გან-თუ-ხჳდოდი შენ წყობად მტერთა შენთა და იხილო მუნ ვაშტი და მჴედრები და გუნდები ერთა მრავალთა უძლიერესი შენსა, ნუ გეშინინ მათგან, რამეთუ უფალი ღმერთი შენ თანა არს, რომელმან გამოგიყვანა შენ ქუეყანით ეგჳპტით.
და იყოს, რაჟამს მიეახლო შენ ადგილსა მას განსაწყობელსა, წარდგეს მღდელთმოძღუარი იგი (3S) და თქუას:
ისმინე, ისრაელო, თქუენ გამოსრულ ხართ, ეგერა, დღეს წყობად მტერთა თქუენთა. ნუ დაჴსნდებიედ გულნი თქუენნი, ნუცა გეშინინ მათგან, ნუ დაბრკოლდებიედ გულნი თქუენნი, ნუცა დაჰრიდებთ პირსა მათსა,
რამეთუ უფალი ღმერთი თქუენ თანა არს, რომელი წინა გიძღჳს თქუენ, რაჲთა სძლოთ თქუენ მტერთა თქუენთა და განგარინნეს თქუენ ჴელთაგან მათთა.
მერმე წარდგეს სჯულის მწიგნობარი იგი და ეტყოდის ერსა მას და ჰრქუას: ეშენოს Page of ms. E: 54V თუ ვისმე კაცსა სახლი ახალი და სატფური არა ეყოს მას შინა, განვედინ ჩუენგან და მიიქეცინ მუნვე სახიდ თჳსა. ნუუკუე მოკუდეს წყობასა მას შინა და სხუა კაცი მივიდეს და სატფურება-ყოს მას შინა.
და ესხას თუ ვისმე კაცსა რქა და არა ეხაროს მისგანი, წარვიდეს, მიიქცეს სახიდ თჳსა, ნუუკუე მოკუდეს წყობასა მას შინა და სხუა კაცი მივიდეს და იხარებდეს მას შინა.
და ეთხოოს თუ ვისმე კაცსა ცოლი და არღა შეერთოს, წარვედინ და მიიქეცინ სახედვე თჳსა, ნუუკუე მოკუდეს წყობასა შინა და სხუამან შეირთენ ცოლი იგი მისი.
მერმე შესძინონ მწიგნობართა მათ ერისა მიმართ და თქუან: იყოს თუ ვინმე კაცი გულმედგარ და შეშინებულ იყოს გული მისი, წარვედინ და მიიქეცინ სახიდ თჳსა, რაჲთა არა განიმედგროს გული ძმათა, ვითარცა-იგი მისი.
რაჟამს დადუმნენ მწიგნობარნი იგი სიტყჳსა მისგან, Page of ms. E: 55R რომელსა-იგი ეტყოდიან ერსა მას. დაადგინედ მთავარნი და ერისთავნი და წინამძღუარნი ერსა მას ზედა.
ოდეს შთაჴდეთ ქალაქსა, ჰყოფდე ბრძოლად, პირველად სიტყუათა მშჳდობისათა ეტყოდეთ.
მო-თუ-უჴდეთ ქალაქსა რომელსამე ბრძოლად, პირველად მშჳდობითღა ეტყოდეთ.
და თუ მშჳდობისა სიტყუა მოგიგონ თქუენ და სიმდაბლით დაგემორჩილნენ, და იყავნ ყოველი იგი ერი დამორჩილებულ, მოხარკე თქუენდა.
უკუეთუ არა გერჩდენ და ბრძოლად გამოგეწყვნენ თქუენ, გარე მოადეგით და მოიცევით იგი,
და მოგცეს თქუენ უფალმან ღმერთმან თქუენმან ჴელთა თქუენთა და მოსრათ ყოველი მამაკაცი და წული ყრმა მათი.
ხოლო დედები მათი, ფასი და მონაგები მათი, საცხოვარი და ყოველი, რაცა იყოს და იპოოს ქალაქსა მას, საცხორებელი მათი წარმოიდო ტყუედ. და სჭამდე ნატყუენავსა მას, რომელ-იგი უფალმან ღმერთმან მოგცეს შენ.
ესრე უყო ყოველთა მათ ქალაქთა, რომელნი-იგი განშორებულ იყვნენ შენსა, რომელ-იგი არა ნათესავისა Page of ms. E: 55V მისგანისა წარმართთასა იყვნენ.
ხოლო ქალაქთა მათ წარმართთასა, რომელ-იგი უფალმან ღმერთმან შენმან მოგცეს შენ დამკჳდრებად, მოსრვით მოსრნე იგინი, არა დაუტეო მას შინა ცოცხალი ერთიცა მშჳნვიერი, რომლისა თანა იყოს სამშჳნველი ცხოველი,
არამედ წყევით დასწყევნე იგინი: ქეტელი იგი და ამორეველი და ქანანელი და ფერეზელი იგი, ეველი და გერგესეველი იგი და იაბოსელი, ვითარცა გამცნო შენ უფალმან ღმერთმან შენმან.
რაჲთა არა გასწაონ შენ ყოველი იგი საქმე ბილწებისა, რომელსა-იგი იქმთდეს კერპთა მიმართ მათთა, და გაცთუნონ შენ წინაშე უფლისა ღმრთისა შენისა.
უკუეთუ მიხჳდე და გარე მოადგე რომელსამე ქალაქსა და მოიცვა იგი და ჰბრძოდი მას ბრძოლით მრავალ დღე, ნუ დაჰკაფ ნერგსა მათსა მახჳლითა შენითა, არამედ ჭამით სჭამდე მათ შენ, ნუ მოჰკუეთ ხესა ხილის გამომღებელსა პატნეზად შესაცველად გამოსაპყრობელად მისა, Page of ms. E: 56R
არამედ იგი ძელი მოჰკაფეთ, რომელი უწყოდით, ვითარმედ არა ხილის გამომღებელი იყოს. და მოაქმნე მას გარემოსა ბრძოლად კიბედ ქალაქსა მას, ვიდრემდის უფალმან ღმერთმან შენმან მოგცეს ქალაქი იგი ჴელთა შენთა.
