TITUS
Tetraevangelium (redactio athonensis)
Part No. 66
Previous part

Chapter: 22 


Verse: 1  Link to ntkpl   და მოახლებულ იყო დღესასწაული იგი უცომოებისაჲ, რომელსა ჰრქჳან პასქაჲ.

Verse: 1V    დღჱსასწაული Q.


Verse: 2  Link to ntkpl   და ეძიებდეს მას მღდელთმოძღუარნი იგი და მწიგნობარნი, რაჲთამცა მოკლეს იგი, ხოლო ეშინოდა ერისა მის.


Verse: 3  Link to ntkpl   და შეუჴდა ეშმაკი იუდას, რომელსა ერქუა ისკარიოტელ. და იყო იგი რიცხჳსაგან ათორმეტთაჲსა.


Verse: 4  Link to ntkpl   და მივიდა, ეზრახა მღდელთმოძღუართა და მწიგნობართა და ერისა წინამძღუართა, ვითარმცა იგი მისცა მათ.


Verse: 5  Link to ntkpl   ხოლო მათ განიხარეს და აღუთქუეს მას ვეცხლი მიცემად.

Verse: 5V    აღუთქუჱს HI.


Verse: 6  Link to ntkpl   და აღუვარა მათ და ეძიებდა ჟამსა მარჯუესა, რაჲთა მისცეს იგი მათ თჳნიერ ერისა.

Verse: 6V    მარჯუჱსა QHI.


Verse: 7  Link to ntkpl   მოიწინეს დღენი იგი უცომოებისანი, ოდეს ღირდა პასქაჲ იგი დაკლვად.


Verse: 8  Link to ntkpl   და წარავლინნა პეტრე და იოვანე და ჰრქუა მათ: წარვედით და მომიმზადეთ ჩუენ პასქაჲ, რაჲთა ვჭამოთ.


Verse: 9  Link to ntkpl   ხოლო მათ ჰრქუეს: სადა გნებავს, და მოგიმზადოთ?


Verse: 10  Link to ntkpl   ხოლო თავადმან ჰრქუა მათ: აჰა, ეგერა, შესლვასა ოდენ თქუენსა ქალაქად შეგემთხჳოს თქუენ კაცი, რომელსა ლაგჳნი წყლითა ზეედგას; შეუდეგით მას სახიდ, ვიდრეცა შევიდეს.


Verse: 11  Link to ntkpl   და არქუთ სახლისა უფალსა მას: გეტყჳს შენ მოძღუარი: სადა არს სავანე, რომელსა პასქაჲ ესე მოწაფეთა ჩემთა თანა ვჭამო?


Verse: 12  Link to ntkpl   და მან გიჩუენოს თქუენ ქორი დაგებული დიდი; მუნ მზა-მიყავთ ჩუენ.

Verse: 12V    გიჩუჱნოს HI; მიყავით Q.


Verse: 13  Link to ntkpl   და წარვიდეს და პოვეს ეგრე, ვითარცა-იგი ჰრქუა მათ, და მოუმზადეს პასქაჲ იგი.

Verse: 13V    პოეს K.


Verse: 14  Link to ntkpl   და ოდეს იყო ჟამი, დაჯდა, და ათორმეტნი მოციქულნი მის თანა.


Verse: 15  Link to ntkpl   და ჰრქუა მათ: გულისსიტყჳთ გული მითქუმიდა პასექსა ამას ჭამად თქუენ თანა ვიდრე ვნებადმდე ჩემდა.


Verse: 16  Link to ntkpl   ხოლო გეტყჳ თქუენ: არღარა ვჭამო ამიერითგან, ვიდრემდე აღესრულოს სასუფეველსა შინა ღმრთისასა.


Verse: 17  Link to ntkpl   და მოიღო სასუმელი და ჰმადლობდა და თქუა: მიიღეთ და განიყავთ თავისა თქუენისა.


Verse: 18  Link to ntkpl   ხოლო გეტყჳ თქუენ: ამიერითგან არღარა ვსუა ნაყოფისაგან ვენაჴისა, ვიდრემდე სასუფეველი ღმრთისაჲ მოვიდეს.


Verse: 19  Link to ntkpl   და მოიღო პური, ჰმადლობდა და განტეხა და მისცა მათ და თქუა: ესე არს ჴორცი ჩემი თქუენთჳს მიცემული, ამას ჰყოფდით მოსაჴსენებელად ჩემდა.

Verse: 19V    თქუა ] ჰრქუა K; თქონთჳს K*.


Verse: 20  Link to ntkpl   ეგრეთვე სასუმელი შემდგომად სერობისა და თქუა: ესე სასუმელი -- ახალი შჯული სისხლისა ჩემისაჲ თქუენთჳს დათხეული.

