TITUS
Tetraevangelium (redactio athonensis)
Part No. 56
Previous part

Chapter: 12 


Verse: 1  Link to ntkpl   რომელთა ზედა შეკრებულ იყო ბევრეული ერი, ვიდრემდე დასთრგუნვიდეს ურთიერთას. იწყო პირველად სიტყუად მოწაფეთა თჳსთა და ჰრქუა: ეკრძალენით თავთა თქუენთა ცომისაგან ფარისეველთაჲსა, რომელ არს ორგულებაჲ.


Verse: 2  Link to ntkpl   ხოლო არარაჲ არს დაფარული, რომელი არა გამოცხადნეს, და დამალული, რომელი არა საცნაურ იყოს.


Verse: 3  Link to ntkpl   ამისთჳს რომელი ბნელსა შინა სთქუათ, ნათელსა შინა ისმეს, და რომელსა ყურსა ეტყოდით საუნჯეთა შინა, იქადაგოს ერდოთა ზედა.


Verse: 4  Link to ntkpl   ხოლო გეტყჳ თქუენ, მეგობართა ჩემთა: ნუ გეშინინ მათგან, რომელთა მოწყჳდნენ ჴორცნი და ამისა შემდგომად ვერარაჲ აქუს უმეტესი, რაჲ გიყონ თქუენ.

Verse: 4V    მოსწყჳდნენ QHIK; ამისსა K; უმეტი K.


Verse: 5  Link to ntkpl   ხოლო გიჩუენო თქუენ, ვისა გეშინოდის: გეშინოდენ მისა, რომელსა შემდგომად მოწყუედისა ჴელ-ეწიფების შთაგდებად გეჰენიასა. ჰე, გეტყჳ თქუენ, მისა გეშინოდენ.

Verse: 5V    გიჩუჱნო HI; ვისსა K; მისსა (1) K; მოწყუჱდისა HI; გეჰჱნიასა I; ჰჱ QHIK; მისსა (2) K.


Verse: 6  Link to ntkpl   ანუ არა ხუთი სირი განისყიდების ორის ასარის? და ერთიცა მათგანი არა არს დაფარულ წინაშე ღმრთისა.


Verse: 7  Link to ntkpl   არამედ თმანიცა თავისა თქუენისანი ყოველნი განრაცხილ არიან. ნუუკუე გეშინინ, რამეთუ მრავალთა სირთა უმჯობეს ხართ.

Verse: 7V    ნუუკუჱ QHIK.


Verse: 8  Link to ntkpl   ხოლო გეტყჳ თქუენ: ყოველმან რომელმან აღიაროს ჩემდა მომართ წინაშე კაცთა, ძემანცა კაცისამან აღიაროს იგი წინაშე ანგელოზთა ღმრთისათა.


Verse: 9  Link to ntkpl   და რომელმან უვარ-მყოს მე წინაშე კაცთა, უვარ იქმნეს იგიცა წინაშე ანგელოზთა ღმრთისათა.


Verse: 10  Link to ntkpl   და ყოველმან რომელმან თქუას სიტყუაჲ ძისა მიმართ კაცისა, მიეტეოს მას, ხოლო სულისა წმიდისა მგმობარსა არა მიეტევოს.

Verse: 10V    მიეტეოს (2) HIK.


Verse: 11  Link to ntkpl   და ოდეს შეგიყვანნენ თქუენ შესაკრებელთა და წინაშე მთავართა და ჴელმწიფეთა, ნუ ჰზრუნავთ, ვითარ, ანუ რაჲ სიტყუაჲ მიუგოთ, ანუ რაჲ სთქუათ,

Verse: 11V    წინაშე -- HI; ზრუნავთ QHI.


Verse: 12  Link to ntkpl   რამეთუ სულმან წმიდამან გასწაოს თქუენ მას ჟამსა შინა, რაჲ-იგი სთქუათ.


Verse: 13  Link to ntkpl   ჰრქუა ვინმე მას მის ერისაგანმან: მოძღუარ, არქუ ძმასა ჩემსა, რაჲთა განმეყოს მე სამკჳდრებელსა.


Verse: 14  Link to ntkpl   ხოლო თავადმან ჰრქუა მას: კაცო, ვინ დამადგინა მე მსაჯულად და განმყოფელად თქუენდა?

