ცოლსა მამისა შენისასა ნუ ცოლს-იყოფ, რაჲთა არა განაცხადო სარცხუენელი მამისა შენისა.
კუდური და დუმაკ-კუეთილი ნუ შეიწირვინ ტაძრად უფლისა.
ნუ შევალს კვეთილნი და საჭურისი შესაკრებელად უფლისა.
ძაღლით ნასყიდევი და Page of ms. E: 61R სიძვით სასყიდელი ნუ შეიწირვიედ ტაძრად უფლისა.
ნუცა შევლენ სიძვისა სასყიდელი ტაძრად უფლისა.
ამანიტელი და მოაბელი ნუ შევლენედ სახიდ უფლისა ვიდრე ათამდე ნათესავად, ნუცა უკუნისამდე ჟამთა,
რაჲთა არა მოგეგებვოდეს თქუენ პურითა და წყლითა, რაჟამს გამოხუედით ეგჳპტით, არამედ სასყიდლით მოიყვანეს ბალამ, ძე ბეორისი, შორის მდინარეთა მათ წყევად თქუენდა.
და არა უნდა უფალსა ღმერთსა სმენად ბალამისი, არამედ გარდააქცია წყევა იგი კურთხევად თქუენდა, რამეთუ შეგიყუარნა თქუენ უფალმან ღმერთმან თქუენმან.
რაჲთურთით (6S) კითხვა არა მისცე მათ, არცადა მშჳდობასა იტყოდი მათდა მიმართ ყოველთა დღეთა ცხორებისა შენისათა.
ნუ გძაგნ შენ იდუმელი იგი, რამეთუ ძმა შენი არს. ნუ გძაგნ შენ მეგჳპტ\ელი, Page of ms. E: 61V რამეთუ მწირ იყავ ქუეყანასა მათსა.
და-თუ-ემკჳდროს შენ შორის და ესხნენ მას შვილ, მესამე იგი ნათესავი შევიდეს სახლსა უფლისასა.
გან-თუ-ხჳდოდი წყობად მტერთა შენთა, დაიცევ თავი შენი ყოვლისაგან სიტყჳსა ბოროტისა.
იყოს თუ ვინმე შენ შორის ხაშმ და უწრდოდის საფსმელი მისი გამო. განვედინ გარეშე ბანაკსა და ნუ შემოვალნ ბანაკად,
და მერმე მიმწუხრ დაიბანენ გუამი მისი წყლითა და მზისა დასლვასა შემოვედინ ბანაკსავე მას.
ადგილ ერთ განჩინებულ იყავნ გარეშე ბანაკსა, რომელსა განხჳდოდი შენ
და მანა ერთი იყავნ გამობმულ სარტყელსა შენსა და სადა-იგი დასდგე, აღმოსთხარო და დაჰფარო საძაგელება იგი სარცხჳნელისა მის შენისა,
რამეთუ უფალი ღმერთი შენი გარდამოსრულ არს და იქცევის ბანაკსა შენსა განრ\ინებად Page of ms. E: 62R შენდა და მოცემად მტერთა შენთა წინაშე პირსა შენსა, რაჲთა იყოს ბანაკი იგი წმიდა, არა გამოჩნდეს შენ შორის საქმე საძაგელებისა და გარემიაქციოს უფალმან პირი მისი შენგან.
მონა, რომელ შემოვედრებულ იყოს შენდა, ნუ მისცემ მას ჴელთა უფლისა თჳსისათა.
მონა, რომელი შემოვიდეს შენდა და გევედროს უფლისა თჳსისა, ნუ მისცემ ჴელთა უფლისა თჳსისათა.
რომელი შეყოფილ იყოს შენდა და ჯდეს შორის ყოველსავე ადგილსა, რომელიცა სთნდეს მას, ნურასა აჭირვებ მას.
ასულთაგანი ისრაელისათა ნუ იქმნების როსკიპ, ნუ იპოებინ მამაკაცი მეძავი ძეთაგან ისრაელისათა.
ნუ შესწირავ შენ სასყიდელსა სიძვისასა, ნუცა ნაცვალსა ძაღლისასა სახიდ უფლისა შენისა, ნუცა შესწირავ ყოველსა აღნათქუამსა, რომელ აღგეთქუას, რამეთუ ბილწ არს წინაშე უფლისა ღმრთისა შენისა ორივე.
რაჲთა არა იყოს ზვერი ასულთაგან ისრაილისათა და რაჲთა არა იყოს ზვერის მიდება ყოველთა ზედა აღთქუმათა ძეთაგან ისრაელისათა, ნუ შესწირავ შენ სასყიდელსა სიძვისასა, ნუცა ნაცვალსა ძაღლისასა სახლად უფლისა ღმრთისა შენისა, ნუ შესწირავ მას ჟამსა ვასხსა აღნათქვამსა, რომელ აღგეთქუვას შენ, რამეთუ ბილწ არს უფლისა ღმრთისა შენისა ორივე.
ნუ მოჰჴდი ძმასა შენსა აღნადგინებსა ვეცხლისასა, ნუცა აღნადგინებსა საჭმლისასა, (20S) ნუცა ყოველსა Page of ms. E: 62V აღნადგინებსა სესხისა შენისასა, რომელ ავასხე ძმასა შენსა,
რაჲთა გაკურთხოს შენ უფალმან ღმერთმან შენმან ყოველთა მათ ზედა საქმეთა შენთა ქუეყანასა მას, რომელსა შეხჳდე დამკჳდრებად მუნ.
უცხოსა რაჲთა ავასხო ვასხი, ძმასა შენსა არა მისცე ვასხი, რაჲთა გაკურთხოს შენ უფალმან ღმერთმან შენმან ყოველთა საქმეთა შენთა ზედა ქუეყანასა მას, რომელსა შეხჳდე დამკჳდრებად მუნ.
აღ-თუ-უთქუა აღნათქუამი უფალსა ღმერთსა შენსა, არა დააყენო აღსრულება მისი, რამეთუ მიჴდით მიგჴადოს იგი უფალმან ღმერთმან შენმან და იყოს იგი შენდა ცოდვა.
უკუეთუ არა აღუთქუა, არა არს ცოდვა შენდა.
უკუეთუ არა გენებოს, აღუთქვა შენ, არარა ცოდვა არს შენდა.
გარნა რომელ აღმოჴდეს ბაგეთა შენთა, დაიმარხე და ყავ, ვითარცა აღუთქუ უფალსა ღმერთსა შენსა მისაცემელსა, რომელსა იტყოდა პირი შენი.
შთა-თუ-ჰჴდე მოყუსისა შენისა ყანასა თავის-კრებად, მანგლითა ნუ მოჰმკი ყანასა მოყუსისა შენისასა.
შთა-თუ-ჰჴდე ვენაჴსა მოყუსისა შენისასა ჭამად ყურძნისა, ჭამე, რაოდენცა უნდეს სულსა შენსა, წიაღსა შენსა ნუ შთაიდებ, ნუცა სხუასა რას ჭურჭელსა შთაიდებ.
