TITUS
Tetraevangelium (redactio athonensis)
Part No. 74
Previous part

Chapter: 6 


Verse: 1  Link to ntkpl   ამისა შემდგომად წიაღჴდა იესუ წიაღ ზღუასა მას გალილეაჲსასა, რომელ არს ტიბერიაჲსაჲ.

Verse: 1V    ამისსა K.


Verse: 2  Link to ntkpl   და მისდევდა მას ერი მრავალი, რამეთუ ხედვიდეს სასწაულთა მათ, რომელთა იქმოდა უძლურთა ზედა.


Verse: 3  Link to ntkpl   და აღვიდა იესუ მთასა და მუნ დაჯდა მოწფითურთ თჳსით.

Verse: 3V    მოწ̃ფითურთ HIK.


Verse: 4  Link to ntkpl   და იყო მოახლებულ პასქაჲ, დღესასწაული იგი ჰურიათაჲ.


Verse: 5  Link to ntkpl   აღიხილნა თუალნი თჳსნი იესუ და იხილა, რამეთუ მრავალი ერი მოვალს მისა. ჰრქუა ფილიპეს: ვინაჲ ვიყიდოთ პური, რაჲთა ჭამონ ამათ?

Verse: 5V    ახილნა K; მისსა K.


Verse: 6  Link to ntkpl   ამას რაჲ ეტყოდა, გამოსცდიდა მას, ხოლო თჳთ უწყოდა, რაჲ ეგულებოდა ყოფად.


Verse: 7  Link to ntkpl   ჰრქუა ფილიპე: ორასისა დრაჰკნისა პური ვერ კმა არს ამათა, რაჲთა კაცად-კაცადმან მცირედ რაჲმე მიიღოს.

Verse: 7V    ამათდა K.


Verse: 8  Link to ntkpl   ჰრქუა მას ერთმან მოწაფეთა მისთაგანმან, ანდრეა, ძმამან სიმონ-პეტრესმან:


Verse: 9  Link to ntkpl   არს აქა ყრმაჲ, რომელსა აქუს ხუთი პური ქრთილისაჲ და ორი თევზი, არამედ ესე რაჲ არს ესოდენთა წინაშე?


Verse: 10  Link to ntkpl   ჰრქუა მას იესუ: დასხით კაცები ესე! -- და იყო თივაჲ ფრიად ადგილსა მას, და დასხდა კაცები იგი, რიცხჳთ ვითარ ხუთ ათას ოდენ.


Verse: 11  Link to ntkpl   და მოიხუნა იესუ პურნი იგი და ჰმადლობდა და მისცემდა მოწაფეთა, და მოწაფენი მისცემდეს ერსა მას, რომელნი-იგი დასხდეს; ეგრეცა თევზთა მათგანი, რაოდენი-იგი უნდა მათ.


Verse: 12  Link to ntkpl   და ვითარცა განძღეს, ჰრქუა მოწაფეთა თჳსთა: შეკრიბეთ ნეშტი ეგე ნამუსრევი, რაჲთა ნუმცა რაჲ წარწყმდების.


Verse: 13  Link to ntkpl   ხოლო მათ შეკრიბეს და აღავსეს ათორმეტი გოდორი ნამუსრევითა ხუთთა მათ პურთაგან ქრთილისათა, რომელ-იგი დაუშთა მათ, რომელთა-იგი ჭამეს.


Verse: 14  Link to ntkpl   ხოლო კაცთა მათ ვითარცა იხილეს სასწაული იგი, რომელ ქმნა იესუ, იტყოდეს: ესე არს ჭეშმარიტად წინაწარმეტყუელი, რომელი მოსრულ არს სოფლად.


Verse: 15  Link to ntkpl   ხოლო იესუ გულისჴმა-ყო, რამეთუ მოვიდოდეს წარტაცებად, რაჲთამცა ყვეს იგი მეფე, და განეშორა და წარვიდა მთად იგი ხოლო მარტოჲ.

Verse: 15V    მეფჱ Q.


Verse: 16  Link to ntkpl   და ვითარცა შემწუხრდა, შთავიდეს მოწაფენი მისნი ზღუად.


Verse: 17  Link to ntkpl   და შევიდეს ნავსა და მოვიდოდეს წიაღ ზღუასა მას კაპერნაუმდ. და ვითარ შე-ოდენ-რიჟუდებოდა, და არღა მოსრულ იყო მათა იესუ,


Verse: 18  Link to ntkpl   და ზღუაჲ იგი ქარისაგან დიდისა აღძრვოდა.


Verse: 19  Link to ntkpl   და შე-ოდენ-სრულ იყვნეს ვითარ ოცდახუთ უტევან, გინა ოცდაათ, იხილეს იესუ, ვიდოდა რაჲ ზღუასა ზედა; და მოეახლა რაჲ ნავსა მას, შეეშინა მათ.


