და გამოვიდეს ყოველნი ძენი ისრაელისანი და ეკკლესია იქმნა ყოველი შესაკრებელი, ვითარ კაცი ერთი, დანითგან ბერსაბედმდე და ქუეყანაჲ გალაადისაჲ უფლისა მიმართ მასსიფას.
და დადგეს წინაშე უფლისა ყოველნი ტომნი ისრაელისანი ეკკლესიასა შინა ღმრთისასა ოთხასნი ათასეულნი კაცთა მკჳრცხლთანი, მჴდელნი მახჳლსა.
და ესმა ძეთა ბენიამინისთა, ვითარმედ აღმოვიდეს ძენი ისრაელისანი მასსიფას და მოსრულთა თქუეს ძეთა ისრაელისათა: თქუთ, სადა იქმნა უკეთურებაჲ ესე?
და მიუგო კაცმან ლევიტელმან, ქმარმან დედაკაცისა მოკლულისამან, და თქუა: დავაას ბენიამინისსა მოვედ მე და ცოლი ჩემი დავანებად,
და აღდგეს ჩემ ზედა კაცნი ღავაჲსანი და გარე-მოიცვეს ჩემ ზედა სახლი ღამე და ჩემი ენება სიკუდილი, და ხარჭი ჩემი დაამდაბლეს და მოკუდა.
და უპყარ ხარჭსა ჩემსა და განვაასოე იგი და წარვეც ყოველსა საზღვარსა მკჳდრობისა ძეთა ისრაელისათაჲსასა, რამეთუ ყვეს უცნობელობაჲ და განვრდომილობაჲ ისრაელსა შორის.
აჰა, ყოველნი თქუენ ძენი ისრაელისანი, მიეცით თავთა თჳსთა სიტყუაჲ და განზრახვაჲ.
და აღდგა ყოველი ერი, ვითარ კაცი ერთი, მეტყუელნი: არა წარვიდეთ საყოფლად თჳსსა და არა მივაქციოთ კაცმან სახიდ თჳსსა.
და აწ ესე სიტყუაჲ, რომელი იქმნეს ღავასა ზედა: აღვიდეთ მის ზედა ნაწილსა შინა,
გარნა მივიხუნეთ ათნი კაცნი ასთაგან ყოველთა შორის ტომთა ისრაელისათა და ასნი -- ათასთაგან და ათასნი -- ბევ\რთაგან Page of ms. Ga: 388v მოღებად საზრდელსა ერისასა, ქმნად მოსლვასა მათსა ღავაად ბენიამინისსა, ყოფად მისსა ყოვლისაებრ განვრდომილებისა, რომელი უყო ისრაელსა.
და შეკრბა კაცი ისრაელისაჲ, ვითარცა კაცი ერთი, ბრძოლად მოსრულნი.
და მიავლინეს ტომთა ისრაელისათა კაცი ყოვლისა მიმართ ტომისა ბენიამინისსა, მეტყუელთა: რაჲ არს უკეთურებაჲ ესე, ქმნილი თქუენ შორის?
და აწ მოგუცენით კაცნი, ძენი უშჯულოთანი, ღავაელნი, და მოვაკუდინნეთ იგინი და განვწმიდოთ უკეთურებაჲ ისრაელისაგან.
და შეკრბეს ძენი ბენიამინისნი ქალაქთა მათთაგან ღავაას განსლვად წყობად ძეთა მიმართ ისრაელისათა.
და აღხილულ იქმნეს ძენი ბენიამინისნი მას დღესა შინა ბრძოლისა მიმართ, ოცდახუთნი ათასეულნი კაცთანი, კაცი მჴდელი მახჳლისაჲ, თჳნიერ მკჳდრთა ღავაჲსათასა, რომელნი აღხილულ იქმნეს შჳდასნი კაცნი, რჩეულნი ყოვლისაგან Page of ms. Gb: 198r ერისა,
ორ კერძო მარჯუენენი, ყოველნი ესე კაცნი შურდლოსანნი, ქვებითა თმისა მიმართ და არა დამცილებელნი.
და ყოველი კაცი ისრაელისაჲ აღხილულ იქმნეს თჳნიერ ბენიამინისსა, ოთხასნი ათასეულთა კაცთა მჴდელთა მახჳლისათანი, ყოველნი ესე კაცნი წყობისანი.
