TITUS
Svan (Lashx) Texts ed. A. Oniani
Part No. 20
Previous part

Text: 7 
Page: 60 
Line: 17 
VII. ჲაკოფ სარე̄ჩი ციგინ.


Line: 18       ალე ჯამზჷრას ღერთემ-ი̀ ლჷმარდ ეშხუ ჲაკოფ სარე̄ჩ, გეზალ მა̄
Line: 19    ლახჳოდე̄ნა. ღერთალ ოხწუხჳა ლაჴჷ̄რა̄ლს. ოხზჷზა ღე̄რბათს ანგლოზ,
Line: 20    ოხყეჳნა ანგლოზიშდ წჷრნი უსკჳ, ჩოთბიჴჳა ჲეხჳ-ჭაშიშდ ეჯ უსკჳ
Line: 21    ი ხოქჳა, "მინს ლოქ ეხთენიხ გეზალ ი ჟახად ეჯის ჲაკოფუ ლოქ
Line: 22    ესჟახეხ მიჩა მუე ჟახე. სემი ზაჲ მურგჳალ მუ̄რყჳამხენქა ნო̄საჳ ლოქ
Line: 23    ანფიშჳდხ, ოდო ჩუ ლოქ ოთთჳეფნიხ სემი ზაჲ მურგჳალ ი ეჩანღო
Line: 24    მინეშ ი̄რი აჯაღუდ". ჩჳედღანჳა̄ნ ჲაკოფ სარე̄ჩი ჲეხჳ ი ქე̄ხთენა̄ნდა
Line: 25    ბობშ ი ჟანპრისდეხ ი პეპიდ ედგენეხ ჯგჷრა̄გ, ჟესჟახეხ ჲაკოფ მუეშა̄ლ.
Line: 26    ხეყე̄დახ სემი თოჲ მუ̄რყჳამისა ი დეშ ედგიჭხ, ქა ხოჩდენო̄ლხ
Line: 27    მუ̄რყვამხენ. ლე̄თჳშ ირთხინს იცხმჷდა ი ლადეღჳშ კამჷლს. ალახ დოშ
Line: 28    ედგიჭხ მუ̄რყჳამისა, ქა̄ნფიშჳდხ. ოხჴიდხ ჩა̄რე ჯოგ ი იმჳაჲ ტოტ
Line: 29    ოსცჳჲე, მაგ ჩჳადჯაჭუ̄რე, ჲაღო მიჩა ბაბა̄ რაშ ლოქ ხა̄ბ ჳორმო̄ჲსა ი
Line: 30    "ეჯჲუ ლოქ ოხჴიდხ". ოხჴიდხ-ი̀ ოსცჳიე ტოტი ღულა̄ჲ თხუმჳარ ესშიდჳნე,
Line: 31    ჟანსკინე რაშემ ი ხე̄ქჳ ერე "ალე ლოქ მიჩ დე̄სა ხაჲე̄ნა იჳალადეღ".
Line: 32    ქა̄ფიშჳდხ ეშხუთოჲა ჳადაჳშ ბალახთე̄ჲ ეჩჷნღო ანჴად მიჩაჳშ.
Page: 61  Line: 1    ოსცჳჲე ტოტ-ი̀ ფათჳ დეშსა ათკჳარჳნე. რაშემ ხე̄ქჳ: "ჲაღო უნგირ
Line: 2    ლოქუ ესგე მიჩ". ჟანუნგრე ი ჟი ლახსგუ̄რდა. რაშემ ხე̄ქჳ ერე "ჩუ̄
Line: 3    ოხქახ. ოდო̀ დეცს ლოქ ლახხიპე ჟი, ჯეჲ ლოქ ჩუქჳა̄ნ ეხცა̄დი, ჩუბო̄ჳ
Line: 4    ლოქ ლახხიპე, ლესგხენ ლოქ ეხცა̄დი, ლესგთე ლოქ ლახხიპე, მე̄რმა
Line: 5    ლესგხენ ლოქ ეხცა̄დი". ანპარ რაშ დეცთეჲ დეცელიხპე ხაკუჩ-ი ჲაკოფ
Line: 6    ჩუქჳა̄`ნ ესცა̄და̄ნ. ჩუბოჳ ლიხპე ხაკუჩ-ი ლესგხენ ეხცა̄და̄ნ. ლესგთე
Line: 7    ლიხპე ხაკუჩ-ი̀ მე̄რმა ლესგხენ ეხცა̄და̄ნ. ეჩხა̄ჳ ხაკუჩ ლიხპე̄ჲ ჟიქა̄ნ
Line: 8    ეხცა̄და̄ნ. ჩჳესჷ̄გან რაშ სერ ი აშამ ხე̄ქჳ ჲაკოფს ერე "მიჩა პატრონჷნღო
Line: 9    ხჳაჲ ხან ლოქ მეჩდე̄ლი-ი̀ ჩუ ლოქ არი ცუდდ". ანსკინე ცხეკხენ
Line: 10    თჳეთჳნე ილჳდ, ეხჭამ ღოშგინ ჲაკოფ მიჩა ლჷრაშდ, ატა-ტა-ტა
Line: 11    ხეჲა̄ლ ი დეშ ხეჲა̄ლ, ესქინე-ი̀ ეჯი̄ ესქინე. დო̄მ ესქინე-ი̀ ეჯი̄ დე̄მ
