TITUS
Tetraevangelium (redactio athonensis)
Part No. 79
Previous part

Chapter: 11 


Verse: 1  Link to ntkpl   იყო ვინმე უძლური ლაზარე ბეთანიაჲთ, დაბისაგან მარიამისა და მართაჲსა, დისა მისისა.

Verse: 1V    მარიამისსა K; მართაჲსსა K.


Verse: 2  Link to ntkpl   ესე იყო მარიამ, რომელმან სცხო ნელსაცხებელი უფალსა და თმითა თჳსითა წარჰჴოცნა ფერჴნი მისნი, რომლისაჲ ძმაჲ მისი ლაზარე სნეულ იყო.


Verse: 3  Link to ntkpl   მიუვლინეს იესუს დათა მისთა და ჰრქუეს: უფალო, აჰა, რომელი გიყუარს, სნეულ არს.


Verse: 4  Link to ntkpl   ხოლო ვითარცა ესმა იესუს, თქუა: ესე სნეულებაჲ არა არს სასიკუდინჱ, არამედ დიდებისათჳს ღმრთისა, რაჲთა იდიდოს ძე ღმრთისაჲ მისგან.

Verse: 4V    სასიკუდინე HIK; ძეჱ Q.


Verse: 5  Link to ntkpl   უყუარდა იესუს მართა და დაჲ მისი და ლაზარე.


Verse: 6  Link to ntkpl   ვითარცა ესმა, რამეთუ სნეულ არს, მაშინ და-ღა-ადგრა ადგილსა მას, სადაცა იყო, ორ დღე.

Verse: 6V    და ვითარცა K; დაადგრა K; დღჱ Q.


Verse: 7  Link to ntkpl   მერმე, ამისა შემდგომად, ჰრქუა მოწაფეთა თჳსთა: გუალეთ, წარვიდეთ კუალად ჰურიასტანად.

Verse: 7V    ამისსა K; გუალე Q.


Verse: 8  Link to ntkpl   ჰრქუეს მას მოწაფეთა: მოძღუარ, აწღა გეძიებდეს შენ ჰურიანი ქვისა დაკრებად, და კუალად მუნვე მიხუალა?


Verse: 9  Link to ntkpl   ჰრქუა მას იესუ: არა ათორმეტნი ჟამნი არიანა დღისანი? უკუეთუ ვინმე ვიდოდის დღისი, არა წარსცეს ფერჴი, რამეთუ ნათელსა ამის სოფლისასა ხედავს.


Verse: 10  Link to ntkpl   და უკუეთუ ვინმე ვიდოდის ღამესა შინა, უბრკუმეს მას, რამეთუ ნათელი არა არს მას შინა.

Verse: 10V    უკუჱთუ H; ნთ̃ლ H.


Verse: 11  Link to ntkpl   ესე თქუა და ამისა შემდგომად ჰრქუა მათ: ლაზარე, მეგობარმან ჩემმან, დაიძინა, არამედ მე მივიდე და განვაღჳძო იგი.

Verse: 11V    ამისსა K.


Verse: 12  Link to ntkpl   ჰრქუეს მას მოწაფეთა: უფალო, უკუეთუ დაიძინა, ცხონდეს.


Verse: 13  Link to ntkpl   ხოლო იესუ ჰრქუა სიკუდილისა მისისათჳს, და მათ ეგონა, ვითარმედ მძინარებისათჳს ძილისა თქუა.


Verse: 14  Link to ntkpl   მაშინ ჰრქუა მათ იესუ განცხადებულად: ლაზარე მოკუდა.


Verse: 15  Link to ntkpl   და მე მიხარის თქუენთჳს, რაჲთა გრწმენეს ჩემი, რამეთუ არა ვიყავ მუნ. არამედ მოგუალეთ, მივიდეთ მისა.

Verse: 15V    მისსა K.


