TITUS
Tetraevangelium (redactio praeathonensis)
Part No. 22
Previous part

Chapter: 22 


Verse: 1  Link to ntkpl   და მერმე მიუგო მათ იესუ იგავით და ჰრქუა:

Verse: 1V    ჰრქუა ] თქუა F


Verse: 2  Link to ntkpl   ემსგავსა სასუფეველი ღმრთისაჲ კაცსა მეუფესა, რომელმან ყო ქორწილი ძისა თჳსისაჲ


Verse: 3  Link to ntkpl   და წარავლინნა მონანი თჳსნი მოწოდებად ჩინებულთა მათ ქორწილსა მას, და არა ინებეს მოსლვად.

Verse: 3V    თჳსნი ] მისნი RP; მოსლვად ] მოსლვაჲ FG


Verse: 4  Link to ntkpl   კუალად წარავლინნა სხუანი მონანი და ჰრქუა: არქუთ ჩინებულთა მათ: აჰა, ესერა, პური ჩემი მზა-მიყოფიეს, ზუარაკები ჩემი და უსხები ჩემი დაკლულ არს, და ყოველივე მზა არს, მოვედით ქორწილსა ამას.

Verse: 4V    არს ] არიან FG; და ყოველივე მზა არს ] -- RP; მზა არს ] + და F; ამას ] ჩემსა F


Verse: 5  Link to ntkpl   ხოლო მათ უდებ-ყვეს და წარვიდეს: რომელიმე თჳსსა აგარაკსა და რომელიმე სავაჭროსა თჳსსა.

Verse: 5V    თჳსსა ] თჳსა F; და (2) ] -- RPG


Verse: 6  Link to ntkpl   ხოლო სხუათა შეიპყრნეს მონანი იგი მისნი, აგინნეს და მოწყჳდნეს.

Verse: 6V    მოწყჳდნეს ] მოსწყჳდნეს F


Verse: 7  Link to ntkpl   ხოლო მეუფჱ იგი განრისხნა და მიავლინა ერი თჳსი და მოსრნა კაცისმკლველნი იგი და ქალაქი იგი მათი მოწუა ცეცხლითა.


Verse: 8  Link to ntkpl   მაშინ ჰრქუა მონათა თჳსთა: ქორწილი ესე მზა არს, ხოლო ჩინებულნი იგი არა ღირს იყვნეს.


Verse: 9  Link to ntkpl   წარვედით მებოძირთა გზათასა და, რაოდენიცა ჰპოოთ, მოუწოდეთ ქორწილსა ამას.

Verse: 9V    რაოდენიცა ] რავდენიცა FG; ამას ] მას F


Verse: 10  Link to ntkpl   და განვიდეს მონანი იგი მისნი გზათა ზედა და შეკრიბეს ყოველი, რაოდენი პოვეს ბოროტი და კეთილი, და აღივსო ქორწილი იგი მეინაჴითა.

Verse: 10V    განვიდეს მონანი იგი მისნი ] მონანი იგი მისნი განვიდეს RP; რაოდენი ] რავდენი FG; პოვეს ] პოეს F;


Verse: 11  Link to ntkpl   და შე-რაჲ-ვიდა მეუფჱ იგი ხილვად მეინაჴეთა მათ, იხილა მუნ კაცი, რომელსა არა ემოსა სამოსელი საქორწინჱ.

Verse: 11V    სამოსელი ] სამუსელი F; საქორწინჱ ] საქორწინე FG


Verse: 12  Link to ntkpl   და ჰრქუა მას: მოყუასო, ვითარ შემოხუედ აქა, რამეთუ არა გმოსიეს სამოსელი საქორწინჱ? ხოლო იგი დუმნა.

Verse: 12V    ვითარ ] შენ ვითარ RP; სამოსელი ] სამუსელი F; საქორწინჱ ] საქორწინე FG


Verse: 13  Link to ntkpl   მაშინ ჰრქუა მეუფემან მან მსახურთა თჳსთა: შეუკრენით მაგას ჴელნი და ფერჴნი და განაგდეთ ეგე ბნელსა მას გარესკნელსა. მუნ იყოს ტირილი და ღრჭენაჲ კბილთაჲ.

Verse: 13V    ეგე ] იგი G


Verse: 14  Link to ntkpl   რამეთუ მრავალნი არიან ჩინებულ და მცირედნი -- რჩეულ.

Verse: 14V    მრავალნი ] მრავალ RPG; ჩინებულ ] ჩინებულნი RG; და ] ხოლო RP; მცირედნი ] მცირედ RPG; რჩეულ ] რჩეულნი RPG.