Line: 12    ესქინე. სგა̄ჴად უდუნბურ ცხეკთე̄ჲსა ი ჩჳედბა̄ქა̄ნ ილჳ. ლახსინჯჳე კოჯთე̄ჲ
Line: 13    ამეჟი სგურ ზითუნახაჳ-ი̀ იცხე̄ნჲელ, იმხენ ჩუ̄ჲ იცჳენი ლაცხნი̄რს,
Line: 14    კოჯს ეჩხენჩუ ატრო̄ნტე. ზითუნახაჳდ ლახტუ̄ლე ჲაკოფს: "ჲარ ლოქ
Line: 15    ჯეჲ?" "ჯეჲ ლოქ ლი ჲაკოფ სარე̄ჩი გეზალ", ჩუ̄ჳ ლოქ ედი̄ღა̄ლა̄ნ ი მიჩა
Line: 16    ლეჭშჷ̄რიდ ლოქ ე ხეყე̄ნი, ჟი̄ჳ ლოქ ანჴად, დო̄რიღო̄ჲ აჩადუ ლოქ
Line: 17    მიჩაშჳდ". ჩჳედი̄ღა̄ლა̄ნ ჲაკოფ-ი ქა ხეწად ზითუნახაჳ. ჲაკოფ ისგჷნჩუ
Line: 18    ჳერცხლ-ი ისგჷნჟი ჳოქრ ლას. ჟი̄ჳ ლოქ ანჩად ჲაღო". ლახტუ̄ლე
Line: 19    ზითუნახაჳდ. ჟაჩად ჲაკოფ ი ხე̄ქჳ: "ჲაღო ჩუ̄ჳ ლოქ ელგჳირგჳნე̄ნდედ!" "მა̄დე,
Line: 20    ბა̄ზი მეშხად ლჷღაფ სადგომისა ლოქ ადჷ̄გა̄ნ ი მჷხარ სგა ლოქ
Line: 21    ლეჲგჳირგჳნი, ჩუ ლოქ ნო̄რდუ ადქადჳნე ბა̄ზი". სგა̄ჩად მეშხა ჳოთახთე
Line: 22    ჲაკოფ-ი იღრა̄ლ მიჩაშურად. ზითუნახაჳდ ხაჴიდ შიარ უშხჳა̄რ ი კოჯთე̄ჲსა
Line: 23    ეთკარა̄ნ ყო̄რ-ი სგა̄ჩად. ჩჳედბურა̄ნდა-ი̀ ანჴადხ ჲეშდთექა და̄ჳარ.
Line: 24    ხაკუხ, ერე ჩუ მოშ ადქადჳნახ ამსჳა̄ლდ, მარა̀ დეშ ადქადჳნეხ-ი ჟანხჳიტ
Line: 25    და̄ჳარ ჲაკოფდ. ქაშიდ ღელათე̄ჲსა ი ჩჳადყუ̄რდა. ჩუ ერ ედრუა̄ნდა,
Line: 26    ლაგა̄გიჟი ეშ მჷრ კი̄ჳა. ძინარს ზითუნახაჳი̄ სგა̄ნჴად-ი ჲაკოფ ლეხჭოდდა:
Line: 27    "იმნარ ლოქ ალკი̄ჳი̄ნე̄ლი ლაგა̄გიჟი". "იმნარ ლოქ-ი ალ სადგომს
Line: 28    და̄ჳარ ლოქ ხაფსჳნახ ჟი, ეჯჲარს ლოქ ემოშ ჩი̄ს ჟანხჳტე, ალე ლოქ
Line: 29    თელდ ჩჳედღი̄ჳი̄ნი". ამ ლადეღ ეშხუდ არიხ ჲაკოფ-ი ზითუნახაჳ, ჩუ ერ
Line: 30    ედნებჳზა̄ნდა, ზითუნახაჳ ჟი̀-უდ აჩად კოჯთე̄ჲსა, ჲაკოფ ჩჳასად
Line: 31    სადგომისა. ამ ლე̄თ ხოფშირა̄უდ ანჴადხ და̄ჳარ აშ ერე გარჯ ხა̄რ მიჩ
Line: 32    გარ ეჯჲარე ლიხჳტე დაშნა̄ჲ უჴმარად-ი რაში უწე̄ნა̄ლად, მარა̀ ეში̄
Line: 33    ჟანხჳიტ, სგა ერ ეხნეჩდა̄ნდა ეჯი, მაგ და̄ჳარ გულიბდ ადგენა̄ლე ი ქა̄შიდ
Line: 34    მაგ კოჯს. მეშხე სადგომ მესმე ლჷმა̄თი ჩჳედკი̄ჳი̄ნა̄ნ თელდ. ჩჳედრუა̄ნდა,
Page: 62  Line: 1    ანჴად ზითუნახაჳ. ჲაკოფდ ხე̄ქჳ ერე "მიჩა ლირდე ღჳარა,
Line: 2    ლე̄თი ძღჷდ გარჯ ლოქ ხა̄რა და̄ჳარე ლიხჳტე".

Line: 3       "გარჯ ლოქ ბა̄ზი ხე̄რი, ლე̄თი ლოქ ერ ემჴედხ, ჲერუ ეჲზუმ ლოქ
Line: 4    ანჴდენიხ ბა̄ზი მინე ლჷხენწიფდ და̄ჳარ. ლიმარგ ბა̄ზი ლოქ ეჲკჳეჲნი
Line: 5    ეჯჲარცახან ლაცჳა̄ლისა".

