და ესე არიან ბრძანებანი და მსჯავრნი, რომელ დაიმარხნეთ და ჰყოთ ქუეყანასა მას, რომელ-იგი უფალმან ღმერთმან მამათა თქუენთამან მოგცეს თქუენ სამკჳდრებელად ყოველთა დღეთა, რავდენცა სცხონდეთ ქუეყანასა ზედა.
მოსპოლვით მოსპნე ყოველნი იგი ადგილნი სამსახურებელნი წარმართთანი, რომელსა ემსახუროს სამსახურებელი იგი ბილწებისა ზედა მთათა მაღალთა და ბორცუთა და ხეთა ქუეშე (3S) ვარჯოვანთა.
ბაგინები მათი დაამჴუთ და Page of ms. S: 335R ძეგლები მათი დამუსრეთ, სერტყები მათი დაკაფეთ, კერპები მათი დაწვით ცეცხლითა და საჴსენებელი მათი წარწყმიდეთ ქუეყანისა მისგან.
ხოლო არა ეგრეთ უყოთ უფალსა ღმერთსა თქუენსა,
არამედ ადგილსა ერთსა, რომელსა გამოირჩიოს უფალმან ღმერთმან თქუენმან ადგილი ერთი ნათესავთაგან თქუენთა სახელის-დებად სახელი მისი მუნ, ადგილი იგი გამოირჩიეთ და შევედით მუნ.
და შეწირეთ მსხუერპლები იგი თქუენი მუნ და საკუმეველები და პირველისა ნაყოფისა თქუენისა და აღნათქუემი თქუენი და ძდუენი ნეფსითი გონებათა თქუენთა და პირმშოები ზროხათა თქუენთა და ცხოვართა თქუენთა.
ჭამდით და იხარებდით წინაშე უფლისა ღმრთისა თქუენისა და მხიარულ იყვნეთ ყოველთა ზედა, რომელსა ზედა შეხებულ იყვნენ ჴელნი თქუენნი, თქუენ და ყოველნი სახლეულნი თქუენნი, რამეთუ გაკურთხნა თქუენ უფალმან ღმერთმან თქუენმან.
არა ჰყოთ ეგრე, ვითარეგე ჰყოფთ აქა დღეს კაცად-კაცადი ეგე ნებასა თავისა თჳსისასა,
რამეთუ არღა მოწევნულ ხართ თქუენ აქამდის განსასუენებელსა მას და სამკჳდრებელსა თქუენსა, რომელ-იგი უფალმან ღმერთმან თქუენმან მოგცეს თქუენ.
რამეთუ წიაღ-ჰჴდეთ თქუენ იორდანესა და დაეშენნეთ ქუეყანასა მას, რომელსა-იგი უფალმან ღმერთმან დაგიმკჳდროს თქუენ და განგისუენოს თქუენ ყოველთაგან Page of ms. S: 335V მტერთა თქუენთა, რომელნი იყვნეს გარემოს თქუენსა, და დაეშენნეთ მყუდროებით.
და იყოს, ადგილი იგი, რომელ გამოირჩიოს უფალმან ღმერთმან თქუენმან თავისა თჳსისა სახელდებად სახელი მისი მას ზედა, მუნ შესწირით ყოველი შესაწირავი, რომელსა-ესე მე გამცნებ თქუენ დღეს: მსხუერპლები იგი თქუენი და ძღუენი თქუენი და ათეული თქუენი და პირველი იგი ჴელთა თქუენთა და რჩეულ-რჩეული ძღუენი აღნათქუემთა თქუენთა, რომელ აღუთქუათ უფალსა ღმერთსა თქუენსა.
და იხარებდეთ წინაშე უფლისა თქუენისა თქუენ და ძენი თქუენნი და ასულნი თქუენნი, მონანი და მჴევალნი თქუენნი და ლევიტელი იგი, რომელ არს ზედამდგომელ თქუენდა, რამეთუ არა უც მას ნაწილ და სამკჳდრებელ თქუენ შორის.
