TITUS
Tetraevangelium (redactio mcxetica defectiva)
Part No. 19
Previous part

Chapter: 19 
Verse: 1  Link to ntkpl   და იყო ვითარცა დაასრულნა იესო სიტყუანი ესე, წარვიდა გალილეათ და მივიდა საზღვართა ჰურიასტანისათა, წიაღ იორდანესა.

Verse: 2  Link to ntkpl   და მისდევდა მას ერი მრავალი, და განჰკურნნა იგინი მუნ.

Verse: 3  Link to ntkpl   მაშინ მოუჴდეს მას ფარისეველნი, გამოსცდიდეს მას და ეტყოდეს: უკუეთუ ჯერ-არს კაცისა განტევება ცოლისა თჳსისა ყოვლისათჳს ბრალისა?

Verse: 4  Link to ntkpl   ხოლო იესო მიუგო და ჰრქუა მათ: არა აღმოგიკითხავსა, რამეთუ რომელმან დაჰბადნა დასაბამსა, მამაკაცად და დედაკაცად შექმნნა იგინი?

Verse: 5  Link to ntkpl   და თქუა: ამისთჳს დაუტეოს კაცმან მამა თჳსი და დედა თჳსი და შეეყოს ცოლსა თჳსსა, და იყვნენ ორნივე იგი ერთ ჴორც.

Verse: 6  Link to ntkpl   ვითარმედ არღარა არიან ორ, არამედ ერთ ჴორც. აწ უკუე რომელნი-იგი ღმერთმან შეაუღლნა, კაცი ნუ განაშორებს.

Verse: 7  Link to ntkpl   ხოლო მათ ჰრქუეს მას: რასათჳს უკუე მოსე ამცნო წიგნი განტევებისა მიცემად და განტევებად?

Verse: 8  Link to ntkpl   მიუგო იესო და ჰრქუა მათ, რამეთუ: მოსე გულფიცხელობისა თქუენისათჳს გიბრძანა განტევება ცოლთა თქუენთა, ხოლო დასაბამსა არა ეგრე იყო.

Verse: 9  Link to ntkpl   ხოლო მე გეტყჳ თქუენ, რამეთუ: რომელმან განუტეოს ცოლი თჳსი თჳნიერ სიძვისა და სხუა შეირთოს, იმრუშებს; და რომელმან განტევებული შეირთოს, იგიცა იმრუშებს.

Verse: 10  Link to ntkpl   ჰრქუეს მას მოწაფეთა მისთა: უკეთუ ესოდენი ბრალი არს კაცისა დედაკაცისა თანა, არა შეჰგავს ქორწინება.

Verse: 11  Link to ntkpl   ჰრქუა მათ იესო: არა ყოველთა დაიტიონ სიტყუა ეგე, არამედ რომელთადა მიცემულ არს.

Verse: 12  Link to ntkpl   რამეთუ არიან საჭურისნი, რომელნი მუცლითგან დედისა თჳსისათ საჭურისნი იშვნეს; და არიან საჭურისნი, რომელნი კაცთაგან გამოისაჭურისნეს; და არიან საჭურისნი, რომელთა გამოისაჭურისნეს თავნი თჳსნი სასუფეველისათჳს ცათასა. რომელი შემძლებელ არს დატევნად, დაიტიენ.

Verse: 13  Link to ntkpl   მაშინ მოჰგუარეს მას ყრმები, რაჲთამცა ჴელი დასდვა მათ ზედა და აკურთხნა იგინი. ხოლო მოწაფენი ჰრისხვიდეს მათ.

Verse: 14  Link to ntkpl   ხოლო იესო ჰრქუა მათ: აცადეთ ყრმებსა მაგას მოსლვად ჩემდა და ნუ აყენებთ მაგათ, რამეთუ ეგევითართა არს სასუფეველი ცათა.

Verse: 15  Link to ntkpl   და დაასხნა მათ ზედა ჴელნი. და ვითარცა წარვიდა მიერ,

Verse: 16  Link to ntkpl   აჰა, მო-ვინმე-უჴდა მას და ჰრქუა: მოძღუარო სახიერო, რაჲ კეთილი ვქმნე, რაჲთა მაქუნდეს ცხორება საუკუნო?

