და̄ჳ ი ჩუ̄ჲ ადგარ. ეჩა თხუმე თჳელ ჟენკიდ, სგე̄სჭო̄ნე
Line: 33    ურიბთე ი სგე̄სდე ჯიბაჲთე. ჟი ლეჲთქებნე ალ და̄ჳა ზითუნახაჳი̄,
Line: 34    ლახსგუ̄რდა მიჩა ჩა̄ჟს-ი̀ აჩადხ მიჩა ზითუნახაჳი ლათხე̄ლითე. ათხე̀
Page: 71  Line: 1    ჳოხუშდ ხოთქბჷნა ჩა̄ჟდ, სემი ხენწფარ-ი̀ ჲერუ ზითუნახაჳარ. აჯაღ
Line: 2    ესწჳე̄ნეხ ლა̄ზჟი მესმე და̄ჳა სასახ. ამე̄ჲსა̄ჲ ხეყე̄და და̄ჳს ხოჩა
Line: 3    ზითუნახაჳ ი ალე ხაბჟა ბელხანჯარს ეშჲეში̄ მიჩა ლეჲხუ̄რი, მარა̀
Line: 4    ჟი ერ ენკიდ დაშნაჲ ი ლახსინჯჳე ნახატს, ალ ზითუნახაჳ დეშ ლას
Line: 5    ეჩთა̄ნ თჳალაშ. ალ ზითუნახაჳდ ხე̄ქჳ ალჲარს ერე არიქა თხუმსუ
Line: 6    ხოწა̄დახ, ოდო ლეგდ ლოქ ლი მინე გჳეშ. ამექა ბუზუ̄ლი ლი̄ზისი̄
Line: 7    ჟი ლოქ იმჴერი ამეჩუ̄ნა ფუსდ და̄ჳ ი ჟი ლოქ აჲხჳტეხ, მარა̀
Line: 8    ბელხანჯარს მა̄მა ხაყლუ̄ნდა ეჩაშჳდ-ი̀ სგა̄ჩადხ სასახთე̄ჲსა. ჯეჲ
Line: 9    ჩჳესსგუ̄რდა და̄ჳა ლასგჳრა ჳოქრე ბეჩჟი, მიჩა აფხნიკარ ჩჳადშდუხჳე
Line: 10    ჳორმო̄ჲსა ი ჟიქა̄ნ ფიცრალ ესქჳე, ქა ლოქ დო̄სა ხეწეს და̄ჳ. ნებჳზა
Line: 11    პილთე ჟენმე̄რა̄ნ ი ანყირ ბუქდ ი და̄ჳა უშუშდი̄. ე̀ჸ ათხე̀ ლოქ
Line: 12    ანღრი და̄ჳ. ანჴად და̄ჳ მიჩა ლჷჩა̄ჟდ. ჩა̄ჟდ ეშხჳხენ ბიკ ხო̄ცუდა-ი̀
Line: 13    მე̄რმახენ ნათხჳჲარე. გალჳანისა ჩჳედბჷგა̄ნ ჩა̄ჟ ი სგა დე̄მ ღჷ̄რდა.
Line: 14    და̄ჳემ ხე̄ქჳ ჩა̄ჟს ერე "მიჩა ლირდეღჳარა ბელხანჯარ ლოქ არი ამეჩუ".
Line: 15    "ჳო̄ჳ, ეჯი ლოქ არი ამეჩუ". "მა̄ჲღენ ამთა̄ნ ჭაბუკ ლი ბელხანჯარ,
Line: 16    ჯეჲ ლოქ ხაწჳე̄ნნე სეჲრს, მიჩა ლახჳბა ჲერუ ლოქ ერ ჟოხხჳი̄ტა".
