TITUS
Tetraevangelium (redactio mcxetica defectiva)
Part No. 7
Previous part

Chapter: 7 
Verse: 1  Link to ntkpl   ნუ განიკითხავთ, რაჲთა არა განიკითხნეთ,

Verse: 2  Link to ntkpl   რამეთუ რომლითა განკითხვითა განიკითხვიდეთ, განიკითხნეთ, და რომლითა საწყაულითა მიუწყოთ, მოგეწყოს თქუენ.

Verse: 3  Link to ntkpl   ანუ რასა ხედავ წუელსა თუალსა შინა ძმისა შენისასა და დჳრესა თუალსა შინა შენსა არა განიცდი?

Verse: 4  Link to ntkpl   ანუ ვითარ ჰრქუა ძმასა შენსა: მაცადე, და აღმოგიღო წუელი თუალისაგან შენისა, და, აჰა, ეგერა, დჳრე თუალსა შინა შენსა!

Verse: 5  Link to ntkpl   ორგულო, აღმოიღე პირველად დჳრე თუალისაგან შენისა, და მაშინ იხილო აღმოღებად წუელი თუალისაგან ძმისა შენისა.

Verse: 6  Link to ntkpl   ნუ მისცემთ სიწმიდესა ძაღლთა, ნუცა დაუფენთ მარგალიტსა თქუენსა წინაშე ღორთა, ნუუკუე დათრგუნონ იგი ფერჴითა მათითა და მოიქცენ და განგხეთქნენ თქუენ.

Verse: 7  Link to ntkpl   ითხოვდით, და მოგეცეს თქუენ; ეძიებდით და ჰპოოთ; ირეკდით, და განგეღოს თქუენ.

Verse: 8  Link to ntkpl   რამეთუ ყოველი რომელი ითხოვდეს მოიღოს; და რომელი ეძიებდეს -- პოვოს, და რომელი ირეკდეს - განეღოს.

Verse: 9  Link to ntkpl   ანუ ვინ არს თქუენგანი კაცი, რომელსა სთხოვდეს ძე თჳსი პურსა, ნუ ქვა მისცესა მას?

Verse: 10  Link to ntkpl   გინა თუ თევზსა სთხოვდეს, ნუ გუელი მისცეს მას?

Verse: 11  Link to ntkpl   უკუეთუ თქუენ უკეთურთა იცით მისაცემელი კეთილი მიცემად შვილთა თქუენთა, რაოდენ უფროსღა მამამან თქუემან ზეცათამან მოსცეს კეთილი, რომელნი სთხოვდენ მას!

Verse: 12  Link to ntkpl   ყოველი, რომელი გინდეს თქუენ, რაჲთა გიყონ კაცთა, ეგრეცა თქუენ ჰყვით მათა მიმართ, რამეთუ ესრეთ არს შჯული და წინაწარმეტყუელნი.

Verse: 13  Link to ntkpl   შევედით იწროსაგან ბჭისა, რამეთუ ვრცელ არს ბჭე და ფართო არს გზა, რომელსა მიჰყავს წარსაწყმედელად, და მრავალნი ვლენან მას ზედა.

Verse: 14  Link to ntkpl   ვითარ-იგი იწრო არს ბჭე და საჭირველ გზა, რომელი მიიყვანებს ცხორებასა, და მცირენი არიან, რომელნი ჰპოებენ მას.

Verse: 15  Link to ntkpl   ეკრძალენით ცრუწინასწარმეტყუელთაგან, რომელნი მოვიდოდიან თქუენდა სამოსლითა ცხოვართაჲთა, ხოლო შინაგან იყვნენ მგელ მტაცებელ.

Verse: 16  Link to ntkpl   ნაყოფთა მათთაგან იცნნეთ იგინი. ნუუკუე შეკრიბიან ეკალთაგან ყურძენი ანუ კუროსთავთაგან ლეღჳ?

Verse: 17  Link to ntkpl   ესრეთ ყოველმან ხემან კეთილმან ნაყოფი კეთილი გამოიღოს, ხოლო ხემან ხენეშმან ნაყოფი ხენეში გამოიღის.

Verse: 18  Link to ntkpl   ვერ ჴელ-ეწიფების ხესა კეთილსა ნაყოფისა ხენეშისა გამოღებად და არცა ხესა ხენეშსა ნაყოფი კეთილი ყოფად.

Verse: 19  Link to ntkpl   ყოველმან ხემან რომელმან არა ყოს ნაყოფი კეთილი, მოეკუეთოს და ცეცხლსა დაედვას.

Verse: 20  Link to ntkpl   ნაყოფთა სამე მათთაგან იცნნეთ იგინი.

Verse: 21  Link to ntkpl   არა ყოველმან რომელმან მრქუას მე: უფალო, უფალო, და შევიდეს იგი სასუფეველსა ცათასა, არამედ რომელმან ყოს ნება მამისა ჩემისა ზეცათასა.

Verse: 22  Link to ntkpl   მრავალთა მრქუან მე მას დღესა შინა: უფალო, უფალო, არა სახელითა შენითა ვწინაწარმეტყუელებდითა და სახელითა შენითა ეშმაკნი განვასხენით და სახელითა შენითა ძალნი მრავალნი ვქმნენით?

Verse: 23  Link to ntkpl   მას ჟამსა ვრქუა მათ, ვითარმედ: არა გიცნი თქუენ, განმეშორენით ჩემგან ყოველნი მოქმედნი უსჯულოებისანი.

Verse: 24  Link to ntkpl   ყოველმან რომელმან ისმინნეს სიტყუანი ესე ჩემნი და ყვნეს იგინი, ვამსგავსო იგი კაცსა გონიერსა, რომელმან აღაშენა სახლი თჳსი კლდესა ზედა.

Verse: 25  Link to ntkpl   და გარდამოჴდა წჳმა, მოვიდეს მდინარენი, ქროდეს ქარნი და ეკუეთნეს სახლსა მას და არა დაეცა, რამეთუ დაფუძნებულ იყო კლდესა ზედა.

Verse: 26  Link to ntkpl   და ყოველმან რომელმან ისმინნეს სიტყუანი ესე ჩემნი და არა ყვნეს იგინი, ემსგავსოს იგი კაცსა ცოფსა, რომელმან აღაშენა სახლი თჳსი ქჳშასა ზედა.

Verse: 27  Link to ntkpl   და გარდამოჴდა წჳმა, მოვიდეს მდინარენი, ქროდეს ქარნი და ეკუეთნეს სახლსა მას, და დაეცა. და იყო დაცემა იგი მისი დიდ ფრიად.

Verse: 28  Link to ntkpl   და იყო რაჟამს დაასრულნა იესო სიტყუანი ესე, განუკჳრდებოდა ერსა მას მოძღურება იგი მისი.

Verse: 29  Link to ntkpl   რამეთუ იყო სწავლა იგი მისი მათა მიმართ, ვითარცა-იგი ვის ჴელმწიფება აქუნ, და არა ვითარ-იგი მწიგნობარნი მათნი და ფარისვველნი.

Next part


This text is part of the TITUS edition of Tetraevangelium (redactio mcxetica defectiva).

Copyright TITUS Project, Frankfurt a/M, 20.11.2023. No parts of this document may be republished in any form without prior permission by the copyright holder.