Verse: 20  Link to ntkpl   ხოლო თავადმან ჰრქუა მათ: მე ვარ, ნუ გეშინინ!


Verse: 21  Link to ntkpl   უნდა მათ, რაჲთამცა შეიყვანეს იგი ნავსა მას. და მეყსეულად იპოვა ნავი იგი ქუეყანასა მას, ვიდრეცა მივიდოდეს.


Verse: 22  Link to ntkpl   ხვალისაგან ერი იგი რომელ დგა წიაღ ზღუასა მას, უწყოდეს, რამეთუ სხუაჲ ნავი არა იყო მუნ, გარნა ერთი იგი ხოლო, რომელსა შესრულ იყვნეს მოწაფენი იესუჲსნი, და რამეთუ არა შევიდა იესუ მოწაფეთა თანა ნავსა მას, არამედ მოწაფენი ხოლო მისნი შევიდეს.

Verse: 22V    რომელი HI.


Verse: 23  Link to ntkpl   მოვიდეს უკუე სხუანიცა ნავნი ტიბერიით, მახლობელად ადგილსა მას, სადა-იგი ჭამეს პური, რომელი-იგი აკურთხა უფალმან და ჰმადლობდა.

Verse: 23V    უკუჱ QHIK; პური ] -- K.


Verse: 24  Link to ntkpl   ვითარცა იხილა ერმან მან, ვითარმედ იესუ არა მუნ არს, არცა მოწაფენი მისნი, მოადგინეს მათ ნავები იგი და მოვიდეს კაპერნაუმდ და ეძიებდეს იესუს.


Verse: 25  Link to ntkpl   და პოვეს იგი წიაღ ზღუასა მას და ჰრქუეს მას: რაბი, ოდეს მოხუედ აქა?

Verse: 25V    მოხუჱდ HI.


Verse: 26  Link to ntkpl   მიუგო იესუ და ჰრქუა მათ: ამენ, ამენ გეტყჳ თქუენ: მეძიებთ მე, არა თუ რამეთუ იხილენით სასწაულნი, არამედ რამეთუ შჭამეთ პურთა მათგან და განსძეღით.

Verse: 26V    სჭამეთ K.


Verse: 27  Link to ntkpl   იქმოდეთ ნუ საზრდელსა წარსაწყმედელსა, არამედ საზრდელსა, რომელი ჰგიეს ცხორებად საუკუნოდ, რომელი ძემან კაცისამან მოგცეს თქუენ, რამეთუ ამას მამამან დაჰბეჭდა, ღმერთმან.


Verse: 28  Link to ntkpl   ჰრქუეს მას: რაჲ ვყოთ, რაჲთა ვიქმოდით საქმესა ღმრთისასა?


Verse: 29  Link to ntkpl   მიუგო იესუ და ჰრქუა მათ: ესე არს საქმჱ ღმრთისაჲ, რაჲთა გრწმენეს, რომელი-იგი მან მოავლინა.

Verse: 29V    საქმე HIK.


Verse: 30  Link to ntkpl   და მათ ჰრქუეს მას: რასა სასწაულსა იქმ, რაჲთა ვიხილოთ და გურწმენეს შენი? რასა იქმ?


Verse: 31  Link to ntkpl   მამანი ჩუენნი ჭამდეს მანანასა უდაბნოსა ზედა, ვითარცა წერილ არს: პური ზეცით მოსცა მათ ჭამად.


Verse: 32  Link to ntkpl   ჰრქუა მას იესუ: ამენ, ამენ გეტყჳ თქუენ: არა მოსე მოგცა თქუენ პური ზეცით, არამედ მამამან ჩემმან მოგცა თქუენ პური ჭეშმარიტი ზეცით.

Verse: 32V    მოსჱ Q.


Verse: 33  Link to ntkpl   რამეთუ პური ღმრთისაჲ არს, რომელი გარდამოჴდა ზეცით და მოსცა ცხორებაჲ სოფელსა.


Verse: 34  Link to ntkpl   ჰრქუეს მას: უფალო, მარადის მომეც ჩუენ პური ესე!

Verse: 34V    ესე ] ზეცით I.


Verse: 35  Link to ntkpl   ჰრქუა მათ იესუ: მე ვარ პური ცხორებისაჲ; რომელი მოვიდეს ჩემდა, არა შიოდის, და რომელსა ჰრწმენეს ჩემი, არასადა სწყუროდის.

Verse: 35V    ჰსწყუროდის HI.


Verse: 36  Link to ntkpl   არამედ გარქუ თქუენ, ვითარმედ: მიხილეთ მე და არა გრწამს.


Verse: 37  Link to ntkpl   ყოველი რომელი მომცა მე მამამან ჩემმან, ჩემდა მოვიდეს; და რომელი მოვიდეს ჩემდა, არა განვაძო გარე.


