TITUS
Svan (Lashx) Texts ed. A. Oniani
Part No. 21
Previous part

Text: 8 
Page: 67 
Line: 8 
VIII. ღარიბ მეზგო̄ლა ციგინ.


Line: 9       ჯამზჷრახ ღერთემ-ი̀ ამეჩუ ლჷმარდე̄ლი ღარიბ ქრუჳ ზურა̄ლო̄ლ.
Line: 10    ეჯის ხაყე̄ნა ეშხუ ჭყინტო̄ლ გარ. ეჯ სახელწიფისა ხენწიფეს ხაყე̄ნა
Line: 11    ზითუნახაჳ ხოჩა ლეწჳი̄ლე. ჲერჳაჲ ეშთა̄ნ ლირტყჳელა̄ლს ლე̄ქჳნა,
Line: 12    ერე გაცხაჲდ ლირტყჳელა̄ლ ლჷმა̄რე̄ლას, ჳეზრალ ერ ჩჳადტკიცნახ
Line: 13    ლირტყჳელა̄ლდ, ეჯის ხა̄ჳდინახ ქა ზითუნახაჳს ჲეხჳდ ემჴედე̄ლი ალ
Line: 14    ქრუჳი ჭჳინტო̄ლ ი ხო̄ქჳა ხელწიფიშდ ერე მიჩ ლოქ ხოხალ ხოჩა
Line: 15    ლირტყჳელა̄ლ. ჲაღო ლე̄ქჳარ ლოქ. ათა̄და ალ ჭყინტო̄ლს ერე ჳახშამს
Line: 16    ლოქ ხამა̄რა̄ლნახ მინ ი ლეჳახშამ ლოქ დე̄სამა ხაღჳე̄ნახ, ლარტამისა
Line: 17    ლოქ ხაცხე̄ნა მიჩ კჳახნესუ̄ლ, ემჩედე̄ლი ლოქ ეჩა ლაჴდათე-ი̀
Line: 18    ათჭემე̄ნა ეჯ კჳახნესუ̄ლა ბარდს ი დეშსა ლოქ ათლაკე̄ნა, ათჭემე̄ნა
Line: 19    ლოქ ი ძუღჳა ეჩხენთე ლოქ ხა̄რა ქა ლეჭემ კერკაჩხჳშ. ეჩე ჟი ლოქ
Line: 20    ოხგი̄ლა კჳახნესუ̄ლ ი ქა ლეტეხ ლოქ ხა̄რა ძუღჳაქა კერკაჩხჳშ, მარა̀
Line: 21    ჳახშამ ლოქ ეში̄ ჩი̄მიშდ ჟოხჩი̄შა. ალე ეშხუ ლოქ.

Line: 22       ათხე̀ მე̄რმე ლირტყჳელა̄ლუ ლოქ ლე̄ქჳ ჲაღო. ჟენბინე მე̄რმე̄მი
Line: 23    ლი̄მბჳი: ჳახშამს ლოქ ხამურჯინახ ი ჯიმ ლოქ დე̄სა ხაღჳე̄ნახ მინს.
Line: 24    ძუღჳა ეჩხენ ლოქ ხაცხე̄ნა მიჩ კურმულ ჯიმი კოჯ. ემჩედე̄ლი ლოქ-ი̀
Line: 25    ეჩე კოჯი ქა ლაკჳშა კჳერთხ ლოქ დე̄სა ხაღჳე̄ნა, ლოხყა̄ბჲელა ლოქ
Line: 26    კურმულ ჯიმი კოჯდ თხუმ ეჩხენ-ი ამხენ ი ქა ლოქ ოხკჳიშა ჯიმ ი
Line: 27    აგითე ლოქ ოხჴი̄და ძუღჳაქა ი ნა̄ყუნი ლისყი̄ ლიჳახშმა̄ლ ჩიმიშდ
Line: 28    ლოქ ლოხჩი̄შახ მინს ეში̄.

Line: 29       ალე ლოქ ჲერუ ლირტყჳელა̄ლ ეზარ ლოქ ლიხ ი ათხე̀ მესმე
Line: 30    ლოქ ეხბინ, ხე̄ქჳ ალ ჭყინტო̄ლს. ენბინე ლიმბჳი მესმე̄შიშ. აჩად
Line: 31    აგითე, ხე̄ქჳ მიჩა დის ქრუჳს ერე ხამო̄ლარ ლოქ ერ ხაყახ მინს,
Page: 68  Line: 1    ქა̄ჳ ლოქ ლახო̄მ ეჯჲარ. ქე̄ხბი̄შდა მიჩა დის-ი̀ ქა̄დჳოდა̄ლე, ეჩა ნაფასჳშ
Line: 2    ენყიდე კეცარ, სგა̄დჲე კეცარ ხენწიფი სასახთე̄ჲსა. ხე̄ქჳ ხელწიფს
Line: 3    ერე ალჲარე ლიგჳშილე ლოქ ხაგად მიჩ ჩილადეღისა ვოქრშჳ.
Line: 4    ალე მესმე ლირტყჳელა̄ლ ლას. ლახსჲამჷ̄ნხ ალ სემი ლირტყჳელა̄ლარ-ი̀
Line: 5    ჩჳადტკიცეხ ხელწიფდ-ი̀ მიჩა ჳეზრალდ გაცხა̄ჲდ ლირტყჳელა̄ლარ
Line: 6    ალ ჭყინტო̄ლა ნაქჳი̄ს. ხელწიფი ასუშ ზითუნახაჳ ქა ლახო̄მხ
Line: 7    ალ ლირტყჳელა̄ლი მუ̄ქჳი̄ს ჭყინტო̄ლს ჲეხჳდ, სგა ლოხგჳირგჳნეხ ი
Line: 8    ხელწიფი ნა̄თჲობა̄ჲ ამის ოთტკიცეხ ჩუ მაგ. ეჯიარს ხოჩა ლირდე
Line: 9    ოთხკი̄დახ-ი̀ სგაჲ ჯამზრჷ̄რახ ღერთემ ამშა მუჳნარი მაგ.

Line: 10       ალ ციგინი̄ ნესტორი ნა̄მბაჳ ლი ჯამაშა.



Next part


This text is part of the TITUS edition of Svan (Lashx) Texts ed. A. Oniani.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.