Line: 6       ჩჳედბურა̄ნდა ი ეჯი კოჯთე აჩად ი ჯეჲ ჩჳასად მიჩა სადგომისა.
Line: 7    ანჴადხ და̄ჳარ, მარა̀ მაჲ, ჩუ დეშ ხასკდახ მიდამისა. რაშს ლეხჭოდდა:
Line: 8    "მიჩ ლოქ მაჲ ხა̄ჲმედა?" მიჩ ლოქ ეჯი ხა̄ჲმედა, ერე სი ლოქ ლახ ჟი
Line: 9    მესგჳრი̄ხი, ჲესჳა̄ჲ ძუას ხორკინნი ჲედ ჴეფს, ჩი̄ს ლოქ ჟი ხუტნი".
Line: 10    ხმალს ლეხჭოდდა ერე "მიჩ ლოქ მაჲ ხა̄ჲმედა?" მიჩ ლოქ ეჯი ხა̄ჲმედა,
Line: 11    ერე ჯეჲ ლოქ აქთუნდაუ ი და̄ჳარს თხუმჳარ ლოქ ხეჭკჳრო̄ლნიხ".
Line: 12    და̄ჳარე ხენწიფდ ხე̄ქჳ ჲაკოფს. "ხჳაჲ ლოქ ოხხჳი̄ტა, მარა̀ ბა̄ზი
Line: 13    ხოლა̀ ლე̄თს ლოქ ახჲეს, მიჩ მა̄დე̄ჲ მიჩა მუ̄ლუ̄დსი̄ ჩუ ლოქ ადტკურნი".
Line: 14    ჟენბინა̄ნ ლიცჳა̄ლ. ხუტე ი ხუტე ჲაკოფ და̄ჳარე ჯარს, კოჭო̄ლ
Line: 15    ერ ხოკლჷნდა, ეჩქა̀ ხმალ ოთკჳაშ ჩუ. მაგ ჟანხჳიტ-ი ეშხუ კაჩხჳ
Line: 16    და̄ჳუ̄ლ ოთსად უდგარად, ლჷდგარუ̄ცახან მეყჳნე. მაფეშჳშ ჯე̄ჲ სგე̄დსიპა̄ნ
Line: 17    ლაყჳრათე̄ჲსა ი ტოტ ქა̄მენჩუ ოსსად. ანჩად ალ კაჩხჳ და̄ჳუ̄ლ-ი
Line: 18    ჟენკო̄დე კეტჳშ ხმალი ნაკჳიშ-ი ჟესრიღჳ ქალუცჳირ ტოტ ჟი
Line: 19    ჲაკოფს ი ქა̄თქჳიც მეჴერ, მარა̀ ჲაკოფს ეში̄ დე̄სამა ხობჯა ჟი, ეჲჟი
Line: 20    მაფშა̄რ ლას-ი̀ ბჷგიდ ხაგდჷდა. ძინარს ანჴად ზითუნახაჳ ი ლჷდგარუ
Line: 21    და̄ჳარ მაგ ქა̄შიდ ღელთე. ხეწად მექჳცა ტოტს ჲაკოფიშ ი ლოხცჳიე
Line: 22    პლატუკ ი სგალახბე ტოტ, იმჟი̄ ეჩქა̀დ ხა̄და, მარა̀ კოჭო̄ლ დაღი̄ლ
Line: 23    ესთენა̄ნდა. ქა̄ნჲეცხჳნე ი ჲაკოფდ ხე̄ქჳ: "მიჩა ლირდე ღჳარა ლოქ, ლე̄თი
Line: 24    ძღჷდ თჷმი ხა̄რე̄ნა, ლაჳჟაჲსა ტოტ ლოქ ე̄რეს ოხქჳი̄ცა". ზითუნახაჳდ
Line: 25    ხე̄ქჳ ერე "ეჯ ტოტ მიჩ ლოქ ლოხტი̄ხა სგა. ადსინჯჳეხ სადგომ ი
Line: 26    თელდ ლჷკი̄ჳი̄ნე ლი, მარა̀ ეშხუ ყალბი̄ლ ხეცჳარ მეშხად ეშხუ აგის ი
Line: 27    ეჯის ლოქ ოთქჳი̄ცა ლე̄თი მიჩაშჳდ ტოტ". სერ ჩჳედგჳირჳნა̄ნხ
Line: 28    ალჲარ, მარა̀ ლაგჳირჳინა̄ლჟი ნიც ახფჷ̄ნდა ჲაკოფს-ი ოხჴიდ თოთობაჲ
Line: 29    ბობში̄ლდ ლიც, ლალჷ̄შ-ი ჩჳადშდჷმე ი ჩჳადყუ̄რდა ი ჩჳასად
Line: 30    უგჳირგჳნად. ეჩჟი მე̄რმა ლადეღუდ ხაყერ. კაჩხჳ და̄ჳულ ასსიპე̄ნა
Line: 31    თოთობაჲ ბობში̄ლდ-ი ეჯი ხაფნა̄სჳნინა ლიცს ჲაკოფს ლაგჳირგჳნა̄ლჟი.