Line: 17    სგა̄ჩად და̄ჳ ი სგაჲ ხეძგარხ უშხჳა̄რ. ალ და̄ჳ ჩიდ ხოშა ლჷმა̄რ ი
Line: 18    ჩიდ ხოშა ხაბცე̄ნა ი ჩჳენნახე და̄ჳდ ბელხანჯარ. ეჩქა̀ ლუშდუხ ერ
Line: 19    ხეყე̄და ბელხანჯარს ხელწფარ, ჟანშჷ̄დახ, მარა̀ ლიწეჲ მა̄მა ესწჷხჷ̄ნდახ
Line: 20    ბელხანჯარიშ. ბელხანჯარ ჟოხჩად და̄ჳს, დეშ ახწი̄ნდა და̄ჳ ი მიჩა
Line: 21    აფხნიკარ ჟანხჳიტ მა̄ნკჳი. დო̄ჳ ლოქ და̄ჳემ ე̄სა ლოხჩიშ ალჲარე
Line: 22    ლიხჳტე ი ღო და̄ჳა ნადგარს ჯეჲ დეშ ალჳარდა. ალჲარე ლუხჳი̄ტან,
Line: 23    სგა ხეძგარ და̄ჳს ი მიჩა ლჷჩა̄ჟდ ჩჳადგარ ი ქე̄დღირ, ლუხჳიტ
Line: 24    მიჩა აფხნიკარს ლოხცჳჲე და̄ჳა თჳელ, ურიბს ერ ხოჭო̄ნა̄ნ,
Line: 25    ი ჟანლჳარე მაგ ეჯჲარ. მანკჳი̄ ნათხე̄ლ ზითუნახაჳ
Line: 26    გიმე ხელმწიფს ლახო̄მ ჲეხჳდ. მე̄რმე ზითუნახაჳ ძუღჳა̄ ხელმწიფს
Line: 27    ჲეხჳდ-ი̀ მესმე დეცე ხელწიფს ჲეხჳდ. ალ მესმა ხოშა და̄ჳა ნაღე̄შ
Line: 28    ზითუნახაჳდ ხე̄ქჳ ბელხანჯარს ერე "მიჩა ლეჲხუ̄რი ზითუნახაჳ ფე̄დჲას
Line: 29    ლოქ ლი ამეჩუ" ი ქა ხაწჳე̄ნე დეცე ნამეგჳდ ბროლი კოშკ
Line: 30    ი "ეჩე̄ჲს ლოქ არი ისგჳი ლეთხე̄ლი ლეჲხუ̄რი. ბროლი კოშკს
Line: 31    გირგტანდ და̄ჳა ჯარ ლოქ ხაცხიპ ზითუნახაჳი მჷლჩად. ჲესჳა̄ჲს
Line: 32    ლოქ ქა ხეწდენიხ ეჯჲარ, ჩი̄ს ლოქ ბეჩდ ხასპეხ. ჳოდ ლოქ სი
Line: 33    აჴდენი̄ხი ეჩაჳ, ფიშირ ბეჩდ ლჷსპა მა̄რას ლოქ ეთლაკიხი̄ მინე
Line: 34    ლჷჩა̄ჟდ ი სი̄ ლოქ ბეჩდ აჯსიპნეხ ეჯჲარ", მარა̀ ბელხანჯარს მა̄მა
Page: 72  Line: 1    ახყალუ̄ნდა. ეში̄ ლახსგუ̄რდა შდა̄შჳდ მიჩა ჩა̄ჟს-ი̀ აჩად. მიჩა
Line: 2    აფხნიკარ ჩჳაცჳირ ამეჩუ. ერ აჴად ეჩა მინდორთექა, ხჳაჲ ბეჩდ ლჷსპა
Line: 3    მა̄რას ეთლაკა̄ნდა, მარა̀ მაყალ ეში̄ მა̄ ლოხჩოდ გუთე, ხაჴიდ მადრაჴ
Line: 4    მიჩა ჩა̄ჟს ი ჳოდ და̄ჳარ ქა ლისინჯაჳის ლოხჩიშახ, ეჩქა̀დ ძღუდი
Line: 5    ყო̄რალ სგაჲ ადყუჩუ̄რე, და̄ჳარდ ჩა̄ჟი ღოშგმე ჭიშხი̄ლს გარ ლახთხეპეხ
Line: 6    თე, სერ დეშსამა ლოხჩიშხ, ეჯჟი ჲენას მა̄რე ლას ბელხანჯარ,
Line: 7    ეჯ ღოშგმე ჭიშხი̄ლ ბეჩდ ოსსიპეხ, ბელხანჯარდ და̄ჳა თჳელ
Line: 8    ოსცჳჲე ი ჟოხხოჩჳე მიჩა ჩა̄ჟს ჭიშხ. ჩა̄ჟ ჩჳესბე ჩუ̄ბ ძღუდისა
Line: 9    ი ჯეჲ ჲეშდჲერუ ლე̄თ-ლადეღ ეხკჳად ბროლი კოშკთეჟი ლა̄ზს.
