TITUS
Tetraevangelium (redactio athonensis)
Part No. 76
Previous part

Chapter: 8 


Verse: 1  Link to ntkpl   ხოლო იესუ წარვიდა მთასა მას ზეთისხილთასა.


Verse: 2  Link to ntkpl   და განთიად კუალად მოვიდა ტაძრად, და ყოველი ერი მოვიდოდა მისა მიმართ, და დაჯდა და ასწავებდა მათ.

Verse: 2V    მისსა K.


Verse: 3  Link to ntkpl   ხოლო მწიგნობართა მათ და ფარისეველთა მოიყვანეს მისა დედაკაცი, რომელი ცხადად ერსა ზედა დაეპყრა მრუშებასა, და დაადგინეს იგი შორის

Verse: 3V    მისსა K.


Verse: 4  Link to ntkpl   და ჰრქუეს მას, რამეთუ გამოსცდიდეს: მოძღუარ, ესე დედაკაცი ცხადად მრუშებასა დაეპყრა.


Verse: 5  Link to ntkpl   და მოსე ამცნო შჯულსა შინა ჩუენსა ესევითართა ქვისა დაკრებაჲ. შენ უკუე რასა იტყჳ?

Verse: 5V    მოსჱ Q; სჯულსა K; უკუჱ QHIK.


Verse: 6  Link to ntkpl   ხოლო ესე თქუეს და გამოსცდიდეს მას, რაჲთა აქუნდეს შესმენად მისა. ხოლო იესუ ქუეყანად დადრკა და თითითა ქუეყანასა წერდა და არარას ეტყოდა.

Verse: 6V    თქუჱს I; მისსა K.


Verse: 7  Link to ntkpl   და ვითარ მყოვარ დგეს და ჰკითხვიდეს მას, აღემართა ზე და ჰრქუა მათ: ვინ უცოდველ არს თქუენგანი, პირველად მან დაუტევენ ქვაჲ მაგას ზედა.


Verse: 8  Link to ntkpl   და კუალად ქუედადრკა და წერდა ქუეყანასა.

Verse: 8V    ქუჱდადრკა QHI.


Verse: 9  Link to ntkpl   ხოლო მათ ვითარცა ესმა, მხილებულნი სჳნიდისისაგან, გამნვიდოდეს თითოჲ: იწყეს მოხუცებულითგან, ვიდრემდის დაშთა თავადი მარტოჲ, და დედაკაცი იგი დგა შორის.


Verse: 10  Link to ntkpl   ხოლო იესუ აღემართა და არავინ იხილა, გარნა დედაკაცი იგი და ჰრქუა მას: სადა არიან შემასმენელნი შენნი? არავინ განგიკითხა შენ?

Verse: 10V    იგი -- K.


Verse: 11  Link to ntkpl   ხოლო მან ჰრქუა: არავინ, უფალო! -- ხოლო იესუ ჰრქუა მას: არცა მე განგიკითხავ შენ; წარვედ და ამიერითგან ნუღარა სცოდავ.


Verse: 12  Link to ntkpl   მერმეცა ეტყოდავე იესუ და ჰრქუა მათ: მე ვარ ნათელი სოფლისაჲ, რომელი შემომიდგეს მე, არა ვიდოდის ბნელსა, არამედ აქუნდეს ნათელი ცხორებისაჲ,


Verse: 13  Link to ntkpl   ჰრქუეს მას ფარისეველთა შენ თავისა შენისათჳს სწამებ, და წამებაჲ შენი არა არს ჭეშმარიტ.


Verse: 14  Link to ntkpl   მიუგო იესუ და ჰრქუა მათ: დაღაცათუ მე ვწამო თავისა ჩემისათჳს, ჭეშმარიტ არს წამებაჲ ჩემი, რამეთუ ვიცი, ვინაჲ მოსრულ ვარ და ვიდრე მივალ, ხოლო თქუენ არა იცით, ვინაჲ მოვედ და ვიდრე ვალ.


Verse: 15  Link to ntkpl   თქუენ ჴორცთაებრ შჯით, ხოლო მე არავის ვშჯი.

Verse: 15V    შჯით HI; ვსჯი K.


