სიტყუაჲ, ქმნილი იერემიაჲს მიმართ უფლისა მიერ ყოველთა ზედა იუდეანთა, დამკჳდრებულთა ეგჳპტეს შინა და მსხდომარეთა შორის ტაფნასა და მაგდოლონსა და მემფისა და ქუეყანასა შინა პათურისსა, მეტყუელი:
ასრეთ თქუა უფალმან ძალთამან, ღმერთმან ისრაელისამან: თქუენ იხილენით ყოველნი ძჳრნი, რომელნი მოვჴადენ იერუსალემსა ზედა და ქალაქთა ზედა იუდაჲსთა; და აჰა არიან უშენ დღესა ამას მკჳდრთაგან.
პირისაგან უკეთურებისა მათისა, რომელი ქმნეს განსამწარებელად ჩემდა, წარსრულთა ჴუმევად და კუთნვად ღმერთთა სხუათა, რომელნი არა იცოდენით თქუენ და მამათა თქუენთა.
და მიმავლენდ თქუენდა ყრმათა ჩემთა წინაჲსწარმეტყუელთა, აღმსთობი და მიმავლენელი და მეტყუელი: ნუ იქმთ საქმესა შეგინებისა ამისსა, რომელი მოვიძულე.
და არა ისმინეს ჩემი და არა მოყ\ვეს Page of ed. 1709: 120a ყური მათი მოქცევად უკეთურებისაგან მათისა არჴუმევისა ღმერთთა სხუათაჲსა.
და დასწუთა რისხვაჲ ჩემი და გულისწყრომაჲ ჩემი, და აღეტყინა ცეცხლი ბჭეთა შორის იუდაჲსთა და გარეშე იერუსალიმსა; და იქმნეს აღსაოჴრებელად და უგზოდ, ვითარცა დღესა ამას.
და აწ ესრეთ თქუა უფალმან საბაოთისამან, ღმერთმან ისრაილისმან: რაისათჳს თქუენ იქმთ ბოროტთა დიდთა სულთა ზედა თქუენთა მოკუეთად თქუენი მამაცი და დიაცი, ჩჩჳლი და მწოარი შორისისაგან იუდაჲსსა არდატევებისათჳს თქუენგანსა არცაერთსა.
განმწარებისათჳს ჩემისა საქმეთა მიერ ჴელთა თქუენთაჲსა, ჴუმევითა ღმერთთა სხუათათა ქუეყანასა ეგჳპტისასა, სადა შეხუედით მსხემობად მუნ, რაჲთა აღმოჭრნეთ და რაჲთა იქმნეთ საწყევარად და საყუედრელად წარმართათ შორის.
არდავიწყებითა თქუენგან ძჳრთა მამათა თქუენთასა და ძჳრთა თქუენთა და ძჳრთა მეფეთა იუდაჲსთასა და ძჳრთა ცოლთა მათთასა და ძჳრთა ცოლთა თქუენთასა, რომელნი ქმნნეს ქუეყანასა შინა იუდაჲსსა და გარეშე იერუსალიმისა.
და არა დასცხრეს ვიდრე დღისამდე ამის და არა შეიშინეს და არცა ერჩდეს შჯულთა ჩემთა და არა ვიდოდეს უკუანა ბრძანებათა ჩემთა, რომელნი მივსცენ წინაშე პირსა მამათა მათთასა და წინაშე პირსა მათსა.
ამისთჳს ამას იტყჳს უფალი ძალთაჲ, ღმერთი ისრაილისაჲ: აჰა მე დავამტკიცებ პირსა ჩემსა თქუენ ზედა ბოროტთათჳს მოსრულება[დ] ყოვლისა იუდაჲსსა.
და მიიხუნენ დანაშთომნი იუდაჲსნი, დამსხმელნი პირთა მათთანი შესლვად ქუეყანად ეგჳპტისა მსხემობად მუნ, წარწყმედისათჳს ყოველთა ნაშობთა იუდაჲსთა ეგჳპტეს შინათა და დაეცნენ მახჳლისა მიერ და სიყმილისა და მოაკლდ\ენ Page of ed. 1709: 120b კნინითგან ვიდრე დიდადმდე და მახჳლითა და სიყმილითა მოკუდენ და იყვნენ საფიცად და წარსაწყმედელად და საწყევარად და საყუედრელად.
და ზედ-მოვიხილო მსხდომარეთა ზედა ეგჳპტეს შინა, ვითარცა ზედმოვიხილე იერუსალიმსა ზედა მახჳლისა მიერ და სიყმილისა და სიკუდილისა.
და არა იყოს მათდა განრინებული, არცა დაშთომილი, არცა ერთი, ნეშტათაგანი იუდაჲსთაჲ, მოსრულთაჲ მსხემობად ქუეყანასა შორის ეგჳპტისასა მიქცევად ქუეყანადვე იუდაჲსსა, რომელსა ზედა იგინი ესვენ სულითა მათითა მიქცევად მუნ, არა მიიქცენ თჳნიერ მხოლოდ განლტოლვილნი, ესე იგი არს განრომილნი.
და მიუგეს იერემიას ყოველთა მამაკაცთა, მეცნიერთა, ვითარ უჴუმევენ ცოლნი მათნი ღმერთთა სხუათა და ყოველთა დედათა, მდგომარეთა შესაკრებელმან დიდმან და ყოველმან ერმან, მსხდომარეთა ქუეყანასა ეგჳპტისასა, ქუეყანასა პათოქსისასა, მეტყუელთა:
სიტყუაჲ, რომელ სთქუ ჩუენდამო სახელითა უფლისაჲთა, არა გისმინოთ შენ.
