TITUS
Tetraevangelium (redactio athonensis)
Part No. 9
Previous part

Chapter: 9 


Verse: 1  Link to ntkpl   და შევიდა ნავსა და წიაღჴდა და მოვიდა თჳსა ქალაქად.

Verse: 1V    თჳსა ] თჳსად K


Verse: 2  Link to ntkpl   მაშინ მოართუეს მას განრღუეული ცხედარსა ზედა მდებარე. და იხილა იესუ სარწმუნოებაჲ მათი და ჰრქუა განრღუეულსა მას: ნუ გეშინინ, შვილო, მიგეტევნენ შენ ცოდვანი შენნი.

Verse: 2V    მოართუეს ] მოართუჱს HIXU; განრღუეული ] განრღუჱული HIXUJ; განრღუეულსა ] განრღუჱულსა HIUJ


Verse: 3  Link to ntkpl   და, აჰა ესერა, მწიგნობართაგანთა ვიეთმე თქუეს გულთა შინა მათთა, ვითარმედ: ესე გმობს.

Verse: 3V    თქუეს ] თქუჱს UJ


Verse: 4  Link to ntkpl   იცოდნა იესუ ზრახვანი მათნი და ჰრქუა მათ: რაჲსა თქუენ ბოროტსა ჰზრახავთ გულთა შინა თქუენთა?

Verse: 4V    იცოდნა ] იცნოდა HIXU; რაჲსა ] რაჲსათჳს J; თქუენ ] -- J; ჰზრახავთ ] ზრახავთ UJ; თქუენთა ] თქუჱნთა X


Verse: 5  Link to ntkpl   რაჲ უადვილეს არს სიტყუად: მიგეტევნენ შენ ცოდვანი შენნი, ანუ სიტყუად: აღდეგ და ვიდოდე?

Verse: 5V    მიგეტვნენ ] მიგეტვნე X; შენ ცოდვანი ] შეცოდებანი X; სიტყუად ] რქუმად J; და ] -- J


Verse: 6  Link to ntkpl   ხოლო რაჲთა უწყოდით, რამეთუ ჴელმწიფებაჲ აქუს ძესა კაცისასა ქუეყანასა ზედა მიტევებად ცოდვათა, -- მაშინ ჰრქუა განრღუეულსა მას: აღდეგ, აღიღე ცხედარი შენი და წარვედ სახედ შენდა!

Verse: 6V    განრღუეულსა ] განრღუჱულსა HIXU; აღდეგ ] + და X; სახედ ] სახიდ XUJ


Verse: 7  Link to ntkpl   და იგი მეყსეულად აღდგა და წარვიდა სახედ თჳსა.

Verse: 7V    სახედ ] სახიდ XUJ


Verse: 8  Link to ntkpl   იხილა რაჲ ესე ერმან მან, დაუკჳრდა და ადიდებდეს ღმერთსა, რომელმან მოსცა ესევითარი ჴელმწიფებაჲ კაცთა.


Verse: 9  Link to ntkpl   და წარვიდოდა მიერ იესუ და იხილა კაცი, რომელი ჯდა საზუერესა, -- მატთეოს სახელი მისი, -- და ჰრქუა მას: მომდევდი მე! და აღდგა და მისდევდა მას.

Verse: 9V    და (2) ] -- HIKX; საზუერესა ] საზუჱრესა HIU;


Verse: 10  Link to ntkpl   და იყო, ჯდა რაჲ იგი ინაჴით სახლსა შინა, და მრავალნი მეზუერენი და ცოდვილნი თანასხდეს ინაჴით იესუჲს თანა და მოწაფეთა მისთა თანა.

Verse: 10V    მეზუერენი ] მეზუჱრენი HIXU


Verse: 11  Link to ntkpl   და ვითარცა იხილეს ფარისეველთა მათ, ჰრქუეს მოწაფეთა მისთა: რაჲსათჳს მეზუერეთა და ცოდვილთა თანა ჭამს მოძღუარი თქუენი?