Verse: 16  Link to ntkpl   ჰრქუა უკუე თომა, რომელსა ერქუა მარჩბივ, მისთანათა მათ მოწაფეთა: მოგუალეთ, მივიდეთ, რაჲთა მოვწყდეთ ჩუენცა მის თანა.

Verse: 16V    უკუჱ QHIK; მოვსწყდეთ QHIK.


Verse: 17  Link to ntkpl   და ვითარცა მოვიდა იესუ ბეთანიად, პოვა იგი, რამეთუ ოთხი დღე აქუნდა საფლავსა შინა.


Verse: 18  Link to ntkpl   ხოლო იყო ბეთანიაჲ მახლობელ იერუსალჱმსა ვითარ ათხუთმეტ ოდენ უტევან.


Verse: 19  Link to ntkpl   და მრავალნი ჰურიათაგანნი მოსრულ იყვნეს მართაჲსა და მარიამისა, რაჲთა ნუგეშინის-სცენ მათ ძმისა მათისათჳს.

Verse: 19V    მართაჲსსა K; მარიამისსა HIK.


Verse: 20  Link to ntkpl   ხოლო მართას ვითარცა ესმა, რამეთუ იესუ მოვალს, მიეგებვოდა მას, ხოლო მარიამ სახლსა შინა ჯდა.


Verse: 21  Link to ntkpl   ჰრქუა მართა იესუს: უფალო, უკუეთუმცა აქა იყავ, არამცა მომკუდარ იყო ძმაჲ იგი ჩემი,


Verse: 22  Link to ntkpl   არამედ და აწცა უწყი, ვითარმედ: რაჲცა-იგი სთხოო ღმერთსა, მოგცეს შენ ღმერთმან.


Verse: 23  Link to ntkpl   ჰრქუა მას იესუ: აღდგეს ძმაჲ შენი.


Verse: 24  Link to ntkpl   ჰრქუა მას მართა: უწყი, რამეთუ აღდგეს აღდგომასა მას უკუანაჲსკნელსა დღესა.


Verse: 25  Link to ntkpl   ჰრქუა მას იესუ: მე ვარ აღდგომაჲ და ცხორებაჲ. რომელსა ჰრწმენეს ჩემი, მო-ღათუ-კუდეს, ცხოვნდესვე.

Verse: 25V    ცხონდესვე QHI.


Verse: 26  Link to ntkpl   და ყოველი, რომელი ცოცხალ არს და ჰრწმენეს ჩემი, არა მოკუდეს იგი უკუნისამდე. გრწამსა ესე?


Verse: 27  Link to ntkpl   ჰრქუა მას მართა: ჰე, უფალო, მრწამს, რამეთუ შენ ხარ ქრისტჱ, ძჱ ღმრთისაჲ, მომავალი სოფლად.

Verse: 27V    ჰჱ QIK; ქრისტე HIK; ძე HIK.


Verse: 28  Link to ntkpl   და ვითარცა ესე თქუა, წარვიდა და მოუწოდა მარიამს, დასა თჳსსა, იდუმალ და ჰრქუა მას: მოძღუარი მოსრულ არს და გიწესს შენ.


Verse: 29  Link to ntkpl   ხოლო მას ვითარცა ესმა, აღდგა ადრე და მივიდოდა მისა.

Verse: 29V    მას ] მარიამს K; მივიდოდა ] მოვიდოდა Q; მისსა K.


Verse: 30  Link to ntkpl   რამეთუ არღა მოსრულ იყო იესუ დაბად, არამედ მუნღა იყო ადგილსა მას, სადაცა მიეგებვოდა მას მართა.


Verse: 31  Link to ntkpl   ხოლო ჰურიანი იგი, რომელნი იყვნეს მის თანა სახლსა შინა და ნუგეშინის-სცემდეს მათ, ვითარცა იხილეს მარიამ, რამეთუ ადრე აღდგა და გამოვიდა, მისდევდეს მას, ჰგონებდეს, ვითარმედ საფლავად მივალს ტირილად მისა.