Verse: 14V    თავად H.


Verse: 15  Link to ntkpl   და ეტყოდა მათ: ეკრძალენით და დაიცვენით თავნი თქუენნი ყოვლისაგან ანგაჰრებისა, რამეთუ არა ნამეტნავისაგან ვისამე არნ ცხორებაჲ მისი ნაყოფთა მისთაგან.

Verse: 15V    ნამეტნავ QHIK; ვისსამე K.


Verse: 16  Link to ntkpl   და ეტყოდა მათ იგავსაცა და ჰრქუა მათ: კაცისაჲ ვისიმე მდიდრისაჲ ნაყოფიერ იყო აგარაკი.

Verse: 16V    ვისმე K.


Verse: 17  Link to ntkpl   და განიზრახვიდა გულსა შინა თჳსსა და თქუა: რაჲმე ვყო, რამეთუ არა მაქუს, სადა შევიკრიბო ნაყოფი ჩემი?

Verse: 17V    თჳსა Q; შევკრიბო HI..


Verse: 18  Link to ntkpl   და თქუა: ესე ვყო: დავარღჳნე საუნჯენი ჩემნი და უფროჲსნი აღვაშენნე და შევიკრიბო მუნ ყოველი ნაყოფი და კეთილი ჩემი.


Verse: 19  Link to ntkpl   და ვჰრქუა სულსა ჩემსა: სულო, გაქუს მრავალი კეთილი დაუნჯებული მრავალთა წელთა: განისუენე, ჭამე და სუ და იხარებდ.

Verse: 19V    განისუჱნე I.


Verse: 20  Link to ntkpl   ჰრქუა მას ღმერთმან: უგუნურო, ამას ღამესა მიგიღონ სული შენი შენგან; ეგე, რომელ მოიმზადე, ვისა იყოს?


Verse: 21  Link to ntkpl   ეგრეცა რომელი იუნჯებდეს თავისა თჳსისა და არა ღმერთისა მიერ განმდიდრდებოდის.


Verse: 22  Link to ntkpl   და ჰრქუა იესუ მოწაფეთა თჳსთა: ამისთჳს გეტყჳ თქუენ: ნუ ჰზრუნავთ სულისა თქუენისა, რაჲ შჭამოთ, და ნუცა ჴორცთა თქუენთა, რაჲ შეიმოსოთ.

Verse: 22V    ზრუნავთ Q; სჭამოთ K.


Verse: 23  Link to ntkpl   რამეთუ სული უფროჲს არს საზრდელისა და ჴორცნი -- სამოსლისა.


Verse: 24  Link to ntkpl   განიცადენით ყორანნი, რამეთუ არა სთესვენ, არცა მკიან, რომელთა არა აქუს საუნჯჱ, ანუ სადა შეიკრიბონ, და ღმერთი ზრდის მათ. რაოდენ თქუენ უმჯობეს ხართ მფრინველთა?

Verse: 24V    საუნჯე HIK.


Verse: 25  Link to ntkpl   ვინმე უკუე თქუენგანი ზრუნვიდეს და შეუძლოს შეძინებად ჰასაკსა თჳსსა წყრთა ერთ?

Verse: 25V    უკუჱ HI.


Verse: 26  Link to ntkpl   უკუეთუ არცა უმცირესსა შემძლებელ ხართ, რაჲსაღა სხუასა მას ჰზრუნავთ?

Verse: 26V    უკუჱთუ H; ზრუნავთ QHI.


Verse: 27  Link to ntkpl   განიცადენით შროშანნი, ვითარ-იგი აღორძნდის: არცა შურების, არცა სთავს. ხოლო გეტყჳ თქუენ, რამეთუ: არცა სოლომონ ყოველსა დიდებასა თჳსსა შეიმოსა, ვითარცა ერთი ამათგანი.


Verse: 28  Link to ntkpl   უკუეთუ ველსა გარე, რომელი დღეს თივა არს და ხვალე თორნესა შთაეგზნეს, ღმერთმან ესრეთ შემოსის, რაოდენ უფროჲს თქუენ, მცირედ მორწმუნენო?

Verse: 28V    უკუჱთუ I; თქუენ ] თქ?ე H.