Verse: 38  Link to ntkpl   რამეთუ გარდამოვჴედ ზეცით, არა რაჲთა ვყო ნებაჲ ჩემი, არამედ ნებაჲ მომავლინებელისა მამისა ჩემისაჲ.


Verse: 39  Link to ntkpl   ხოლო ესე არს ნებაჲ მომავლინებელისა ჩემისა მამისაჲ, რაჲთა ყოველი, რომელი მომცა მე, არა წარვწყმიდო მისგან, არამედ აღვადგინო იგი უკუანაჲსკნელსა მას დღესა.


Verse: 40  Link to ntkpl   რამეთუ ესე არს ნებაჲ მომავლინებელისა ჩემისაჲ, რაჲთა ყოველი რომელი ხედვიდეს ძესა და ჰრწმენეს მისი, აქუნდეს ცხორებაჲ საუკუნოჲ, და მე აღვადგინო იგი უკუანაჲსკნელსა მას დღესა.

Verse: 41V    ძჱსა Q.


Verse: 41  Link to ntkpl   დრტჳნვიდეს მისთჳს ჰურიანი იგი, რამეთუ თქუა: მე ვარ პური იგი, რომელი ზეცით გარდამოვჴედ, --


Verse: 42  Link to ntkpl   და იტყოდეს: არა ესე არსა იესუ, ძჱ იოსებისი, რომლისა მამაჲ და დედაჲ ჩუენ ვიცით? ვითარ უკუე იტყჳს ესე, ვითარმედ: ზეცით გარდამოვჴედ?

Verse: 42V    ძე HIK; უკუჱ QHIK.


Verse: 43  Link to ntkpl   მიუგო იესუ და ჰრქუა მათ: ნუ სდრტჳნავთ ურთიერთას!


Verse: 44  Link to ntkpl   ვერვის ჴელ-ეწიფების მოსლვად ჩემდა, უკუეთუ არა მამამან, მომავლინებელმან ჩემმან, მოიყვანოს იგი ჩემდა, და მე აღვადგინო იგი უკუანაჲსკნელსა მას დღესა.

Verse: 44V    უკუჱთუ H.


Verse: 45  Link to ntkpl   წერილ არს წინაწარმეტყუელთა შინა, ვითარმედ: იყვნენ ყოველნი ღმრთივ სწავლულ. ყოველსა რომელსა ესმეს მამისა ჩემისაგან და ისწავოს, მოვიდეს ჩემდა.

Verse: 45V    ესმას K; ისწაოს K.


Verse: 46  Link to ntkpl   არა თუ მამაჲ ვის უხილავს, არამედ რომელი-იგი არს ღმრთისაგან, ამან იხილა მამაჲ.

Verse: 46V    მამაჲ ] ღმერთი QHIK.


Verse: 47  Link to ntkpl   ამენ, ამენ გეტყჳ თქუენ: რომელსა ჰრწმენეს ჩემი, აქუნდეს ცხორებაჲ საუკუნოჲ.


Verse: 48  Link to ntkpl   მე ვარ პური ცხორებისაჲ.


Verse: 49  Link to ntkpl   მამათა თქუენთა ჭამეს მანანაჲ უდაბნოსა და მოწყდეს.

Verse: 49V    მოსწყდეს QHIK.


Verse: 50  Link to ntkpl   ესე არს პური, რომელი ზეცით გარდამოჴდა; უკუთუ ვინმე ჭამოს მისგანი, არა მოკუდეს.


Verse: 51  Link to ntkpl   მე ვარ პური ცხოველი, რომელი ზეცით გარდამოვჴედ. უკუეთუ ვინმე ჭამდეს ამის პურისაგან, არა მოკუდეს, არამედ ცხოვნდეს უკუნისამდე. და პური, რომელი მე მივსცე, ჴორცი ჩემი არს, რომელსა მე მივსცემ ცხორებისათჳს სოფლისა.

Verse: 51V    ცხონდეს QHI; უკ̃ჱ K.


Verse: 52  Link to ntkpl   ილალვიდეს ურთიერთას ჰურიანი იგი და იტყოდეს: ვითარმე ჴელ-ეწიფების ამას მოცემად ჩუენდა ჴორცი თჳსი ჭამად?


Verse: 53  Link to ntkpl   ჰრქუა მათ იესუ: ამენ, ამენ გეტყჳ თქუენ: უკუეთუ არა შჭამოთ ჴორცი ძისა კაცისაჲ და სუათ სისხლი მისი, არა გაქუნდეს ცხორებაჲ თავთა შორის თქუენთა.

Verse: 53V    სჭამოთ K.


Verse: 54  Link to ntkpl   ხოლო რომელი ჭამდეს ჴორცსა ჩემსა და სუმიდეს სისხლსა ჩემსა, აქუნდეს ცხორებაჲ საუკუნოჲ, და მე აღვადგინო იგი უკუანაჲსკნელსა მას დღესა.


