TITUS
Svan (Lashx) Texts ed. A. Oniani
Part No. 19
Previous part

Text: 6 
Page: 59 
Line: 16 
VI. ჲეხჳ-ჭაში ციგინ.


Line: 17       ალე ჯამზჷრახ ღერთემ-ი̀ ლჷმარდხ ეშხუ ჲეხჳ-ჭაშ. ალგენე̄ლი
Line: 18    ჲეხჳ ი ჟოხლაჯა ბარგ ი ლი̄ზის ხამურჯნა ჩულიჩედს ჭაშიშ. ჭაშს
Line: 19    ხო̄ქჳა ერე იმ ლოქ ხამურჯი ჯეჲ? იმ ლოქ ხამურჯი-ი̀ ჳოდ ლოქ ეშთა̄ნ
Line: 20    ქორს დო ოთგემ, ერე დო ლოქ გიმს ხეთილეს-ი დო დეცს ხება̄ჯგე̄ნს,
Line: 21    ეჩქად ლოქ დეშ იგნი მიჩაცახან. ჲაღო ოდინე ლოქ, ჭაშს ღალ ხო̄ქჳა
Line: 22    ჲეხჳეშდ-ი ნო̄თი ლოქ მოშ ითხა̄ს ეშთა̄ნ ჳოსტატ, ერე ალე ლოქ
Line: 23    ხე̄ჲმედე̄ნს. ჟანგა̄ნდა̄ჲ აჩად. შუკჟინ ეთლაკა̄ნდა ბობშს მა̄რას. ჩუ
Line: 24    ყუყდა ი ისგე̄რდა. ლეხჭოდდა ჭაშ: ისგჳი მუ ლოქ იმე ა̄რი? იმე
Line: 25    ლოქ არი-ი̀ შუკჳარისა ლოქ ლიცჳა̄ლს ალა̄ში. იმჟი ლოქ ალაში ლიცჳა̄ლს?
Line: 26    იმჟი ლოქ-ი ამჟი: შუკჳეპილისა ღედერს ლოქ ალა̄ში-ი̀, ჲერჳაჲ
Line: 27    ლოქ ხელკო̄ლნი, იწა̄ნნიხ ლოქ ღედერს, ეჯი ლოქ მიშგჳა მუს ხესდიკი-ი̀
Line: 28    ჩიგარ ლიცჳა̄ლ ლოქ ხე̄რი. ალე ათსაკჳრელჷ̄ნ ჭაშს ი ეჩჷნღო
Line: 29    ლეხჭოდდა აჯაღ: ეჯკალიბ ქორა ლიგემ ჯა̄ჲმედა ლოქ მოშ, ერე დო
Line: 30    გიმს ხეთილეს-ი დო დეცს. მა̄ჲმედა ლოქ, ამნემ ხე̄ქჳ. ჩჳედსყა̄ნხ ამჟი,
Line: 31    ერე დოშდიშ ხაკუჩ-ერ ემჴედე̄ლას ჲეხჳ-ჭაში ქორთე ქორა მჷგემდ. აჩად
Line: 32    დოშდიშ ი დე̄სა ანჴად, აჩად თახაშ-ი დე̄სა ანჴად, აჩად ჯიმაშ-ი დე̄საუდ


Page: 60 
Line: 1       ანჴად, ცა̄ ლადეღ გარ ანჴად. ლეხჭოდდახ ჲეხჳ-ჭაშ, იმღა ლოქ მო̄დ
Line: 2    ემჴედე̄ლი დოშდიშ. იმღა ლოქ მო̄დ ემჴედე̄ლი-ი̀ ძუღჳა̄ჲ ხმელათ ლოქ
Line: 3    ხა̄რა ლეზმა̄ლი. ხედი ლოქ ათსერე̄ნახ ქა? კოჯ ლოქ მაგ ძუღჳათე
Line: 4    ხოჩმი̄ნა, მარა̀ ეში̄ ლოქ ხმელათ ათსერე̄ნა. თახაშ ლოქ იმღა მო̄დ
Line: 5    ემჴედე̄ლი? ლჷკა̄ფე მეგემ ი ჟიმეგნე მეგემ ლოქ ოხზჷმა̄ლა ი ჟიმეგნე
Line: 6    მეგემ ლოქ ათსერე̄ნა. ჯიმაშ ლოქ იმღა მო̄დ ემჴედე̄ლი? ლუჳარ-ი
Line: 7    ლჷდგარ ლოქ ხა̄რა ლეშჷლდანი. ხედი ლოქ ათსერე̄ნა? ჭაშ ლახჭოდნა.
Line: 8    ჲერჳაჲს ჭაშს ჲეხჳ ლოქ ჟი ხაწრე, ეჯი̄ ლოქ მაგ ლჷდგართე ხოჩმი̄ნა,
Line: 9    მარა̀ ეში̄ ლოქ ლუჳარ ახსერე̄ნა. ემტეხ აგითე ჭაშ, ოხკი̄და ხოშა
Line: 10    ტყენ ი ჩოთჟჳერაჳა გულჲანდ. ეჩქა̀ სგა̄თჴჷ̄რენა ჲეხჳ, ერე ჩუ ლოქ
Line: 11    ნო̄მუ მადგარი-ი̀ ფაცხი̄ლისა̄ჲ ლოქ ჩოთგენი მახჲადა̄რ. ამჷნღო ბობშ
Line: 12    ჩოთსაჩქჳრა ჭაშს ი ოთფი̄შჳდა ეჲჟი მიჩა აგითე-ი̀ ჯამზჷრახ ღერთემ
Line: 13    ამშა მუჳნარი მა̄რე მაგ.

Line: 14       ალ ციგინი̄ ნესტარდ ანა̄მბჳე ჯაბაშა ჭყინტდ. ჲერჳაჲს ჲეხჳ
Line: 15    ხემწირ-ი ეჩა ლუქჳს ჩუ იჯრაჳი ჭაშ, ეჯ კალიბ მა̄რაჟი ხოხალხ ალ
Line: 16    ციგინი ლი̄მბჳი ლა̄შხარს.



Next part


This text is part of the TITUS edition of Svan (Lashx) Texts ed. A. Oniani.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.