Verse: 29  Link to ntkpl   და თქუენ ნუ ეძიებთ, რაჲ შჭამოთ და რაჲ ჰსუათ, და ნუცა განსცხრებით,

Verse: 29V    სჭამოთ K; სუათ QHI.


Verse: 30  Link to ntkpl   რამეთუ ამას ყოველსა ნათესავნი სოფლისანი ეძიებენ, ხოლო მამამან თქუენმან იცის, რაჲ გიჴმს ამათ ყოველთაგანი,


Verse: 31  Link to ntkpl   გარნა ეძიებდით სასუფეველსა ღმრთისასა, და ესე ყოველი შეგეძინოს თქუენ.


Verse: 32  Link to ntkpl   ნუ გეშინინ მცირესა მაგას სამწყსოსა, რამეთუ სათნო-იყო მამამან თქუენმან ზეცათამან მოცემად თქუენდა სასუფეველი.


Verse: 33  Link to ntkpl   განყიდენით მონაგებნი თქუენნი და მიეცით ქველისსაქმჱ და ყავთ თავისა თქუენისა საფასჱ, რომელი არა დაძუელდეს, და საუნჯჱ მოუკლებელი ცათა შინა, სადა-იგი მპარავი არა მიეხების, არცა მღილმან განრყუნის.

Verse: 33V    ქველისსაქმე HIK; საფასე HIK; დაძუჱლდეს HI; საუნჯე HIK.


Verse: 34  Link to ntkpl   სადაცა არს საუნჯე თქუენი, მუნცა იყოს გული თქუენი.


Verse: 35  Link to ntkpl   იყვნედ წელნი თქუენნი მორტყმულ და სანთელნი თქუენნი აღნთებულ.


Verse: 36  Link to ntkpl   და თქუენ ემსგავსენით კაცთა მათ, რომელნი მოელიედ უფალსა თჳსსა, ოდეს მოვიდეს ქორწილისაგან, რაჲთა, რაჟამს მოვიდეს და ირეკოს, მეყსეულად განუღონ მას.


Verse: 37  Link to ntkpl   ნეტარ იყვნეს იგი მონანი, რომელთაჲ მოვიდეს უფალი მათი და პოვნეს იგინი მღჳძარენი. ამენ გეტყჳ თქუენ, რამეთუ მოირტყნეს და დასხნეს იგინი, წარმოუდგეს და ჰმსახურებდეს მათ.


Verse: 38  Link to ntkpl   დაღათუ მეორესა საჴუმილავსა და მესამესა მოვიდეს და პოვნეს ესრეთ, ნეტარ იყვნენ იგინი.


Verse: 39  Link to ntkpl   ხოლო ესემცა უწყით: უკუეთუმცა იცოდა სახლისა უფალმან, რომელსა ჟამსა მპარავი მოვალს, იღჳძებდამცა და არა უტევა დათხრად სახლისა თჳსისა.

Verse: 39V    უკუჱთუმცა H.


Verse: 40  Link to ntkpl   და თქუენცა იყვენით განმზადებულ, რამეთუ ჟამსა, რომელსა არა ჰგონებდეთ, ძჱ კაცისაჲ მოვიდეს.

Verse: 40V    ძე HIK.


Verse: 41  Link to ntkpl   ჰრქუა მას პეტრე: უფალო, ჩუენდა მომართ ხოლო იტყჳ იგავსა ამას, ანუ სხუათა ყოველთა მიმართ?


Verse: 42  Link to ntkpl   და ჰრქუა იესუ: ვინმე არს მნე იგი სარწმუნოჲ და გონიერი, რომელი დაადგინოს უფალმან მონათა თჳსთა ზედა მიცემად იფქლი ჟამსა თჳსსა?


Verse: 43  Link to ntkpl   ნეტარ არს იგი მონაჲ, რომლისაჲ მოვიდეს უფალი მისი და პოვოს იგი ესრეთ მოქმედი.

Verse: 43V    პოოს HIK.


Verse: 44  Link to ntkpl   ამენ გეტყჳ თქუენ, რამეთუ ყოველთა ზედა მონაგებთა მისთა დაადგინოს იგი.


Verse: 45  Link to ntkpl   უკუეთუ თქუას მონამან მან გულსა შინა თჳსსა: ყოვნის უფალი ჩემი მოსლვად, და იწყოს გუემად მონათა და მჴევალთა და ჭამად და სუმად და დათრობად,

Verse: 45V    გუჱმად HI.


