TITUS
Tetraevangelium (redactio mcxetica defectiva)
Part No. 15
Previous part

Chapter: 15 
Verse: 1  Link to ntkpl   მაშინ მოუჴდეს იესოს იერუსალჱმით ფარისეველნი და მწიგნობარნი და ეტყოდეს:

Verse: 2  Link to ntkpl   რაჲსათჳს მოწაფენი შენნი გარდაჰვლენ მოძღურებასა ხუცესთასა? რამეთუ არა დაიბანნიან ჴელნი, რაჟამს პურსა ჭამედ.

Verse: 3  Link to ntkpl   ხოლო იესო მიუგო და ჰრქუა მათ: და რაჲსათჳს თქუენცა გარდახვალთ მცნებასა ღმრთისასა მოძღურებითა თქუენითა?

Verse: 4  Link to ntkpl   რამეთუ ღმერთმან თქუა: პატივ-ეც მამასა შენსა და დედასა შენსა; და რომელმან თქუას ბოროტი მამისათჳს, გინა დედისა, სიკუდილით მოკუედინ.

Verse: 5  Link to ntkpl   ხოლო თქუენ სთქუთ: რომელმან ჰრქუას მამასა თჳსსა, გინა დედასა თჳსსა: ნიჭი, რომელი ჩემგან სარგებელ გეყო, -- და არა პატივ-სცეს მამასა, ანუ დედასა თჳსსა, --

Verse: 6  Link to ntkpl   ესევითართა დაუმტკიცებელ-ჰყავთ მცნება ღმრთისაჲ მოძღურებითა თქუენითა.

Verse: 7  Link to ntkpl   ორგულნო, კეთილად წინაწარმეტყუელებდა თქუენთჳს ესაია და თქუა:

Verse: 8  Link to ntkpl   მახლობელ არს ჩემდა ერი ესე პირითა მათითა და ბაგითა მათითა პატივ-მცემს მე, ხოლო გულნი მათნი შორს განშორებულ არიან ჩემგან,

Verse: 9  Link to ntkpl   ამაოდ მმსახურებენ მე, რამეთუ ასწავებენ მოძღურებასა და მცნებასა კაცთასა.

Verse: 10  Link to ntkpl   და მოუწოდა ერსა მას და ეტყოდა: ისმინეთ და გულისხმა-ყავთ.

Verse: 11  Link to ntkpl   არა თუ პირით შემავალი შეაგინებს კაცსა, არამედ პირით გამომავალი შეაგინებს კაცსა.

Verse: 12  Link to ntkpl   მაშინ მოუჴდეს იესოს მოწაფენი მისნი და ჰრქუეს მას: უწყია, რამეთუ ფარისეველთა რა ესმა სიტყუა იგი, დაჰბრკოლდეს?

Verse: 13  Link to ntkpl   ხოლო თავადმან მიუგო და ჰრქუა მათ: ყოველი ნერგი, რომელი არა დაჰნერგა მამამან ჩემმან ზეცათამან, ძირითურთ აღიფხურას,

Verse: 14  Link to ntkpl   უტევენით ეგე, რამეთუ ბრმანი არიან და წინამძღუარნი ბრმათანი, ხოლო ბრმა ბრმასა, თუ წინაუძღჳნ, ორნივე მთხრებლსა შთაცჳვიან.

Verse: 15  Link to ntkpl   მიუგო პეტრე და ჰრქუა მას: გამოგჳთარგმანე ჩუენ იგავი ესე.

Verse: 16  Link to ntkpl   ხოლო იესო ჰრქუა მას: თქუენცა უგულისხმოვე ხართა?

Verse: 17  Link to ntkpl   და არა გიცნობიეს, რამეთუ ყოველი, რომელი შევალს პირით, მუცლად შევალს და განსავალით განვალს?

Verse: 18  Link to ntkpl   ხოლო გამომავალი პირით გულისაგან გამოვალს და იგი შეაგინებს კაცსა.

Verse: 19  Link to ntkpl   რამეთუ გულისაგან გამოვლენ გულისსიტყუანი ბოროტნი, კაცის-კლვანი, მრუშებანი, სიძვანი, პარვანი, ცილის-წამებანი, გმობანი.

Verse: 20  Link to ntkpl   ესენი არიან, რომელნი შეაგინებენ კაცსა, ხოლო უბანელითა ჴელითა ჭამა არა შეაგინებს კაცსა.

Verse: 21  Link to ntkpl   და წარვიდა მიერ იესო და მივიდა ადგილთა ტჳროსისა და სიდონისათა.