Verse: 55  Link to ntkpl   რამეთუ ჴორცი ჩემი ჭეშმარიტი საჭმელი არს, და სისხლი ჩემი ჭეშმარიტი სასუმელი არს.


Verse: 56  Link to ntkpl   და რომელი ჭამდეს ჴორცსა ჩემსა და სუმიდეს სისხლსა ჩემსა, იგი ჩემ თანა დადგრომილ არს, და მე მის თანა.


Verse: 57  Link to ntkpl   ვითარცა მომავლინა მე ცხოველმან მამამან, და მეცა ცხოველ ვარ მამისა თანა; და რომელი ჭამდეს ჩემგან, იგიცა ცხონდეს ჩემ მიერ.


Verse: 58  Link to ntkpl   რამეთუ ესე არს პური, რომელი ზეცით გარდამოჴდა. არა ეგრეთ, ვითარ-იგი ჭამეს მამათა თქუენთა მანანაჲ და მოწყდეს. ხოლო რომელი ჭამდეს ამას პურსა, ცხონდეს უკუნისამდე.

Verse: 58V    მოსწყდეს QHIK.


Verse: 59  Link to ntkpl   ესე თქუა შესაკრებელსა შორის და ასწავებდა კაპერნაუმს.


Verse: 60  Link to ntkpl   მრავალთა უკუე მოწაფეთა მისთაგანთა ესმა ესე და იტყოდეს: ფიცხელ არს სიტყუაჲ ესე. ვის ჴელ-ეწიფების სმენად მისა?

Verse: 60V    უკუჱ QHIK; მისსა K.


Verse: 61  Link to ntkpl   იცოდა იესუ თავით თჳსით, რამეთუ დრტჳნვენ მოწაფენი მისნი ამისთჳს, და ჰრქუა მათ: ესე დაგაბრკოლებსა თქუენ?

Verse: 61V    ამისთჳს ] მისთჳს Q.


Verse: 62  Link to ntkpl   უკუეთუ იხილოთ ძჱ კაცისაჲ აღმავალი, სადაცა იყო პირველ?

Verse: 62V    ძე HIK.


Verse: 63  Link to ntkpl   სული არს განმაცხოველებელ, ხოლო ჴორცნი არად სარგებელ არიან; სიტყუათა რომელთა გეტყჳ თქუენ, სულ არიან და ცხორება,


Verse: 64  Link to ntkpl   არამედ არიან ვინმე თქუენგანნი, რომელთა არა ჰრწამს. -- რამეთუ იცოდა იესუ პირველითგან, თუ ვინ არიან იგინი, რომელთა არა ჰრწამს, ანუ ვინ არს მიმცემელი მისი.


Verse: 65  Link to ntkpl   და ეტყოდა: ამისთჳს გარქუ თქუენ: ვერვის ჴელ-ეწიფების მოსლვად ჩემდა, უკუეთუ არა არს მოცემულ მისა მამისაგან ჩემისა.

Verse: 65V    უკუჱთუ H; მისსა K.


Verse: 66  Link to ntkpl   ამის გამო მრავალნი მოწაფეთა მისთაგანნი უკუნიქცეს და არღარა ვიდოდეს მის თანა.


Verse: 67  Link to ntkpl   ჰრქუა იესუ ათორმეტთა მათ: ნუუკუე თქუენცა გნებავს წარსლვის?

Verse: 67V    ნუუკუჱ QHI.


Verse: 68  Link to ntkpl   მიუგო მას სიმონ-პეტრე და ჰრქუა: უფალო, ვისა მივიდეთ ჩუენ? რამეთუ სიტყუანი ცხორებისა საუკუნოჲსანი გქონან შენ.

Verse: 68V    ვისსა QHIK.


Verse: 69  Link to ntkpl   და ჩუენ გურწმენა და გჳცნობიეს, რამეთუ შენ ხარ ქრისტჱ, ძჱ ღმრთისა ცხოველისაჲ.

Verse: 69V    ქრისტე HIK; ძე HIK.


Verse: 70  Link to ntkpl   მიუგო იესუ და ჰრქუა მათ: არამე ათორმეტნი გამოგირჩიენა? და ერთი თქუენგანი ეშმაკი არს.


Verse: 71  Link to ntkpl   ხოლო იტყოდა იუდას სიმონისსა, ისკარიოტელსა, რომელი იყო ერთი ათორმეტთაგანი, რამეთუ ამას ეგულებოდა მიცემაჲ მისი.



Next part


This text is part of the TITUS edition of Tetraevangelium (redactio athonensis).

Copyright TITUS Project, Frankfurt a/M, 16.2.2022. No parts of this document may be republished in any form without prior permission by the copyright holder.