Verse: 46  Link to ntkpl   მოვიდეს უფალი იგი მონისაჲ მის დღესა, რომელსა არა მოელოდის, და ჟამსა, რომელი არა იცის, და ორგან განკუეთოს იგი და ნაწილი მისი დადვას ურწმუნოთა თანა.

Verse: 46V    განკუჱთოს HI.


Verse: 47  Link to ntkpl   ხოლო მონამან რომელმან იცის ნებაჲ უფლისა თჳსისაჲ და არა განემზადოს ნებისაებრ მისისა, იტანჯოს იგი ფრიად.

Verse: 47V    უფლისაჲ K.


Verse: 48  Link to ntkpl   ხოლო რომელმან არა იცის და ქმნეს რაჲმე ღირსი ტანჯვისაჲ, იგუემოს მცირედ, რამეთუ ყოველსა რომელსა მიეცა დიდად, დიდადცა იძიოს მისგან, და რომელსა მიეცა ფრიად, უმეტესი მოჰჴადონ მას.

Verse: 48V    იგუჱმოს HI.


Verse: 49  Link to ntkpl   ცეცხლისა მოვედ მიფენად ქუეყანასა ზედა და რაჲ მნებავს, რაჲთა აწვე აღეგზნეს!

Verse: 49V    აღეგზნას K.


Verse: 50  Link to ntkpl   ხოლო ნათლის-ღებაჲ მაქუს ნათლის-ღებად და ვითარ შეურვებულ ვარ, ვიდრემდე აღესრულოს!


Verse: 51  Link to ntkpl   ეგრე ჰგონებთ, ვითარმედ მშჳდობისა მოვედ მიფენად ქუეყანასა ზედა? არა, გეტყჳ თქუენ, არამედ -- განყოფად.


Verse: 52  Link to ntkpl   რამეთუ იყვნენ ამიერითგან ხუთნი სახლსა შინა ერთსა განყოფილ: სამნი ორთაგან და ორნი სამთაგან;


Verse: 53  Link to ntkpl   განყოფად მამაჲ ძისაგან და ძჱ მამისაგან; და დედაჲ ასულისაგან და ასული დედისაგან; დედამთილი ძისცოლისაგან მისისა და სძალი დედამთილისაგან.

Verse: 53V    ძე HIK; და (2) -- HI; დედისაგან + და K.


Verse: 54  Link to ntkpl   ეტყოდა იესუ ერსაცა მას: რაჟამს იხილოთ ღრუბელი აღმომავალი დასავალით, მეყსეულად სთქჳთ, ვითარმედ: წჳმაჲ მოაქუს, -- და არნ ეგრეთ.

Verse: 54V    სთქუთ K.


Verse: 55  Link to ntkpl   და რაჟამს სამხრით ქარი ქრინ, სთქჳთ, ვითარმედ: სიცხე იყოს, და არნ ეგრე.

Verse: 55V    სთქუთ K; ეგრეთ K.


Verse: 56  Link to ntkpl   ორგულნო, პირი სამე ქუეყანისაჲ და ცისაჲ იცით გამოცდად, ხოლო ჟამი ესე ვითარ არა გამოიცადეთ?


Verse: 57  Link to ntkpl   ანუ რაჲსა თავით თჳსით არა შჯით სამართალსა?

Verse: 57V    სჯით HI.


Verse: 58  Link to ntkpl   რამეთუ ოდეს მიხუალ მოსაჯულისა შენისა თანა მთავრისა წინაშე გზასა ზედა, მიეც საქმარი განთავისუფლებად მისგან, ნუუკუე მიგიყვანოს შენ მსაჯულისა, და მსაჯულმან მიგცეს შენ მეხარკესა, და მეხარკემან მიგცეს შენ საპყრობილედ.

Verse: 58V    ნუუკუჱ QHI.


Verse: 59  Link to ntkpl   გეტყჳ შენ: ვერ გამოხჳდე მიერ, ვიდრემდე უკუანაჲსკნელიცა იგი მი-ვე-სცე მწულილი.



Next part


This text is part of the TITUS edition of Tetraevangelium (redactio athonensis).

Copyright TITUS Project, Frankfurt a/M, 16.2.2022. No parts of this document may be republished in any form without prior permission by the copyright holder.