წელსა მეათორმეტესა, თთუესა შინა მეთორმეტესა, ერთსა თთჳსასა, იქმნა სიტყუაჲ უფლისაჲ ჩემდამო მეტყუელი:
ძეო კაცისაო, განიმტკიცე პირი შენი ფარაოს ზედა, მეფისა ეგჳპტისასა; და წინაწარმეტყუელებდ მის ზედა და ყოველსა ზედა ეგჳპტესა.
იტყოდე და თქუ: ამათ იტყჳს უფალი უფალი: აჰა მე შენ ზედა, ფარაო მეფეო ეგჳპტისაო, ვეშაპსა დიდსა, მჯდომარესა საშუალ მდინარეთა მისთა, მეტყუელსა: ჩემნი არიან მდინარენი მე შემქმნენ იგინი.
და მივსცე მახე ღაწუთა მიმართ შენთა და მოვაბნე თევზნი მდინარისა შენისანი Page of ms. Ga: 267r ფრთეთა მიმართ შენთა და აღმოგიყვანო შენ შორის მდინარისაგან შენისა და ყოველნი თევზნი მდინარისა შენისანი და ქეცთა შენთა აღეწებნენ. და განგაგდო შენ უდაბნოდ მიმართ, შენ და ყოველნი თევზნი მდინარისა შენისანი.
და დაგამჴუა სწრაფით და ყოველნი თევზნი მდინარისა შენისანი და პირსა ზედა ველისასა დაჰვარდე და არღარა შემოჰკრბე და აღარა კრება ჰყო; მჴეცთა ქუეყანისათა და მფრინველთა ცისათა მიგეც შენ შე საჭმელად.
და ცნან ყოველთა დამკჳდრებულთა ეგჳპტისათა, ვითარმედ მე ვარ უფალი მის წილ, რომელ ექმენ კუერთხ ლერწმისა სახლისა ისრაჱჱლისასა.
ოდეს გიპყრეს შენ ჴელითა მათითა, შეიმუსრე და ოდეს ეზედმპყრობელა მათ ზედა ყოველი ჴელი Page of ed. 1709: 188b და ოდეს ზედ განისუენა შენ ზედა, შეიმუსრე და შეჰფქევ ყოველი ძალი მათი.
ამისთჳს ამათ იტყჳს ადონაი უფალი: აჰა მე მოვაწევ შენ ზედა მახჳლსა და წარვსწყმედ კაცთა შენგან და საცხოვართა.
და იყოს ქუეყანაჲ ეგჳპტისაჲ წარსაწყმედელად და მოსაოჴრებელად და ცნან, ვითარმედ მე ვარ უფალი. ნაცვლად თქუმისა შენგან: "მდინარენი ჩემნი არიან და მე შევქმენ იგინი",
ამისთჳს აჰა მე შენ ზედა და ყოველთა ზედა მდინარეთა შენთა და მივსცე ქუეყანაჲ ეგჳპტისაჲ ოჴრებად და წარწყმედად მაგდალოჲთგან და სჳნით და ვიდრე საზღვართამდე ეთიოპისათა.
არა განვლოს მის მიერ ფერჴმან კაცისამან და ყოველმან საცხოვარმან არა განვლოს იგი და არდამკჳდრებულ იქმნეს ორმეოც წელ.
და მივსცე ქუეყანაჲ მისი წარსაწყმედელად შორის ქუეყანისა მოოჴრებულისა და ქალაქნი მისნი შორის ქალაქთა მოოჴრებულთასა იყვნენ ორმეოც წელ. უჩინოქმნულ იყოს და განვსთესო ეგჳპტე წარმართთა შორის და განფიწლნე იგინი სოფლებსა შორის.
ამათ იტყჳს უფალი უფალი: შემდგომად ორმეოცისა წლისა შევკრიბნე მეგჳპტელნი წარმართთაგან, სადა განიბნინეს მუნ.
და მოვაქციო ტყუეობაჲ ეგჳპტისაჲ და დავამკჳდრნე იგინი პა\თურისსა, Page of ms. Ga: 267v ქუეყანასა შინა, რომლისაგან მოცემულ იქმნეს, და იყოს მუნ სამთავროჲ მდაბალი
უფროჲს ყოველთა სამთავროთასა. და იყოს სიმდაბლე არ ამაღლებად მერმე წარმართთა ზედა და შემცირებულ ვყვნე იგინი უმრავლო ყოფად მათდა წარმართთა შორის.
და არღა იყვნენ მერმე სახლისათჳს ისრაჱლისა სასოებად, აღსაჴსენებელად უშჯულოებისა, შედგომასა შინა მათსა უკუანა გულთა მათთა და ცნან, ვითარმედ მე ვარ ადონაი უფალი.
და იყო შჳდ და მეოცესა Page of ed. 1709: 189a წელსა ერთსა თთჳსასა იქმნა სიტყუაჲ უფლისაჲ ჩემდამო მეტყუელი:
ძეო კაცისაო, ნაბუხოდონოსორ მეფემან ბაბილონისამან დაამონა ძალი თჳსი მონებითა დიდითა ტჳროსსა ზედა; ყოველი თავი მტიერ და ყოველი მჴარი მოშუე და სასყიდელი არა იქმნა მისსა და ძალი მისი ტჳროსსა ზედა დამონებასა, რომელი ჰმონეს მის ზედა.
ამისთჳს ამათ იტყჳს უფალი უფალი: მიცემით მივსცე მე ნაბუხოდონოსორს მეფესა ბაბილონისასა ქუეყანაჲ ეგჳპტისაჲ და წარიღოს სიმრავლე მისი და წარტყუენოს ტყუჱ მისი და იავარ-ყვნეს იავარნი მისნი და იყოს სასყიდელ ძალისა მისისა.
მსახურებისა წილ მისისა, რომელი ჰმონა ტჳროსსა ზედა, მივეც მას ქუეყანაჲ ეგჳპტისაჲ, -- იტყჳს ადონაი უფალი; ამათ იტყჳს უფალი უფალი:
მას დღესა შინა აღმოსცენდეს რქაჲ ყოვლისა სახლისა ისრაჱლისაჲ და შენ მიგცე პირი აღებული შორის მათსა, და ცნან ვითარმედ მე ვარ უფალი.
