და იქმნა წელსა მეოთხესა იოაკიმ, ძისა იოსიაჲსსა, მეფისა იუდაჲსსა, იქმნა სიტყუაჲ უფლისაჲ ჩემდამო, მეტყუელი:
მოიღე თავისა შენისად ქარტაჲ წიგნისაჲ და დაწერ\ენ Page of ed. 1709: 110b მას ზედა ყოველნი სიტყუანი, რომელნი გამოგიცხადენ შენ ისრაილსა ზედა და იუდასა ზედა და ყოველთა ზედა ნათესავთა, რომლით დღითგან ვიტყოდე მე შენდამი დღეთაგან იოსია მეფისა იუდაჲსთა და ვიდრე დღისამდე ამის.
ნუუკუე ისმინნეს სახლმან იუდაჲსმან ყოველნი ძჳრნი, რომელთა მე ვსიტყუავ ყოფად მათდა, და მოიქცენ კაცადი გზისაგან თჳსისა ბოროტისა, და მლხინებელ ვეყო სიცრუეთა მათთა და ცოდვათა მათთა.
და მოუწოდა იერემია ბარუქს, ძესა ნირისსა, და დაწერნა ბარუქმან პირისაგან იერემიაჲსსა ყოველნი სიტყუანი, რომელნი გამოაცხადნა მისდამი ქარტასა ზედა წიგნისასა.
და ამცნო იერემია ბარუქსა, მეტყუელმან: მე ვიცვები და ვერ ძალმიც შესლვაჲ სახიდ უფლისა.
და შეხჳდე შენ და აღმოიკითხო ქარტასა ამას შინა, რომელნიცა დასწერენ პირისაგან ჩემისა სიტყუანი უფლისანი ყურთა მიმართ ერისათა სახლსა შინა უფლისასა დღესა მარხვისასა და ყურთა შორის ყოვლისა იუდაჲსთა, რომელნი მოვლენ ქალაქთაგან მათთა, აღმოუკითხო მათ.
ნუუკუე დავარდეს წყალობაჲ მათი წინაშე პირსა უფლისასა და მოიქცენ გზისაგან მათისა ბოროტისა, რამეთუ დიდ არს გულის-წყრომაჲ და რისხვაჲ უფლისაჲ, რომელ თქუა ერსა ამას ზედა.
და ყვნა ბარუქმან ყოველთაებრ, რაოდენნი ამცნნა იერემია წინაჲსწარმეტყუელმან აღმოკითხვაჲ წიგნსა შინა სიტყუათა უფლისათა სახლსა შორის უფლისასა.
და იქმნა წელსა მეხუთესა იოაკიმისსა. ძისა იოსიაჲსა, მეფისა იუდაჲსა, თუესა შინა მეცხრესა იეკკლისიეს მარხვაჲ წინაშე პირსა უფლისასა ყოველმან ერმან იერუსალიმისამან და ყოველმან ერმან, მომავალთა ქალაქთაგან იუდაჲსთა იერუსალიმდ სახლისა იუდაჲსმან.
და იყო, და იკითხვიდა ბარუქ წიგნსა შინა სიტყუათა იე\რემიაჲსთა Page of ed. 1709: 111a შორის სახლისა უფლისა, სახლსა შინა გამარიაჲსსა, ძისა საფანისსა მწიგნველისასა, შორის ეზოჲსა ზენაჲთ კარის-წინათა თანა ბჭეთა სახლისა ახლისათა, ყურთა მიმართ ყოვლისა ერისათა.
და ესმა მიქეას, ძესა გამარიაჲსსა, ძისა საფანისსა, ყოველნი სიტყუანი უფლისანი წიგნისაგან.
და შთავიდა სახიდ მეფისა, სახიდ მწიგნველისა, და აჰა მუნ სხდეს ყოველნი მთავარნი: ელისამა მწიგნველი და სალეა, ძე სამეაჲსი, და ელდათან, ძე აქაბორისი, და გამარია, ძე საფანისი, და სადაკია, ძე ანანიაჲსი, და ყოველნი მთავარნი.
და მიუთხრნა მათ მიქეა ყოველნი სიტყუანი, რომელნი ესმნეს, აღმოიკითხვიდა რაჲ ბარუქ ყურთა მიმართ ერისათა.
და მიავლინეს ყოველთა მთავართა ბარუქის მიმართ იუდი, ძე ნათანისი, ძისა სელემისი, ძისა ხუსისი, მეტყუელთა: წიგნსა რომელსა შენ აღმოიკითხავ მას შინა ყურთა მიმართ ერისათა, მ[ო]იღე იგი ჴელსა შენსა და მოვედ. და მოიღო წიგნი ბარუქ, ძემან ნირისმან. წიგნი ჴელსა ზედა თჳსსა და შთავიდა მათდამი.
და ჰ[რ]ქუეს მათ მთავართა: კუალად აღმოიკითხე ყურთა მიმართ ჩუენთა. და აღმოიკითხა ბარუქმან ყურთა მიმართ მათთა.