Verse: 11V    მეზუერეთა ] მეზუჱრეთა HIXU


Verse: 12  Link to ntkpl   ხოლო იესუს ვითარცა ესმა, ჰრქუა მათ: არა უჴმს ცოცხალთა მკურნალი, არამედ სნეულთა.


Verse: 13  Link to ntkpl   ხოლო თქუენ წარვედით და ისწავეთ, რაჲ არს: წყალობაჲ მნებავს და არა მსხუერპლი. რამეთუ არა მოვედ წოდებად მართალთა, არამედ ცოდვილთა.

Verse: 13V    მსხუერპლი ] მსხუჱრპლი UJ


Verse: 14  Link to ntkpl   მაშინ მოუჴდეს მას მოწაფენი იოვანესნი და ეტყოდეს: რაჲსათჳს ჩუენ და ფარისეველნი ვიმარხავთ ფრიად, ხოლო მოწაფენი შენნი არა იმარხვენ?


Verse: 15  Link to ntkpl   ჰრქუა მათ იესუ: ჴელ-მე -ეწიფებისა ძეთა სიძისათა გლოვად, ვიდრემდე მათ თანა არს სიძე? მოვლენან დღენი, რაჟამს აღმაღლდეს მათგან სიძე იგი, და მაშინ იმარხვიდენ.

Verse: 15V    გლოვად ] გლოად HIXU


Verse: 16  Link to ntkpl   არა ვინ დაადგის სადგმელი უმურკნველი სამოსელსა ძუელსა, რამეთუ აღიღის სავსებაჲ სამოსლისა მისგან, და უფროჲსი განხეთქილებაჲ იქმნის.

Verse: 16V    უმურკნველი ] უმურკლველი X; ძუელსა ] ძუჱლსა HIXU; სამოსლისა ] სამოსლისაჲ K


Verse: 17  Link to ntkpl   არცა შთაასხიან ღჳნოჲ ახალი თხიერთა ძუელთა, რაჲთა არა განსთქდენ თხიერნი, და ღჳნოჲ დაითხიოს, და თხიერნი წარწყმდენ. არამედ შთაასხიან ღჳნოჲ ახალი თხიერთა ახალთა, და ორნივე დაიმარხნიან.

Verse: 17V    ძუელთა ] ძუჱლთა HIUX; განსთქდენ ] განსქდენ X


Verse: 18  Link to ntkpl   და ვითარცა იგი ამას ეტყოდა მათ, მაშინ მოუჴდა მას მთავარი ერთი, თაყუანის-სცემდა მას და ეტყოდა, ვითარმედ: ასული ჩემი აწღა აღესრულა; არამედ მოვედ და დასდევ ჴელი შენი მას ზედა, და ცხოვნდეს.

Verse: 18V    ცხოვნდეს ] ცხონდეს HIXJ


Verse: 19  Link to ntkpl   და აღდგა იესუ და შეუდგა მას, და მოწაფენი მისნი მის თანა.


Verse: 20  Link to ntkpl   და, აჰა, ესერა, დედაკაცი ვინმე, რომელი იყო სისხლისა დინებასა ათორმეტ წელ, მოუჴდა ზურგით და შეახო ფესუსა სამოსლისა მისისასა.

Verse: 20V    სისხლისა ] სისხლის J; შეახო ] შიახო X


Verse: 21  Link to ntkpl   რამეთუ იტყოდა გულსა თჳსსა, ვითარმედ: შე-ხოლო-თუ-ვახო სამოსელსა მისსა, ვცხოვნდე.

Verse: 21V    გულსა ] + შინა U; ვცხოვნდე ] ვცხონდე HIX


Verse: 22  Link to ntkpl   ხოლო იესუ მიექცა, იხილა იგი და ჰრქუა მას: ნუ გეშინინ, ასულო, სარწმუნოებამან შენმან გაცხოვნა შენ. და განიკურნა დედაკაცი იგი მიერ ჟამითგან.


Verse: 23  Link to ntkpl   და მოვიდა იესუ სახლსა მის მთავრისასა და იხილა მუნ მგოსნები და ერი კრებული და შფოთი

Verse: 23V    იხილა ] იხილნა X


Verse: 24  Link to ntkpl   და ჰრქუა მათ: განეშორენით, რამეთუ არა მომკუდარ არს ეგე, არამედ სძინავს. ხოლო იგინი ეკიცხევდეს მას.