Line: 32    მესმა̄მდ ჟი ლეთმი̄ნე ლოქ ჯა̄რ ლიცი მაფჷნ, ოდო̀ ჩუ ლოქ ჯექრაჳი
Line: 33    მიჩა თხუმ იჳალადღიშდ. ე ლოქ დო̄მ ეხთჷმი̄ნნე ლიცე ლითრეს.
Line: 34    ჲაკოფდ ხე̄ქჳ ერე მაჲ ლოქ ხაყრის ღო. მესმა̄მდ ლაგჳირგჳნა̄ლჟი აჯაღუდ
Page: 63  Line: 1    ჩჳეთგა̄წბულა̄ნდახ ლიცე მაფჷნშჳ. ერ ახფჷ̄ნდა, ოხჴიდ თოთობაჲ
Line: 2    ბობშემ ლიც ი ლალჷ̄შ ი ჩჳედგურნა̄ნ მაშდმა̄რ. სერ ეთქარჳა̄ნ ზითუნახჳ
Line: 3    იჳალადღიშდ. ჩჳადი̄რე ლაჲრ, ჟესდე გუჟი, ატლასი ქესა̄ჲ
Line: 4    ჟესდე გუჟი ჲაკოფს ი ჩჳედგჳა̄ნე, სგე̄სგუ̄რდა ხჳალმანდთე̄ჲ აჩად.
Line: 5    ანჲაცხ ჲაკოფ ი დე̄სა ხაყა ჲეხჳ ი ატლასი ქესა ი ქაღალთ ჟი ხა̄ზ
Line: 6    მუჭოდჟი. ჩჳესჭოდა̄ნე ქაღალთ-ი̀ ხე̄ჲრა̄ნ ერე "ჯეჲ ლოქ სერ იჳალადეღ
Line: 7    დეშსა ხეთხნი მიჩ". მე̄ჳარ ხოლა გუჟი ღალ ადჷ̄გა̄ნ ჲაკოფ. დე ლა̄რტყს
Line: 8    იბენ ი დე ჩაფლარს იდე̄ს ი დე ფაყჳს იგემ ი იზელა̄ლ ეჲჟი. ლახხჳი̄და
Line: 9    მიჩა პეპი ჯგჷრა̄გ ი ლეხჭოდდა მიჩა ლუწხჳაჳად ლირდე, "იმშა ტარ
Line: 10    ლოქ ლი". "ამჟი-ამჟი ჲეხჳ ლოქ ემთჳაფ ჩუ". "ჯეჲ პილწ, იმღა ლოქ
Line: 11    დო̄სი ლახჭოდნე̄ნა მიჩ? ჯეჲ ლოქ და̄ჳარე ლახჳტას ლესგხენ ხაგნე̄ნა,
Line: 12    ოდო̀ ჯეჲ ლოქ მიჩა̀-შურა̀ჲ იმ ანხჳტა, ჯეჲ ლოქ უმჴერა!" ხათო̄ნე
Line: 13    ჯგჷრა̄გდ ამჟი: "ჩუ̄ჳ ლოქ ადგარ მიჩა რაშ კოჯა ძირმჷყ, თხუმ ი
Line: 14    ფაშ ჯო̄დჲათეუ ლოქ ადჲე ქა. გობრანჯთე̄ჲსა ჯეუ ლოქ აჩად სგა
Line: 15    ი ქაჳ ლოქ ანშხებე ი ეჲჟი ლუპჟუნადუ ლოქ ა̄რდა სგა̄მენ
Line: 16    გობრანჯისა. ენსგიდნი ლოქ არწიჳ, ესწჳე̄ნნე ლოქ გობრანჯს, ესფხიჭნე
Line: 17    ი ადჲეს ლოქ, მარა̀ ჟი̄ბ ბა̄რტყალდ ნო̄სა ლოქ აჯდა̄ჳშახ, მი ლოქ
Line: 18    მუმურჯი ჯე̄რი მეჲად. არწიჳ ანტხენი ეჩანღო თხუმთე ი ფაშთე, ეჩქად*
Line: 19    სი ქო̄ხჩედნი̄ხი ლოქ, ჳოდ ჟანჴდე არწიჳ თხუმს ი ფაშს". რაში ლიდგარი
Line: 20    ღალ მე̄ჳარ ხამჭი̄ნდა ჲაკოფს, მარა̀ რაშემ ხე̄ქჳ ერე "ნომა̄ჳ
Line: 21    ლოქ ხატკლებ ჯეჲ, რაშალ ლოქ ხჳაჲ ჯეთხი სი ი მი ლოქ მე̄ჳარ
Line: 22    მა̄ზნუნი ისგჳა ბაბა̄შთე". ხაკიდ ხმალ-ი̀ ქა̄`თკჳარჳნე თხუმ, ფაშ ი
Line: 23    თხუმ ჯო̄დჲას ესდე. გობრანჯთე სგა̄ჩად ი ჟანშხებე. ენსგიდდა არწიჳ
Line: 24    ი ესწჳე̄ნე რაში გობრანჯ. ანპარ ჩუ̄ჲ ჟადჲე. ეჩანღო ანტახ ჩუ
Line: 25    თხუმთე̄ჲ ფაშთე. ჲაკოფ ეჩქა̀ ქო̄ხჩად ბა̄რტყა̄ლს ი ჩჳაჩად ზითუნახაჳი
Line: 26    ლარდა სახელმწიფთე̄ჲსა. ჩჳედბჷრგა̄ნდა ღარიბ ზურა̄ლო̄ლმჷყ.
