და იყოს, ვიდრემდის მოვიდენ შენ ზედა ყოველნი ესე სიტყუანი -- კურთხევაჲ და წყევაჲ, რომელი მივეც წინაშე პირსა შენსა, და შეიწყნარო გულსა შენსა ყოველთა შორის ნათესავთა, სადაცა განაბნიოს უფალმან ღმერთმან შენმან მუნ,
და მოიქცე უფლისა მომართ ღმრთისა შენისა და ისმინო ჴმისა მისისაჲ ყოველთაებრ, რაოდენთა მე გამცნებ შენ დღეს ყოველითა გულითა შენითა და ყოვლითა სულითა შენითა,
და განკურნნეს უფალმან ცოდვანი შენნი და შეგიწყალოს შენ და კუალად შეგკრიბოს შენ ყოველთაგან ნათესავთა, რომელთა მიმართ განგაბნია შენ უფალმან მუნ.
უკუეთუ იყოს განთესულებაჲ შენი კიდითგან ცისაჲთ ვიდრე კიდედმდე ცისა, მიერ შეგკრიბოს შენ უფალმან შენმან და მიერ მოგიზიდოს შენ უფალმან ღმერთმან შენმან
და შეგიყვანოს შენ უფალმან ღმერთმან შენმან ქუეყანად, რომელი დაიმკჳდეს მამათა შენთა, და დაიმკჳდრო იგი და ქველ-გიყოს შენ უფროჲს მამათა შენთა.
და აგარეშწმიდოს უფალმან უფალმან გული შენი და გული თესლისა შენისაჲ შეყუარებად უფალი ღმერთი შენი ყოვლითა სულითა შენითა, რაჲთა იცოცხლო შენ და თესლმან შენმან.
და მისცნეს უფალმან ღმერთმან შენმან წყევანი ესე მტერთა შენთა ზედა და მოძულეთა შენთა ზედა, რომელთა გდევნეს შენ.
და შენ მოიქცე და ისმინო ჴმისა უფლისა ღმრთისა შენისაჲ და ჰყვნე მცნებანი მისნი, რომელთა მე გამცნებ შენ დღეს,
და დაგიცვას შენ უფალმან ღმერთმან შენმან ყოველსა შინა საქმესა ჴელთა შენთასა და შვილის წულთა შორის მუცლისა შენისათა და ნაშობის ნაშობთა შორის საცხოვართა შენთასა და ნაშრომთა მოგაქცევს შენ უფალი ღმერთი შენი სიხარულად შენ ზედა კეთილთა მიმართ, რამეთუ იხარა მამათა შენთა ზედა,
უკუეთუ ისმინო ჴმისა უფლისა ღმრთისა შენისაჲ დაცვად და ქმნად ყოველთა მცნებათა მისთა და სამართალთა მისთა და მშჯავრთა მისთა, შთაწერილთა წიგნსა ამას შინა, უკუეთუ მოიქცე უფლისა მიმართ ღმრთისა შენისა ყოვლითა გულითა შენითა Page of ms. Ga: 283r და ყოვლითა სულითა შენითა.
რამეთუ მცნებაჲ ესე, რომელსა მე გამცნებ შენ დღეს, არა ზეშთა მეტ არს, არცა შორის შენგან არს,
არა ცასა შინა შინა ზე არს სათქუმელად: ვინ აღვიდეს ჩუენი ცად და მომართუას ჩუენ იგი და მსმენელტა მისთა ვქმნათ.
არცა წიაღ ზღუასა არს თქუმად: ვინ წიაღ-ვიდეს ჩუენი წიაღ კერძო ზღუასა და მოიღოს ჩუენდა იგი და მსმენელთა მისთა ვყოთ.
ახლოს შენსა არს სიტყუაჲ ფრიად პირსა შინა შენსა და გულსა შინა შენსა და ჴელთა შინა შენთა მისი ქმნაჲ.
აჰა, მოვეც წინა პირსა შენსა დღეს სიცოცხლე და სიკუდილი, კეთილი და ბოროტი.
ისმინეთ თუ მცნებანი უფლისა ღმრთისა თქუენისანი, რაოდენთა მე გამცნებ თქუენ დღეს, შეყუარებად უფალი ღმერთი შენი, სლვად ყოველტა გზათა მისთა და დაცვად სამართალთა მისთა და მცნებათა მისთა და მშჯავრთა მისთა. Page of ms. Ga: 283v და ცოცხალ იყვნეთ და მრავალ იყვნეთ, და გაკურთხოს შენ უფალმან ღმერთმან შენმან ყოველსა ქუეყანასა ზედა, რომლისა მიმართ ხუალ მუნ დამკჳდრებად მისსა.
და უკუეთუ გარდადგეს გული შენი და არა შეისმინო და ცთომილმან თაყუანის-სცე ღმერთთა სხუათა და ჰმსახურო მათ,
მიგითრობ შენ დღეს, ვითარმედ წარწყმედით წარსწყმდეთ და არა დღემრავალ იყვნეთ ქუეყანასა ზედა, რომელსა უფალი ღმერთი შენი მიგცემს შენ, რომლისა მიმართ თქუენ წიაღ-ხუალთ მუნ იორდანესა დამკჳდრებად მისსა.
გიწამებ თქუენ დღეს ცასა და ქუეყანასა, და სიცოცხლე და სიკუდილი მივეც წინაშე პირსა თქუენსა, კურთხევაჲ და წყევაჲ. გამოირჩიე სიცოცხლე, რაჲთა იცოცხლო შენ და თესლმან შენმან.
შეყუარებად უფალი ღმერთი შენი, სმენად ჴმისა მისისაჲ და შედგომად მისსა, რამეთუ ესე არს სიცოცხლე შენი და სიგრძე დღეთა შენთაჲ დამკჳდრებად ქუეყანასა ზედა, რომელსა ეფუცა უფალი ღმერთი მამათა შენთა -- ავრაამს და ისაკს და იაკობს -- მიცემად მათდა.