Verse: 20V    ეგრევე Q; სჯული K.


Verse: 21  Link to ntkpl   ხოლო, აჰა, ჴელი განმცემელისა ჩემისაჲ ჩემ თანა ტაბლასა ზედა.


Verse: 22  Link to ntkpl   ძე სამე კაცისაჲ, მსგავსად განჩინებულისა მისისა, წარვალს, ხოლო ვაჲ არს კაცისა მის, ვის მიერ მიეცემის იგი!


Verse: 23  Link to ntkpl   და მათ იწყეს გამოძიებად ურთიერთას: ვინმე არს მათგანი, რომელსა ეგულების ესე ყოფად?


Verse: 24  Link to ntkpl   და იყო ცილობაჲცა მათ შორის, ვითარმედ: ვინმე იყოს დიდ მათ შორის?


Verse: 25  Link to ntkpl   ხოლო თავადმან ჰრქუა მათ: მეფენი წარმართთანი უფლებენ მათ ზედა, და რომელთა ჴელმწიფებაჲ აქუნ მათ ზედა, ქველისმოქმედ ჰრქჳან.


Verse: 26  Link to ntkpl   ხოლო თქუენ არა ეგრე იყვნეთ, არამედ უდიდესი იგი თქუენ შორის იყავნ მრწემ, და წინამძღუარი იგი -- ვითარცა მსახური.


Verse: 27  Link to ntkpl   ვინ არს უფროჲსი: რომელი ინაჴით-ზის ანუ რომელი ჰმსახურებს? ანუ არა, რომელ-იგი ინაჴით-ზის? ხოლო მე ვარ შორის თქუენსა, ვითარცა მსახური.


Verse: 28  Link to ntkpl   და თქუენ ხართ, რომელნი დაადგერით ჩემ თანა განსაცდელთა შინა ჩემთა.


Verse: 29  Link to ntkpl   და მე აღგითქუამ თქუენ, ვითარცა მე აღმითქუა მამამან ჩემმან, სასუფეველსა,

Verse: 29V    აღმითქვა K.


Verse: 30  Link to ntkpl   რაჲთა შჭამდეთ და სუმიდეთ ტაბლასა ზედა ჩემსა სასუფეველსა შინა ჩემსა და დასხდეთ ათორმეტთა საყდართა და შჯიდეთ ათორმეტთა ტომთა ისრაჱლისითა.

Verse: 30V    სჭამდეთ K; სასუფეველსა შინა ჩემსა -- HIK; და (2) -- Q; სჯიდეთ K.


Verse: 31  Link to ntkpl   და თქუა უფალმან: სიმონ, სიმონ, აჰა, ესერა, ეშმაკმან გამოგითხოვნა თქუენ აღცრად, ვითარცა იფქლი.


Verse: 32  Link to ntkpl   ხოლო მე ვევედრე მამასა ჩემსა შენთჳს, რაჲთა არა მოგაკლდეს სარწმუნოებაჲ შენი, და შენ ოდესმე მიიქეც და განამტკიცენ ძმანი შენნი.

Verse: 32V    ვევედრჱ Q; და (1) ] ა K.


Verse: 33  Link to ntkpl   ხოლო მან თქუა: უფალო, მე შენ თანა მზა ვარ საპყრობილედ და სიკუდილად მისლვად.


Verse: 34  Link to ntkpl   ხოლო თავადმან თქუა: გეტყჳ შენ, პეტრე: არღა ეყივლოს ქათამსა დღეს, ვიდრემდე სამგზის უვარ-მყო, ვითარმედ არა მიცი მე.

Verse: 34V    პეტრჱ Q.


Verse: 35  Link to ntkpl   და ჰრქუა მათ: ოდეს-იგი წარგავლინენ თქუენ თჳნიერ ბალანტისა და ვაშკარანისა და ფერჴთა შესასხმელთა, ნუ გაკლდა რაჲა თქუენ? -- ხოლო მათ ჰრქუეს: არარაჲ გუაკლდა.

Verse: 35V    ჰრქუჱს I.


Verse: 36  Link to ntkpl   და მერმე ჰრქუა მათ: არამედ აწ რომელსა აქუნდეს საქუფთჱ, აღიღენ; ეგრეთვე მსგავსად ვაშკარანიცა; და რომელსა არა აქუნდეს, განყიდენ სამოსელი თჳსი და იყიდენ მახჳლი.

Verse: 36V    საქუფთე HIK.


