და იქმნა ხუთ და მეოცესა შინა წელსა ტყუეობისა ჩუენისასა, პირველსა შინა თთუესა, ათსა თთჳსასა, ოთხ და მეათესა წელსა შემდგომად დაპყრობისა ქალაქისა, მას დღესა შინა იქმნა ჩემ ზედა ჴელი უფლისაჲ და მომიყვანა მე მუნ
ხილვასა შორის ღმრთისასა, შემიყვანა მე ქუეყანად ისრაჱლისა და დამადგინა მე მთასა ზედა მაღალსა ფრიად და მას ზედა, ვითარცა დაშენებულებაჲ ქალაქისაჲ პირისპირ.
და შემიყვანა მე მუნ და აჰა კაცი და ხილვაჲ მისი იყო, ვითარცა ხილვაჲ რვალისა მბზინვარისაჲ და იყო საბელი მაშენებლისაჲ ჴელსა შორის მისსა და ლელწამი საზომისაჲ ჴელსა შინა მისსა და იგი დგა ბჭესა ზედა.
და თქუა ჩემდამო კაცმან: იხილეა, ძეო კაცისაო? განიცადე თუალთა მიერ შენთა და ყურთა მიერ შენთა ისმინე და დააწესენ გულსა შენსა ყოველნი, რავდენთა მე გიჩუენებ შენ, მით რამეთუ ჩუენებისათჳს შენისა შემოვედ აქა; და უჩუ\ენო, Page of ed. 1709: 203b რავდენთა შენ ჰხედავ, ყოველსა სახლსა ისრაჱლისასა.
და აჰა ეზოჲ გარეშე სახლისა გარემო და ჴელსა შინა კაცისასა ლელწამი ზომით წყრთათა ექუსთაჲ წყრთითა და გოჯულითა; და განზომა წინმოზღუდვილობაჲ, სივრცე სწორი ლელწმისაჲ და სიმაღლე მისი სწორი ლელწმისაჲ.
და შევიდა ბჭედ მხედველად აღმოსავალით კერძო, შჳდთა შორის აღხარისხულთა და მოზომა თეეჲ ექუს-ექუსი და ელამი ბჭისაჲ, სწორი ლელწმისაჲ სივრცით და სწორი ლელწმისაჲ სივრცედ.
და თეეჲ სწორი ლელწმისაჲ სიგრძედ და სწორი ლელწმისაჲ სივრცედ და ელამი საშუალ თეელამისა წყრთეებ ექუს; და თეეჲ მეორე სწორი ლელწმისაჲ სივრცედ და სწორი ლელწმისაჲ სიგრძედ და ელამი წყრთათა ხუთთა.
და თვეჲ მესამე სწორი ლელწმისაჲ სივრცედ და სწორი ლელწმისაჲ სიგრძედ,
და ელამი ბჭისაჲ, მახლობელად ელამსა ბჭისასა, წყრთათა რვათაჲ და ელევნი წყრთათა ორთანი და ელამნი შინაგან ბჭისა.
და თეენი პირისპირ ბჭისა, სამნი ამიერ და სამნი იმიერ, გზისა კერძ აღმოსავალისა, და საზომი სამთავე შორის; და საზომი ელამთა შორის ამიერ და იმიერ.
და განზომა სივრცე კარისა ბჭისაჲ მის წყრთაებ ათ და სიგრძე ბჭისაჲ წყრთათა ათსამმეტთაჲ.
და წყრთისა შემოკრებული საზღვარი პირსა წინაშე თეეთასა წყრთისა ერთისაჲ და წყრთისა ერთისა საზღვარი ამიერ და იმიერ და თეეჲ წყრთათა ექუსთაჲ აქაჲთ და იქით.
და განზომა ბჭე წყრთითგან თეეისაჲთ ზღუდისა მიმართ თეეისა სივრცე ოცდახუთთა წყრთათა; ესე ბჭე ბჭესა ზედა.
და ურთავი ელამისა ბჭისაჲ სამეოც წყრთა\ებ Page of ed. 1709: 204a და თეისნი ბჭისაჲ მრგულივ გარემოთა ეზოჲსათა და ურთავი გარეშე ბჭისა.
ურთავისა მიმართ ელამისაჲსა შინაგან ბჭისა ერგასის წყრთაებ.
და სარკუმელნი დაფარულნი თეჲმთაჲთ კერძო შინაგან და ელამით კერძო, ბჭესა ეზოჲსასა მრგულივ, და ეგრეთვე ელამისა სარკუმელნი მრგულივ, შინაგან და ელამით კერძო, შეწებვით ფინიკნი სამ-სამნი აქეთ და იქით.
