და იყო წელსა მეექუსესა, მეხუთესა თთუესა, ხუთსა თთჳსასა, მე ვჯედ სახლსა შინა ჩემსა და მოხუცებულნი იუდაისნი სხდეს წინაშე ჩემსა და იქმნა ჩემ ზედა ჴელი ადონაი უფლისაი.
და ვიხილე: და აჰა მსგავსებაჲ კაცისაჲ წელითგან მისით და ვიდრე შთამართ -- ცეცხლი, და წელითგან მისით ზეშთა ზედანი მისნი, ვითარცა ხილვაჲ ნიავისაჲ და ვითარცა სახე ილეკტროჲსაჲ.
და განირთხა მსგავსებაჲ ჴელისა კაცობრივისაჲ და აღმიღო მე თხემითა თავისა ჩემისაჲთა და აღმიღო მე სულმან საშუალ ქუეყანისა და საშუალ ცისა და მომიყვანა მე იერუსალჱმდ ხილვისა მიერ ღმრთისა, წინა ბჭეთა ზედა შინაგანისა ბჭისა, მხედველისათა ჩრდილოდ მიმართ, სადა იყო სუეტი ხატისა შურისა მომგებელისაჲ.
და აჰა მუნ იყო დიდებაჲ უფლისა ღმრთისა ისრაჱლისაჲ ხილ ვისაებრ, რომელი ვიხილე ველსა.
და თქუა ჩემდამო: ძეო კაცისაო, აღიხილენ თუალნი შენნი ჩრდილოდ მიმართ; და Page of ed. 1709: 159b აღვიხილენ თუალნი ჩემნი ჩრდილოდ მიმართ და აჰა ჩრდილოჲთ, ბჭესა თანა აღმოსავალად მიმართსა მსხუერპლის საცავისასა, სადა იყო ხატი შურისაჲ ამის, შესავალსა თანა მისსა.
და თქუა ჩემდამო: ძეო კაცისაო, იხილეა რასა ესენი იქმან! უშჯულოებათა დიდთა სახლი ისრაჱლისაჲ ჰყოფენ აქა განყენებასა მათსა წმიდათაგან ჩემთა; და მერმე იხილნეღა უშჯულოებანი უფროჲსნი.
და შემიყვანა მე წინა ბჭესა თანა ეზოჲსასა და ვიხილე და აჰა ჴურელი ერთი ზღუდისა შორის.
და თქუა ჩემდამო: ძეო კაცისაო, დათხარე ზღუდისა შორის! და დავთხარე და აჰა კარი ერთი ზღუდისა შორის!
და თქუა ჩემდამო: შეედ და იხილენ უშჯულოებანი ბოროტნი, რომელთა ესენი ზმენ აქა!
და შევედ და ვიხილე და აჰა ყოველი მსგავსებაჲ ქუეწარმძრომელთა და საცხოვართაჲ და ამაონი საძაგელებანი და ყოველი კერპები გამოწერილები სახლისა ისრაჱლისაჲ კედელსა ზედა გარემო.
და სამეოცდაათნი კაცნი მოხუცებულთაგან სახლისა ისრაჱლისათა და იეზონია, ძე საფანისი, საშუალ მათსა დგა წინა პირისა მათისა; თითოეულსა მათსა სასაკუმევლე აქუნდა ჴელსა შინა თჳსსა. და ორთქლი საკუმეველისაჲ აღვიდოდა, აღბორქუნებოდა და მიმოეფინებოდა.
და თქუა ჩემდამო უფალმან: ძეო კაცისაო, იხილეა, რომელთა მოხუცებულნი სახლისა ისრაჱლისანი ჰყოფენ სახლსა შინა ბნელსა, თითოეული საწოლსა შინა თჳსსა მალულსა? მით რამეთუ თქუან: არა მხედავს უფალი ჩუენ, დაუტევა უფალმან ქუეყანაჲ.
და თქუა ჩემდამო: მერმე იხილნე კუალად უშჯულოებანი უფროჲსნი, რომელთა ესენი ჰყოფენ.
და შემიყვანა მე წინაბჭეთა თანა ბჭისა სახლისაჲსათა, რომელი ჰხედავს ჩრდილოდ მი\მართ; Page of ed. 1709: 160a და აჰა მუნ დედანი მსხდომარენი, მეტყებარნი თამუზისნი.
და თქუა ჩემდამო: ძეო კაცისაო, იხილეა? და მერმე იხილოვე სიმარჯუე უდიდესი ამისი.
და შემიყვანა მე ეზოსა სახლისა უფლისასა უშინაგანესსა და აჰა წინაბჭესა თანა ტაძრისა უფლისასა, საშუალ ელამისა და საშუალ მსხუერპლის საცავისა, ვითარ ოცნი და ხუთნი კაცნი, ზურგთა მათთა ტაძრისა მიმართ უფლისა მქონებელნი და პირთა მათთა -- პირისპირ აღმოსავალად მიმართ, და ესენი თაყუანისსცემდეს აღმოსავალით კერძო მზესა.
და თქუა ჩემდამო: იხილეა, ძეო კაცისაო? ნუ მცირე არსა სახლისა იუდაჲსსა ქმნაჲ უშჯულოებათაჲ, რომელნი ყვნეს აქა? მით რამეთუ აღავსეს ქუეყანაჲ უშჯულოებითა და მიიქცეს განრისხებად ჩემდა და აჰა ესენი განავრცობენ ნერგსა, ვითარცა მოკიცხარნი ჩემნი;
და მეცა უყო მათ გულისწყრომით; არა ერიდოს თუალი ჩემი, არცა შევიწყალო. და უწოდდენ ჴმითა დიდითა ყურთა შორის ჩემთა და არა შევისმინო მათი.