Verse: 16  Link to ntkpl   უკუეთუ ვშჯიდე მე, საშჯელი ჩემი ჭეშმარიტ არს, რამეთუ არა ვარ მარტოჲ, არამედ მე და მომავლინებელი ჩემი მამაჲ.

Verse: 16V    ვსჯიდე K; სასჯელი K.


Verse: 17  Link to ntkpl   რამეთუ შჯულსაცა თქუენსა წერილ არს, ვითარმედ: ორისა კაცისა წამებაჲ ჭეშმარიტ არს.

Verse: 17V    შჯულსაცა HI.


Verse: 18  Link to ntkpl   მე ვარ, რომელი ვწამებ ჩემთჳს, და წამებს ჩემთჳს მომავლინებელი ჩემი მამაჲ.


Verse: 19  Link to ntkpl   ჰრქუეს მას ჰურიათა მათ: სადა არს მამაჲ შენი? -- მიუგო იესუ და ჰრქუა მათ: არცა მე მიცით, არცა მამაჲ ჩემი. უკუეთუმცა მიცოდეთ მე, მამაჲცამცა ჩემი იცოდეთ.

Verse: 19V    უკუჱთუმცა H.


Verse: 20  Link to ntkpl   ამას სიტყუასა ეტყოდა ფასისსაცავსა მას თანა და ასწავებდა ტაძარსა შინა, და არავინ შეიპყრა იგი, რამეთუ არღა მოსრულ იყო ჟამი მისი.


Verse: 21  Link to ntkpl   მერმე ჰრქუა მათ იესუ: მე წარვალ, და მეძიებდეთ მე და არა მპოოთ და ცოდვათა შინა თქუენთა მოსწყდეთ; და ვიდრე-იგი მე მივალ, თქუენ ვერ ჴელ-გეწიფების მოსლვად.


Verse: 22  Link to ntkpl   იტყოდეს ურთიერთას ჰურიანი იგი: ნუუკუე მოიკლავს თავსა თჳსსა, რამეთუ იტყჳს: ვიდრე-იგი მე მივალ, თქუენ ვერ ჴელ-გეწიფების მოსლვად.

Verse: 22V    ნუუკუჱ HIK; ვიდრე Q.


Verse: 23  Link to ntkpl   და ეტყოდა მათ იესუ: თქუენ ქუეყანისაგანნი ხართ, ხოლო მე ზეცისაგანი ვარ; თქუენ ამის სოფლისაგანნი ხართ, ხოლო მე არა ამის სოფლისაგანი ვარ.


Verse: 24  Link to ntkpl   გარქუ თქუენ, ვითარმედ: მოსწყდეთ ცოდვათა შინა თქუენთა. უკუეთუ არა გრწმენეს ჩემი, რამეთუ მე ვარ, მოსწყდეთ ცოდვათა შინა თქუენთა.


Verse: 25  Link to ntkpl   ეტყოდეს მას: და შენ ვინ ხარ? -- ჰრქუა მათ იესუ: პირველად, რამეთუ მე გეტყჳ თქუენ:


Verse: 26  Link to ntkpl   მრავალი მაქუს თქუენდა სიტყუად და განკითხვად, არამედ რომელმან მომავლინა მე, ჭეშმარიტ არს, და რაჲ-იგი მესმა მისგან, მას ვიტყჳ სოფელსა ამას შინა.


Verse: 27  Link to ntkpl   ხოლო მათ არა ცნეს, რამეთუ მამასა თჳსსა უთხრობდა მათ.


Verse: 28  Link to ntkpl   მერმე ჰრქუა მათ იესუ: ოდეს აღამაღლოთ ძჱ კაცისაჲ. მაშინ სცნათ, რამეთუ მე ვარ და თავით ჩემით არას ვიქმ, არამედ ვითარცა მასწავა მე მამამან, მასცა ვიტყჳ.

Verse: 28V    ძე HIK.


Verse: 29  Link to ntkpl   და რომელმან მომავლინა მე, ჩემ თანა არს; არა დამიტევა მე მარტოჲ მამამან, რამეთუ მე სათნოებასა მისსა ვიქმ მარადის.


Verse: 30  Link to ntkpl   ამას რაჲ ეტყოდა, ჰრწმენა მრავალთა მისი.