და შემიყვანა მე ეზოდ უშინაგანესად და აჰა კრეტსაბმელები და სუეტები ქმნულები გარემოჲს ეზოჲსა, ოცთაათები კრეტსაბმელები გარემო სუეტებთა ზედა.
და სტოვაები სამხრით კერძოთა ბჭეთასა სიგრძისაებრ ბჭეთაჲსა, პირისპირ გარემო სუეტსა ქუეშე კერძოსა.
და განზომა სივრცე ეზოჲსა ურთავითგან ბჭისა გარეშისაჲთ შინაგან ურთავისა კერძ ბჭისა, მხედველისა გარეთ წყრთა ას, მხედველისა აღმოსავალით კერძო, და შემიყვანა მე ჩრდილოდ მიმართ.
და აჰა ბჭე, მხედველი ჩრდილოჲთ კერძო ეზოჲსა გარეშისაჲ, და განზომა იგი, სივრძეცა მისი და სივრცე მისი.
და თეი სამნი, სამნი ამიერ და სამნი იმიერ; და ელაჲ და ელამონი და ფინიკნი მისნი და იყო საზომთაებრ ბჭისა, მხედველისათა აღმოსავალით კერძო, ერგასისთა წყრთაჲ სიგრძე მისი და სივრცე მისი წყრთათა ოცდახუთთაჲ.
და სარკუმელნი მისნი და ელამონნი მისნი და ფინიკნი მისნი, ვითარ-იგი ბჭე, მხედველი აღმოსავალით კერძო, და შჳდთა აღხარისხულთა მიერ აღვიდოდეს მის ზედა და ელამონნი მისნი შინაგან მათსა.
და ბჭე ეზოსა შინაგანსა, მხედველი ბჭესა ზედა ჩრდილოჲსასა, ვითარ სახედ ბჭისა, მხედველისა აღმოსავალით კერ\ძო, Page of ed. 1709: 204b და განზომა ეზოჲ ბჭისაგან ბჭისა მიმართ წყრთაებ ას.
და მიმიყვანა მე გზისა მიმართ სამხრით კერძოსა და აჰა ბჭე, მხედველი სამხრად მიმართ, და განზომა იგი და თვენი და ელანი და ელამონნი საზომთაებრ ამათ.
და სარკუმელნი მისნი და ელამონნი გარემო, ვითარ-იგი სარკუმელნი ელამისანი, ერგასისთა წყრთათაჲ სიგრძე მისი და სივრცე მისი წყრთა ოცდახუთთაჲ.
და შვიდნი აღკიბულნი მისნი და ელამონნი მისნი შინაგან მისსა და ფინიკნი მისნი, ერთი ამიერ და ერთი იმიერ ელევით კერძო.
და ბჭე პირისპირ ბჭესა ეზოჲსა შინაგანისასა ჩრდილოდ მიმართ; და განზომა ეზოჲ ბჭისაგან ბჭისა მიმართ გზისა სამხრად მიმართისაჲ წყრთაებ ას და სივრცე წყრთაებ ოცდახუთ.
და შემიყვანა მე ეზოდ მიმართ უშინაგანესად, ბჭისა მიერ სამხრად მიმართისა, და განზომა ბჭე სამხრად მიმართი საზომთაებრ ამათ.
და თეენი და ელევნი და ელამონნი საზომთაებრ ამათ; და სარკუმელნი მისნი და ელამონი გარემოჲს ერგასის წყრთაებ სიგრძე მისი და სივრცე მისი წყრთაებ ოცდახუთ.
და ელამონისა გარემოჲსა სიგრძე ხუთთა და ოცთა წყრთათა და სივრცე ხუთთა წყრთათა.
და ელამონნი მისნი უშინაგანესსა მისსა შინა ეზოსა და ფინიკნი მისნი ერთი ამიერ და ერთი იმიერ ელევისა მიმართ; და რვანი აღხარისსულნი მისნი აღსავალად მისსა.
და შემიყვანა მე უშინაგანესისა მიმართ ბჭისა, მხედველისა გზად აღმოსავალით კერძოდ, და განზომა იგი საზომთაებრ ამათ.
და თვენი და ელევნი და ელამონნი საზომთაებრ ამათ; და სარკუმელნი მისნი და ელამონნი გარემოჲს ერგასის წყრ\თაებ Page of ed. 1709: 205a სიგრძე მისი და სივრცე მისი წყრთაებ ოცდახუთ.
და ელამონნი მისნი უშინაგანესსა შინა ეზოსა და ფინიკნი ელევთა ზედა მისთა ამიერ და იმიერ და თუალნი აღხარისხულნი მისნი.
