და შენ, ძეო კაცისაო, წინაწარმეტყუელებდ გოგსა ზედა და არქუ: ამათ იტყჳს ადონაი უფალი: აჰა მე შენ ზედა, გოგ, მთავარსა როსისსა, მოსოხს და თოველს,
და შეგკრიბო შენ და წარგიძღუე შენ და აღგიყვანო შენ დასა\სრულსა Page of ms. Ga: 276v ზედა შორრაჲსასა და მიგიყვანო შენ მთათა ზედა ისრაჱლისათა.
და განვბერტყო მშჳლდი შენი ჴელისაგან შენისა მარცხენისა და ისარნი შენნი ჴელისაგან შენისა მარჯუენისა და დაგამჴუა შენ
მთათა ზედა ისრაჱლისათა. და დაეცე შენ და ყოველნი შენთანანი და მრავალნი ნათესავნი შენთანა, მფ\რინველთა Page of ed. 1709: 202a ცისათა და ყოველთა ფრთოანთა მიეცნეთ და ყოველთა მჴეცთა ქუეყანისათა მიგეც შენ შესაჭმელად.
პირსა ზედა ველისასა დაეცე, რამეთუ მე უფალი ვიტყოდე.
მიგავლინო ცეცხლი გოგსა ზედა და დაემკჳდრნენ ჭალაკნი მშჳდობით და ცნან, ვითარმედ მე ვარ უფალი.
და სახელი ჩემი წმიდაჲ იცნობოს შორის ერისა ჩემისა ისრაჱლისა და არა შეიგინოს სახელი ჩემი წმიდაჲ არღა მერმე, და ცნან წარმართთა, ვითარმედ მე ვარ უფალი წმიდაჲ შორის ისრაჱლისა.
აჰა მოვალს და სცნა, ვითარმედ იყოს, -- იტყჳს ადონაი უფალი, ესე არს დღე, რომელ ვთქუ.
და გამოვიდენ დამკჳდრებულნი ისრაჱლისანი ქალაქთაგან და დასწუვიდენ და აღაგზებდენ საჭურველთა მიერ ფარებისა და ჰორლებისა და შუბებისა და მშჳლდებისა და ისრებისა. და კუერთხებისა ჴელთაჲსა და ლახურებისა და აგზებდენ მათ მიერ ცეცხლსა შჳდთა წელიწადთა.
და არა მოიღონ შეშაჲ ველით, არცა მოჰკუეთონ მაღნართაგან, არამედ საჭურველთა წუვიდენ ცეცხლითა; და ტყუე-ჰყოფდენ წარმტყუენველთა მათთა და იავარ-ჰყოფდენ იავარმქმნელთა მათთა, -- იტყჳს ადონაჲ უფალი.
და იყოს მას დღესა შინა მივსცე გოგს ადგილი სახელოანი, საფლავი ისრაჱლსა შორის, სამრავალკაცოჲ მომავალთაჲ აღმოსავალით ზღჳსაჲთ, და გარე-მოაშენონ პირისგარე ჴევისაჲ; და დაჰფლან მუნ გოგ და ყოველი სიმრავლე მისი და ეწოდოს გესა მრავალსაკაცო გოგისა.
და დაჰფლნეს იგინი სახლმან ისრაჱლისამან, რაჲთა განწმდეს ქუეყანაჲ შჳდ თთუე.
და დაჰფლვიდენ მათ ყოველი ერი ქუეყანისაჲ და იყოს მათდა სახელად დღე, რომელსა შინა ვიდიდო მე, -- იტყჳს ადონაი უფალი.
და კაცთა განავლინებდენ მარადის ზედმოარულ, რომელნი ვიდოდინ ზედა Page of ed. 1709: 202b ქუეყანასა დაფლვად გარემო\მავალთა Page of ms. Ga: 277r თანა, დაშთომილთა პირსა ზედა ქუეყანისასა, რაჲთა განწმიდონ იგი შემდგომად შჳდთა თთუეთასა, და გამოეძიებდენ
ყოველი მომვლელი ქუეყანისაჲ და მიმომავალი; მხილველმან ძუალსა კაცისასა აღაშენოს მათ მიერ სასწაული, ვიდრე არა დაჰფლნენ იგინი დამფლველთა გეს შინა, სამრავალკაცოსა გოგისსა.
