TITUS
Tetraevangelium (redactio mcxetica defectiva)
Part No. 6
Previous part

Chapter: 6 
Verse: 1  Link to ntkpl   ეკრძალენით ქველისსაქმესა თქუენსა, რაჲთა არა ჰყოთ წინაშე კაცთა სახილველად მათა; უკუეთუ არა, სასყიდელი არა გაქუს მამისა თქუენისაგან ზეცათასა.

Verse: 2  Link to ntkpl   ხოლო რაჟამს იქმოდი ქველისსაქმესა, ნუ ჰქადაგებ წინაშე შენსა, ვითარცა-იგი ორგულთა ყვიან შესაკრებელთა მათთა და უბანთა ზედა, რაჲთა იდიდნენ კაცთაგან. ამენ გეტყჳ თქუენ: მიუღებიეს სასყიდელი მათი.

Verse: 3  Link to ntkpl   ხოლო შენ რაჟამს ჰყოფდე ქველისსაქმესა, ნუ სცნობნ მარცხენა შენი, რაჲსა იქმოდის მარჯუენა შენი.

Verse: 4  Link to ntkpl   რაჲთა იყოს ქველისსაქმე შენი ფარულად; და მამამან შენმან, რომელი ჰხედავს დაფარულთა, მოგაგოს შენ ცხადად.

Verse: 5  Link to ntkpl   და რაჟამს ილოცვიდე, არა იყო ეგრე, ვითარცა იგი ორგულნი, რამეთუ უყუარან შესაკრებელთა შორის და უბანთა ზედა დგომა და ლოცვა, რაჲთა უჩუენონ კაცთა. ამენ გეტყჳ თქუენ: მიუღებიეს სასყიდელი მათი.

Verse: 6  Link to ntkpl   ხოლო შენ რაჟამს ილოცვიდე, შევედ საუნჯესა შენსა და დაჴაშ კარი შენი და ილოცე მამისა შენისა მიმართ ფარულად, და მამა შენი რომელი ხედავს დაფარულთა, მოგაგოს შენ ცხადად.

Verse: 7  Link to ntkpl   და რაჟამს ილოცვიდეთ, ნუ მრავალსა იტყჳთ, ვითარცა-იგი წარმართთაგანნი, რამეთუ ჰგონებედ, ვითარმედ მრავლისმეტყველებითა მათითა ისმინოს მათი.

Verse: 8  Link to ntkpl   ხოლო თქუენ ნუ ემსგავსებით მათ, რამეთუ იცის მამამან თქუენმან, რაჲ-იგი გიჴმს თქუენ, ვიდრე თხოვადმდე თქუენდა მისგან.

Verse: 9  Link to ntkpl   ხოლო თქუენ ესრეთ ილოცევდით: მამაო ჩუენო, რომელი ხარ ცათა შინა, წმიდა იყავნ სახელი შენი,

Verse: 10  Link to ntkpl   მოვედინ სუფევა შენი, იყავნ ნება შენი, ვითარცა ცათა შინა, ეგრეცა ქუეყანასა ზედა.

Verse: 11  Link to ntkpl   პური ჩუენი არსობისა მომეც ჩუენ დღეს

Verse: 12  Link to ntkpl   და მომიტევენ ჩუენ თანანადებნი ჩუენნი, ვითარცა ჩუენ მიუტევებთ, თანამდებთა მათ ჩუენთა.

Verse: 13  Link to ntkpl   და ნუ შემიყვანებ ჩუენ განსაცდელსა, არამედ მიჴსნენ ჩუენ ბოროტისაგან, რამეთუ შენი არს სუფევა და ძალი და დიდება საუკუნეთა მიმართ, ამენ.

Verse: 14  Link to ntkpl   უკუეთუ მიუტევნეთ თქუენ კაცთა შეცოდებანი მათნი, მოგიტევნენ თქუენცა მამამან თქუენმან ზეცათამან.

Verse: 15  Link to ntkpl   ხოლო უკეთუ არა მიუტევნეთ კაცთა შეცოდებანი მათნი, არცა მამამან თქუენმან მოგიტევნეს თქუენ შეცოდებანი თქუენნი.

Verse: 16  Link to ntkpl   და რაჟამს იმარხვიდეთ, ნუ იყოფით, ვითარცა-იგი ორგულნი, მწუხარე, რამეთუ განირყუნნიან პირნი მათნი, რაჲთა ეჩუენნენ კაცთა მმარხველად. ამენ გეტჳ თქვენ: მიუღებიეს სასყიდელი მათი.

Verse: 17  Link to ntkpl   ხოლო შენ რაჟმს იმარხვიდე, იცხე თავი შენი და დაიბანე პირი შენი.