Verse: 15  Link to ntkpl   მაშინ წარვიდეს ფარისეველნი იგი და ზრახვა-ყვეს მისთჳს, რაჲთა სიტყჳთა საფრჴე-უგონ მას.

Verse: 15V    საფრჴე- ] საბრჴე- F


Verse: 16  Link to ntkpl   და მიუვლინნეს მოწაფენი მათნი ჰეროდიანთა თანა და ჰრქუეს: მოძღუარ, ვიცით, რამეთუ ჭეშმარიტ ხარ და გზასა ღმრთისასა ჭეშმარიტად ასწავებ და არა ჰზრუნავ არავისთჳს, რამეთუ არა თუალთ-აღებ პირსა კაცისასა.

Verse: 16V    ჰზრუნავ ] ზრუნავ FG; თუალთ- ] თუალ- FG


Verse: 17  Link to ntkpl   აწ მარქუ ჩუენ, რაჲ გნებავს შენ: ჯერ-არსა ხარკისა მიცემაჲ კეისარსა, ანუ არა?


Verse: 18  Link to ntkpl   გულისხმა-ყო იესუ უკეთურებაჲ მათი და ჰრქუა: რაჲსა გამომცდით მე, ორგულნო?

Verse: 18V    გულისხმა- ] გულისჴმა- F


Verse: 19  Link to ntkpl   მიჩუენეთ მე დრაჰკანი იგი ხარკისაჲ! ხოლო მათ მოართუეს მას დრაჰკანი.

Verse: 19V    ხარკისაჲ ] კინსონისაჲ ხარკისაჲ FG


Verse: 20  Link to ntkpl   ჰრქუა მათ იესუ: ვისი არს ხატი ესე ანუ ზედაწერილი?

Verse: 20V    ანუ ] და F


Verse: 21  Link to ntkpl   ჰრქუეს მას: კეისრისაჲ. მაშინ ჰრქუა მათ იესუ: მიეცით კეისრისაჲ კეისარსა და ღმრთისაჲ ღმერთსა.

Verse: 21V    ღმრთისაჲ ] ღმრთისაი G


Verse: 22  Link to ntkpl   და ესმა რაჲ ესე, უკჳრდა და დაუტევეს იგი და წარვიდეს.

Verse: 22V    და ] ვითარცა FG


Verse: 23  Link to ntkpl   მას დღესა მოუჴდეს მას სადუკეველნი იგი და ეტყოდეს, ვითარმედ: არა არს აღდგომაჲ, და ჰკითხეს მას.

Verse: 23V    სადუკეველნი ] სადოკეველნი F;


Verse: 24  Link to ntkpl   და ეტყოდეს: მოძღუარ, მოსე ესრე თქუა: უკუეთუ ვინმე მოკუდეს და არა ესუას მას შვილი, ესიძენ ძმაჲ მისი ცოლსა მისსა და აღუდგინენ თესლი ძმასა თჳსსა.

Verse: 24V    ეტყოდეს ] ეტყდეს R; მოკუდეს ] მოკდეს G; მას ] -- G; თესლი ] ნათესავი RP


Verse: 25  Link to ntkpl   იყვნეს ჩუენ შორის შჳდნი ძმანი, და პირველმან შეირთო და მოკუდა, და არა დაშდა ნათესავი, და დაუტევა ცოლი თჳსი ძმასა თჳსსა,

Verse: 25V    დაშდა ] დაშთა FG; ნათესავი ] + მისი F; და (3) ] -- F


Verse: 26  Link to ntkpl   ეგრევე მეორემან და მესამემან ვიდრე მეშჳდედმდე.

Verse: 26V    მეშჳდედმდე ] მეშჳდემდე F


Verse: 27  Link to ntkpl   უკუანაჲსკნელ ყოველთასა მოკუდა დედაკაციცა იგი.

Verse: 27V    უკუანაჲსკნელ ] უკუანსკნელ F; უკუანაჲსკნელ ] უკუასკნელ R


Verse: 28  Link to ntkpl   აწ უკუე აღდგომასა მას ვისა შჳდთა მათგანისა იყოს იგი ცოლად? რამეთუ ყოველთავე ესუა იგი?

Verse: 28V    უკუე ] -- FG; ყოველთავე ] ყოველთა FG


Verse: 29  Link to ntkpl   მიუგო იესუ და ჰრქუა მათ: სცთებით, რამეთუ არა იცით წიგნი, არცა ძალი ღმრთისაჲ.