და იყო, ვითარცა ესმნეს ყოველთა მთავართა ყოველნი იგი სიტყუანი, განიზრახეს კაცადმან მოყუსისა მიმართ თჳსისა და თქუეს ბარუქის მიმართ: მიმთხრობელნი მიუთხრობთ მეფესა ყოველთა ამას სიტყუათა.
და ბარუქს ჰკითხეს, მეტყუელთა: მომითხარ ჩუენ, ვინაჲ დასწერენ ყოველნი ესე სიტყუანი?
და თქუა ბარუქმან: პირისაგან იერემიაჲსისა; რამეთუ მომითხრობდა იგი ჩემდამო ყოველთა მას სიტყუათა. და მე ვწერდ წიგნსა შინა მელანითა.
და ჰ[რ]ქუეს ყოველთა მთავართა ბარუქს: წარსრული დაიმალე შენ და იერემია, კაცი ნუ სცნობნ, სადა Page of ed. 1709: 111b თქუენ.
და შევიდეს მეფისა მიმართ ეზოდ და წიგნი მისცეს დასამარხავად სახლსა შინა ელისამა მწიგნველისასა და მიუთხრნეს მეფეს ყოველნი ესე სიტყუანი.
და მიავლინა მეფემან იუდი მოღებად წიგნისა მის, და მოიღო იგი იუდი სახლისაგან ელისამისა მწიგნველისა და აღმოიკითხა იუდი ყურთა მიმართ მეფისათა და ყურთა მიმართ ყოველთა მთავართა, მდგომარეთასა გარემოჲს მეფისა.
და მეფე ჯდა სახლსა შინა საზამთროსა თუესა მეცხრესა, და კერაკნი ცეცხლისანი პირისპირ მისსა.
და იყო, აღმო-რაჲ-იკითხის იუდი სამი კეფი ანუ ოთხი, მოჰკუეთდის მათ საჭრელითა მწიგნველისაჲთა და შთააგდებდის ცეცხლსა, კერაკსა მას ზედა, ვიდრემდის არა დააკლდა წიგნსა ცეცხლსა მას კერაკთასა.
და არა გამოიძიეს, არცა დაიპნეს სამოსელნი მათნი მეფემან და ყოველთა ყრმათა მისთა, რომელთა ესმნეს ყოველნი ესე სიტყუანი.
და ელდათან და გოდოლია და დალეა, ღამარია ჰმოქენობდეს მეფესა არაწჳსათჳს წიგნისა; და არა ისმინა, მათი.
და ამცნო მეფემან იერემეილს, ძესა მეფისასა, და სარეას, ძესა ეზრიილისასა, სალამეას, ძესა ამიილისსა, შეპყრობაჲ ბარუქისი მწიგნობრისაჲ და იერემია წინაჲსწარმეტყუელისაჲ; და დაიმალნეს უფლისა მიერ.
და იქმნა სიტყუაჲ უფლისაჲ იერემიაჲს მიმართ შემდგომად დაწვისა მეფისა მიერ ქარტასა, მქონებელსა ყოველთა ამათ სიტყუათასა, რომელნი დაწერნა ბარუქმან პირისაგან იერემიაჲსსა, მეტყუელი:
კუალად მოიღებინ წიგნი სხუაჲ და დაწერენ ყოველნი ესე სიტყუანი, მყოფნი ქარტასა შინა, რომელი დაწუა იოაკიმ, მეფემან იუდაისმან.
და იოაკიმის მიმართ, მეფისა იუდაჲსსა, სთქუ: ესრეთ თქუა უფალმან: შენ დასწჳ ქარტაჲ ესე, მეტყუელმან: რაჲსთჳს დასწ\ერე Page of ed. 1709: 112a მას ზედა, მთქუმელმან ვითარმედ: შემომავალი შემოვიდეს მეფე ბაბილონისაჲ და მოსრას ქუეყანაჲ ესე, და მოაკლდეს მისგან კაცი და საცხოვარი.
ამისთჳს ესრეთ თქვა უფალმან იოაკიმის ზედა, მეფისა იუდაჲსსა: არა იყოს მისსა მჯდომარე საყდარსა ზედა დავითისსა, და მძორი მისი იყოს დაგდებულ სიცხესა დღისასა და ნეფხვასა ღამისასა.
და ზედ-მომიხილო მის ზედა და თესლსა ზედა მისსა და ყრმათა ზედა მისთა და ყრმათა ზედა მისთა და მოვაწინე მათ ზედა და მკჳდრთა ზედა იერუსალიმისათა და ქუეყანასა ზედა იუდაჲსსა ყოველნი ძჳრნი,: რომელთა ვიტყოდე, და არა ისმინეს ჩემი.
და მოიღო ბარუქმან ქარტაჲ სხუაჲ და დაწერნა მას ზედა პირისაგან იერემიაჲსსა ყოველნი სიტყუანი წიგნისანი, რომელნი დაწუნა იოაკიმმან, მეფემან იუდაჲსმან და მერმეცა შეეძინნეს მას სიტყუანი უმრავლესნი, ვითარ იგინი.