Verse: 37  Link to ntkpl   გეტყჳ თქუენ: ესე ხოლოღა წერილი ჯერ-არს ჩემ ზედა აღსრულებად, ვითარმედ: უშჯულოთა თანა შეირაცხა, -- და რამეთუ ჩემთჳს აღსასრული იყოს.

Verse: 38V    ხოლო Q; უსჯულოთა K.


Verse: 38  Link to ntkpl   ხოლო მათ ჰრქუეს: უფალო, აჰა, ესერა, არიან აქა ორ დანაკ. -- ხოლო თავადმან ჰრქუა მათ: კმა არს.

Verse: 38V    ჰრქ?ჱს I.


Verse: 39  Link to ntkpl   და გამოვიდა მიერ და წარვიდა, ვითარცა ჩუეულებაჲ აქუნდა, მთასა მას ზეთისხილთასა, და მისდევდეს მას მოწაფენიცა მისნი.

Verse: 39V    ჩუჱულებაჲ HI.


Verse: 40  Link to ntkpl   და მი-რაჲ-ვიდა ადგილსა მას, ჰრქუა მათ: ილოცევდით, რაჲთა არა შეხჳდეთ განსაცდელსა.


Verse: 41  Link to ntkpl   და თავადი განეშორა მათგან ვითარ ქვისსატყორცებელ ოდენ და დაიდგნა მუჴლნი, ილოცვიდა.


Verse: 42  Link to ntkpl   და იტყოდა: მამაო, უკუეთუ გნებავს თანაწარსლვად სასუმელი ესე ჩემგან, ხოლო ნუ ნებაჲ ჩემი, არამედ ნებაჲ შენი იყავნ!


Verse: 43  Link to ntkpl   და ეჩუენა მას ანგელოზი ზეცით, განაძლიერებდა მას.

Verse: 43V    ეჩუჱნა HI.


Verse: 44  Link to ntkpl   და იყო იგი ღუაწლსა შინა, უმეტესღა ილოცვიდა. და იქმნა ოფლი მისი, ვითარცა ცუარი სისხლისაჲ, გარდამომავალი ქუეყანასა ზედა.

Verse: 44V    ქუჱყანასა H.


Verse: 45  Link to ntkpl   და აღდგა მიერ ლოცვისაგან და მოვიდა მოწაფეთა თჳსთა და პოვნა იგინი მძინარენი მწუხარებისა მისგან


Verse: 46  Link to ntkpl   და ჰრქუა მათ: რაჲსა გძინავს? აღდეგით, ილოცევდით, რაჲთა არა შეხჳდეთ განსაცდელსა.


Verse: 47  Link to ntkpl   და ვიდრე იგი ამას იტყოდაღა, აჰა, ერი და, რომელსა ერქუა იუდა ისკარიოტელი, ერთი ათორმეტთაგანი, წინაუძღოდა მათ და მიეახლა იესუს ამბორის-ყოფად მისა, რამეთუ ესე სასწაული მიეცა მათა და ჰრქუა: რომელსა მე ამბორს-უყო, იგი არს.

Verse: 47V    მისსა K; მათდა K.


Verse: 48  Link to ntkpl   ხოლო იესუ ჰრქუა მას: იუდა, ამბორის-ყოფითა მისცემა ძესა კაცისასა?

Verse: 48V    ამბორის-ყოთა H; ძჱსა Q.


Verse: 49  Link to ntkpl   იხილეს რაჲ მისთანათა მათ საქმე ესე, ჰრქუეს მას: უფალო, უკუეთუ მოვსრნეთ ესენი მახჳლითა?

Verse: 49V    ჰრქუჱს I.


Verse: 50  Link to ntkpl   და სცა ვინმე მათგანმან ერთმან მონასა მღდელთმოძღურისასა და წარჰკუეთა ყური მისი მარჯუენჱ.

Verse: 50V    წარჰკუჱთა HI; მარჯუენე K; მარჯუჱნე HI.


Verse: 51  Link to ntkpl   მიუგო იესუ და ჰრქუა მათ: აცადეთ აქამომდე! -- და შეახო ჴელი ყურსა მისსა და განკურნა იგი.


Verse: 52  Link to ntkpl   ჰრქუა იესუ მოსრულთა მათ მის ზედა მღდელთმოძღუართა და ერისთავთა ტაძრისათა და ხუცესთა: ვითარცა ავაზაკსა ზედა გამოსრულ ხართ მახჳლითა და წათებითა.


Verse: 53  Link to ntkpl   დღითი დღე ვიყავ მე თქუენ თანა ტაძარსა მას შინა, და არა განჰყავთ ჴელი ჩემ ზედა; არამედ ესე არს ჟამი თქუენი და ჴელმწიფებაჲ ბნელისაჲ.