Verse: 30  Link to ntkpl   რამეთუ აღდგომასა მას არცა განჰქორწინებდენ, არცა იქორწინებოდიან, არამედ, ვითარცა ანგელოზნი, იყვნენ ცათა შინა.

Verse: 30V    იქორწინებოდიან ] იქორწინებოდინ G


Verse: 31  Link to ntkpl   ხოლო აღდგომისათჳს მკუდართაჲსა არა აღმოგიკითხავსა თქუმული იგი ღმრთისამიერი, რომელსა იტყჳს:

Verse: 31V    რომელსა ] რასა F


Verse: 32  Link to ntkpl   მე ვარ ღმერთი აბრაჰამისი და ღმერთი ისააკისი და ღმერთი იაკობისი? არა არს ღმერთი მკუდართაჲ, არამედ ცხოველთაჲ.

Verse: 32V    ისააკისი ] ისაკისი FG


Verse: 33  Link to ntkpl   და ესმა რაჲ ესე ერსა მას, დაუკჳრდა მოძღურებაჲ იგი მისი.

Verse: 33V    დაუკჳრდა ] დაუკჳრდებოდა FG; მოძღურებაჲ ] მოძღრებაჲ G


Verse: 34  Link to ntkpl   ხოლო ფარისეველთა რაჲ ესმა, რამეთუ დაუყო პირი სადუკეველთა მათ, შეკრბეს ერთად.

Verse: 34V    სადუკეველთა ] სადოკეველთა F


Verse: 35  Link to ntkpl   და ჰკითხა ერთმან მათგანმან, და გამოსცდიდა მას:

Verse: 35V    და (2) ] -- FG; გამოსცდიდა ] გამოჰცდიდა RP


Verse: 36  Link to ntkpl   მოძღუარ, რომელი მცნებაჲ უფროჲს არს შჯულსა შინა?


Verse: 37  Link to ntkpl   ხოლო იესუ ჰრქუა მას: შეიყუარო უფალი ღმერთი შენი ყოვლითა გულითა შენითა და ყოვლითა სულითა შენითა და ყოვლითა გონებითა შენითა.


Verse: 38  Link to ntkpl   ესე არს დიდი და პირველი მცნებაჲ.


Verse: 39  Link to ntkpl   და მეორჱ, მსგავსი ამისი: შეიყუარო მოყუასი შენი, ვითარცა თავი თჳსი.

Verse: 39V    მეორჱ ] მეორე PF; თავი ] თათავი F


Verse: 40  Link to ntkpl   ამათ ორთა მცნებათა ყოველი შჯული და წინაწარმეტყუელნი გამოკიდებულ არიან.

Verse: 40V    მცნებათა ] -- RP


Verse: 41  Link to ntkpl   შეკრებულ რაჲ იყვნეს ფარისეველნი იგი, ჰკითხა მათ იესუ

Verse: 41V    ჰკითხა ] ჰკითხვიდა F


Verse: 42  Link to ntkpl   და ჰრქუა: ვითარ ჰგონებთ თქუენ ქრისტჱსთჳს? ვისი ძჱ არს იგი? ხოლო მათ ჰრქუეს: დავითისი.

Verse: 42V    ქრისტჱსთჳს ] ქრისტესთჳს FG; ძჱ ] ძე F


Verse: 43  Link to ntkpl   ჰრქუა მათ იესუ: ვითარ უკუე დავით სულითა ჰხადის მას უფლით და იტყჳს:

Verse: 43V    ჰხადის ] ხადის G


Verse: 44  Link to ntkpl   ჰრქუა უფალმან უფალსა ჩემსა: დაჯედ მარჯუენით ჩემსა, ვიდრემდე დავსხნე მტერნი შენნი ქუეშე ფერჴთა შენთა?

Verse: 44V    ვიდრემდე ] ვიდრე F


Verse: 45  Link to ntkpl   უკუეთუ დავით უფლით ჰხადის მას, ვითარ ძჱ მისი არს?

Verse: 45V    ჰხადის ] ხადის G


Verse: 46  Link to ntkpl   და ვერ ვინ უძლო მას სიტყჳს-მიგებად, არცაღა იკადრა ვინ მიერ დღითგან კითხვად მისა არღარა.

Verse: 46V    არცაღა ] არღარაჲ F



Next part


This text is part of the TITUS edition of Tetraevangelium (redactio praeathonensis).

Copyright TITUS Project, Frankfurt a/M, 15.2.2022. No parts of this document may be republished in any form without prior permission by the copyright holder.