რამეთუ მყოფელთა ვყოთ ყოველი სიტყუაჲ, რომელი გამოვიდეს პირისაგან ჩუენისა ჴუმევად მეფეას ცისასა და ზორვად მისსა საზორველთა, ვითარ-იგი ვყავთ ჩუენ და მამათა ჩუენთა და მთავართა ჩუენთა და მეფეთა ჩუენთა ქალაქთა შინა იუდაჲსთა და გამოსავალთა იერუსალიმისათა; და აღვივსენით პურითა და ვიქმნენით ტკბილ და ძჳრნი არ ვიხილენით.
და ვითარცა მოვაკლეთ მჴუმეველთა მეფეას ცისასა და მზორველთა მისდა საზორველთასა, ნაკლულევან ვიქმნენით ყოველნი ჩუენ და მახჳლისა მიერ და სიყმილისა მოვაკლდით.
და დედათა თქუეს: რამეთუ უკუმევთ ჩუენ მეფეას ცისასა და უზორავთ მას {საზორველთა? ნუ თჳნიერ ქმართა ჩუ\ენთასა Page of ed. 1709: 121a უქმენით მას მსუნევანნი და უგენით მას} საგებნი?
და ჰ[რ]ქუა იერემია ყოველსა ერსა, მიმგებელთა მისდა სიტყუათასა მეტყუელმან:
არა საჴუმეველისა, რომელსა უჴუმევდით ქალაქთა შორის იუდაჲ[ს]თა და გამოსავალთა 'მიეწიის იერუსალიმისათა თქუენ და მამანი თქუენნი და მეფენი თქუენნი და მთავარნი თქუენნი და ერი ქუეყანისაჲ, მოიჴსენა უფალმან და აღვიდა გულსა ზედა მისსა.
და ვერ უძლებდა მერმე თავსდებად უფალი პირისაგან უკეთურებისა სიმარჯუეთა თქუენთაჲსა და საძაგელებათა თქუენთაჲსა, რომელნი ჰქმნენით; და იქმნა ქუეყანაჲ თქუენი მოსაოჴრებელად და უვალად და საწყევარად არყოფისა მიერ მკვდრთაჲსა, ვითარცა დღესა ამას.
პირისაგან, რომელთა უჴუმევდით და რომლითა შესცოდეთ უფალსა, და არა ისმინეთ ჴმისა უფლისა და შჯულსა შინა მისსა და წამებათა შორის მისთა და ბრძანებათა ზედა მისთა არა ხჳდოდეთ; და გპოვნეს თქუენ ბოროტთა ამათ, ვითარცა დღესა ამას.
და ჰრქუა იერემია ყოველსა ერსა და დედებსა: ისმინეთ სიტყუაჲ უფლისაჲ ყოველმან იუდამან ქუეყანასა შინა ეგჳპტისასა.
ამათ იტყჳს უფალი ძალთაჲ, ღმერთი ისრაილისაჲ: თქუენ და ცოლთა თქუენთა სთქუთ პირითა თქუენითა და ჴელითა თქუენითა აღასრულეთ, მეტყუელთა: მყოფელთა ვყვნეთ აღსაარებანი ჩუენნი, რომელნი აღვიარენით ჴუმევად მეფეას ცისასა, და სწრაფაჲ გებად მისსა საგებთა; დადგრომილნი დაადგერით აღსარებათა თქუენთა და მყოფელთა ჰყვენით აღთქუმანი თქუენნი.
ამისთჳს ისმინეთ სიტყუაჲ უფლისაჲ ყოველმან იუდამან, მსხდომარეთა ქუეყანასა შინა ეგჳპტისასა: აჰა მე ვფუცე სახელსა ჩემსა დიდსა, თქუა უფალმან ღმერთმან, უკუეთუ იყოს მერმე სახე\ლი Page of ed. 1709: 121b ჩემი წოდებულ პირითა ყოვლისა იუდეანისა, მეტყუელისაჲთა: ცხოველ არს უფალი ღმერთი ყოველსა შინა ქუეყანასა ეგჳპტისასა.
რამეთუ მე ვიღჳძე ბოროტებად მათდა და არა კეთილობად; და მოაკლდეს ყოველი იუდაჲ, დამკჳდრებულნი ქუეყანასა შინა ეგჳპტისასა მახჳლისა მიერ და სიყმილისა, ვიდრემდის არა მოაკლდენ.
და განრინებულნი მახჳლისაგან მიიქცენ ქუეყანით ეგჳპტით ქუეყანად იუდაჲსსა კნინნი რიცხჳთა და ცნან ყოველთა ნეშტთა იუდაჲსთა, მსხემთა ქუეყანას შინა ეგჳპტისასა, სიტყუაჲ თუ ვისი დაადგრეს, ჩემი ანუ მათი.
და ესე თქუენდა სასწაულ, იხილოთ, რამეთუ მე ზედ-მოვიხილო თქუენ ზედა ადგილსა ამას შინა ბოროტებად, რაჲთა სცნათ, ვითარმედ დადგრომით დაადგრენ სიტყუანი ჩემნი თქუენ ზედა ბოროტებად.
ასრეთ თქუა უფალმან: აჰა მე მივსცემ ფარაოს უაფრესა მეფესა ეგჳპტისასა განცემულად ჴელებსა მტერთა მისთასა და ჴელებსა მეძიებელთა სულისა მისისათასა, ვითარცა მივეც სედეკია, მეფე იუდაჲსი ჴელთა ნაბუქოდონოსორ მეფისა ბაბილოვნისათა, მტერისა მისისა და მეძიებელისა სულისა მისისასა.