Line: 10    ჟი ერ აჴად ბროლი კოშკთე-ჟი, ზითუნახაჳ ჩუ ლუმყჳინე̄ლი ი ეშხუ
Line: 11    მუტჳარ თხუმრა̄შ ხატჳრე̄ნა ი მე̄რმე ლაჭშხარა̄შ. ბელხანჯარი
Line: 12    ლიჴედჟი ქე̄მჲეცხე̄ლი. ბელხანჯარს ხო̄ქჳა ერე "ჯეჲ ლოქ ლი მიჩა
Line: 13    ლეჭშჷ̄რი". ზითუნახაჳ ჳარს ხაგნე̄ნა, "მა̄ ლოქ ლი მიჩა ლეჭშჷ̄რი?"
Line: 14    ლურჳან ძინარს ლაბრა̄ლდ ემჴედე̄ლიხ სემი მუგჳარ, ეშხჳს ტაშტ
Line: 15    ოხჴი̄და, მე̄რმას ლაბრა̄ლ ნიც ი მესმას ლაკჳცა̄ნ. ჩოთბარახ ზითუნახაჳ
Line: 16    ი ბელხანჯარი̄. ჩოსგურახ ეშხუდ მუგჳარს, ლეზობ ოხჴი̄დახ
Line: 17    ი ლეთრე. ლეთრას გოში ლათრა̄ლხენ მუგჳარ ჩიქე ზითუნახაჳს
Line: 18    ხათჳნინახ, ღო ეჩა̀ ქანაბირს ბელხანჯარს ხაჴდინახ, ღო ქა უდ
Line: 19    ლჷმტიხინხ ი ეჩის ხათრინახ, ქა ლახუ̄ლუშ ეშ, ოდო თჳითჟი ქა დე̄მ
Line: 20    ხანწჷ̄რჳინახ ლათრა̄ლს დეხდაშ ი ამყალიბდ ჩოთგჳირჳნახ მუგჳარს
Line: 21    ჲეხჳ-ჭაშდ ჲერქდა. ლჷმარდხ ეშხუდ ჳო̄ბა ხანს. ალსგიდნე̄ლი ლაჴჳრაქა
Line: 22    ზითუნახაჳ ი ოსწჳე̄ნა ჟი მეფშჳდე ბელხანჯარი ჩა̄ჟ, ესრენ
Line: 23    ჩა̄ჟს და̄ჳარ მაგ ჟოხხჳი̄ტა ძღუდი მჷლჩა̄ლა ი ჯეჲ ზისხისა ცურაჳე.
Line: 24    ზითუნახაჳს ხო̄ქჳა ერე "ჯეჲ და̄ჳ იმნარ ლოქ ოთსერა ამთა̄ნ ჩა̄ჟ
Line: 25    ამჟი ლეცჳრად". ოხსკინა ალ ამბაჳჟი ბელხანჯარს კოშკხენ ჩუ,
Line: 26    ჩოთჷრმა ჩა̄ჟ, ჩოთბარა̄ლა ზისხა̄რ ი ჩოსბა ჳო̄შთხჳე̄და ჭიშხარშჳ, ჟი
Line: 27    ლოქ ერ დოშ ენქუცის. ჯეჲ ჟიუდ ემტეხ კოშკთე ჟი, ჟახკჳედე̄ნა ჟი
Line: 28    ლა̄ზს ჲეშდჲერუ ლე̄თ-ლადეღ. ნასკინი̄ ალეს ხა̄ჲშხა, ჲაღო იმ!
