TITUS
Tetraevangelium (redactio mcxetica defectiva)
Part No. 20
Previous part

Chapter: 20 
Verse: 1  Link to ntkpl   რამეთუ მსგავს არს სასუფეველი ცათა კაცსა, სახლისა უფალსა, რომელი განვიდა განთიად დადგინებად მუშაკთა ვენაჴსა თჳსსა.

Verse: 2  Link to ntkpl   და აღუთქუა მათ სასყიდელი თითოეულსა დრაჰკანი დღესა შინა და წარავლინნა იგინი ვენაჴსა თჳსსა.

Verse: 3  Link to ntkpl   და განვიდა იგი მესამესა ჟამსა და პოვნა სხუანი, მდგომარენი უბანთა ზედა უქმად,

Verse: 4  Link to ntkpl   და ჰრქუა მათ: წარვედით თქუენცა ვენაჴსა ჩემსა და, რაჲ-იგი იყოს სამართალი, მიგცე თქუენ.

Verse: 5  Link to ntkpl   ხოლო იგინი წარვიდეს. და მერმე განვიდა მეექუსესა და მეცხრესა ჟამსა და ყო ეგრეთვე.

Verse: 6  Link to ntkpl   ხოლო მეათერთმეტესა ჟამსა განვიდა და პოვნა სხუანი მდგომარენი და ჰრქუა მათ: რაჲსა სდეგით თქუენ იქა დღე ყოველ უქმად?

Verse: 7  Link to ntkpl   ხოლო მათ ჰრქუეს მას: ვითარმედ არავინ დამიდგინნა ჩუენ. ჰრქუა მათ: წარვედით თქუენცა ვენაჴსა ჩემსა, და რაჲ-იგი იყოს სამართალი, მიიღოთ.

Verse: 8  Link to ntkpl   და ვითარცა შემწუხრდა, ჰრქუა უფალმან სავენაჴისამან ეზოსმოძღუარსა თჳსსა: მოუწოდე მუშაკთა მათ და მიეც მათ სასყიდელი; იწყე უკანასკნელთაგან, ვიდრე პირველთამდე.

Verse: 9  Link to ntkpl   მოვიდეს მეათერთმეტისა ჟამისანი იგი და მიიღეს თითო დრაჰკანი.

Verse: 10  Link to ntkpl   მოვიდეს პირველისანიცა იგი და ჰგონებდეს, ვითარმედ უფროსი მიიღონ;

Verse: 11  Link to ntkpl   და მიიღეს მათცა თითო დრაჰკანი. ხოლო მი-რაჲ-იღეს, დრტჳნვიდეს სახლისა უფლისა მისთჳს

Verse: 12  Link to ntkpl   და იტყოდეს, ვითარმედ: უკანასკნელთა მათ ერთი ხოლო ჟამი დაყვეს, და სწორ ჩუენდა ჰყვენ იგინი, რომელთა ვიტჳრთეთ სიმძიმე დღისა და სიცხე.

Verse: 13  Link to ntkpl   ხოლო მან მიუგო ერთსა მათგანსა და ჰრქუა: მოყუასო, არა რას გავნებ შენ, ანუ არა ერთი დრაჰკანი აღგითქუ შენ?

Verse: 14  Link to ntkpl   მიიღე შენი და ვიდოდე! ხოლო მე მნებავს უკანასკნელსა ამას მიცემად, ვითარცა შენ.

Verse: 15  Link to ntkpl   ანუ არა ჯერ-არსა ჩემდა, რაცა მინდეს, ყოფად ჩემსა ზედა? არამედ თუალი შენი ვიდრემე ბოროტ არს, ხოლო მე სახიერ ვარ.

Verse: 16  Link to ntkpl   ესრეთ იყვნენ წინანი უკანა და უკანანი წინა, რამეთუ მრავალნი არიან ჩინებულ და მცირედნი -- რჩეულ.

Verse: 17  Link to ntkpl   და ვითარცა აღვიდოდა იესო იერუსალჱმად, წარიყვანნა ათორმეტნი იგი მოწაფენი თჳსაგან და მგზავრ ეტყოდა მათ:

Verse: 18  Link to ntkpl   აჰა, ესერა, აღვალთ იერუსალჱმად, და ძე კაცისა მიეცეს მღდელთმოძღუართა და მწიგნობართა, და დასაჯონ იგი სიკუდილად.