Verse: 54  Link to ntkpl   და ვითარცა შეიპყრეს იგი, წარიყვანეს და შეიყვანეს სახლსა მღდელთმოძღურისასა. ხოლო პეტრე მისდევდა შორით.


Verse: 55  Link to ntkpl   და აღაგზნეს ცეცხლი შორის ეზოსა მას და გარემოასხდეს იგინი; დაჯდა პეტრეცა შორის მათსა.


Verse: 56  Link to ntkpl   და იხილა იგი მჴევალმან ვინმე მჯდომარჱ ნათელსა მას, მიჰხედა მას და თქუა: ესეცა მის თანა იყო.

Verse: 56V    მჯდომარე HIK; მიხედა K.


Verse: 57  Link to ntkpl   ხოლო მან უვარ-ყო და თქუა: დედაკაცო, არა ვიცი იგი.


Verse: 58  Link to ntkpl   და მცირედრე შემდგომად იხილა იგი სხუამან და თქუა: და შენცა მათთანაჲ ხარ. -- ხოლო პეტრე თქუა: კაცო, არა ვარ მათთანაჲ.

Verse: 58V    მცირედრაჲ Q.


Verse: 59  Link to ntkpl   და ვითარცა წარჴდა ჟამი ერთი, სხუაჲ ვინმე დაამტკიცებდა და იტყოდა: ჭეშმარიტად ესეცა მის თანავე იყო, და რამეთუ გალილეველ არს.


Verse: 60  Link to ntkpl   ხოლო პეტრე ჰრქუა მას: კაცო, არა ვიცი, რასა იტყჳ. -- და მეყსეულად, ვიდრე იტყოდაღა იგი ამას, ქათამმან იყივლა.

Verse: 60V    პეტრჱ Q.


Verse: 61  Link to ntkpl   და მოიქცა უფალი და მიხედა პეტრეს. და მოეჴსენა პეტრეს სიტყუაჲ იგი უფლისაჲ, რომელ ჰრქუა მას, ვითარმედ: ვიდრე ქათმისა ჴმობადმდე სამგზის უვარ-მყო მე.


Verse: 62  Link to ntkpl   და განვიდა გარე და ტიროდა მწარედ.

Verse: 62V    გარეჱ Q.


Verse: 63  Link to ntkpl   ხოლო კაცთა მათ რომელთა შეეპყრა იესუ, ეკიცხევდეს მას და სცემდეს.


Verse: 64  Link to ntkpl   და დაჰბურეს მას თავსა და სცემდეს პირსა და ჰკითხვიდეს და ეტყოდეს: წინაწარმეტყუელებდ, ვინ არს, რომელმან გცა შენ.


Verse: 65  Link to ntkpl   და სხუასა მრავალსა სიტყუასა ჰგმობდეს და იტყოდეს მისთჳს.


Verse: 66  Link to ntkpl   და ვითარცა განთენა დღჱ, შეკრბეს მოხუცებულნი ერისანი, მღდელთმოძღუარნი და მწიგნობარნი და აღიყვანეს იგი საკრებულოსა მას მათსა

Verse: 66V    დღე HIK.


Verse: 67  Link to ntkpl   და ეტყოდეს: უკუეთუ შენ ხარ ქრისტჱ, მითხარ ჩუენ! -- ჰრქუა მათ იესუ: უკუეთუ გითხრა თქუენ, არავე გრწმენეს ჩემი;

Verse: 67V    ქრისტე HIK; გითხრათ H#I.


Verse: 68  Link to ntkpl   და უკუეთუ გკითხო თქუენ, ვერაჲვე მომიგოთ მე, გინა განმიტეოთ.


Verse: 69  Link to ntkpl   ამიერითგან იყოს ძჱ კაცისაჲ მჯდომარე მარჯუენით ძლიერებასა ღმრთისასა.

Verse: 69V    ძე HIK; მარჯუჱნით H.


Verse: 70  Link to ntkpl   და ჰრქუეს მას ყოველთა: შენ უკუე ხარა ძჱ ღმრთისაჲ? -- ჰრქუა მათ იესუ: თქუენ იტყჳთ, ვითარმედ მე ვარ.

Verse: 70V    უკუჱ QHIK; ძე HIK.


Verse: 71  Link to ntkpl   და მათ თქუეს: რაჲსაღა გჳჴმან მოწამენი? რამეთუ ჩუენ თჳთ გუესმის პირისაგან მაგისისა.

Verse: 71V    გუჱსმის HI.



Next part


This text is part of the TITUS edition of Tetraevangelium (redactio athonensis).

Copyright TITUS Project, Frankfurt a/M, 16.2.2022. No parts of this document may be republished in any form without prior permission by the copyright holder.