და რამეთუ სახელი ქალაქისაჲ დაცემულება და მრავალსაკაცო და განწმდეს ქუეყანაჲ.
და შენ, ძეო კაცისაო, ამათ იტყჳს ადონაი უფალი: არქუ ყოველსა მფრინველსა და ყოველსა ფრთოანსა და ყოველთავ მჴეცთა ველისათა: შეკერბით და მოვედით და კრება ყავთ ყოველთაგან გარემოთა მსხუერპლსა ზედა ჩემსა, რომელი მე დაგიდევ თქუენ, მსხუერპლი დიდი მთათა ზედა ისრაჱლისათა, და ჭამეთ ჴორცი და სუთ სისხლი.
ჴორცი გმირთაჲ ჭამეთ და სისხლი მთავართა ქუეყანისათაჲ სუთ, ვერძნი და ზუარაკნი და ვაცნი და ზუარაკნი, ჭამებულნი ყოველნი.
და ჭამეთ ცმელი სიმაძღრედ და სუთ სისხლი სიმთრვალედ მსხუერპლისაგან ჩემისა, რომელი დაგიკალ თქუენ.
და აღივსენით ტაბლისაგან ჩემისა ცხენი და აღმავალი და გმირი და ყოველი კაცი მბრძოლი, -- იტყჳს ადონაი უფალი.
და მე მივსცე დიდებაჲ ჩემი თქუენ შორის და იხილონ ყოველთა წარმართთა საშჯელი ჩემი, რომელი ვყავ, და ჴელი ჩემი, რომელი მოვაწიე მათ ზედა.
და ცნას სახლმან ისრაჱლისამან, ვითარმედ მე ვარ უფალი ღმერთი მათი დღითგან ამით და წამართ.
და ცნან ყოველთა წარმართთა, ვითარმედ ცოდვათა მათთათჳს ტყუე იქმნეს სახლი ისრაჱლისაჲ, მის წილ რომელ იშეურაცხეს ჩემდამო და მიმიქციე პირი ჩემი მათგან და მივსცენ იგინი ჴელთა მტერთა მათთასა და დაეცნეს ყოველნი მახჳლითა.
არაწმიდებათაებრ მათთა და უშჯულოებათაებრ მათთა უყავ მათ და მივიქციე პირი ჩემი მათგან.
ამისთჳს ამათ იტყჳს Page of ed. 1709: 203a ადონაი უფალი: აწ მოვაქციო ტყუეობაჲ იაკობისი და შევიწყალო სახლი ისრაჱლისაი და ვაშურვო სახელისათჳს ჩემისა წმიდისა.
და მიიღონ უპატივოებაჲ მათი და ყოველნი უსამართლოებანი მათნი, რომელნი იუსამართლოვნეს ჩემ\დამო, Page of ms. Ga: 277v დამკჳდრებასა შინა მათსა ქუეყანასა ზედა მათსა მშჳდობით, და არა იყოს მაშინებელი,
მო-რაჲ-ვაქცევდე მე მათ წარმართთაგან და შევჰკრებდე მე მათ სოფლებთაგან მტერთა მათთაჲსა, და წმიდა ვიქმნე მე მათ შორის წინაშე მრავალთა ნათესავთასა.
და ცნან, ვითარმედ მე ვარ უფალი ღმერთი მათი, გამო-რაჲ-უჩნდე მე მათ წარმართთა შორის. და შევკრიბნე იგინი ქუეყანასა ზედა და არავინ დაუტეო მათგანი მათ თანა
და არა მივიქციო არა მერმე პირი ჩემი მათგან მის წილ, რომელ მივჰფინე გულისწყრომაჲ ჩემი სახლსა ზედა ისრაჱლისასა, -- იტყჳს უფალი უფალი.
