მეფე იქმნა სედეკია, ძე იოსიჲასი ნაცვლად იექონიაჲსა, ძისა იოაკიმისსა, რომელი მეფე ყო ნაბუქოდონოსორ მეფემან ბაბილონისამან, მეფობად იუდაჲსსა.
და არა ისმინნეს მან და ყრმათა მისთა და ერმან ქუეყანისამან სიტყუანი უფლისანი, რომელნი თქუნა ჴელითა იერემიაისითა.
და მიავლინა მეფემან სედეკია იოახას, ძე სელემისი, და სოფონია, ძე მაასესი. მღდელი იერემიაჲს მიმართ წინაჲსწარმეტყუელისა, მეტყუელმან: ემილოცვილე ჩუენთჳს უფლისა ღმრთისა ჩუენისა.
და იერემია მოვიდა და განვლო საშუალ ქალაქისა, და არ მიიყვანეს იგი საპყრობილედ. და ძალი ფარაოჲს გამოვიდა ეგჳპტით, და ესმა ქალდეველთა მომცველთა იერუსალიმისათა, სასმენელი მათი და წარვიდეს იერუსალიმით.
და იყო სიტყუაჲ უფლისაჲ იერემიაჲსა მიმართ, მეტყუელი:
ესრე თქუა უფალმან ღმერთმან ისრა\ელისამან: Page of ed. 1709: 112b ესრე ჰსიტყო მეფისა მიმართ იუდაჲსა, მომავლინებელისა შენდამი გამოძიებად ჩემდა: აჰა ძალი ფარაოჲსი, გამოსრული შეწევნად თქუენდა, უკუნ-იქცენ ქუეყანად მათდად ქუეყანად ეგჳპტისა.
და უკმოიქცენ ქალდეველნი და ჰბრძოდენ ქუეყანასა ამას და დაიპყრან იგი და დაწუან იგი ცეცხლითა.
რამეთუ ესრეთ თქუა უფალმან: ნუ მოიღებთ ასულთა თქუენთა, მეტყუელნი: წარმრბენელნი წარვიდენ ჩუენგან ქალდეველნი, რამეთუ არა წარვიდენ.
არამედ დაღათუ მოსრათ ყოველი ძალი ქალდეველთაჲ, მბრძოლთა თქუენთაჲ, და დაშთენ ვინმე დაგურემულნი მამაკაცნი და მათ შორის, კაცადი ადგილსა თჳსსა. იგინი აღდგენ და დაწუან ქალაქი ესე ცეცხლითა.
და იქმნა, ოდეს აღმოვიდა ძალი ქალდეველთაჲ იერუსალიმით პირისაგან ძალისა ფარაოჲსისა.
გამოვიდა იერემია იერუსალიმით წარსლვად ქუეყანად ბენიამინისა სყიდად მუნით პურისა საშუალ ერისა.
და იქმნა იგი ბჭესა თანა ბენიამენისა; და მუნ კაცი, რომლისასა დაივანის სარუია, ძემან სელემისმან, ძისა ანანიაჲსმან, და შეიპყრა იერემია, მეტყუელმან: ქალდეველთა მიმართ შენ ივლტი?
და ჰრქუა იერემია: ცილ არს, არა ქალდეველთა მიმართ მოვივლტი მე. და არა ისმინა მისი და შეიპყრა სათუთმან იერემია და შეიყვანა იგი მთავართა მიმართ.
და განმწარდეს მთავარნი იერემიაჲს ზედ და გუემეს იგი და მისცეს იგი სახიდ საპყრობილისა კრულისა საცმელად სახიდ იონათან მწიგნველისა, რამეთუ სახლი მისი შექმნეს საპყრობილედ. რამეთუ მოვიდა ერი სახიდ მღჳმისა და ქერეთდ.
და შევიდა იერემია სახიდ მღჳმისა და შესაწყდობელად და დაჯდა მუნ დღეთა მრავალთა იერემია
და მიავ\ლინა Page of ed. 1709: 113a მეფემან სედეკია და მოუწოდა მას და გამოჰკითხა მას მეფემან სახლსა შინა თჳსსა იდუმალ და ჰრქუა მას: უკუეთუ არს სიტყუაჲ უფლისა მიერ? და მან ჰრქუა. არს. და თქუა: ჴელთა მეფისა ბაბილოვნისათა მიეცე.
და ჰრქუა იერემია მეფესა სედეკიას: რაჲ გამძლავრებენ [შენ] და ყრმათა შენთა და ერსა ამას, რამეთუ თქუენ მიმეცით მე სახიდ საპყრობილისად?
და სადა არიან წინაჲსწარმეტყუელნი თქუენნი, რომელნი გიწინაჲსწარმეტყუელებდეს თქუენ, მეტყუელნი ვითარმედ: არა მოვიდეს მეფე ბაბილონისაჲ ქუეყანასა ამას ზედა?
და აწ უფალო ჩემო მეფე, დავარდინ წყალობაჲ ჩემი წინაშე პირსა შენსა, და რად მიმაქცევ მე სახიდ იონათან მწიგნველისა, და არა მოვკუდე მუნ.
და მიუწესა მეფემან სედეკია, და შეაგდეს იგი სახლსა საპყრობილისასა და მისცემდეს მას პურსა ერთსა დღივ გარეშე, რომელსა განსცემდეს, ვიდრე არა მოაკლდეს პურნი ქალაქისამან; და დაჯდა იერემია ეზოსა შინა საპყროლისასა.