Line: 29    ათრა̄გენა ამე ჳობა ხანს ზითუნახაჳი ცახან. ზითუნახაჳს უჟ ხამთქჳე̄ნა
Line: 30    ლა̄ჲრაკი ქა ხო̄ქჳა მიჩა ჭაშიშდ ერე მიშგჳა ლაჳჟაჟი ლოქ ეშხუ
Line: 31    სადგომ ნო̄სა ლოქ ათკარა, ეჩა კჷლარ ლერსგჳენ ლუსდგჳარს
Line: 32    ლოქ ხა̄ბ-ი̀ იშგენ სადგჳმარს ხაკრენიხ ლოქ. ჩოთუჟა ზითუნახაჳს.
Line: 33    ბელხანჯარს ხო̄ქჳა ერე ლჷკჷრლაჳეუ ლოქ ლი ჯეჲ, ეჯ სადგომ
Line: 34    მო̄დ ადკარას მიჯნე̄მ. ჩჳადკარე სადგომ, ხედი̄ ხეკჳეს მო̄დ ოთკარე̄ნ,
Page: 73  Line: 1    ი ქა̄ნსკინე სადგომხენქა ჳოქრე ფატანდ. ხა̄ლ ყო̄რ ედკარა̄ნ
Line: 2    შიშდ. კჷლი ლიბენ ლერსგჳენხენ დეშ ლოხჩიშ ი ლერთენხენ ლახბე.
Line: 3    ზითუნახაჳ ქა̄ნჲაცხ ი ჩუ ერ ედკჳიე სადგომი ლიკრენი, ლე̄ქჳ ერე
Line: 4    "ამღა ლოქ მა̄მა ი̄რი, მარა̀ მეკჳბად ლირდე ლოქ ხაკუჩ, ოდო̀
Line: 5    ხოლა̄მდ ლოქ ოგჴედნი მა̄ლე". სადგომხენ ნაჩედ ჳოქრე ფატან
Line: 6    ძუღჳა̄ პილისა ლჷმსიპინ მე̄რმა სახელწიფისა ი ჟახხჳე̄ნა საბრალ
Line: 7    ზურა̄ლო̄ლს. ეჯის ოხჴი̄და მინე ხენწიფიშდ. ხენწიფს ხო̄ქჳა ეჩაშჳდ
Line: 8    ერე "ამშა მუქჳემს ლოქ ედო̄მ ოხთხე̄ლნე, მიჩ ჩუ ლოქ ადგარნე".
Line: 9    ესრენ ეჯ ზურა̄ლო̄ლ ხაზელა̄ლჳნე სახენწიფისა ჩია̄გ ი ხამჷრგიე
Line: 10    ჩი̄ს, მარა̀ და̄ს ხერგია̄ნ ი დეშსამოშ ენთხე̄ლე ეჩა მუქჳემ. ლათხე̄ლჟი
Line: 11    ლახხჳი̄და მეჩი გა̄ბუ ზურა̄ლ. "მაჲ ლოქ ხაწჷხ?" მეჩიდ ხე̄ქჳ მიჩ.
Line: 12    "ხემა მაჲ ლოქ ხაწჷხ, ჳოქრე ფატან ლოქ ახხჳე̄ნა მიჩ-ი̀, ოთხი̄და
Line: 13    ხენწიფიშდ. ეჯის დაგრა ლოქ ოსხუნა̄ლა მიჩაშჳდ, ამშა მუქჳემს
Line: 14    ლოქ ედო̄მ ენთხე̄ლნე". მეჩი გა̄ბუ ზურა̄ლს ხობცა ეჩა მუქჳემი
Line: 15    ლითხე̄ლი. ქალახო̄მ მეჩის ალ ჳოქრე ფატან ი აჩად გა̄ბუ ზურა̄ლ
Line: 16    ლათხე̄ლითე ფატნი მარგიად მუქჳემიშ, ყაურჯენ ში̄სა ლეჲყედნე. ეჩა
Line: 17    ნათხე̄ლუ̄ლ მეჩიდ ხაშგმინ, დედჳფალი ნაქჳემ ლერექუ̄ლალნ ლოქ
Line: 18    ხოჟჷ̄ნდახუ ჯეჲ ი ხოჩა წყჷ̄ლჲან ლეზობ იშგმინ ლეზჷზდ ლეყდა̄ნიდ