Verse: 22  Link to ntkpl   და, აჰა, ესერა, დედაკაცი ქანანელი საზღვართა მათგან გამოვიდა, ღაღადებდა და იტყოდა: შემიწყალე მე, უფალო, ძეო დავითისო, რამეთუ ასული ჩემი ბოროტად ეშმაკეულ არს.

Verse: 23  Link to ntkpl   ხოლო იესო არა მიუგო მას სიტყვა და მოუჴდეს მოწაფენი იესოს და ჰრქუეს მას: განუტევე ესე, რომელი ღაღადებს და შეგჳდგეს ჩუენ.

Verse: 24  Link to ntkpl   ჰრქუა მათ იესო: არა ვიდრე მოვლინებულ ვარ, გარნა ცხოვართა მათ წარწყმედულთა სახლისა ისრაჱლისათა.

Verse: 25  Link to ntkpl   ხოლო იგი მოუჴდა და თაყვანის-სცემდა მას და ეტყოდა: უფალო, შემიწყალე მე!

Verse: 26  Link to ntkpl   ხოლო თავადმან მიუგო და ჰრქუა მას: არა კეთილ არს მოღებად პური შვილთაგან და დადებად ძაღლთა.

Verse: 27  Link to ntkpl   ხოლო მან ჰრქუა: ჰე, უფალო, რამეთუ ძაღლნიცა ჭამედ ნაბიჭევისაგან, რომელ გარდამოსცჳვინ ტაბლისაგან უფალთა მათთასა.

Verse: 28  Link to ntkpl   მაშინ მიუგო იესო და ჰრქუა მას: დედაკაცო! დიდ არს სარწმუნოება ეგე შენი; გეყავნ შენ, ვითარცა გნებავს. -- და განიკურნა ასული იგი მისი მიერ ჟამითგან.

Verse: 29  Link to ntkpl   და წარვიდა მიერ იესო და მოვიდა ზღჳსკიდესა მას გალილეაჲსასა და აღვიდა მთასა და დაჯდა მუნ.

Verse: 30  Link to ntkpl   და მოუჴდა მას ერი მრავალი, რომელთა ჰყვა მათ თანა მკელობლები, ბრმები, ყრუნი, ქუეწარმძრომელნი და სხუანი მრავალნი თითოსახეთაგან სენთა შეპყრობილნი. და დასხნეს იგინი ფერჴთა თანა მისთა, და განკურნნა იგინი.

Verse: 31  Link to ntkpl   ვიდრე უკჳრდაცა ერსა მას, ხედვიდეს რაჲ, ვითარ-იგი ყრუნი იტყოდეს, და მკელობელნი ვიდოდეს, და ღრეკილნი განიკურნებოდეს, და ბრმანი ხედვიდეს და ადიდებდეს ღმერთსა ისრაჱლისასა.

Verse: 32  Link to ntkpl   ხოლო იესო მოუწოდა მოწაფეთა თჳსთა და ჰრქუა მათ: მეწყალის ერი ესე, რამეთუ, აჰა, ესერა, სამი დღე არს, და მელიან მე და არარაჲ აქუს, რაჲმცა ჭამეს; და განტევება მათი უზმათა არა მნებავს, ნუუკუე დაცჳვენ გზასა ზედა.

Verse: 33  Link to ntkpl   ჰრქუეს მას მოწაფეთა მისთა: ვინაჲ არს ჩუენდა უდაბნოსა ზედა პური ესოდენი, ვითარმცა განძღა ერი ესოდენი?

Verse: 34  Link to ntkpl   ჰრქუა მათ იესო: რაოდენი პური გაქუს? ხოლო მათ ჰრქუეს მას: შჳდი პური და მცირედ თევზი.

Verse: 35  Link to ntkpl   და უბრძანა ერსა მას დასხდომა ქუეყანასა ზედა.

Verse: 36  Link to ntkpl   და მოიღო შჳდი იგი პური და თევზნი, ჰმადლობდა, განტეხა და მისცემდა მოწაფეთა, და მოწაფენი მისცემდეს ერსა მას.

Verse: 37  Link to ntkpl   ჭამეს ყოველთა და განძღეს; და აღიღეს ნეშტი იგი ნამუსრევი შჳდი სფირიდი სავსე.

Verse: 38  Link to ntkpl   ხოლო რომელთა ჭამეს, იყუნეს ოთხ ათას მამანი ხოლო, თჳნიერ ყრმებისა და დედებისა.

Verse: 39  Link to ntkpl   და განუტევა ერი იგი და აღვიდა იესო ნავსა და მოვიდა საზღვართა მაგდალოჲსათა.

Next part


This text is part of the TITUS edition of Tetraevangelium (redactio mcxetica defectiva).

Copyright TITUS Project, Frankfurt a/M, 20.11.2023. No parts of this document may be republished in any form without prior permission by the copyright holder.