იპოოს თუ ვინმე წყლული ქუეყანასა ზედა, რომელ-იგი უფალმან ღმერთმან შენმან მოგცეს შენ, და არავინ უწყოდის, რომელმან წყლა იგი,
გამოვიდეს ყოველი იგი მოხუცებული ქალაქისა მის მსაჯულითურთ და მოზომონ ქალაქი იგი, რომელი იყოს გარემოს წყლულსა მას.
და რომელი ქალაქი ეახლოს მას, გამოიბან ქალაქისა მისგან (3S) მოხუცებულთა დიაკეული იგი ერთი ზროხათაგან, რომელი არა შეხებულ იყოს უდელსა და არცა საქმე რაჲ ექმნეს მას,
შთაიბან იგი ჴევსა ერთსა ძნელსა, რომელი არასადა ჴნულ იყოს, მოხუცებულთა მის ქალაქისათა და კირნი დაჰკუეთნენ დიაკეულსა მას ჴევსა მას შინა.
წარდგენ ლევიტელნი იგი მღდელნი, რამეთუ იგი გამოირჩია უფალმან ღმერთმან წარდგომად წინაშე მისსა და კურთხევად სახელისა Page of ms. E: 56V მის მისისა, პირითა მათითა ყოვლისათჳს იჭჳსა და ყოვლისა ჴდომისა,
ყოველი იგი მოხუცებული ქალაქისა მის, რომელი-იგი მეახლოე იყოს წყლულისა, და დაასხნენ ჴელნი მათნი თავსა ზედა მის დიაკეულისა კირდაკუეთილისასა ჴევსა მას შინა
და თქუან: ჴელთა ჩუენთა არა დასთხიეს სისხლი ესე, არცა თუალთა ჩუენთა იხილეს.
ლხინება იყავნ ერისა ამის შენისა ისრაელისა, რომელ-ესე იჴსენ ქუეყანისა მისგან ეგჳპტელთასა, და ნუ იკითხვის სისხლი უბრალო ერსა შორის შენსა ისრაელსა. და განწმიდენ იგინი სისხლისა მისგან,
და თქუენ განიწმიდენით თავნი სისხლისა მისგან უბიწოსა, რაჲთა კეთილი გეყოს შენ, რაჟამს ჰყო კეთილი და სათნო წინაშე უფლისა ღმრთისა თქუენისა.
უკუეთუ განხჳდე ბრძოლად მტერთა შენთა და მოგეცინ ღმერთმან შენმან ჴელთა შენთა. წარმოსტყუენო ნატყუენავი იგი მათი
და იხილო შენ ნატყუენავსა მას შორის დედაკაცი ქმნულკეთილი და შეგივრდეს და გინდეს ცოლად,
შეიყვანო Page of ms. E: 57R იგი სახიდ შენდა და დაჰყჳნო თავი მისი (13S) და მოჰყჳნნე ფრჩხილნი მისნი,
და განსძარცო ყოველი სამოსელი ტყუეობისა და დაჯდეს სახლსა შინა შენსა და სტიროდის მამასა თჳსსა და დედასა თჳსსა თთუე ერთ. მაშინღა შეხჳდე და შეირთო იგი და იყოს იგი მიერითგან შენდა ცოლად.
უკუეთუ იყოს და არასათნო გეყოს შენ, გამოავლინო იგი შენგან განთავისუფლებული, სყიდით არა განჰყიდო იგი ვეცხლად და არცა შეურაცხ-ჰყო იგი, რამეთუ შეაგინე.
ესხნენ თუ ვისმე კაცსა ორ ცოლ: ერთი საყუარელ იყოს და ერთი საძულელ, და უსხნენ ორთავე ნაშობ. საძულველსა მასცა და საყუარელსაცა, და უპირმშოესი იყოს საძულველისა მის,
დოესა მას განყოფისასა და წილ-გდებისასა, (16S) რაჟამს განჰყოფდეს შვილთა მისთა სამკჳდრებელად, ნუ არჩევნ შვილსა მის საყუარელისასა Page of ms. E: 57V და ნუცა შეურაცხ-ჰყოფნ პირმშოებასა მისსა,
არამედ უხუცესი იგი ნაწილი მას საძულველისასა მიეცინ შენდობით მრჩობლი ყოვლისავე მისგან ფასისა მისისა, რაჲცა იყოს ჴელსა შინა მისსა, რამეთუ იგი არს დასაბამი შვილებისა მისისა და მისა წეს არს პირმშოება იგი.
იყოს თუ ვისიმე შვილი ურჩ და ხუესტ და არა ერჩდეს სწავლასა მამადედათა მისთასა,
შეიპყრედ მამადედათა მისთა და მოიყვანედ იგი წინაშე კრებულსა მოხუცებულთა მათ ქალაქისათა კარსა მას, სადა სასხდომელი იყოს კაცთა მათ ქალაქისათა,
და თქუან: შვილი ესე ჩუენი ურჩ არს და ხუესტ და უზავ. არა მერჩის ჩუენ და არცა ისმინის ჴმა სწავლისა ჩუენისა, ჭამს და სუამს და ლანკანაკებს მომთურალეთა თანა.
მოიყვანონ იგი კაცთა მათ ქალაქისათა და ქვა დაჰკრიბონ მას და მოკუდეს, რაჲთა მოისპოს უ\კეთური Page of ms. E: 58R იგი თქუენ შორის და ყოველსა ისრაელსა, რომელსა ესმეს, შეეშინოს.
იყოს თუ ვის ზედამე სასჯელი სიკუდილისა თანამდებისა, და მოკლან იგი და ჯუარს-აცუან,
იყოს თუ ვინმე კაცი სიკუდილისა თანამდებ მსჯავრითა სიკუდილისა და მოკლან იგი და ჯუარს-აცუან იგი,
არა დაუტეოთ გუამი იგი მისი ჯუარსა ზედა, არამედ გარდამოიღოთ და დაჰფლათ მასვე დღესა, რამეთუ წყეულ არს უფლისა მიერ ყოველი, რომელი დამოეკიდოს ძელსა. ნუ შეაბილწებთ ადგილსა მას, რომელი უფალმან ღმერთმან თქუენმან მოგცეს თქუენ წილად დამკჳდრობისა თქუენისა.