Verse: 19  Link to ntkpl   და მისცენ იგი წარმართთა კიცხევად და ტანჯვად და ჯუარ-ცუმად, და მესამესა დღესა აღდგეს.

Verse: 20  Link to ntkpl   მაშინ მოუჴდა იესოს დედა ძეთა ზებედესთა ძეთა მისთა თანა, თაყუანის-სცემდა მას და ითხოვდა რასამე მისგან.

Verse: 21  Link to ntkpl   ხოლო თავადმან ჰრქუა მას: რაჲ გნებავს? ჰრქუა მას: თქუ, რაჲთა დასხდენ ორნი ესე ძენი ჩემნი ერთი მარჯუენით შენსა და ერთი მარცხენით შენსა სასუფეველსა შენსა.

Verse: 22  Link to ntkpl   მიუგო იესო და ჰრქუა მათ: არა იცით, რასა ითხოვთ, ძალ-გიცა შესუმად სასუმელი, რომელი მე მეგულვების შესუმად, ანუ ნათლის-ღება, რომელი მე ნათელ-ვიღო, ნათლის-ღებად? ხოლო მათ ჰრქუეს: ძალ-გჳც.

Verse: 23  Link to ntkpl   ჰრქუა მათ იესო: სასუმელი სამე ჩემი შესუათ და ნათლის-ღება, რომელი მე ნათელ-ვიღო, ნათელ-იღოთ, ხოლო დაჯდომა მარჯუენით ჩემსა და მარცხენით არა არს ჩემი მიცემად, არამედ ვიეთდა განმზადებულ არს მამისა მიერ ჩემისა.

Verse: 24  Link to ntkpl   ვითარცა ესმა ესე ათთა მათ, განრისხნეს ორთა მათ ძმათათჳს.

Verse: 25  Link to ntkpl   ხოლო იესო მოუწოდა მათ და ჰრქუა: უწყითა, რამეთუ მთავარნი წარმართთანი უფლებენ მათ ზედა, და დიდ-დიდნი ჴელმწიფებენ მათ ზედა?

Verse: 26  Link to ntkpl   ხოლო თქუენ შორის არა ეგრეთ იყოს, არამედ რომელსა უნებს თქუენ შორის დიდ-ყოფა, იყავნ თქუენდა მსახურ;

Verse: 27  Link to ntkpl   და რომელსა უნებს თქუენ შორის წინა ყოფა, იყოს იგი თქუენდა მონა.

Verse: 28  Link to ntkpl   ვითარცა ძე კაცისა არა მოვიდა, რაჲთამცა იმსახურა, არამედ მსახურებად და მიცემად სული თჳსი საჴსრად მრავალთათჳს.

Verse: 29  Link to ntkpl   და ვითარცა გამოვიდოდეს იგინი იერიქოთ, მისდევდა მას ერი მრავალი.

Verse: 30  Link to ntkpl   და, აჰა, ესერა, ორნი ბრმანი სხდეს გზასა ზედა და ვითარცა ესმა, ვითარმედ იესო წარმოვალს, ჴმობდეს და იტყოდეს: შემიწყალენ ჩუენ, უფალო, ძეო დავითისო!

Verse: 31  Link to ntkpl   ხოლო ერი იგი ჰრისხვიდა მათ, რაჲთა დადუმნენ. ხოლო იგინი უფროს ღაღადებდეს: შემიწყალენ ჩუენ, უფალო, ძეო დავითისო!

Verse: 32  Link to ntkpl   და დადგა იესო, მოუწოდა მათ და ჰრქუა: რაჲ გნებავს, და გიყო თქუენ?

Verse: 33  Link to ntkpl   ჰრქუეს მას: უფალო, რაჲთა აღვიხილნეთ თვალნი ჩუენნი.

Verse: 34  Link to ntkpl   შეეწყალნეს იგინი იესუს და შეახო თუალთა მათთა, და მეყსეულად აღეხილნეს და შეუდგეს მას.

Next part


This text is part of the TITUS edition of Tetraevangelium (redactio mcxetica defectiva).

Copyright TITUS Project, Frankfurt a/M, 20.11.2023. No parts of this document may be republished in any form without prior permission by the copyright holder.