და იქმნა, წელსა მეცხრესა სედეკია მეფისა იუდაჲსსა, თთუესა მეათესა, მოვიდა ნაბუქოდონოსორ, მეფე ბაბილონისაჲ, და ყოველი ძალი მისი იერუსალიმსა ზედა და ჰბრძოდეს მას.
და მეათესა წელსა სედეკია მეფისასა, თუესა მეოთხესა, ცხრასა თთჳსასა, განიპო ქალაქი.
და შევიდეს ყოველნი მთავარნი ბაბილონისა მეფისანი და დასხდეს ბჭესა თანა საშუალსა: ნირგელ სარსამაღად და ნაბუსახარ და ნაბუსარი, ნაღარღა ნა\სერ, Page of ed. 1709: 115a რაბამად და ყოველნი ნეშტნი მთავარნი მეფისა ბაბილონისანი.
ხოლო იქმნა, რაჟამს იხილნა იგინი სედეკია მეფემან იუდაჲსმან და ყოველთა კაცთა ბრძოლისათა, ივლტოდეს და გამოჴდეს ღამე ქალაქისაგან გზით მტილისა მეფისაჲთ, ბჭისა მიერ საშუალისა ორთა ზღუდეთაჲსა, და გამოვიდეს გზად უდაბნოჲსა არავიაჲსათა.
და დევნა-ყო ძალმან ქალდეველმან უკუანაგან მათსა და ეწინეს სედეკიას არავოდს შინა იერიქოჲსასა და შეიპყრეს იგი და აღმოიყვანეს იგი ნაბუქოდონოსორის მიმართ მეფისა ბაბილონისა დევლათას შინა, ქუეყანასა! ეთამისსა, და იტყოდა მის თანა მსჯავრითა.
და მოსწყჳდნა მეფემან ბაბილონისამან ძენი სედეკიაჲსნი დევლათას შინა წინაშე თუალთა მისთა და მოსწყჳდნა ყოველნი აზნაურნი იუდაჲსნი მეფემან ბაბილონისმან.
და თუალნი სედეკიაჲსნი დააბრმნა და შეკრა იგი ბორკილებითა რკალისაჲთა წარყვანებად იგი ბაბილონდ.
და სახლი მეფისაჲ და სახლები ერისაჲ მოწვეს ქალდეველთა ცეცხლითა და ზღუდე იერუსალიმისაჲ დაარღჳეს.
და ნეშტი ერისაჲ, დაშთომილნი ქალაქსა შინა, და შეცჳვნებულნი, რომელნი შესცჳვნებოდეს მას, და ნეშტნი ერისანი, დაშთომილნი, განსახლნა ნაბუზარდან მთავარ-ქონდაქარმან ბაბილონდ.
ხოლო ერისაგანნი, დავრდომილნი, რომელთა არა აქუნდა არარაჲ, დაუტევნა ნაბუზარდან მთავარ-ქონდაქარმან ქუეყანასა შინა იუდაჲსსა და სცა მათ ვენაჴები და სარწყავები მას დღესა შინა.
და ამცნო ნაბუქოდონოსორ მეფემან ბაბილონისამან იერემიაჲსთჳს ნაბუზარდანს მთავარ-ქონდაქარსა, მეტყუელმან:
მიიყვანე იგი და თუალნი შენნი დასხენ მას ზედა და ნუ უყოფ მას Page of ed. 1709: 115b ნურას ბოროტსა, არამედ რამეთუ ვითარცა რაჲ თქუას შენდამი, ეგრეთ ყავ მის თანა.
ხოლო მიავლინა ნაბუზარდან მთავარ-ქონდაქარმან და ნაბუსარ საჭურისთ-მთავარმან სექქიმ ნაბსარი, ნირგელ სარასარა, რაბამაღ და ყოველთა დიდებულთა ბაბილონისთა.
და მოიყვანეს იერემია ეზოჲთ საპყრობილისჲთ და მისცეს იგი გოდოლიაჲს მიმართ, ძისა აქიკამისა, ძისა საფანისსა, და განიყვანეს იგი დეფნიდ, და დაჯდა საშულ ერისა.
და იერემიაჲს მიმართ იქმნა სიტყუაჲ უფლისაჲ ყოფასაღა მისსა შეყენებით ეზოსა შინა საპყრობილისასა, მეტყუელი.
ვიდოდე და თქუ აბდემელექის მიმართ ეთიოპისა, მეტყუელმან: ესრეთ თქუა უფალმან ძალთამან, ღმერთმან ისრაილისამან: აჰა მე მოვიღებ სიტყუასა ჩემსა ქალაქსა ამას ზედა საბოროტოდ და არა საკეთილოდ და იყვნენ წინაშე პირსა შენსა მას დღესა შინა, და გაცხოვნო შენ მას დღესა შინა, თქუა უფალმან.
და არა მიგცე შენ ჴელთა კაცთასა, რომელთაგან შენ გეშინის პირისაგან მათისა.
რამეთუ მაცხოვნებელმან გაცხონო შენ და მახჳლსა შორის არა შეჰვარდე, და იყოს სული შენი მოპოვნებულ, რამეთუ ესევდი ჩემდამო, თქუა უფალმან.