Verse: 17  Link to ntkpl   ხოლო იესო ჰრქუა მას: რასა მეტყჳ მე სახიერით? არა ვინ არს სახიერი, გარნა მხოლო ღმერთი. ხოლო უკეთუ გნებავს ცხორებასა შესლვა, დაიმარხენ მცნებანი.

Verse: 18  Link to ntkpl   ჰრქუა მას: რომელნი? ხოლო იესო ჰრქუა მას, ვითარმედ: არა კაც-ჰკლა, არა იპარო, არა იმრუშო, არა ცილი სწამო,

Verse: 19  Link to ntkpl   პატივ-ეც მამასა შენსა და დედასა შენსა და შეიყუარო მოყუსი შენი, ვითარცა თავი თჳსი.

Verse: 20  Link to ntkpl   ჰრქუა მას ჭაბუკმან მან: ესე ყოველი დამიმარხავს სიყრმით ჩემითგან, რაღა მაკლს მე?

Verse: 21  Link to ntkpl   ჰრქუა მას იესო: უკეთუ გნებავს, რაჲთა სრულ იყო, წარვედ და განყიდე მონაგები შენი და მიეც გლახაკთა, და გაქუნდეს საუნჯე ცათა შინა, და მოვედ და შემომიდეგ მე.

Verse: 22  Link to ntkpl   და ვითარცა ესმა სიტყუა ესე ჭაბუკსა მას, წარვიდა მწუხარე, რამეთუ იყო იგი მდიდარ ფრიად.

Verse: 23  Link to ntkpl   ხოლო იესო ჰრქუა მოწაფეთა თჳსთა: ამინ გეტყჳ თქუენ, რამეთუ მდიდარი ძნიად შევიდეს სასუფეველსა ცათასა.

Verse: 24  Link to ntkpl   და მერმე გეტყჳ თქვენ: უადვილეს არს აქლემი განსლვად ჴურელსა ნემსისა, ვიდრე მდიდარი შესლვად სასუფეველსა ცათასა.

Verse: 25  Link to ntkpl   ვითარცა ესმა ესე მოწაფეთა მისთა, განუკჳრდებოდა ფრიად და იტყოდეს: და ვისმე ჴელ-ეწიფების ცხოვნებად?

Verse: 26  Link to ntkpl   მიხედა იესო და ჰრქუა მათ: კაცთაგან შეუძლებელ არს ესე, ხოლო ღმრთისა მიერ ყოველივე შესაძლებელ არს.

Verse: 27  Link to ntkpl   მაშინ მიუგო პეტრე და ჰრქუა მას: აჰა, ესერა, ჩუენ ყოველი დაუტევეთ და შეგიდეგით შენ: რამე იყოს ჩვენდა?

Verse: 28  Link to ntkpl   ხოლო იესო ჰრქუა მათ: ამინ გეტყჳ თქუენ, რამეთუ თქუენ, რომელნი-ეგე შემომიდეგით მე, მერმესა მას შობასა, რაჟამს დაჯდეს ძე კაცისა საყდართა დიდებისა თჳსისათა, დასხდეთ თქუენცა ათორმეტთა საყდართა განშჯიდეთ ათორმეტთა ტომთა ისრაჱლისათა.

Verse: 29  Link to ntkpl   და ყოველმან რომელმან დაუტევა სახლი, გინა ძმანი, ანუ დანი, ანუ მამა, ანუ დედა, ანუ ცოლი, ანუ შვილნი, ანუ აგარაკნი სახელისა ჩემისათჳს, ასწილად მიიღოს და ცხოვრება საუკუნო დაიმკჳდროს.

Verse: 30  Link to ntkpl   ხოლო მრავალნი იყვნენ პირველნი უკანა, და უკანანი -- წინა.

Next part


This text is part of the TITUS edition of Tetraevangelium (redactio mcxetica defectiva).

Copyright TITUS Project, Frankfurt a/M, 20.11.2023. No parts of this document may be republished in any form without prior permission by the copyright holder.