Line: 19    ი მე̄ჳარ მჷშდმია̄ნ ლეთრე. ალე მაგ ქა ლახო̄მხ მეჩი გა̄ბუს ი
Line: 20    აჩად. ესრენ ალ მეჩი გა̄ბუ ზურა̄ლ გჳეფ ლი, აფხიჟ ღალარ ი ეშ
Line: 21    ლეხქარჳა̄ნ ძუღჳაქა, ძუღჳა ქა̄დში̄ნშხე ი ჩჳესგუ̄რდა ბროლი კოშკი
Line: 22    დე̄ფანჟი, ბელხანჯარიშ-ი ზითუნახაჳი ლარდამჷყ ქა ი ლახა̄და ეჯჲარს
Line: 23    ლაჴჷ̄რა̄ლს. "ჯეჲ ლოქ ლი მინეშთე ღერთა ნაზჷზ მინე ფარეშდ ი
Line: 24    მუახლდ ი ჩულიგჳა̄ჳეს ხეშგმჷდა მინეცახან". ზითუნახაჳ დე̄მ იხნა
Line: 25    ი დე̄მ აგჳა̄ჳა, მარა̀ ჟახწი̄ნდა ბელხანჯარ ი ჩჳადგჳა̄ჳე მინეცახან
Line: 26    მომსახურდ მერდად. ბელხანჯარს ი ზითუნახაჳს ღერთალ ხაზზინახ
Line: 27    ლეზობ-ლეთრას, ღერთა ნაწილ ლჷმა̄რხ ი ეჯის ლჷმზობინხ. ეშხუ
Line: 28    ლე̄თ ხოშგმინა გჳეფ მეჩი ზურა̄ლს, ჯე̄ჲ, ლოქ ღერთალუ ნაზჷზ
Line: 29    ლი მინეშთე ი მიჩა ნა̄თი ლეზობუ ლოქ ლალე̄მხ მინდ. ზითუნახაჳ
Line: 30    დე̄მ ხაჯრაჳნა, დემ ლჷმზობინ. "მინს მინე ნა̄თი შიდ ლოქ
Line: 31    ხუღჳახ, ღერთალხენ ნაზჷზ ი მიჩა ნა̄თი მაჲ ლოქ ხა̄რხ, მარა̀
Line: 32    ბელხანჯარს მა̄დ ოთჯირჳა მიჩა ჲეხჳეშდ ი ჩუ ლოხმამახ გა̄ბუ
Line: 33    ზურა̄ლა ლეზობ. ეჩანღო გა̄ბუ ზურა̄ლს მჷშდმია̄ნ ლეთრე ლოხთუნა
Line: 34    ი ჩოთშდჷმა̄ლა ჲერქე̄და. ბელხანჯარიშდ ოხკი̄და დაშნაჲ ი სგოთკჳა̄რა
Page: 74  Line: 1    ძუღჳათეჲსა. ბელხანჯარი ქუნ ესრენიშ დაშნაჲსა არი ი ბელხანჯარ
Line: 2    დაშნა̄ჲ ლჷქრაუნღო ჩუ ღალ ალდაგრე̄ლი შიშდ. ზითუნახაჳიშდ
Line: 3    ხოფხიჭა ლუსდგჳარა̄ლდ-ი̀ ჩოთჷთირნა ძუღჳათე̄ჲსა. ერ
Line: 4    ასყე̄ნა გჳეფ გა̄ბუს ზითუნახაჳ, ჩა̄ჟ ხაწდა ჩულჷბე ჳო̄შთხჳე̄და
Line: 5    ჭიშხარშჳ ი დემ ღალ ხაყჳანნა ი ჟოხგი̄ლა ეშხუ ჭიშხ ჳოდ
Line: 6    ძუღჳათე̄ჲსა ლიესა̄ლდ. ძუღჳაქა ერ ასყე̄ნა, ეჩქა̀ ღალ მე̄რმე ჭიშხ უდ
Line: 7    ოხგი̄ლა. ქე̄რ ოთჲა ძუღჳას, ეჩქას მესმე ჭიშხ უდ ოხგი̄ლა. სგა ერ ოთჲა
Line: 8    მე̄რმა სახენწიფნუნ, ეჩქა̀ ღალ თელდ ჟოხგჷლჷ̄რა მაგ ჭიშხარ ი ახჭემე̄ნა
Line: 9    ზითუნახაჳს. სგე̄მჴედე̄ლი, იმთე̄ჲ ეჯი ადჲეხ, ეჯ სახელწიფთე̄ჲსა.
