და იყო, თთუესა მეშჳდესა მოვ\იდა Page of ed. 1709: 117a ისმაილ, ძე ნათანისი, ძისა ელისამაჲსი, ნათესავისაგან მეფობისა, და ყრმა[ა]კნი მეფისანი და ათნი მამაკაცნი მათ თანა გოდოლიაჲს მიმართ მასიფად და ჭამეს მუნ პური ზოგად.
და აღდგა ისმაილ, ძე ნათანისი, და ათნი მამაკაცნი მის თანა და მოკლეს გოდოლია, რომელ დაადგინა მეფემან ბაბილონისამან ქუეყანასა ზედა.
და ყოველნი იუდეანნი, მყოფნი მის თანა მასსიფას, და ყოველნი ქალდეველნი, პოვნილნი მუნ, და მამაკაცნი ბრძოლისანი მოსრნა ისმაილმან.
და იყო დღესა მეორესა მოკლვისა გოდოლიაჲსსა მის მიერ, და კაცმან არა ცნა.
და მოვიდეს კაცნი სჳქემით და სალიმით და სამარიაჲთ ოთხმეოცნი კაცნი, დამყუენელნი წუერთანი და დამბძარველნი სამოსელთა მათთანი და მეტყებარნი, და მინნაჲ და გუნდრუკი და ძღუენნი ჴელთა შინა მათთა შეღებად სახლად უფლისა.
და გამოვიდა მიგებებად მათდა ისმაილ მასსიფაჲთ, და იგინი ვიდოდენ და ტიროდეს, და ვითარცა მიეახლა მათ, ჰრქუა მათ: შვედით გოდოლიაჲსსა, ძისა აქიკამისა.
და იყო, შე-რაჲ-ვიდეს საშუალ ქალაქისა, მოსრნა იგინი ისმაილმან და შთაყარნა ჯურღმულსა, მან და კაცთა მათ მისთათა.
და ათნი კაცნი იპოვნეს მუნ და ჰრქუეს ისმაილსა: ნუ მომწყუედ ჩუენ რამეთუ არიან ჩუენდა საუნჯენი ველსა შინა, იფქლნი და ქრთილნი და თაფლი და ზეთი და წარჰჴდა და არა მოსწყჳდნა იგინი შორის ძმათა მათთა.
ხოლო ჯურღმული, რომელსა შთაყარნა ისმაილ ყოველნი, რომელნი მოსრნა გოდოლიაჲს თანა, ჯურღმული დიდი ესე არს, რომელი ქმნა მეფემან ასა პირისაგან [ბ]ასაჲსა, მეფისა ისრაილისა, ესე აღავსო ისმაილმან წყლულებითა.
და მიაქცია ისმაელმან ყოველი ერი, დაშთომილი მასსიფას, და ასულნი მეფისანი, რომელნი შეჰვედრ\ნა Page of ed. 1709: 117b მთავარქონდაქარმან გოდოლიას, ძესა აქიკამისსა და აღიმსთო ისმაილ და წარვიდა წიაღ ძეთა ამმონისთა.
და ესმნეს იონანს, ძესა კარიესსა, და ყოველთა მთავართა ძალისათა მისთანათა, ყოველნი ძჳრნი, რომელნი ქმნნა ისმაილმან, ძემან ნათანისმან.
და შეკრიბეს ყოველი ლაშქარი მათი და მივიდეს ბრძოლად მისსა და პოეს იგი წყალსა ზედა მრავალსა გაბაონს შინა.
და იყო, ვითარცა იხილა ყოველმან ერმან ისმაილისთანამან იონან და მთავარნი ძლიერებისანი მისთანანი, განიხარეს.
და მოაქცია ყოველმან ერმან, რომელი წარტყუენა ისმაელმან მასსეფაჲთ, და მოქცეულნი მოვიდეს იონანის მომართ, ძისა კარიესსა.
ხოლო ისმაილ, ძე ნათანისი, განერა რვათა კაცთა თანა პირისაგან იოანანისსა და მივიდა ძეთა მიმართ ამმონისთა.
და მიიხუნა იონან, ძემან კარიესმან, და ყოველთა მთავართა ძალისათა მისთათა ყოველნი ნეშტნი ერისანი, რომელნი უკმოაქცინა ისმაილისაგან ძისა ნათანისა, შემდგომად მოკლვისა გოდოლიაჲსსა, ძისა აქიკამისსა, ძლიერნი კაცნი ბრძოლასა შინა და დედანი და ნეშტნი და საჭურისნი, რომელნი მოაქცინა გაბაონით.
და წარვიდეს და დასხდეს ქუეყანასა შინა ბიროათამისა ბეთლემით კერძოსა წარსლვად ეგჳპტედ.
პირისაგან ქალდეველთაჲსა, რამეთუ შიშნეულ იქმნნეს პირისაგან მათისა, რამეთუ მოკლა ისმაილმან გოდოლია, რომელი დაადგინა მეფემან ბაბილონისამან ქუეყანასა ზედა.
