TITUS
Tetraevangelium (redactio athonensis)
Part No. 77
Previous part

Chapter: 9 


Verse: 1  Link to ntkpl   და ვითარცა წარვიდოდა იესუ, იხილა კაცი, ბრმაჲ შობითგან.


Verse: 2  Link to ntkpl   ჰკითხვიდეს მოწაფენი მისნი და ეტყოდეს: რაბი, ვინ ცოდა: ამან, ანუ მშობელთა ამისთა, რამეთუ ბრმაჲ იშვა?


Verse: 3  Link to ntkpl   ჰრქუა მათ იესუ: არცა ამან ცოდა, არცა მშობელთა ამისთა, არამედ რაჲთა გამოცხადნეს საქმე ღმრთისაჲ მაგას ზედა.


Verse: 4  Link to ntkpl   და ჩემდა ჯერ-არს საქმედ საქმესა მომავლინებელისა ჩემისასა, ვიდრე დღჱ არსღა; მოვალს ღამე, ოდეს ვერვის ჴელ-ეწიფოს საქმედ.

Verse: 4V    დღე HIK.


Verse: 5  Link to ntkpl   ვიდრემდე ვარ სოფელსა შინა, ნათელი ვარ სოფლისაჲ.


Verse: 6  Link to ntkpl   და ესე ვითარცა თქუა, ჰნერწყუა ქუეყანასა და შექმნა თიჴაჲ ნერწყჳსაგან, და სცხო თიჴაჲ იგი თუალთა მის ბრმისათა


Verse: 7  Link to ntkpl   და ჰრქუა მას: წარვედ და დაიბანე საბანელსა მას სილოამისასა, რომელი ითარგმნების მოვლინებულად. -- წარვიდა კაცი იგი და დაიბანა, მოვიდა და ხედვიდა.


Verse: 8  Link to ntkpl   ხოლო მოძმენი და რომელთა ეხილვა იგი პირველად, რამეთუ მთხოველი იყო, იტყოდეს: არა ესე არსა, რომელი ზინ და ითხოვნ.

Verse: 8V    პირველ K.


Verse: 9  Link to ntkpl   სხუანი იტყოდეს: ესე არს; -- ხოლო რომელნიმე იტყოდეს: არა, არამედ მსგავსი მისი არს; ხოლო იგი იტყოდა: მე ვარ.

Verse: 9V    ეტყოდა HI.


Verse: 10  Link to ntkpl   ჰკითხვიდეს მას: ვითარ აღგეხილნეს თუალნი შენნი?


Verse: 11  Link to ntkpl   მან მიუგო და ჰრქუა მათ: კაცსა რომელსა ჰრქჳან იესუ, თიჴაჲ შექმნა და მცხო თუალთა ჩემთა და მრქუა მე: წარვედ საბანელსა მას სილოამისასა და დაიბანე. მივედ და დავიბანე და აღვიხილენ.

Verse: 11V    დაიბანეჱ Q.


Verse: 12  Link to ntkpl   ჰრქუეს მას: სადა არს იგი? ხოლო მან ჰრქუა მათ: არა უწყი.


Verse: 13  Link to ntkpl   იყო შაბათი, ოდეს-იგი თიჴაჲ შექმნა იესუ და აღუხილნა თუალნი მისნი.


Verse: 14  Link to ntkpl   მოიყვანეს იგი წინაშე ფარისეველთა, რომელ-იგი პირველად ბრმაჲ იყო.


Verse: 15  Link to ntkpl   კუალად ჰკითხვიდეს მას ფარისეველნიცა იგი: ვითარ აღიხილენ? ხოლო მან ჰრქუა მათ: თიჴაჲ დამდვა თუალთა ჩემთა, და დავიბანე და აწ ვხედავ.


Verse: 16  Link to ntkpl   იტყოდეს ვინმე ფარისეველთაგანნი: ესე კაცი არა არს ღმრთისაგან, რამეთუ შაბათსა არა იმარხავს. -- სხუანი იტყოდეს: ვითარ ჴელ-ეწიფების კაცსა ცოდვილსა ესევითარისა სასწაულისა საქმედ? -- და ცილობაჲ იყო მათ შორის.


Verse: 17  Link to ntkpl   ჰრქუეს მას, რომელი-იგი პირველ ბრმაჲ იყო: შენ რასა იტყჳ მისთჳს, რამეთუ აღგიხილნა თუალნი შენნი? ხოლო მან ჰრქუა მათ: წინაწარმეტყუელი არს.

Verse: 17V    პირველად HI.


Verse: 18  Link to ntkpl   არა ჰრწმენა ჰურიათა მისთჳს, ვითარმედ ბრმაჲ იყო და აღიხილნა თუალნი, ვიდრემდე მოუწოდეს მამა-დედათა მისთა, რომელმან-იგი აღიხილნა,


Verse: 19  Link to ntkpl   ჰკითხვიდეს მათ და ჰრქუეს: ესე არსა ძჱ იგი თქუენი, რომლისაჲ თქუენ სთქუთ, ვითარმედ: ბრმაჲ იშვა? აწ უკუე ვითარ ხედავს?

Verse: 19V    ძე HI; უკუჱ QHIK.


Verse: 20  Link to ntkpl   მიუგეს მამა-დედათა მისთა და ჰრქუეს: უწყით, რამეთუ ესე არს ძჱ ჩუენი და რამეთუ ბრმაჲ იშვა.

Verse: 20V    ძე HI.