Verse: 31V    მისსა K.


Verse: 32  Link to ntkpl   ხოლო მარიამ ვითარცა მოვიდა, სადა-იგი იყო იესუ, ვითარცა იხილა იგი, დავარდა ფერჴთა მისთა თანა და ჰრქუა მას: უფალო, უკუეთუმცა აქა ყოფილ იყავ, არამცა მომკუდარ იყო ძმაჲ იგი ჩემი.


Verse: 33  Link to ntkpl   ხოლო იესუ ვითარცა იხილა იგი, რამეთუ ტიროდა, და მის თანა მოსრულნი იგი ჰურიანიცა ტიროდეს, შეძრწუნდა სულითა, ვითარცა რისხვით,


Verse: 34  Link to ntkpl   და ჰრქუა მათ: სადა დასდევით იგი? -- ჰრქუეს მას: მოვედ და იხილე!


Verse: 35  Link to ntkpl   და ცრემლოოდა იესუცა.


Verse: 36  Link to ntkpl   იტყოდეს უკუე ჰურიანი იგი: აჰა, ვითარ სამე უყუარდა იგი!

Verse: 36V    უკუჱ QHIK.


Verse: 37  Link to ntkpl   ვიეთნიმე მათგანნი იტყოდეს: არამცა ეძლო ამას, რომელმან აღუხილნა თუალნი ბრმასა, ყოფად რაჲმე, რაჲთამცა ესეცა არა მოკუდა?


Verse: 38  Link to ntkpl   ხოლო იესუ კუალად, ვითარცა განრისხებული თავსა შორის თჳსსა, მოვიდა საფლავსა მას. ხოლო იყო ქუაბი, და ლოდი ზედაედვა მას.


Verse: 39  Link to ntkpl   ჰრქუა მათ იესუ: აღიღეთ ლოდი ეგე! -- ჰრქუა მას მართა, დამან მის მკუდრისამან: უფალო, ყროდისღა, რამეთუ მეოთხე დღე არს.


Verse: 40  Link to ntkpl   ჰრქუა მას იესუ: არა გარქუ შენ, ვითარმედ: უკუეთუ გრწმენეს, იხილო დიდებაჲ ღმრთისაჲ?


Verse: 41  Link to ntkpl   აღიღეს უკუე ლოდი იგი, სადა მდებარე იყო მკუდარი იგი. ხოლო იესუ აღიხილნა თუალნი ზეცად და თქუა: მამაო, გმადლობ შენ, რამეთუ ისმინე ჩემი,

Verse: 41V    უკუჱ QHIK.


Verse: 42  Link to ntkpl   და მე ვიცი, რამეთუ მარადის ისმენ ჩემსა, არამედ ერისა ამისთჳს, რომელი გარემომადგს მე, ვთქუ, რაჲთა ჰრწმენეს, რამეთუ შენ მომავლინე მე.


Verse: 43  Link to ntkpl   და ესე ვითარცა თქუა, ჴმითა დიდითა ღაღად-ყო: ლაზარე, გამოვედ გარე!

Verse: 43V    ღაღატ- HIK; გამოედ HI.


Verse: 44  Link to ntkpl   და გამოვიდა მკუდარი იგი, შეკრული ჴელით და ფერჴით სახუევლითა, და პირი მისი დაბურვილ იყო სუდარითა. ჰრქუა მათ იესუ: განჰჴსენით ეგე და უტევეთ, ვიდოდის!

Verse: 44V    სახუჱლითა HIK.


Verse: 45  Link to ntkpl   მრავალთა უკუე ჰურიათაგანთა, რომელნი მოსრულ იყვნეს მარიამისა და მართაჲსა, იხილეს, რომელი-იგი ქმნა იესუ, და ჰრწმენა მისა მიმართ.