და შემიყვანა მე ბჭისა მიმართ ჩრდილოჲთ კერძისა და განზომა საზომთაებრ ამათ.
და თვენი და ელევნი და ელამონნი და სარკუმელნი მისნი გარემოჲს; და ელამონნი მისსა გარემო ერგასის წყრთაებ სიგრძე მისი და სივრცე მისი ოცდახუთ წყრთაებ.
და ელამონნი მისნი ეზოსაშინა გარეშესა და ფინიკნი ელევისა ამიერ და იმიერ და რვანი აღხარისსულნი მისნი.
და კრეტსაბმელნი მისნი და თითოეულისა კრეტსაბმელისა იყო კარი და ელამონნი მისნი კართა ზედა ბჭეთასა. და მუნ რცხედ ყოვლად დასაწუელთა.
ხოლო წინაკარსა თანა ბჭისასა ორნი ტაბლანი იმიერ და ამიერ, ტაბლანი ამიერ მეორისა გამოსადინელისა, რაჲთა დაიკლოდინ მათ ზედა ყოვლად დასაწუელი და ცოდვისა ძლითნი და უმეცრებისა ძლითნი.
და სამხრით კერძო სადინელისა ყოვლად დასაწუელთაჲსა, კარსა თანა ბჭისა მხედველისასა ჩრდილოჲთ კერძო, ორნი ტაბლანი აღმოსავალთაჲთ კერძო, სამხრით კერძო მეორისა ელამისაჲსა და ბჭისა ორნი ტაბლანი აღმოსავალით კერძო; და რვანი ტაბლანი აღმოსავალთაჲთ კერძო,
ოთხნი ტაბლანი ამიერ და ოთხნი ტაბლანი იმიერ, სამხრით კერძო ბჭისაჲთ რვანი ტაბლანი მსხუერპლთანი; მათ ზედა დაკლნიან საკლველნი ყოვლად დასაწუელთანი წინაშე რვათა ტაბლათასა.
და ოთხნი ტაბლანი ყოვლად დასაწუელთანი ქვისანი, გამოთლილნი სიგრძით წყრთა და ნახევარ და სივრცით წყრთა და ნახევარ და წყრთა ერთ Page of ed. 1709: 205b სიმაღლით; მათ ზედა დადვიან ჭურჭლები, რომელთა მიერ დაკლიან მუნ ყოვლად დასაწუელები.
და გისოსი გოჯეულსა მქონებელი, გამოთლილსა შინაგან მრგულივ და ტაბლასა ზედა, ზენა კერძოდ სართულნი დამფარველად წჳმისაგან და სიჴმელისაგან.
და შემიყვანა მე ეზოდ უშინაგანესად; და აჰა საყდარნი ორნი გზათანი ეზოსა შინა უშინაგანესსა, ერთი სამჴრით კერძო ბჭისა, მხედველისა ჩრდილოდ მიმართ, და მეორე ჩრდილოდ კერძო ბჭისა, მხედვე. ლისა სამხრისა მიმართ.
და თქუა ჩემდამო: საყდარი ესე, მხედველი სამხრად მიმართ, მღდელთაჲ, მცველთა საცავსა სახლისასა.
და საყდარი, მხედველი ჩრდილოდ მიმართ, მღდელთაჲ, მცველთა საცავსა საკურთხეველისასა; იგინი არიან ძენი სადუკისნი, მიახლებულნი ლევისაგან უფლისა მიმართ მსახურებად მისსა.
და განზომა ეზოჲ სიგრძით წყრთათა ასთაჲ და სივრცით წყრთათა ასთაჲ ოთხთა ზედა კერძოთა მისთა და საკურთხეველი დამართებით სახლისა.
და შემიყვანა მე ელამად მიმართ სახლისა და განზომა; და განზომეს ელამი, წყრთათა ხუთთა სივრცე ამიერ და ხუთთა წყრთათაჲ იმიერ და სიბრტყე სიფართისა წყრთათა ათოთხმეტთაჲ და სამჴარნი კარისა ელამისანი წყრთათა სამთანი ამიერ და წყრთათა სამთანი იმიერ. და სივრცე სიფართისაჲ წყრთათა ათოთხმეტთაჲ და სამჴარნი კარისა ელამისანი წყრთათა სამთანი ამიერ და წყრთათა სამთანი იმიერ.
და სიგრძე ელმისაჲ წყრთათა ოცთაჲ და სივრცე წყრთათა ათერთმეტთაჲ; და ათთა აღხარისხულთა მიერ აღვიდოდეს მის ზედა და სუეტნი იყვნეს ელამსა ზედა, ერთი ამიერ და ერთი იმიერ. Page of ed. 1709: 206a