Line: 27    ატლასი ქესახენქა ხოშდე თჳალ-მარგალიტს ი ჩჳადკეთლე ეჯ
Line: 28    ზურა̄ლო̄ლ. იმე̄ჲ ჯეჲ ხებჷრგა̄ნდა. ეჯ ზურა̄ლო̄ლი ჲეზჳმჷყ ლჷ̄გა̄ნდა
Line: 29    საყდარ. ქა̄მენქა ხე̄ჲრა̄ნდა ეჯის: "ვინც შევიდეს, არ გამევიდეს".
Line: 30    ალე ესჭოდა̄ნე ჲაკოფდ-ი̀ ხაჴიდ იშთხჳ-ი̀ სგა̄დკარე ყო̄რალ. ეჩა
Line: 31    ჴურჳალლეჟა̀ ხეტყჳბა̄ნდახ სემი ლახჳბა გმირალ ჩუ ლჷშშაჳე. ლახაგა̄ნ
Line: 32    ხოშა მუხჳბას. ხაყერ წეს-აგება-ი̀ ქა̄ნჲაცხ. "მიჩა მადილუ ლოქ ხა̄რ
Line: 33    ჲაკოფს, დე ლოქ გიმს ხაბრიე̄ნახ მინ-ი̀ დე დეცს. მინე ცოდ ლოქ
Line: 34    ხა̄ცჳ. ჲერჳა̄ჲდ ღენ ლოქ ყო̄რალჟი ესა̄ჲრე: "ვინც შევიდეს, არ გამეივდეს"
Page: 64  Line: 1    ლოქ. სგა ლოქ დეშერს ოთბედჳა ლიჴედ. ალ გმირდ ხე̄ქჳ
Line: 2    ჲაკოფს ერე ჯეჲ ლოქ ლოხფუ̄ლნე მიჩ მიჩა ნალჴმაშას. ქა̄ჩად, ქა
Line: 3    ლოხფუ̄ლე მიჩა ნალჴმაშა ი გმირ ჩჳედბა̄ქა̄ნ. ჲაკოფ ერ ლას, ჲერუ
Line: 4    ეჲზუმ ნალჴმაში ლეხჳოდა̄ნ. ქა̄ჩად ი მერმა̀ მუხბას ლახა̄გა̄ნ, ხაყერ
Line: 5    წეს-აგება ი ქა̄ნჲცხხ, მიჩა მადილუ ლოქ ხა̄რ ჲაკოფს მიჩა ქუნე ნაგნუ̄რ,
Line: 6    დე ლოქ გიმისა ლჷმარდხ მინ ლუშდუხ ი დე ლოქ დეცეშდ ხაგდენახ.
Line: 7    მინე ცოდუ ლოქ ხა̄ცჳ, ჲერჳა̄ჲს ამეჟი ლოქ ოთო̄ჲრა: "ვინც შევიდეს,
Line: 8    არ გამევიდეს". სგა ლოქ დეშერს ოხბედჳა ლიჴედ. ქა̄უ ანჩად-ი̀
Line: 9    ქა ლოქ ლოხფუ̄ლნე მიჩა ნალჴმაშას. ქა̄ჩად-ი ქა ლოხფუ̄ლე. ჲაკოფ
Line: 10    ეჲჟი ენჷნგჳამი̄ნა̄ნ ერე გიმს ხა̄და გჳამი ნალჴმაშოშ. ლახა̄გა̄ნ
Line: 11    მესმა ხოხრა მუხბა გმირს-ი ეჯისი̄ ამჟი ხაყერ, იმჟი ი ალჲარს.
Line: 12    ქამე̄ჲცახან ეჯნე̄მ, ქა ლახო̄მ ლაფუ̄ლუშ მიჩა ნალჴმაში ი ლეხჭოდდა:
Line: 13    "მიჩა ლახჳბას ლოქ მაჲ ხოშჩუქრახ მიჩაშჳდ". "ნალჴმაში" ლოქ. "ეჯღა
Line: 14    ლოქ ლჷმა̄რხ ეჩქადი̄ და̄ჳარ, ერე იმნარ ლოქ ხაკუხ მინს ლოქ ერ
Line: 15    რაშალ ხაყახ. ჩუ ლოქ ადერ ამეჩუ, ჩუ ლა̄ზ, ლო̄ბი ლოქ ერ ხა̄რ
Line: 16    ეჩელექჳა-ი̀ ეჩეჩუ რაშალ ლოქ ეჩხო̄ლიხ სემი" ეშხუ წჷრნი, მე̄რმე მეშხე
Line: 17    ი მესმე თჳეთჳნე ეჯჲარს ჩი̄ს ლერექჳ ხა̄ზხ, მეშხას მეშხე, წჷრნის
Line: 18    წჷრნი ი თჳეთჳნას თჳელთჳნე. შომა̄ჲ. ლოქ ხოშა თჷმი ჯა̄დეს, ეჩქა̀
Line: 19    წჷრნი რაშხუ ხესგჳრო̄ლდა ი წჷრნი ლერექჳსუ იქჳმუდა. თჳეთჳნა
Line: 20    რაშს მეშხე ლოქ ხოჩა ნაბგან, მეშხას -- წჷრნი ი ლერქჳალცახან
Line: 21    მიჩა-მიჩა ფერი იარაღ ლოქ ხორიკ ჩუ ჩი̄ს. ჩჳაჩად ლო̄ბი ლექჳა, გაცხა̄ჲდ
Line: 22    ეჲჟი ოსხჳი̄დახ რაშალ მინე მინე ლჷრექჳდ ი ლჷჲარაღდ გაწყობილ.