Verse: 18  Link to ntkpl   რაჲთა არა ეჩუენო კაცთა მმარხველად, არამედ მამასა შენსა დაფარულად, და მამამან შენმან, რომელი ხედავს დაფარულთა, მოგაგოს შენი ცხადად.

Verse: 19  Link to ntkpl   ნუ იუნჯებთ თქუენ საუნჯეთა ქუეყანასა ზედა, სადა მღილმან და მჭამელმან განრყუნის, და სადა მპარავთა დათხარიან და განიპარიან.

Verse: 20  Link to ntkpl   ხოლო თქუენ იუნჯებდით საუნჯეთა ცათა შინა, სადა არცა მღილმან, არცა მჭამელმან განრყუნის, და სადა არცა მპარავთა დათხარიან და განიპარიან.

Verse: 21  Link to ntkpl   რამეთუ სადაცა არნ საუნჯე თქუენი, მუნცა იყოს გული თქუენი.

Verse: 22  Link to ntkpl   სანთელი გუამისა არს თუალი. უკუეთუ თუალი შენი განმარტებულ იყოს, ყოველი გუამი შენი ნათელ იყოს.

Verse: 23  Link to ntkpl   ხოლო უკუეთუ თუალი შენი ბოროტ იყოს, ყოველი გუამი შენი ბნელ იყოს. უკეთუ ნათელი იგი შენ შორის ბნელ არს, ბნელი იგი რაოდენმე?

Verse: 24  Link to ntkpl   ვერვის ჴელ-ეწიფების ორთა უფალთა მონებად: ანუ ერთი იგი მოიძულოს და სხუა იგი შეიყუაროს, ანუ ერთისა მის თავს-იდვას და ერთი იგი შეურაცხ-ყოს. ვერ ჴელ-ეწიფების ღმრთისა მონებად და მამონაჲსა.

Verse: 25  Link to ntkpl   ამისთჳს გეტყჳ თქუენ: ნუ ჰზრუნავთ სულისა თქუენისათჳს, რა სჭამოთ და რა ჰსუათ; ნუცა ჴორცთა თქუენთათჳს, რა შეიმოსოთ. ანუ არა სული უფროს არს საზრდელისა და გუამი -- სამოსლისა?

Verse: 26  Link to ntkpl   მიჰხედეთ მფრინველთა ცისათა, რამეთუ არა სთესვენ, არცა მკიან, არცა შეიკრებენ საუნჯეთა, და მამა თქუენი ზეცათა ზრდის მათ. არამე უფროს თქუენ უმჯობეს ხართა მფრინველთა?

Verse: 27  Link to ntkpl   ანუ ვინმე თქუენგანი ზრუნვიდეს და შეუძლოს შეძინებად ჰასაკსა თჳსსა წყრთა ერთ?

Verse: 28  Link to ntkpl   და სამოსლისათჳს რასა ჰზრუნავთ? განიცადენით შროშანნი ველისანი, ვითარ-იგი აღორძნდის! არა შურებინ, არცა სთავნ.

Verse: 29  Link to ntkpl   ხოლო გეტყჳ თქუენ, რამეთუ არცაღა სოლომონ ყოველსა მას დიდებასა მისსა შეიმოსა, ვითარცა ერთი ამათგანი.

Verse: 30  Link to ntkpl   უკეთუ თივა იგი ველისა, რომელი დღეს არს და ხვალე თორნესა შთაეგზნის, ღმერთმან ესრეთ შემოსის, არამე უფროს თქუენა, მცირედმორწუნენო?

Verse: 31  Link to ntkpl   ნუ ჰზრუნავთ და იტყჳთ, რა ვჭამოთ, ანუ რა ვსუათ, ანუ რა შევიმოსოთ?

Verse: 32  Link to ntkpl   რამეთუ ამას ყოველსა წარმართნი ეძიებენ, რამეთუ იცის მამამან თქუენმან, რა გიჴმს ამათ ყოველთაგანი.

Verse: 33  Link to ntkpl   ხოლო თქუენ ეძიებდით პირველად სასუფეველსა ღმრთისასა და სიმართლესა მისსა, და ესე ყოველი შეგეძინოს თქუენ.

Verse: 34  Link to ntkpl   ნუ ჰზრუნავთ ხვალისათჳს, რამეთუ ხვალემან იზრუნოს თავისა თჳსისა. კმა არს დღისა მის სიბოროტე თჳსი.

Next part


This text is part of the TITUS edition of Tetraevangelium (redactio mcxetica defectiva).

Copyright TITUS Project, Frankfurt a/M, 20.11.2023. No parts of this document may be republished in any form without prior permission by the copyright holder.