TITUS
Tetraevangelium (redactio athonensis)
Part No. 62
Previous part

Chapter: 18 


Verse: 1  Link to ntkpl   ეტყოდა მათ იგავსაცა, ვითარ-იგი ჯერ-არს მათა მარადის ლოცვაჲ და რაჲთა არა ეწყინებოდის ლოცვასა შინა.

Verse: 1V    მათდა HI.


Verse: 2  Link to ntkpl   და იტყოდა: მსაჯული ვინმე იყო ქალაქსა შინა, ღმრთისა არა ეშინოდა და კაცთაგან არა ჰრცხუენოდა.

Verse: 2V    ჰრცხუჱნოდა HI.


Verse: 3  Link to ntkpl   და ქურივი ვინმე იყო მასვე ქალაქსა შინა. და მოვიდეს მისა და ეტყჳნ: მისაჯე მე წინამოსაჯულისაგან ჩემისა!

Verse: 3V    მისსა K.


Verse: 4  Link to ntkpl   და არა ისმინის მისი, ვიდრე რომლად ჟამადმდე. ამისა შემდგომად თქუა გულსა შინა თჳსსა: დაღათუ ღმრთისა არა მეშინის და კაცთაგან არა მრცხუენის,

Verse: 4V    ამისსა K; მრცხუჱნის HI.


Verse: 5  Link to ntkpl   ამისთჳს, რამეთუ შრომასა შემამთხუევს მე მარადის ქურივი ესე, უსაჯო მას, რაჲთა არა მარადის მოვიდოდის და მაწყინებდეს მე.

Verse: 5V    შემამთხუჱვს HI.


Verse: 6  Link to ntkpl   და ჰრქუა მათ უფალმან: ისმინეთ, რასა-იგი მსაჯული სიცრუვისაჲ იტყჳს.


Verse: 7  Link to ntkpl   ხოლო ღმერთმან არამე ყოსა შურის-გებაჲ რჩეულთა მისთაჲ, რომელნი ღაღადებენ მისა დღჱ და ღამჱ, და სულგრძელ არს მათ ზედა?

Verse: 7V    მისსა K; დღე HIK; ღამე HIK, ღამეჱ Q.


Verse: 8  Link to ntkpl   გეტყჳ თქუენ: ყოს შურის-გებაჲ მათთჳს ადრე. ხოლო მო-რაჲ-ვიდეს ძჱ კაცისაჲ, პოვოსმეა სარწმუნოებაჲ ქუეყანასა ზედა?

Verse: 8V    ძე HIK; პოოსმეა K.


Verse: 9  Link to ntkpl   თქუა ვიეთამე მიმართ იგავი ესე, რომელნი ესვენ თავთა თჳსთა, ვითარმედ მართალ არიან, და შეურაცხ-ჰყოფენ სხუათა,


Verse: 10  Link to ntkpl   ვითარმედ: ორნი კაცნი აღვიდოდეს ლოცვად ტაძარსა მას: ერთი ფარისეველი და ერთი მეზუერე.

Verse: 10V    მეზუჱრე QHIK.


Verse: 11  Link to ntkpl   ფარისეველი იგი წარდგა და ამას ილოცვიდა თჳსაგან: ღმერთო, გმადლობ შენ, რამეთუ არა ვარ, ვითარცა სხუანი კაცნი, მტაცებელ, ცრუ და მემრუშე, გინა ვითარცა ესე მეზუერე.

Verse: 11V    მემრუშჱ Q; მეზუჱრე HI, მეზუერჱ Q.


Verse: 12  Link to ntkpl   ვიმარხავ ორგზის შაბათსა შინა და ათეულსა შევსწირავ ყოვლისაგან მონაგებისა ჩემისა.


Verse: 13  Link to ntkpl   ხოლო მეზუერე იგი შორს დგა და არა იკადრებდა თუალთაცა ზეახილვად, არამედ იცემდა მკერდსა და იტყოდა: ღმერთო, მილხინე ცოდვილსა ამას.

Verse: 13V    მეზუჱრე HI. აქედან აკლია Q-ს.


Verse: 14  Link to ntkpl   გეტყჳ თქუენ: გარდამოვიდა ესე განმართლებული სახედ თჳსა, ვიდრე ფარისეველი იგი, რამეთუ ყოველმან რომელმან აღიმაღლოს თავი თჳსი, იგი დამდაბლდეს; და რომელმან დაიმდაბლოს თავი თჳსი, იგი ამაღლდეს.

Verse: 14V    სახიდ HI.


Verse: 15  Link to ntkpl   მოჰგურიბდეს მას ყრმებსაცა, რაჲთა მიეახლნენ მას. და ვითარცა იხილეს მოწაფეთა, აყენებდეს მათ.

Verse: 15V    მიეახლენ K.


Verse: 16  Link to ntkpl   ხოლო იესუ მოუწოდა მათ და ჰრქუა: აცადეთ ყრმებსა მაგას მოსლვად ჩემდა და ნუ აყენებთ მაგათ, რამეთუ ეგევითართაჲ არს სასუფეველი ღმრთისაჲ.


Verse: 17  Link to ntkpl   ამენ გეტყჳ თქუენ: რომელმან არა შეიწყნაროს სასუფეველი ღმრთისაჲ. ვითარცა ყრმაჲ, ვერ შევიდეს მას შინა.


Verse: 18  Link to ntkpl   და ჰკითხა ვინმე მას მთავარმან და ჰრქუა: მოძღუარო სახიერო, რაჲ საქმე ვქმნე, რაჲთა ცხორებაჲ საუკუნოჲ დავიმკჳდრო?


Verse: 19  Link to ntkpl   ჰრქუა მას იესუ: რაჲსა მეტყჳ მე სახიერით? არა ვინ არს სახიერ, გარნა მხოლოჲ ღმერთი.


