ყოველივე სიტყუა, რომელსა-ესე მე გამცნებ შენ დღეს, დაიმარხო იგი და ჰყო, არა დააკლო, არცაღა შეჰმატო მათ.
უკუეთუ აღ-ვინმე-დგეს შენ შორის წინაწარმეტყუელი ანუ ჩუენების მხილველი (2S) და აჩუენოს რაჲმე სასწაული საცთურებისა თქუენ შორის და თქუას:
მოვედით! და მივიდეთ ჩუენ ღმერთთა უცხოთა, რომელ-იგი თქუენ არა იცოდეთ, და თქუას: ვჰმსახურებდეთ მათ.
ნუ ისმენთ სიტყუათა მის წინაწარმეტყუელისათა, ნუცა მის ჩუენების მხილველისათა, რამეთუ გამოცდით გამოგცდის თქუენ უფალი ღმერთი თქუენი, გიყუარდეს თუ თქუენ უფალი ღმერთი თქუენი ყოვლითა გულითა თქუენითა და ყოვლითა გონებითა თქუენითა.
არამედ შენ უფალსა ღმერთსა შენსა ხოლო შეუდეგ და მისა გეშინოდენ და მცნებათა მისთა იმარხევდით და ჴმისა Page of ms. S: 336V მისისა ისმინეთ და მას მხოლოსა შეეყვენით.
და წინაწარმეტყუელი იგი გინა ჩუენების მხილველი იგი სიკუდილით მოკუედინ, რამეთუ საცთურსა იტყოდა, რაჲთამცა გაცთუნა შენ უფლისაგან ღმრთისა შენისა, რომელმან გამოგიყვანა შენ ქუეყანით ეგჳპტით და გიჴსნა შენ სახლისაგან კირთებისასა, რაჲთამცა განგაშორა შენ მან გზისა მისგან, რომელ გამცნო შენ უფალმან ღმერთმან შენმან, რაჲთამცა ხჳდოდე მას, და აღიჴოცენ უკეთური იგი თქუენ შორის.
უკუეთუ გლოცვიდეს შენ ძმა შენი მამითი გინათუ დედითი, გინათუ ძე შენი, გინათუ ასული შენი, გინათუ ცოლი შენი, რომელი იყოს წიაღთა შენთა, ანუთუ მეგობარი შენი, რომელ სწორ იყოს თავისა შენისა, ფარულად გეტყოდის: გუალე, მივიდეთ და ვმსახუროთ ღმერთთა უცხოთა, რომელ არა იცოდე შენ, არცა მამათა მათ შენთა,
სამსახურებელთა მათგან წარმართთასა, რომელნი იყვნენ გარემოს თქუენსა, მახლობელნი გინათუ შორიელნი კიდითგან კიდვდმდე ქუეყანისა,
არა ჯერ-იჩინო მისლვა მის თანა, არცაღა ისმინო მისი. (8S) არა ჰრიდოს თუალმან შენმან, არცაღა გეწყალოდის იგი, არცაღა დაუფარო მას.
არამედ მხილებით ამხილო მას და ჴელი შენიღა პირველად შეხებულ იყავნ მოკლვად მისა, მაშინღა ჴელნი ყოვლისა ერისანი.
და Page of ms. S: 337R ქვა დაჰკრიბონ მას და მოკუედინ, რამეთუ იზრახა განშორება შენი უფლისაგან ღმრთისა შენისა, რომელმან გამოგიყვანა შენ ქუეყანით ეგჳპტით, სახლისა მისგან კირთებისა.
და ყოველსა ისრაელსა, რომელსა ესმეს, შეეშინოს და არღარა შესძინონ ყოფად ესევითარი სიტყუა ბოროტი თქუენ შორის.
უკუეთუ გესმეს შენ ერთისა ქალაქთაგანისა, რომელ-იგი უფალმან ღმერთმან მოგცეს შენ სამკჳდრებელად, და თქუან, (13S) ვითარმედ:
კაცნი უშჯულონი განვიდეს ჩუენგან და გარდააქცინეს ყოველნი იგი მკჳდრნი მის ქალაქისანი და ჰრქუეს: მოვედით და ვჰმსახუროთ ღმერთთა უცხოთა, რომელ-იგი თქუენ არა იცოდით,
გამოიძიო, გამოიკულიო ეგევითარი იგი, გამოიკითხო ფრიად და თუ ჭეშმარიტად ყოფილ იყოს სიტყუა იგი ბილწებისა თქუენ შორის,
მოსრვით მოისრნეთ მკჳდრნი იგი მის ქალაქისანი პირითა მახჳლისაჲთა და დაწყევით დასწყევნეთ იგინი და ყოველივე, რაჲცა იყოს ქალაქსა მას შინა, და საცხოვარი მათი მოსრათ პირითა მახჳლისათა.
და ყოველი მონაგები მათი გამოჰკრიბო გზასა წარსავალთა მათთასა და ქალაქნი იგი მათნი და ყოველი იგი ნატყუენავი და მონაგები მათი, რომელ გამოგეკრიბოს, დაწჳთ ცეცხლითა წინაშე უფლისა ღმრთისა თქუენისა, და იყავნ იგი ოჴერ უკუნისამდე ჟამთა და ნუღარა აღეშენებინ!
და ნუცა რაჲ შეგეხებინ ჴელთა შენთა ჭურჭრისა მისგან მისისა, რამეთუ Page of ms. S: 337V წყეულ არს. რაჲთა მოიქცეს უფალი რისხვისა მისგან გულისწყრომისა მისისა და შეგიწყალოს შენ და განგამრავლოს შენ, ვითარცა ეფუცა უფალი ძამათა მათ შენთა,
უკუეთუ ისმინო შენ ჴმა უფლისა ღმრთისა შენისა და დაიცვნეთ ყოველნი მცნებანი მისნი, რომელსა-ესე მე გამცნებ შენ დღეს დღე, უკუეთუ ჰყო კეთილი და სათნოება წინაშე უფლისა ღმრთისა შენისა.