Line: 23    ლეზობდ რაშალს ჩუ ხოშჷდახ ხოჩა ირინჯ-ი̀ იზბჷდახ. ქა̄ნტახ მიჩა
Line: 24    ბინათე, ლაყჳრა დეშსა ხოგიჭ ჲაკოფს, დეთა̄ჲ სკამ. გიმჟი იყჳნი ჩუ.
Line: 25    მარა̀ მიჩა ნაზჷმს ჟი ხათნე, ჟი ერ იგნა̄ლ, ეჩქა̀. მიჩა ლეჲხუ̄რი
Line: 26    ზითუნახაჳ ეჩქა̀ გარ ემჴედე̄ლი ეჯ სახენწიფთე̄ჲსა მიჩა ეჩე ლარდუშ,
Line: 27    აშ ერე ჯეჲ ახჩეშა, ჩუ მეჩდას მეჭემ, სგა ლაბედდ. იმთე̄ჲ ზითუნახაჳ
Line: 28    ადჲეხ ხენწიფიშთე, ეჯ ხენწიფს ლოხზჷზე მოცქულ ჩხარა ლუთხუმ
Line: 29    და̄ჳდ. აშიშდუ ლოქ ოთჴიდხ მიჩ ძინრი ხეჳსდ მინე ზითუნახაჳ,
Line: 30    ოდო მინს მა̄დე-ი̀ ჩი̄ს ლოქ ჟანხჳტე მინე სახენწიფს, მუ̄მბჳის
Line: 31    ლოქ და̄ს აფშჳდე. ალ ზითუნახაჳს ჲაკოფიშდ ლოქ ოხხჳიტჳნა მიჩა
Line: 32    მეხუბ და̄ჳარ ი ეჯღა ლოქ ლი ლჷმჯა̄რჳე ამშა̄შთე ი აშიშდუ ლოქ
Line: 33    ოთჴიდხ ჩუ მიჩ ძინარს დო̄სგ!" ალ ამბაჳ ჩჳედკჳჲე ჲაკოფდ. ლეხჭოდდა
Line: 34    რაშალს: "იმჟი ლოქ ხოჩა?" წჷრნი რაშემ ხე̄ქჳ, ერე ეჩა დაგრა


Page: 65 
Line: 1       ლოქ მა̄მ ხოჴდენი ძღჷდ კჳედდ-ი̀ ჟი̄უ ლოქ ლახსგუ̄რდა მა̄ნკჳი
Line: 2    თჳეთჳნა რაშს, თჳეთჳნე ჲარაღ ი თჳეთჳნე ლერექჳშუ ენგა̄წყობლა̄ნ, მინ
Line: 3    ლოქ მარქაფდუ ლეჲყედნე. ერ ირჳა̄ლ ალჲონი პილთე, ძუღჳად ედბინე
Line: 4    ლიტორტმანი. ესრენ ხენწიფს ჟახყალუ̄ნდა ჩხარა ლუთხუმ და̄ჳაშდ
Line: 5    ი ჩოთჴი̄დახ ძუღჳა̄ პილთეჟი ზითუნახაჳ. ეჯემ ხამურჯი ჩუ ლინტყჳის
Line: 6    და̄ჳ ზითუნახაჳიშ, ანჴადხ ამჩიქა დეცე ნამფა̄რჳაქა ჲაკოფ-ი
Line: 7    მიჩა რაშალ ი ხეძგარხ და̄ჳს ი შიშდ ადგარხ. ესტუ̄ლე ჩიემ ერე
Line: 8    მინს ლოქ ღერთალ ახწე̄ნახ, ოდო იშგენ ლოქ დეშერ ლჷმდაგრინ
Line: 9    ჩხარალუთხუმ და̄ჳს. ამშა დაგრა ერ ედკჳიე ჲეშდ-ჳოხუშდლუთხუმ
Line: 10    და̄ჳდ, შიშდ ანზჷზე მოცქულ. ჩუ̄ჳ ლოქ ოთჴიდხ მინე ზითუნახაჳუ̄ლ
Line: 11    აშიშდ, ოდო̀ ჩი̄ს ლოქ ქუნს ოხქჳიცე ფუ̄ლ ხანისა. ალე ერ
Line: 12    ხე̄ქჳხ ჲეშდ-ჳოხუშდ და̄ჳა ნამციქულ ჲაკოფს, ლეხჭოდდა მიჩა რაშალს,
Line: 13    მაჲ ლოქ ხოჩა. რაშალდ ხე̄ქჳხა მეშხა რაშს ჟი̄უ ლახსგუ̄რდა,
Line: 14    წჷრნი̄ თჳეთჳნე მარქაფდუ ედჭე̄ნე ი სგა ლოქ ლელცჳა̄ლე̄ნდედ. ჩუ
Line: 15    ერ ედრუა̄ნდა, ძუღჳად ედბინე ლიტორტმანი. ანღლი მაგ ერე აჯაღ
Line: 16    ლოქ ანჴდენიხ ღერთალ და̄ჳა მჷდგარიდ. დეცე ნამფა̄რჳაქა ენთენა̄ნხ