Verse: 20  Link to ntkpl   მცნებანი იცნი: ნუ იმრუშებ, ნუ კაც-ჰკლავ, ნუ იპარავ, ნუ ცილსა სწამებ, პატივ-ეც მამასა შენსა და დედასა შენსა.


Verse: 21  Link to ntkpl   ხოლო მან თქუა: ეგე ყოველი დავიმარხე სიყრმით ჩემითგან.


Verse: 22  Link to ntkpl   ესმა რაჲ ესე იესუს, ჰრქუა მას: ერთიღა გაკლს შენ: ყოველი, რაჲცა გაქუს, განყიდე და მიეც გლახაკთა და გაქუნდეს საუნჯე ცათა შინა და მოვედ და შემომიდეგ მე.


Verse: 23  Link to ntkpl   და ვითარცა ესმა ესე მას, მწუხარე იქმნა, რამეთუ იყო იგი მდიდარ ფრიად.


Verse: 24  Link to ntkpl   ვითარცა იხილა იგი იესუ, რამეთუ შეწუხნა, თქუა: ვითარ ძნიად შევიდენ სასუფეველსა ღმრთისასა, რომელთა აქუნდეს საფასე!


Verse: 25  Link to ntkpl   უადვილეს არს მანქანისა საბელი ჴურელსა ნემსისასა განსლვად, ვიდრე მდიდარი შესლვად სასუფეველსა ღმრთისასა.

Verse: 25V    მანქანისა* აშიაზე მიწერილია "აქლემი" HI. აქედან გრძელდება Q.


Verse: 26  Link to ntkpl   ხოლო რომელთა-იგი ესმა, ჰრქუეს მას: და ვის ჴელ-ეწიფების ცხორებად?


Verse: 27  Link to ntkpl   მიუგო იესუ და ჰრქუა მათ: შეუძლებელი კაცთაგან შესაძლებელ არს ღმრთისა მიერ.


Verse: 28  Link to ntkpl   ჰრქუა მას პეტრე: აჰა, ესერა, ჩუენ დაუტევეთ ყოველი და შეგიდეგით შენ.


Verse: 29  Link to ntkpl   ხოლო იესუ ჰრქუა მათ: ამენ გეტყჳ თქუენ, რამეთუ არა ვინ არს, რომელმან დაუტევა სახლი, გინა მამაჲ, გინა დედაჲ, გინა ძმანი, გინა ცოლი, გინა შვილნი სასუფეველისათჳს ღმრთისა,


Verse: 30  Link to ntkpl   რომელმან არა მიიღოს მრავალი წილი ჟამსა ამას და საუკუნესა მომავალსა ცხორებაჲ საუკუნოჲ.


Verse: 31  Link to ntkpl   და წარიყვანნა ათორმეტნი იგი და ჰრქუა მათ: აჰა, ესერა, აღვალთ იერუსალჱმდ, და აღესრულნენ ყოველნი წერილნი წინაწარმეტყუელთანი ძესა ზედა კაცისასა:


Verse: 32  Link to ntkpl   რამეთუ მიეცეს ჴელთა წარმართთასა, და ეკიცხევდენ მას, და იგინოს, და ჰნერწყუვიდენ


Verse: 33  Link to ntkpl   და ტანჯონ და მოკლან იგი, და მესამესა დღესა აღდგეს.


Verse: 34  Link to ntkpl   და მათ არარაჲ გულისჴმა-ყვეს ესე, არამედ იყო სიტყუაჲ იგი დაფარულ მათგან, და არა იცოდეს თქუმული იგი.


Verse: 35  Link to ntkpl   და იყო, ვითარცა მიეახლნეს იერიქოდ, ბრმაჲ ვინმე ჯდა გზასა ზედა მთხოველად.

Verse: 35V    მთხოელად K.


Verse: 36  Link to ntkpl   ვითარცა ესმა, ვითარმედ ერი წარმოვალს, იკითხვიდა: რაჲმე არს ესე?


Verse: 37  Link to ntkpl   უთხრეს მას, ვითარმედ: იესუ ნაზარეველი წარმოვალს.


Verse: 38  Link to ntkpl   და მან ღაღად-ყო და თქუა: იესუ, ძეო დავითისო, შემიწყალე მე!

Verse: 38V    ღაღატ- Q.


Verse: 39  Link to ntkpl   ხოლო რომელნი წინაუძღოდეს, ჰრისხვიდეს მას, რაჲთა დადუმნეს. ხოლო იგი უფროჲს ღაღადებდა და იტყოდა: იესუ, ძეო დავითისო, შემიწყალე მე!


Verse: 40  Link to ntkpl   და დადგა იესუ და ბრძანა მოწოდებაჲ მისი. და ვითარცა მოეახლა იგი, ჰკითხა მას:

Verse: 40V    და (1) -- QK.


Verse: 41  Link to ntkpl   რაჲ გნებავს, და გიყო შენ? ხოლო მან ჰრქუა: უფალო, რაჲთა აღვიხილნე თუალნი.


Verse: 42  Link to ntkpl   ხოლო იესუ ჰრქუა მას: აღიხილენ! სარწმუნოებამან შენმან გაცხოვნა შენ.


Verse: 43  Link to ntkpl   და მეყსეულად აღიხილნა და მისდევდა მას და ადიდებდა ღმერთსა. და ყოველმან ერმან იხილეს და აქებდეს ღმერთსა.



Next part


This text is part of the TITUS edition of Tetraevangelium (redactio athonensis).

Copyright TITUS Project, Frankfurt a/M, 16.2.2022. No parts of this document may be republished in any form without prior permission by the copyright holder.