Verse: 31  Link to ntkpl   და ეტყოდა იესუ მორწმუნეთა მათ მისთა ჰურიათა: უკუეთუ თქუენ დაადგრეთ სიტყუათა ჩემთა, ჭეშმარიტად მოწაფენი ჩემნი ხართ.


Verse: 32  Link to ntkpl   და სცნათ ჭეშმარიტი, და ჭეშმარიტებამან განგათავისუფლნეს თქუენ.


Verse: 33  Link to ntkpl   მიუგეს ჰურიათა მათ და ჰრქუეს მას: ჩუენ ნათესავნი აბრაჰამისნი ვართ და არასადა ვის ვჰმონებდით. ვითარ-ეგე შენ იტყჳ, ვითარმედ: განსთავისუფლდეთ?


Verse: 34  Link to ntkpl   მიუგო იესუ და ჰრქუა მათ: ამენ, ამენ გეტყჳ თქუენ, რამეთუ: ყოველმან რომელმან ქმნეს ცოდვაჲ, მონაჲ არს იგი ცოდვისაჲ.


Verse: 35  Link to ntkpl   და მონამან არა დაიმკჳდროს სახლსა შინა უკუნისამდე, ხოლო ძემან დაიმკჳდროს უკუნისამდე.


Verse: 36  Link to ntkpl   უკუეთუ ძემან განგათავისუფლნეს, ჭეშმარიტად თავისუფალ იყვნეთ.

Verse: 36V    უკუჱთუ H.


Verse: 37  Link to ntkpl   უწყი, რამეთუ ნათესავნი აბრაჰამისანი ხართ, არამედ მეძიებთ მე მოკლვად, რამეთუ სიტყუაჲ ჩემი ვერ დაეტევის თქუენ შორის.


Verse: 38  Link to ntkpl   მე რომელი ვიხილე მამისა ჩემისა თანა, მას ვიტყჳ; და თქუენ რომელი იხილეთ მამისა თქუენისა თანა, მას ჰყოფთ.


Verse: 39  Link to ntkpl   მიუგეს და ჰრქუეს მას: მამაჲ ჩუენი აბრაჰამი არს. -- მიუგო იესუ და ჰრქუა მათ: უკუეთუმცა შვილნი აბრაჰამისნი იყვენით, საქმეთამცა აბრაჰამისთა იქმოდეთ.


Verse: 40  Link to ntkpl   ხოლო აწ მეძიებთ მე მოკლვად, კაცსა, რომელი ჭეშმარიტსა გეტყჳ თქუენ, რომელი მესმა ღმრთისაგან. ესე აბრაჰამ არა ქმნა.


Verse: 41  Link to ntkpl   ხოლო თქუენ იქმთ საქმესა მამისა თქუენისასა. -- ჰრქუეს მას: ჩუენ სიძვით არა შობილ ვართ, ერთი მამაჲ ვიცით -- ღმერთი.


Verse: 42  Link to ntkpl   ჰრქუა მათ იესუ: უკუეთუმცა ღმერთი მამაჲ თქუენი იყო, გიყუარდიმცა მე, რამეთუ ღმრთისაგან გამოვედ და მოსრულ ვარ, რამეთუ არა თავით თჳსით მოსრულ ვარ, არამედ მან მომავლინა მე.

Verse: 42V    უკუჱთუმცა H.


Verse: 43  Link to ntkpl   რაჲსათჳს სიტყუანი ჩემნი არა იცნით? რამეთუ ვერ ძალ-გიც სიტყუათა ჩემთა სმენად.


Verse: 44  Link to ntkpl   თქუენ მამისა ეშმაკისანი ხართ და გულისთქუმათა მამისა თქუენისათა გნებავს ყოფად; რამეთუ იგი კაცისმკლველი იყო დასაბამითგან და ჭეშმარიტებასა არა დაადგრა, რამეთუ ჭეშმარიტებაჲ არა არს მის თანა. ოდეს იტყჳნ ტყუვილსა, თჳსისაგან გულისა იტყჳნ, რამეთუ მტყუვარ არს, და რამეთუ მამაჲცა მისი მტყუვარი არს.


Verse: 45  Link to ntkpl   ხოლო მე ჭეშმარიტსა გეტყჳ თქუენ, და არა გრწამს ჩემი.