Line: 17    ჲაკოფ-ი მიჩა რაშალ, ხეძგარხ და̄ჳს-ი̀ ჩჳადგარხ ეჯი̄. ატახ მიჩა ბინათე
Line: 18    ჲაკოფ-ი ჩჳესბა̄ლე რაშალ. ათხე ანზჷზე მოციქულ ჲერჳეშდჳოხუშდლუთხუმ
Line: 19    და̄ჳდ. შიშდუ ლოქ ოხჴიდხ მინე ზითუნახაჳუ̄ლ, ოდო
Line: 20    ეშთა̄ნ ჳორგულს, მინს ლოქ ერ მი̄მანს ესტყჳიფე. ლეხჭოდდი რაშალს
Line: 21    ჲაკოფ: მაჲ ლოქ ჯახოჩხ ამშა? ათხე̀ ლოქ მე̄ჳარ გარჯ ლი
Line: 22    ეჩა ლიცჳა̄ლ. "ეჩქადი̄ ლოქ ხჳაჲდინ ხოცჳა̄ლახ ეჩაშდ მიჩს, მარა̀
Line: 23    დეშსამა ლოქ ხოყრახ. თჳეთჳნა რაშსუ ლოქ ლახსგუ̄რდა, აჯაღ წჷრნი
Line: 24    ი მეშხე მარქაფდუ ლეჲჭე̄ნე ი სგა ლოქ ლელცჳა̄ლე̄ნდედ. ემოშ ლოქ
Line: 25    ალწინად, ეზარ, დო̄რიღო̄ჲ მაჲ ლოქ ლაყრიდ? მი ლოქ, ჴარჴს ერ ადკარნე,
Line: 26    სგა ლოქ ოთშყედნი ჴარჴთე. ღო ჴადთე ი ლოხჳე̄რი ლოქ
Line: 27    ლაჳუ̄რას გულ-ჩონჩხს ი სგაჲ ქა̄მენხენისა ხეშჲა̄ლნიდ. ემოშ ლოქ
Line: 28    ანტხენი ჴადხენქა, ეზარ ი დო̄რიღო, მა̄ჲ ლოქ ლაყრიდ. ალე ოხჩეჳე
Line: 29    წჷრნი რაშემ. ედრუა̄ნდა ჩუ ი ედბინე ძუღჳად ლიტორტმანი, ანღრი
Line: 30    ჲერჳეშდჳოხუშდლუთხუმ და̄ჳ, დეც ი გიმ ქუთან. ენთენა̄ნხ ამჩიქა
Line: 31    დეცე ნამფა̄რჳაქა ჲაკოფ-ი მიჩა რაშალ. ენცხუ̄ტი̄ნე წჷრნი რაშემ-ი
Line: 32    სგო̄თშყა̀*დ მჷკარ ჴარჴთე̄ჲსა ი ღო ჴადთე ადსკინე, სგა ლახა̄და
Line: 33    ლაჳუ̄რას გულჩონჩს, ამხენ ალჲარ ხეძგარხ ი ხაქცუ̄რეხ თხუმჳარს-ი̀
Line: 34    ხეტხენიხ აჯაღუდ თხუმჳარ, გარჯ ლი სერ ლიწნე, ეჲჟი ლი გჳეშ, მარა̀
Page: 66  Line: 1    ამჩიქა ნეპო̄ლი̄ლდ ლახტუ̄ლე: "ჲაკოფ, ნიორწყალუ ესგოშე ქამექჳცა
Line: 2    თხუმჳარჟი". ჟესგოშე ნიორწყალ-ი მა̄მ ლეხტახ თხუმჳარ
Line: 3    და̄ჳს. ჩჳეს მორჩლეხ, წჷრნი რაშემ ერ ანსკინე ქა ჴადხენ,
Line: 4    ეჩჷნღო ი ჩჳადგარხ. წჳრნი რაშ ზისხა̄რ ლას ჴადისა
Line: 5    ნარდჳ ი ჩჳადბარა̄ლე ჲაკოფდ-ი ანჩადხ აგითე მინე ბინათე
Line: 6    დო̄რო̄ლდ. ათხე̀ გარ ათირ ზითუნახაჳდ ჲაკოფ. ათხა̀დ დეშ
Line: 7    თერდა, ეჲჟი მაჲე̄ლჳაშა̄ლ ხერღჳენო̄ლ და̄ჳარს. მიჩაჳშ ჲაკოფდ
Line: 8    მა̄მ ლახლათრუ̄ნე თხუმ. ჲაკოფს ალმასი თე ხა̄რაი ეჯნარ ლოხთხეპა
Line: 9    თე ზითუნახაჳს, ალე ლოქ მიჩა ჲაკოფ ლი. ადზორე ხენწიფდ
Line: 10    მიჩა სახენწიფ-ი ხეთხე̄ლიხ ჲაკოფს, მარა̀ დეშერ ეთლა̄კან
Line: 11    ამსჳა̄ლდ. მე̄რმადუდ ადზორე აჯაღ, ეჩქა̄ჲ დეშერ ეთლაკა̄ნ.
