და ვიხილე და აჰა ზედაჲთ სამყაროსა, ზეშთა თავისა ქერო\ვიმთასა, Page of ed. 1709: 161a ვითარცა ქვისა საპფირონისაჲ, მსგავსებაჲ სახესა საყდრისასა მათ ზედა.
და თქუა კაცისა მიმართ, მოსილისა სამოსლითა: შევედ საშუალ ეტლის თუალთა, ქუეშე კერძოთა ქეროვიმთასა, და აღივსენ მჭელნი შენნი ნაკუერცხლებითა ცეცხლისაჲთა საშუალისაგან ქეროვიმთასა და განაბნიე ქალაქსა ზედა. და შევიდა წინაშე ჩემსა.
და ქეროვიმნი დგეს მარჯუენით კერძო სახლისა, შე-რაჲ-ვიდოდა კაცი იგი და ღრუბელი აღავსებდა შინაგანსა ეზოსა.
და ამაღლდა დიდებაჲ უფლისაჲ ქეროვიმთაგან ურთავად მიმართ სახლისა და აღავსო ღრუბელმან სახლი და ეზოჲ აღივსო ნათლითა დიდებისა უფლისაჲთა.
და ჴმაჲ ფრთეებისა ქეროვიმთაჲსაჲ ისმოდა ვიდრე ეზოჲსა გარეშისამდე, ვითარცა ჴმაჲ ღმრთისა სადდაისაჲ, მეტყუელისაჲ.
და იყო, ამცნებდა რაჲ იგი კაცსა მას, მოსილსა სამოსლითა წმიდითა, მეტყუელი: მიიღე ცეცხლი საშუალისაგან ტლის თუალთაჲსა, შორისისაგან ქეროვიმთაისა; და შევიდა და დადგა მახლობელად ეტლის თუალთა.
და გამოყო ქეროვიმმან ჴელი თჳსი საშუალისაგან ქეროვიმთასა საშუალ ცეცხლისა, რომელი იყო შორის ქეროვიმთაჲსა, და მოიღო და მისცა ჴელთა შემოსილისათა სამოსლითა წმიდითა და მიიღო და გამოვიდა.
და ვიხილენ ქეროვიმნი და მსგავსებაჲ ჴელთა კაცთაჲსა ქუეშე კერძო ფრთეთა მათთაჲსა.
და ვიხილე და აჰა ოთხნი ეტლის თუალნი დგეს, მახლობელნი ქეროვიმთანი; ეტლის თუალი ერთი, მოახლე ქეროვიმისა ერთისაჲ და შესახედავი ეტლის თუალთაჲ, ვითარცა შესახედავი ქვისა ანთრაკისაჲ;
და შესახედავი მათი მსგავსებ ოთხთა Page of ed. 1709: 161b შორის, ვითარ სახედ იყვის ეტლის თუალი საშუალ ეტლის თუალისა.
სლვასა შინა მათსა ოთხთა კერძოთა მიმართ ვიდოდეს იგინი, არა მიიქცეოდეს სლვასა შინა მათსა, რამეთუ, რომლისაცა მიმართ ადგილისა მიიხილის დასაბამმან ერთმან, უკუანა მისსა ვიდოდეს და არა მიიქცეოდეს სლვასა შინა მათსა.
და ყოველი ჴორცი მათი და ზურგნი მათნი და ჴელნი მათნი და ფრთენი მათნი და ეტლის თუალნი სავსე თუალებითა გარემოჲს ოთხთა ეტლის თუალთა მათთა.
ხოლო ეტლის თუალთა ამათ ეწოდა გელგელ, მესმოდა რაჲ მე.
და ოთხნი პირნი აქუნდეს თითოეულსა ცხოველთაგანსა. პირი ერთი -- პირი ქეროვიმისაი, და პირი მეორე -- პირი კაცისაჲ, და მესამე -- პირი ლომისაჲ, და მეოთხე პირი არწივისაჲ.
და აღიმაღლეს ქეროვიმთა ესე ცხოველი, რომელი ვიხილე მდინარესა ზედა ხობარისასა.
და სლვასა თანა ქეროვიმთასა ვიდოდეს ეტლის თუალნი ესე, მახლობელნი მათნი. და განმარტებასა თანა ქეროვიმთაგან ფრთეთა მათთასა ამაღლებისათჳს ქუეყანით, არა მოიქცეოდეს ეტლის თუალნი მათნი, დაღათუ იგინი მოახლეთაგან მათთა.
დგომასა შინა მათსა დგიან და აღმაღლებასა შინა მათსა აღიმაღლებდეს მათ თანა, მით რამეთუ სული სიცოცხლისაჲ იყო მათ თანა.
და გამოვიდა დიდებაჲ უფლისაჲ ურთავისაგან ტაძრისაჲსა და აღვიდა ქეროვიმთა ზედა.
და აღიხუნეს ქეროვიმთა ფრთენი მათნი და აღიმაღლეს ქუეყანით წინაშე ჩემსა აღსლვასა თანა მათსა და ეტლის თუალთაცა მახლობელთა მათთა და დადგეს წინაკართა ზედა ბჭისა სახლისა უფლისაჲსა პირისპირისასა; და დიდებაჲ ღმრთისა ისრაჱლისაჲ იყო მათ ზედა, ზენა კერძო.
ესე ცხოველი არს, რომელი ვიხილე ქუეშე კერძო ღმრთისა ისრაჱლისაჲსა, Page of ed. 1709: 162a მდინარესა ზედა ხობარისასა, და ვცან, ვითარმედ ქეროვიმისა არს.
ოთხნი პირნი ერთისა და ოთხნი ფრთენი ერთისა და მსგავსებაჲ ჴელთა კაცისათაჲ ქუეშე კერძო ფრთეთა მათთაჲსა.
ესე პირნი არიან, რომელნი ვიხილენ ქუეშე კერძო დიდებისა ღმრთისა ისრაჱლისაჲსა, მდინარესა ზედა ხობარისასა. ხილვაჲ მათი და ესენი, თითოეული მათი პირისპირ თჳსსა ვიდოდა.