და აღდგეს და ავიდეს ბეთილდ და იკითხეს ღმრთისა მიერ, და თქუეს ძეთა ისრაელისათა: ვინ აღვიდეს ჩუენდა დამწყებელად ბრძოლისა ძეთა მიმართ ბენიამინისთა? და თქუა უფალმან. იუდა აღვიდეს წინაწარ.
და აღდგეს ძენი ისრაელისანი განთიად და დაიბანაკეს ღავაასა ზედა.
და განვიდა ყოველი კაცი წყობად ბენიამინის მიმართ და შეაწყუდინეს იგინი ღავაას შინა.
და გამოვიდეს ძენი ბენიამინისნი ღავაჲთ და განხრწნეს ისრაელისაგან მას დღესა შინა ორი და ოცი ათასეული კაცთაჲ ქუეყანასა ზედა.
და განძლიერდა კაცი ისრაელისა მიმართ და შესძი\ნეს Page of ms. Ga: 389r შენივთებად ბრძოლაჲ ადგილსა, სადა შეენივთა მას დღესა შინა.
და აღვიდეს ძენი ისრაელისანი და იტირეს წინაშე უფლისა ვიდრე მწუხრამდე და იკითხეს უფლისა მიერ, მეტყუელთა: უკუეთუ შევსძინოთ მიახლებად წყობაჲ ძეთა მიმართ ბენიამინისთა, ძმათა ჩუენთა? და თქუა უფალმან: აღვედით მათდამი!
და მიუჴდეს ძენი ისრაელისანი ძეთა ბენიამინისთა დღესა მეორესა,
Page of ms. Ga: 389v და გამოვიდეს ძენი ბენიამინისნი შემთხუევად მათდა ღავაჲთ დღესა მეორესა და განხრწნეს ძეთაგან ისრაელისათა მერმეცა რვაჲ და ათი ათასეულნი კაცთანი ქუეყანასა ზედა, ყოველნი ესე მჴდელნი მახჳლისანი.
და აღვიდეს ყოველნი ესე ძენი Page of ms. Gb: 198v ისრაელისანი და ყოველი ერი და მივიდეს ბეთილდ და იტირეს და დასხდეს მუნ წინაშე უფლისა და იმარხეს მას დღესა შინა ვიდრე მწუხრამდე. და მოიდ\ეს Page of ms. Ga: 390r ყოვლად-დასაწუველი და სრულნი წინაშე უფლისა,
რამეთუ მუნ იყო კიდობანი აღთქუმისა ღმრთისაჲ მათ დღეთა შინა.
და ფინეეზ, ძე ელეაზარისი, ძისა აარონისი, წარმდგომ წინაშე მისსა მათ დღეთა შინა. და იკითხეს ძეთა ისრაელისათა უფლისა მიერ, მეტყუელთა: უკუეთუ შევსძინოთ მერმე განსლვაჲ წყობად ძეთა მიმართ ბენიამინისთა, ძმათა ჩუენთა, ანუ დავაცადოთ? და ჰრქუა უფალმან: Page of ms. Ga: 390v აღვედით, რამეთუ ხვალე მიგცნე იგინი ჴელთა თქუენთა.
და დაუდვეს ძეთა ისრაელისათა მზირი ღავაასა გარემო.
და აღვიდეს ძენი ისრაელისანი ძეთა მიმართ ბენიამინისთა დღესა მესამესა და შებმა-უყვეს ღავაასა, ვითარცა ერთგზის და ერთგზის.
და გამოვიდეს ძენი ბენიამინისნი შემთხუევად ერისა და გამოიცალნეს ქალაქით და იწყეს სრვად ერისაგან წყლულებთა, ვითარცა ერთგზის და ერთგზის გზათა ზედა, რომელ არს ერთი აღმავალი Page of ms. Ga: 391r ბეთილდ და ერთი ღავაად, ველსა ზედა, ვითარ ოცდაათთა კაცთა ისრაელისაგან.
და თქუეს ძეთა ბენიამინისთა: დაეცემიან წინაშე ჩუენსა, ვითარცა პირველ. და ძეთა ისრაელისათა თქუეს: ვივლტოდით და გამოვსცალნეთ იგინი ქალაქისაგან გზათა ზედა. და ყვეს ეგრეთ.
და ყოველი ისრაელისაჲ აღდგა ადგილით მათით და შეეცემნეს ვაალთამარს შინა, და მზირი ისრაელისაჲ ზედა-მიუვიდა ადგილით თჳსით მაარაჲთ ღავაასა.
