და იქმნა სიტყუაჲ უფლისაჲ ჩემდამო მეტყუელი:
ძეო კაცისა, წინაწარმეტყუელებდ და თქუ: ამათ იტყჳს ადონაი უფალი: ვალალაე, ჵ ჵ დღე,
რამეთუ ახლოს არს დღე უფლისაჲ და მოახლებულ არს დღე ღრუბლისაჲ და ჟამი წარმართთაჲ იყოს.
და [მოიწიოს] მახჳლი მეგჳპტელთა ზედა და იყოს შფოთი ეთიოპიას შინა და დაეცნენ წყლულნი ეგჳპტეს შინა და [წარიღონ] სიმრავლე მისი და დაეცნენ საფუძველნი მისნი;
და დაიჴსნენ სპარსნი და კრიტელნი და ლიბჳელნი და ლჳდნი და ეთიოპელნი და ყოველი არაბიაჲ და ყოველნი ზედ-შემყოფნი და Page of ms. Ga: _ ძენი აღთქუმისა ჩემისანი მის შორის მახჳლითა დაეცნენ მათ თანა.
ამათ იტყჳს ადონაი უფალი: და დაეცნენ საფუძველნი ეგჳპტისანი და შთამოქუევდეს გონებაჲ ძალისა მისი\საჲ, Page of ed. 1709: 189b მაგდალოჲთგან ვიდრე სჳნამდე მახჳლითა დაეცნენ მის შორის, -- იტყჳს ადონაი უფალი.
და მოოჴრდეს საშუალ სოფელთა უჩინოქმნილთა და ქალაქნი მათნი საშუალ ქალაქთა, ქალაქნი მათნი მოოჴრებულნი იყვნენ.
და ცნან, ვითარმედ მე ვარ უფალი, ოდეს მივსცე ცეცხლი ეგჳპტესა ზედა და შეიმუსრნენ ყოველნი შემწენი მისნი.
მას დღესა შინა გამოვიდენ ქადაგნი მოსწრაფენი უჩინო-ქმნად ეთიოპიისა. და იყოს შფოთი მათ შორის დღესა შინა ეგჳპტისასა, რამეთუ აჰა მოიწია.
ამათ იტყჳს უფალი უფალი: და წარვსწყმიდო სიმრავლე მეგჳპტელთაჲ ჴელითა ნაბუხოდონოსორ მეფისა ბაბილონისაჲთა და წარვწყმიდო სიმრავლე მეგჳპტელთაჲ
ჴელითა მისითა და ერისა მისისაჲთა, მის თანა ბუგრნი წარმართთაგან, მოვლინებულნი წარწყმედად ქუეყანისა. და წარმოაცალიერნენ ყოველთა მახჳლნი მათნი ეგჳპტესა ზედა და აღივსოს ქუეყანაჲ წყლულთა მიერ.
და დავსხნე მდინარენი მათნი ოჴრად და განვსცე ქუეყანაჲ ჴელებსა უკეთურთასა და წარვწყმიდო ქუეყანაჲ და სავსებაჲ მისი ჴელებითა უცხოთაჲთა, -- მე უფალმან ვთქუ.
ამათ იტყჳს უფალი ადონაი: და წარვწყმიდნე საძაგელნი და დავაცხრვნე დიდებულნი მემფისაგან და მთავარნი ქუეყანისაგან ეგჳპტისა და არა იყვნენ მერმე. და დავჰკრიბო შიში და ზარი ქუეყანასა მას ეგჳპტელთასა.
და წარვწყმიდო ქუეყანაჲ პათურისა. და მივსცე ცეცხლი ტანისსა ზედა და ვყო შურისგებაჲ დიოსპოლისსა შორის.
და განვჰფინო გულისწყრომაჲ ჩემი სანინსა ზედა, ძალსა ეგჳპტისასა, და წარვწყმიდო სიმრავლე მემფისაჲ.
და მივსცე ცეცხლი ეგჳპტესა ზედა და აღძრვით აღიძრას საისი და სჳნი და დიოსპოლის შინა Page of ed. 1709: 190a იყოს განხეთქილებაჲ და გარდაითხინენ წყალნი.
ჭაბუკნი მზის ქალაქისანი და ვუვასტისანი მახჳლითა დაეცნენ და დედანი ტყუეობად წარვიდენ;
და ტაფნას დაბნელდეს დღე შემუსრვასა ჩემგან მუნ სკიპტრათა ეგჳპტისათა და წარწყმდეს მუნ გინებაჲ ძალისა მისისაჲ და იგი ღრუბელმან დაფაროს და ასულნი მისნი ტყუედ წარიყვანნენ.
და ვყვნე მშჯავრნი ეგჳპტეს შორის და ცნან მეგჳპტელთა, ვითარმედ მე ვარ უფალი.
და იყო მეთორმეტესა წელსა, პირველსა შინა თთუესა, შჳდსა თთჳსასა, იქმნა სიტყუაჲ უფლისაჲ ჩემდამო მეტყუელი:
ძეო კაცისაო, მკლავნი ფარაო მეფისა ეგჳპტისანი შევმუსრენ და აჰა არ შეიხჳნეს მიცემად მისსა კურნებაჲ, დადებად მის ზედა სალბუნი, მიცემად და განძლიერებად მისსა პყრობად მახჳლისა.
ამისთჳს ამათ იტყჳს ადონაი უფალი: აჰა მე ფარაოს ზედა, მეფისა ეგჳპტისასა, და შევმუსრნე მკლავნი მისნი ძლიერნი და მორთხმულნი და შემმუსრველნი და შთამოვაგდო მახჳლი მისი ჴელისაგან მისისა
და განვსთესნე მეგჳპტელნი წარმართთა შორის და განვფიწლნე იგინი სოფლებთა მიმართ.
და განვაძლიერნე მკლავნი მეფისა ბაბილოვნისანი და მივსცნე მახჳლი ჩემი ჴელსა მისსა. და მოიწიოს იგი ეგჳპტესა ზედა და წარტყუენოს ტყუჱ მისი და იავარ-ყოს იავარი მისი.
და განვაძლიერნე მკლავნი მეფისა ბაბილონისანი, ხოლო მკლავნი ფარაოჲსანი -- დავარდენ, და ცნან, ვითარმედ მე ვარ უფალი, მი-რაჲვსცე მე მახჳლი ჩემი ჴელთა მეფისა ბაბილონისათა და განჰმარტოს იგი ქუეყანასა ზედა ეგჳპტისასა.
და განვსთესო ეგჳპტე წარმართთა მიმართ და განვფიწლნე იგინი სოფლებსა შორის და ცნან ყოველთა მეგჳპტელთა, ვითარმედ მე ვარ უფალი. Page of ed. 1709: 190b