Verse: 25  Link to ntkpl   და რაჟამს გამოასხა ერი იგი, შევიდა და უპყრა ჴელი მისი და აღადგინა ქალი იგი.


Verse: 26  Link to ntkpl   და განჴდა ჰამბავი მისი ყოველსა მას ქუეყანასა.


Verse: 27  Link to ntkpl   და წარმო-რაჲ-ვიდოდა მიერ იესუ, მოსდევდეს მას ორნი ბრმანი, ღაღადებდეს და იტყოდეს: შემიწყალენ ჩუენ, ძეო დავითისო!


Verse: 28  Link to ntkpl   და ვითარცა შევიდა იესუ სახლსა, მოუჴდეს მას ბრმანი იგი, და ჰრქუა მათ იესუ: გრწამსა, ვითარმედ ძალ-მიც ესე ყოფად? ჰრქუეს მას: ჰე, უფალო.

Verse: 28V    იგი ] -- J; გრწამსა ] გრწამს J; ჰრქუეს ] ჰრქუჱს I; ჰე ] ჰჱ KJ


Verse: 29  Link to ntkpl   მაშინ შეახო თუალთა მათთა და ჰრქუა მათ: სარწმუნოებისა თქუენისაებრ გეყავნ თქუენ!


Verse: 30  Link to ntkpl   და მეყსეულად აღეხუნეს თუალნი მათნი. და შეჰრისხნა მათ იესუ და ჰრქუა: იხილეთ, ნუმცა ვინ უწყის.

Verse: 30V    აღეხუნეს ] აღეხილნეს UJ


Verse: 31  Link to ntkpl   ხოლო იგინი გამოვიდეს და მიმოდადვეს იგი ყოველსა მას ქუეყანასა.

Verse: 31V    იგი ] -- UX


Verse: 32  Link to ntkpl   და ვითარცა-იგი გამო-ოდენ-ვიდეს, მოჰგუარეს მას კაცი ყრუჲ და ეშმაკეული.


Verse: 33  Link to ntkpl   და ვითარცა განჴადა ეშმაკი იგი, იტყოდა ყრუჲ იგი. და დაუკჳრდებოდა ერსა მას და იტყოდეს, ვითარმედ: არასადა ისრაჱლსა შორის ესრეთ გამოჩნდა.

Verse: 33V    ვითარმედ ] -- HIK


Verse: 34  Link to ntkpl   ხოლო ფარისეველნი იტყოდეს: მთავრითა ეშმაკთაჲთა განასხამს ეშმაკთა.


Verse: 35  Link to ntkpl   და მოჰვლიდა იესუ ქალაქებსა ყოველსა და დაბნებსა და ასწავებდა შესაკრებელთა შორის მათთა და ქადაგებდა სახარებასა სასუფეველისასა და განჰკურნებდა ყოველთა სენთა და უძლურებათა ერსა შორის.

Verse: 35V    შესაკრებელთა ] შესაკრებელსა X; მათთა ] მათსა X


Verse: 36  Link to ntkpl   და ვითარცა იხილა ერი იგი, შეეწყალნეს იგინი, რამეთუ იყვნეს დამაშურალ და დაცჳვნებულ, ვითარცა ცხოვარნი, რომელთა არა აქუნ მწყემსი.

Verse: 36V    შეეწყალნეს ] შეეწყლნეს J


Verse: 37  Link to ntkpl   მაშინ ჰრქუა მოწაფეთა თჳსთა, ვითარმედ: სამკალი ფრიად არს, ხოლო მუშაკნი -- მცირედ.


Verse: 38  Link to ntkpl   ევედრენით უფალსა სამკალისასა, რაჲთა გამოავლინნეს მოქმედნი სამკალსა თჳსსა.





Next part


This text is part of the TITUS edition of Tetraevangelium (redactio athonensis).

Copyright TITUS Project, Frankfurt a/M, 16.2.2022. No parts of this document may be republished in any form without prior permission by the copyright holder.