Line: 10    ჩუ დეშერს ოთჷ̄რმა ჩა̄ჟ. ბელხანჯარ ი ნა̄ჲფხნიკ ხელწიფარს
Line: 11    ათხე̀ გარ ოხმეჴრახ ბროლი კოშკ მჷყ და̄ჳარე ხჳეტა ი სერ ქა̄ბდაჳიხ
Line: 12    ლიჴედს ეჯჲარე ლაწედდ. ათხა̀დ ერ ამჴედე̄ლასხ, ბეჩდ ლისპედ
Line: 13    ხაყლუ̄ნდახ. ანჴადხ ბროლი კოშკთე ი ხეწადხ ლჷდგარ ბელხანჯარს.
Line: 14    ზითუნახაჳს ლჷქრაჳას ი მე̄ჳარ ენწუხჳა̄ნხ. ეჯი ჩუ ხოხა̄ლდახ ერე
Line: 15    ბელხანჯარს ქუნ დაშნა̄ჲსა ხო̄გან. ენთხე̄ლეხ დაშნაჲ, მარა̀ დე̄სა
Line: 16    ახხჳი̄დახ. გიმე ხელწიფ, გიმჟე ე̄მე ი̄რდო̄ლ. ეჩა ლათხე̄ლის ლახა̄და.
Line: 17    ძუღჳა̄ ხელწიფ ძუღჳა̄ჲსა ესთხე̄ლდა, დეცეშ -- დეცჟი. ძუღჳა̄ჲსა
Line: 18    ხელწიფდ ჟანხურჲელე კალმახ, მაჲმა ა̄რდა, მაგ. ლეხჭოდდა ძუღჳა̄
Line: 19    ხელწიფ ჩი̄ს კალმხარს "ჯიხალხ ლოქ ე̄სმა ბელხანჯარი დაშნა̄ჲშ ი ედ
Line: 20    ხარიდ ლოქ მო მაგ, მა̄ჲმა ძუღჳა̄ჲსა კალმახ არი". "დაშნა̄ჲშ დე̄სამა
Line: 21    ლოქ გჳიმჴერა, აშ ლოქ მაგ ხჳარიდ ამეჩუ, ეშხუ კოჭო̄ლ
Line: 22    კალმახე̄ლჷნქა, ეჯი ლოქ ლეგდ არი ი დეშ ლოქ ემჴედ ამხა̄ჳ.
Line: 23    არგებს ლოქ ეჯის ე̄სამა ხოხა̄ლდეს ი ლაბჯგუშუ ანჴიდხ მიჩა̄შთე".
Line: 24    აჩადხ ი ანჴიდხ ლაბჯგუშ ეჯ კოჭო̄ლ კალმახე̄ლ. ხაჴიდ მადრაჴ ი
Line: 25    ჟა̄ნშყად დაშნაჲ ეჩა ჴადხენქა, მარა̀ ხოჩა ბელხანჯარი დაშნაჲ ეჯჟი
Line: 26    ემჴეჩ ერე კოჭო̄ლ კალმახე̄ლა ჴადთე̄ჲსა ათსკჷ̄დე̄ნ. ძუღჳა̄ ხელმწიფდ
Line: 27    ხე̄ქჳ კალხმარს ერე "ხოცჳენდად ლოქ დაშნაჲს ღალარს მაგ ი
Line: 28    ეჯჟი ლოქ ახსყედ, იმჟი̄ ეჩქად ლას. ოდო̀ ჩი̄ს ლოქ ჟანხჳტე
Line: 29    მინს". ლოხცჳიეხ ჩიემ ღალარ ი ჟენსყა̄ნ დაშნაჲ ეჩჟი, იმჟი̄ ეჩქად
Line: 30    ლჷმა̄რ. ჟანიე ი სგოსდე ბელხანჯარს ჳორჩხთე მიჩა დაშნაჲ.