და მოვიდეს პირისპირ ღავაასა ათნი ათასეულნი, გამორჩეულნი ყოვლისაგან ისრაელისა, და წყობაჲ მძიმე. და მათ არა უწყოდეს, ვითარმედ მოწევნულ არს მათ ზედა სიბოროტე.
Page of ms. Gb: 199r და დასცა უფალმან ბენიამინი წინაშე ძეთა ისრაელისათა და განხრწნეს ძეთა ისრაელისათა ბენიამინისგან მას დღესა შინა ოცდახუთი ათასეული და ასნი კაცნი -- და ყოველნი ესე მჴდელნი მახჳლსა.
და იხილეს ძეთა ისრაელისათა ბენიამინი, რამეთუ იწყლნეს. და მისცა კაცმან ისრაელისამან ადგილი ბენიამინსა, რამეთუ ესვიდეს მზირსა, რომელ დაედვა ღაბაასა ზედა.
და მათ ძლით მიჰრიდეს და მზირი აღიძრა და მიიმართეს ღავაასა ზედა და გარდაითხია მზირი, და დასცა ყოველი ქალაქი პირითა მახჳლისაჲთა.
და ნიშანი იყო ძეთა ისრაელისათაჲ მზირსა თანა ბრძოლისასა აღჩენად მათთჳს ნიში კუამლისაჲ ქალაქით.
და მიიქცეს კაცი ისრაელისაჲ ბრძოლასა შინა. და ვითარცა იხილეს ძეთა ისრაელისათა, ვითარმედ წინა-დაიპყრა მზირმან ღავააჲ, და დაადგინეს ბრძოლაჲ და ბენიამინმან იწყო კუალად დაცემად წყლულებთა კაცთა შორის ისრაელისათა, ვითარ ოცდაათთა კაცთა, რამეთუ თქუვს: "კუალად დაცემით დაეცნენ წინაშე ჩუენსა, ვითარცა განწყობილი პირველი".
და ნიშანი აღვიდა ქალაქით მერმე უმეტეს, ვითარცა სუეტი კუამლისაჲ, და მიიხილა ბენიამინმან უკუანაჲთ თჳსსა, და აჰა, აღვიდა მოსრულებაჲ ქალაქისაჲ ვიდრე ცამდე.
Page of ms. Ga: 391v და კაცმან ისრაელისამან მოაქცია და ისწრაფდეს კაცნი ბენიამინსა ზედა, რამეთუ იხილეს, ვითარმედ დაუჴდა მათ ზედა სიბოროტე.
და მიიხილეს წინაშე ძეთა ისრაელისათასა გზად მიმართ უდაბნოჲსა და ივლტოდეს და წყობაჲ ეწია მათ ზედა, და ქალაქისაგანნი განიხრწნნეს იგინი საშუალ მათსა.
და დაშჭრიდეს ბენიამინსა და სდევდეს მათ ნუაჲთგან კუალის-კუალ მისსა ვიდრე პირის-პირამდე ღავააჲსა, აღმოსავალით მზისაჲთ.
და დაეცნეს ბენიამინისგან რვანი და ათნი ათასეულნი კაცნი. ყოველნი ესე კაცნი ძალისანი.
და მოიხილეს ნეშტთა და ივლტოდეს უდაბნოდ, კლდედ მიმართ რემმონისსა, და მოილერწმნეს მათგან ძეთა ისრაელისათა გზათა ზედა ხუთგზის ათასნი კაცნი, და შთავიდეს უკუანა მათსა ძენი ისრაელისანი ვიდრე ღავაამდე და დასცნეს მათგანნი ათასნი კაცნი.
და იყვნეს ყოველნი დაცემულნი ბენიამინისგან ოცდახუთ ათასეულნი და ას კაცთა მჴდელთანი მახჳლსა მას დღესა შინა, ყოველნი ესე ძენი ძალისანი.
და მოიხილეს ნეშტთა და ივლტოდეს უდაბნოდ, კლდედ მიმართ რემმონისსა, ექუსასნი კაცნი, და იყვნეს კლდესა შინა რემმონისსა ოთხ თთუე.
და ძენი ისრაელისანი მიიქცეს ძეთა მიმართ ბენიამინისთა და დასცნეს იგინი პირითა მახჳლისაჲთა ქალაქითგან მეთლაჲთ და ვიდრე საცხოვართამდე და ვიდრე ყოვლად პოვნილადმდე, ყოველთა შინა ქალაქთა პოვნილნი დაწუნეს ცეცხლითა.