Line: 12    მესმად ერ ადზორე ხენწიფდ, ლეხჭოდდა ჩი̄ს, და̄რ ლოქ არჲა̄ მიჩა
Line: 13    სახენწიფისა მა̄რე. ეჩქა̀ გარ ლექჳ ჲაკოფი მასძელ ზურა̄ლო̄ლდ ერე
Line: 14    მიჩაშმჷყ ლოქ არი ეშხუ და̄ჳუ̄ლ, ჩუ ლოქ ერ იყჳნი გიმჟი, მიჩა
Line: 15    ნაყჳინს ჟი ლოქ ხათნე. ზითუნახაჳს ათა̄და ერე ეჯი ლოქ ლი მიჩა
Line: 16    ჲაკოფ. ანჲე წჷრნი რაშ ჲაკოფდ-ი ჟი ლახსგუ̄რდა, აჩად-ი ქა
Line: 17    ლეხწჳე̄ნა̄ნ ზითუნახაჳს ი ეჩჷნღო ჩჳესპაჟჳ. აჩად ზითუნახაჳ ლათხე̄ლითე
Line: 18    ჲაკოფიშ-ი ჟენთხე̄ლე საყდარისა, მარა̀ აჯაღ ჩუ̄დ ესპაჟჳ ჲაკოფ.
Line: 19    აჩად-ი ზითუნახაჳდ მესმა̄მდ ჟიუდ ენთხე̄ლე-ი ეჩქა̀ ხე̄ქჳ ერე ჩუ ლოქ
Line: 20    ე დო̄მ იჩრაჳი, ჩუ ლოქ იდგარი ჯეჲ. ეჩქა̀ ჩჳედჩერჳა̄ნ ზითუნახაჳიცახან
Line: 21    ი ჩუ̄ჲ ედგჳირგჳნა̄ნხ. ეჩე̄ ხენწიფდ მიჩა ხჷნსგე ნა̄თჲობა ქა
Line: 22    ხაშჩუქრე ალჲარს. ამ ხანისა ჲაკოფს სემი ზაჲ ლახრა̄გჷ̄ნ ქორხენ
Line: 23    მეჩდან. ათხე̀ ანტახ სერ მიჩა აგითე. ზითუნახაჳი̄ ანჲე მიჩაცახან.
Line: 24    ათხე̀ ერ ათარა̄გჷ̄ნ ჲაკოფს, ზითუნახაჳს ერ ხეწად, ეჩანღო სემი ზაჲ,
Line: 25    ეჯი ანგლოზდ ერ ხე̄ქჳ ჲაკოფ სარე̄ჩს ერე ჲაკოფ ლოქ ეჯთენიხ,
Line: 26    მარა̀ სემი ზაჲ მუ̄რყჳამისა ლოქ ეთგიჭდ-ი̀ ე ლოქ დოშ ეთგიჭედ,
Line: 27    სემი ზაჲ მურგჳალ ჩუ ლოქ ეჯქარჳიხ, ეჯ ანგლოზი ნასგოჯ
Line: 28    ამბაჳ ადგა̄თჳე ღერთემ ი სემი ზაჲ ქა კჷლჷ̄ნ ჲაკოფ ი ამჟი
Line: 29    ეთჯო̄დნა̄ნ ჲეხჳე ლითხე̄ლ-ი̀ ლიჴდე, მარა̀ ეჩანღო ლოქ ეში̄ ანჴდენი
Line: 30    ჲაკოფ, ეჯი ერ ხოსგოჯ ანგლოზდ ჲაკოფი მუ სარე̄ჩს, ათხე̀
Line: 31    ეჯღა ტეხნი აგითე ღერთა ლჷმსგოჯჳშ ჲაკოფ. სარე̄ჩს, ჲაკოფი
Line: 32    მუს, მიჩა სახენწიფ მაგ ჩოთღაფუ̄რა, ლჷდგარ ხახლე̄ნა მიჩა
Line: 33    გეზალ ჲაკოფ. ჲაკოფი დი̄ჲ მუ ჩუ ღალ ალმეჩე̄ლიხ ალ სემიზაჲსა
Line: 34    გეზლა მატკლებჳშ. ანჴადხ აგითე ჲაკოფ ი მიჩა ჲეხჳ ზითუნახაჳ ი


Page: 67 
Line: 1       ძღჷდ ლიხჲადა̄ლ აჩმინხ მინე სახენწიფისა. ეჯჲარს ეზარ ლირდე
Line: 2    ხა̄რახ-ი ჯამზჷრახ ღერთემ ამშა მუჳნარა̄ლა.

Line: 3       სარე̄ჩს ათხე̀ მახე-მახე მა̄რე̄ლ გარ ხაყლეხ, ოდო̀ ჯჳინელ მა̄რე̄ლ
Line: 4    სარე̄ჯს ლჷმყლო̄ნინხ. სარე̄ჩ მაჲ ჟახე დო ლი, და̄სმა ხომჴერა "ახსნა"
Line: 5    ამშა. აშ ხა̄ჲშხა იაკოფს სარე̄ჩ ჲედ სა̄რე̄ჯ ი მაჲ დო ლი, მა̄მა გჳიმჴერა.

Line: 6       ალ ციგინ ანა̄მბჳე ნესტორდ ჯაბაშა. მახე მა̄რე ლი. ხასმა მიჩა
Line: 7    ბაბა მაზი̄შხენ ჯაბაშა.



Next part


This text is part of the TITUS edition of Svan (Lashx) Texts ed. A. Oniani.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.