Line: 31    ბელხანჯარ შიშდ ჟენლჳარა̄ნდა, ლეჲსგი̄დრა̄ლე, ზითუნახაჳ დე̄სა ხაყა.
Line: 32    ძუღჳა̄ ხელწიფდ ქო̄ხო̄მბჳე, იმჟი̄ ლჷმა̄რე̄ლი, მაგ. "მინს ლოქ
Line: 33    მომსახურდ ერ გჳეფ მეჩი ზურა̄ლ ოხხინახ კოშკთე, ეჯის სგაჲ ლოქ
Line: 34    ჩოთშდჷმად ბჷგი ლეთრაჳშ, ისგჳი დაშნაჲ ძუღჳათე ოთკჳა̄რა. ეჩქა
Page: 75  Line: 1    სი ჩჳალდაგრე̄ლხი, ზითუნახაჳ ოთჲა ძუღჳაქა მე̄რმა სახელწიფთე,
Line: 2    ისგჳა ჩა̄ჟს ჭიშხარ ჟი ლოხჭკორა მაგ, ეჩა ლიჲესს ერ ხაწდა ი
Line: 3    ათჭემა ეჯის. ნაჲ ლოქ ისგჳი ნა̄ფხნიკჳარ ისგჳა ლაწედთე ლოქ
Line: 4    ონჴჳადდ, და̄ჳარე ხჳეტა შომაჲ ლოქ ოხმეჴრედ ი სი ლოქ ლჷდგარ
Line: 5    ოგხჳიდ, გიმე ხემწიფდ, მა̄ჲმა გიმჟი ედჩომნა̄ნ, ეჯი ენმეჴრე,
Line: 6    დეცეშ -- დეცჟი. მი დაშნაჲ ოხთხე̄ლ ისგჳი ლოქ ძუღჳა̄ჲსა კოჭო̄ლ
Line: 7    კალმახე̄ლა ჴადისა, ონჴუ ეჯი ამეჩუ ი ეჩქა̀ სი̄ ჟეხლუარენ. ალე მაგ
Line: 8    ერ ჟენმეჴრე ბელხანჯარდ ხოჩა̄მდ, ანჩად ბროლი კოშკხენ მიჩა
Line: 9    ჲეხჳე ლათხე̄ლთე, ჩა̄ჟი ფოლარ მაგ ჟანხურჲელე ძღუდისა ი შიდ
Line: 10    ესყედნე მიჩაცახან და̄ჳა თჳელ-ი̀ ადიე. აჴად მე̄რმა სახენწიფთე ი
Line: 11    ჩჳადჷ̄გა̄ნ ეშხუ ქრუჳ ზურა̄ლაშმჷყ. ალ გჳეფ მეჩი გა̄ბუ ზურა̄ლს
Line: 12    მე̄რმა სახელწიფისა ოთჴიდა ხენწიფიშდ ბელხანჯარი ზითუნახაჳ.
Line: 13    ზითუნახაჳ ესრენ ქა და̄ს ხეშდა̄ლ ი დეთა̄ჲ ჩუ ლუ̄ცჳნე ე̄ს ხოწჳა
Line: 14    ესრენ ეჯი ი ჯილდოს ხა̄ჳდი ხჷნსგა სახენწიფს, ჲერჳა̄ჲ ეჯის მოშერ
Line: 15    ადა̄ცჳნი, მარა̀ ჩიქე დეშერს ოხჴერჴა დეცე ჩუქჳა̄ნ ეჩა ჩული̄ცჳნე.
Line: 16    ალ ამბაჳ ქო̄ხო̄მბჳე ბელხანჯარს მიჩა მასძელ ქრუჳ ზურა̄ლდ.