Verse: 45V    უკუჱ QHIK; მარიამისსა K; მართაჲსსა K; იხილეს ] ხილვად Q; მისსა K.


Verse: 46  Link to ntkpl   ხოლო რომელნიმე მათგანნი წარვიდეს და უთხრეს ფარისეველთა მათ, რაჲ-იგი ქმნა იესუ.


Verse: 47  Link to ntkpl   და შეკრიბეს მღდელთმოძღუართა მათ და ფარისეველთა კრებული და იტყოდეს: რაჲმე ვყოთ, რამეთუ კაცი ესე მრავალსა სასწაულსა იქმს?

Verse: 47V    შეკრბეს HIK.


Verse: 48  Link to ntkpl   უკუეთუ დაუტეოთ იგი ესრეთ, ყოველთა ჰრწმენეს მისა მიმართ, და მოვიდეს ჰრომნი და მიგჳღონ ჩუენ ადგილიცა ჩუენი და ნათესავიცა.

Verse: 48V    უკუჱთუ H.


Verse: 49  Link to ntkpl   ერთმან ვინმე მათგანმან, კაიაფა, რომელი იყო მღდელთმოძღუარი მის წელიწდისაჲ, ჰრქუა მათ: თქუენ არა იცით არცა ერთი,

Verse: 49V    წელიწადისაჲ HI.


Verse: 50  Link to ntkpl   არცა განგიზრახავს, რამეთუ უმჯობეს არს ჩუენდა, რაჲთა ერთი კაცი მოკუდეს ერისათჳს, და არა ყოველი ნათესავი წარწყმდეს.


Verse: 51  Link to ntkpl   ესე თავით თჳსით არა თქუა, არამედ მღდელთმოძღუარი იყო მის წელიწდისაჲ და წინაწარმეტყუელა, რამეთუ ეგულებოდა იესუს მოსიკუდიდ ნათესავთათჳს,

Verse: 51V    წელიწადისაჲ QHI.


Verse: 52  Link to ntkpl   და არა ხოლო ნათესავთათჳს, არამედ რაჲთა შვილნიცა ღმრთისანი განბნეულნი შეკრიბნეს ერთად.


Verse: 53  Link to ntkpl   მიერ დღითგან შეიზრახნეს ჰურიანი, რაჲთა მოკლან იგი.


Verse: 54  Link to ntkpl   ხოლო იესუ არღარა განცხადებულად ვიდოდა ჰურიათა შორის, არამედ წარვიდა მიერ სოფელსა, მახლობელად უდაბნოსა, ქალაქსა, რომელსა ჰრქჳან ეფრაიმ, და მუნ დაადგრა მოწფითურთ თჳსით.

Verse: 54V    მოწფით̃რთ QHI, მწ̃ფითრთ K.


Verse: 55  Link to ntkpl   ხოლო იყო მახლობელ პასექი იგი ჰურიათაჲ, და აღვიდეს მრავალნი იერუსალჱმდ სოფლებისაგან უწინარეს მის პასექისა, რაჲთა განიწმიდნენ თავნი თჳსნი.


Verse: 56  Link to ntkpl   ხოლო ჰურიანი ეძიებდეს იესუს და იტყოდეს ურთიერთას, დგეს რაჲ ტაძარსა შინა: ვითარ ჰგონებთ თქუენ, არამე მოვიდესა დღესასწაულსა ამას?


Verse: 57  Link to ntkpl   რამეთუ მიეცა მცნებაჲ მღდელთმოძღუართა მათ და ფარისეველთა, რაჲთა, უკუეთუ ვინმე უწყოდის, სადა არს, აუწყოს მათ, რაჲთა შეიპყრან იგი.



Next part


This text is part of the TITUS edition of Tetraevangelium (redactio athonensis).

Copyright TITUS Project, Frankfurt a/M, 16.2.2022. No parts of this document may be republished in any form without prior permission by the copyright holder.