Verse: 21  Link to ntkpl   ხოლო აწ ვითარ ხედავს, ჩუენ არნა ვიცით; ანუ ვინ აღუხილნა მაგას თუალნი, ჩუენ არა უწყით; მაგას ჰკითხეთ, ჰასაკი აქუს, ეგე თავისა თჳსისათჳს იტყოდენ.


Verse: 22  Link to ntkpl   ამისთჳს ესე თქუეს მშობელთა მისთა, რამეთუ ეშინოდა ჰურიათაგან, რამეთუ შეთქუმულ იყვნეს ჰურიანი, რაჲთა აღ-თუ ვინმე-იაროს იგი ქრისტედ, კრებულისაგან განჴადონ იგი.

Verse: 22V    ქ̃ჱდ Q.


Verse: 23  Link to ntkpl   ამისთჳს თქუეს მამა-დედათა მისთა, ვითარმედ: ჰასაკი აქუს, მაგას ჰკითხეთ.


Verse: 24  Link to ntkpl   მოუწოდეს კაცსა მას მეორედ, რომელი-იგი პირველ ბრმაჲ იყო, და ჰრქუეს მას: მიეც დიდებაჲ ღმერთსა; ჩუენ უწყით, რამეთუ კაცი ესე ცოდვილი არს.


Verse: 25  Link to ntkpl   ხოლო მან მიუგო და ჰრქუა: ცოდვილი თუ არს, მე არა უწყი; ხოლო ერთი ესე უწყი, რამეთუ ბრმაჲ ვიყავ და აწ ვხედავ.


Verse: 26  Link to ntkpl   მერმე ჰრქუეს მას: რაჲ გიყო შენ? ვითარ აღგიხილნა თუალნი შენნი?


Verse: 27  Link to ntkpl   მიუგო და ჰრქუა მათ: გარქუ თქუენ პირველვე, და არა გესმა; რაჲსაღა გნებავს კუალად სმენად? ანუ თქუენცა გნებავს მოწაფე-ყოფად მისა?

Verse: 27V    მოწაფჱ- Q; მისსა K.


Verse: 28  Link to ntkpl   ხოლო იგინი აგინებდეს მას და ჰრქუეს: შენ ხარ მოწაფჱ მისი, ხოლო ჩუენ მოწაფენი მოსესნი ვართ.

Verse: 28V    მოწაფე HIK.


Verse: 29  Link to ntkpl   უწყით, რამეთუ მოსეს ეტყოდა ღმერთი, ხოლო ესე არა ვიცით, ვინაჲ არს.


Verse: 30  Link to ntkpl   მიუგო კაცმან მან და ჰრქუა მათ: საკჳრველი ესე არს, რამეთუ თქუენ არა იცით, ვინაჲ არს, და მე აღმიხილნა თუალნი.


Verse: 31  Link to ntkpl   ესე უწყი, რამეთუ ცოდვილისაჲ არა ისმინის ღმერთმან, არამედ უკუეთუ ვინმე არნ ღმრთისმსახურ და ნებასა ღმრთისასა ჰყოფნ, ამისი ისმინის ღმერთმან.

Verse: 31V    არს I.


Verse: 32  Link to ntkpl   საუკუნითგან არასადა ისმა, ვითარმცა აღ-ვინმე-უხილნა თუალნი შობითგან ბრმისანი.


Verse: 33  Link to ntkpl   უკუეთუმცა არა იყო ესე ღმრთისაგან, ვერმცა რას შემძლებელ იყო საქმედ.

Verse: 33V    უკუჱთუმცა H.


Verse: 34  Link to ntkpl   მიუგეს და ჰრქუეს მას: ცოდვათა შინა შობილ ხარ შენ ყოვლად და შენ გუასწავებ ჩუენ? -- და განჴადეს იგი გარე.


Verse: 35  Link to ntkpl   ესმა იესუს, რამეთუ განაძეს იგი გარე, პოვა იგი და ჰრქუა მას: შენ გრწამსა ძჱ ღმრთისაჲ?

Verse: 35V    ძე HIK.


Verse: 36  Link to ntkpl   მან მიუგო და ჰრქუა: ვინ არს იგი, უფალო, რაჲთა მრწმენეს იგი?


Verse: 37  Link to ntkpl   ჰრქუა მას იესუ: იხილე იგი, და რომელი იტყჳს შენ თანა, იგი არს.


Verse: 38  Link to ntkpl   ხოლო მან ჰრქუა მას: მრწამს, უფალო, და თაყუანის-სცა მას.


Verse: 39  Link to ntkpl   და თქუა იესუ: შჯად სოფელსა ამას მოსრულ ვარ მე, რაჲთა, რომელნი არა ხედვიდეს, ხედვიდენ; და რომელნი ხედვიდეს, დაბრმენ.

Verse: 39V    სჯად K.


Verse: 40  Link to ntkpl   ესმა ესე ფარისეველთაგანთა, რომელნი იყვნეს მის თანა, და ჰრქუეს: ნუუკუე ჩუენცა ბრმანი ვართა?

Verse: 40V    ჰრქუჱს H; ნუუკუჱ QHI, უუკუჱ K.


Verse: 41  Link to ntkpl   ჰრქუა მათ იესუ: უკუეთუმცა ბრმანი იყვენით, ცოდვაჲმცა არა გაქუნდა; ხოლო აწ იტყჳთ, ვითარმედ: ვხედავთ, და ცოდვანი თქუენნი ჰგიან.



Next part


This text is part of the TITUS edition of Tetraevangelium (redactio athonensis).

Copyright TITUS Project, Frankfurt a/M, 16.2.2022. No parts of this document may be republished in any form without prior permission by the copyright holder.