Verse: 46  Link to ntkpl   ვინ თქუენგანმან მამხილოს მე ცოდვისათჳს? უკუეთუ ჭეშმარიტსა გეტყჳ თქუენ, რაჲსათჳს არა გრწამს ჩემი?


Verse: 47  Link to ntkpl   რომელი ღმრთისაგან არს, სიტყუათა ღმრთისათა ისმენს; ამისთჳს არა ისმენთ თქუენ, რამეთუ არა ხართ ღმრთისაგან.


Verse: 48  Link to ntkpl   მიუგეს ჰურიათა მათ და ჰრქუეს მას: არა კეთილად ვთქუთა, ვითარმედ სამარიტელ ხარ შენ, და ეშმაკი არს შენ თანა?


Verse: 49  Link to ntkpl   მიუგო იესუ და ჰრქუა მათ: ჩემ თანა ეშმაკი არა არს, არამედ პატივ-ვსცემ მამასა ჩემსა, და თქუენ მაგინებთ მე.

Verse: 49V    პატივსცემ Q; ჩემსა -- Q; მაგინებ I.


Verse: 50  Link to ntkpl   ხოლო მე არა ვეძიებ დიდებასა ჩემსა; არს, რომელი ეძიებს და შჯის.

Verse: 50V    სჯის K.


Verse: 51  Link to ntkpl   ამენ, ამენ გეტყჳ თქუენ: უკუეთუ ვინმე სიტყუაჲ ჩემი დაიმარხოს, სიკუდილი არა იხილოს უკუნისამდე.

Verse: 51V    უკუჱთუ H.


Verse: 52  Link to ntkpl   ჰრქუეს მას ჰურიათა: აწ გჳცნობიეს, რამეთუ ეშმაკეულ ხარ: აბრაჰამ მოკუდა და წინაწარმეტყუელნიცა, და შენ იტყჳ: უკუეთუ ვინმე სიტყუაჲ ჩემი დაიმარხოს, არა იხილოს გემოჲ სიკუდილისაჲ უკუნისამდე.

Verse: 52V    უკ̃ჱ Q.


Verse: 53  Link to ntkpl   ნუუკუე შენ უფროჲს ხარა მამისა ჩუენისა აბრაჰამისა, რომელი მოკუდა, და წინაწარმეტყუელნი მოწყდეს? შენ ვის ჰყოფ თავსა შენსა?

Verse: 53V    ნუუკუჱ QH; აბრაჰამისსა K; მოსწყდეს QHIK.


Verse: 54  Link to ntkpl   მიუგო იესუ და ჰრქუა მათ: უკუეთუ მე ვადიდებდე თავსა ჩემსა, დიდებაჲ ჩემი არარაჲ არს; არამედ არს მამაჲ ჩემი, რომელი მადიდებს მე, რომელ თქუენ სთქუთ, ვითარმედ: ღმერთი ჩუენი არს იგი.


Verse: 55  Link to ntkpl   და არა იცით იგი, ხოლო მე ვიცი იგი, და უკუეთუ ვთქუა, ვითარმედ არა ვიცი იგი, ვიყო მეცა მსგავს თქუენდა მტყუვარ, არამედ ვიცი იგი და სიტყუასა მისსა ვიმარხავ.


Verse: 56  Link to ntkpl   აბრაჰამს, მამასა თქუენსა, უხაროდა, რაჲთა იხილოს დღე ესე ჩემი, იხილა და განიხარა.


Verse: 57  Link to ntkpl   ჰრქუეს მას ჰურიათა მათ: ერგასის წლის არღა ხარ და შენ აბრაჰამი გიხილავსა?


Verse: 58  Link to ntkpl   ჰრქუა მათ იესუ: ამენ, ამენ გეტყჳ თქუენ: პირველ ანრაჰამის ყოფადმდე მე ვარ.


Verse: 59  Link to ntkpl   აღიღეს ქვები ჰურიათა მათ, რაჲთა დაჰკრიბონ მას. ხოლო იესუ დაეფარა და განვიდა ტაძრით, განვლო შორის მათსა და წარვიდა ესრეთ.



Next part


This text is part of the TITUS edition of Tetraevangelium (redactio athonensis).

Copyright TITUS Project, Frankfurt a/M, 16.2.2022. No parts of this document may be republished in any form without prior permission by the copyright holder.