Line: 17    ბელხანჯარდ ხე̄ქჳ ქრუჳ ზურა̄ლს. "ადერ ლოქ სი, მჷსკადს ლოქ
Line: 18    აჯყეჳნი ი ჩუ ლოქ ათა̄ცჳნი სი ი ჯილდო̄ჲ ლოქ სი ჯე̄რი". ქა
Line: 19    ლახო̄მ ქრუჳს მჷსკად-ი̀ აჩად. ერ აჴად ხენწიფი სასახთეჟი, ტუ̄ლდა
Line: 20    ერე "ჯეჲ ლოქ ადა̄ცჳნი ზითუნახაჳს". მარა̀ დე̄მ იხნახ, "ცალთე ქა̄ჳ
Line: 21    ედკჳარა̄ნ ჯეჲ, ლაწი̄ნგჳა̄რ", ჯეჲ მა̄დეჲ გაცხაჲდ ლალყაფიან ი ხუმრიან
Line: 22    ხოჩა მა̄რე̄ლს დეშერს ლოქ ოთო̄ცჳნახ ზითუნახაჳ-ი̀ ათხე̀ ჯეჲ
Line: 23    ლოქ ადა̄ცჳნია̄?" ეშჲეში̄ ალახ იკჳი̄შა̄ლდა ი აჯ მა̄დ ახკიდ ეჯჲარს,
Line: 24    სგე̄დხინეხ ზითუნახაჳიშთე. ქა ერ ხაწჳე̄ნე ზითუნახაჳს ქრუჳდ მჷსკად,
Line: 25    შიშდ ჩჳათჩო̄ნდა სურუ მახჲადშჳ. ხელწიფდ იმჟი ნა̄ქჳ ხა̄და,
Line: 26    ხჷნსგე ნა̄თჲობა შიშდ ქა ლახო̄მ ქრუჳს. ანჩად ბელხანჯარ ი ადჷ̄გა̄ნდა
Line: 27    სასახლისა მოჯნიბდ. სგა̄ჩად საჯინიბთე̄ჲსა, ლახტუ̄ლე მიჩა
Line: 28    ჩა̄ჟს, შაჳჩიტ-შაჳჩიტ! ლოქ ი შიშდ-ქა ლეხზაზა̄ნ მიჩა ჩა̄ჟ. ფლოქარ
Line: 29    სგა ლოხგე ჭიშხარს, ოსცჳიე და̄ჳა თჳელ-ი̀ ჟეხხოჩჳა̄ნ ჭიშხარ
Line: 30    ჩა̄ჟს. ხესგჳრი ჲეს-ი̀-ჲეს ჩა̄ჟს ბელხანჯარ ი ქა ღჷრი ჯო̄დჲად ი
Line: 31    მახჲადშჳ ლიღრა̄ლს იბნე. მიჩა ლიღრა̄ლჟი ესრენ ბეჩარ შჷ̄დნიხ
Line: 32    კოჯარხენ ჩუ, დეც, გიმ, მეგემ, მაგ ქუნ ლჷ̄მგენე ე̄სამა ჩჳარი, ჲესჳა̄ჲ
Line: 33    ლეხსჷმიხ ბელხანჯარი ლიღრა̄ლ, ეჯჲარი̄ ლჷმღარა̄ლნიხ მიჩაცახან.
Line: 34    ზითუნახაჳს ხოქჳა ხენწიფიშდ ერე ლაზელა̄ლთეუ ლოქ აფიშჳდხ ჩა̄ჟშჳ
Page: 76  Line: 1    სასახენქა მოჯნიბცახან. ხენწიფს ჟი ლოხსგურა შაჳჩიტთეჟი ზითუნახაჳ
Line: 2    ი ქა ერ ლოქქა̄ბა სასახლიშდ, ბელხანჯარი̄ ჟი ლახსგურე̄ნა ეჩაცახან.
Line: 3    ეჩქა̀ ხოყირა მადრაჴ ჩა̄ჟიშდ-ი̀ ეშ მჷრა̄მთე ლახქარჳე̄ნახ დეცე
Line: 4    ნამფა̄რჳაქა. ემჩედხ მინე აგითე, ხოჩა ლირდეჳ ოთჴი̄დახ-ი̀ ჯამზჷ̄რახ
Line: 5    ღერთემ ამშა მუ̄ჳნარი მაგ.

Line: 6       ალ ციგინ ანა̄მბჳე ჯჳინელდჷ̄რან ნასჷ̄მ ჯაბაშა ნესტორდ მჷსსა̄შდ
Line: 7    მიჩა ბაბა მაზი̄შხენ ხასმა ესრენ.



Next part


This text is part of the TITUS edition of Svan (Lashx) Texts ed. A. Oniani.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.