იგულე თავი შენი, ნუუკუე შე-სადამე-სწირვიდე შესაწირავთა შენთა ყოველსავე ადგილსა, რომელ იხილო,
არამედ მას ადგილსა ხოლო, რომელ გამოირჩიოს უფალმან ღმერთმან შენმან, ადგილსა ერთსა ქალაქთა შენთასა, მუნ შესწირო მსხუერპლი შენი და მუნ ჰყო ყოველი, რომელსა-ესე მე გამცნებ შენ.
არამედ ყოვლითა გულისთქუმითა შენითა შესწირო მსხუერპლი იგი შენი და სჭაძო ჴორცი იგი მისი კურთხევითა მით უფლისა ღმრთისა შენისათა, რომელ-იგი მოგცა შენ ყოველთა მათ ქალაქთა* შენთა. ბილწი იგი და წმიდა ერთბამად ჭამდით ვითარცა ქურციკსა და ირემსა.
ხოლო სისხლსა მისსა ნუ შჭამთ, არამედ ქუეყანასა დასთხიეთ იგი, ვითარცა წყალი.
ვერ შჭამო შენ ქალაქთა შინა შენთა ათეული იგი იფქლისა შენისა და ღჳნისა და ზეთისა შენისა, და პირმშოები ზროხათა შენთა და ცხოვართა შენთა, და აღთქუმული იგი აღნათქუემთა შენთა და შესაწირავი იგი აღსაარებათა თქუენთა და პირველი იგი ნაყოფთა ქმნული ჴელთა თქუენთა.
არამედ წინაშე უფლისა ღმრთისა შენისა შეშჭამო იგი ადგილსა მას, რომელსაცა-იგი გამოირჩიოს უფალმან ღმერთმან თქუენმან, შენ და ძემან შენმან და ასულმან შენმან, მონამან და მჴევალმან შენმან, და ლევიტელი იგი, რომელ დამკჳდრებულ იყოს ქალაქთა შენთა. შჭამდე და იხარებდე წინაშე უფლისა ღმრთისა შენისა და ყოველსა მას ზედა, რომელსა შეეხოს ჴელი შენი.
ეკრძალე, ნუუკუე და-სადამე-უტეო ლევიტელი იგი ყოველთა დღეთა ცხორებისა შენისათა, რავდენცა სცხოვნდე ქუეყანასა ზედა.
უკუეთუ განგიფართნეს შენ უფალმან ღმერთმან საზღვარნი შენნი, ვითარცა გეტყოდა შენ, უკუეთუ გულმან გითქუას ჭამად ჴორცისა გულისთქუმისათჳს გულისა შენისასა, ჭამე შენ ჴორცი იგი.
უკუეთუ განშორებულადრე იყოს შენგან ადგილი იგი, რომელ გამოირჩია უფალმან ღმერთმან წოდებად სახელი მისი მას ზედა, და შესწირო შენ ზუარაკთაგანი შენთა ანუ ცხოვართა, რომელი მოგცეს შენ უფალმან ღმერთმან შენმან, ვითარცა გიბრძანა შენ, და შეშჭამო იგი ქალაქთა შინა შენთა ყოვლითა მით გულისთქუმითა გულისა შენისათა.
ვითარცა შეიჭამოს ქურციკი და ირემი, ეგრე შეშჭამო იგი, რომელ-იგი არაწმიდა არს შენ თანა, და წმიდა იგი ერთბამად შეჭამედ იგი.
ეკრძალე მტკიცედ არაჭამად სისხლისა, რამეთუ სისხლი საცხოვარისა სამშჳნველი არს. არა შეშჭამო შენ სამშჳნველი იგი ჴორცსა მას თანა,
არამედ ქუეყანასა დასთხიო იგი, ვითარცა წყალი.
არა შჭამო იგი, რაჲთა კეთილი გეყოს შენ და შვილთა შენთა შენ თანა, რაჟამს ჰყო კეთილი და სათნოება წინაშე უფლისა ღმრთისა შენისა.
ხოლო შესაწირავი იგი სიწმიდისა შენისა და აღნათქუემი იგი შენი მიიღო ადგილსა მას, რომელ-იგი გამოირჩია უფალმან,
და შესწირო იგი მუნ, მსხუერპლები შენი, ჴორცი იგი შესწირო საკურთხეველსა მას ზედა უფლისა ღმრთისა შენისასა, ხოლო სისხლი იგი დააპკურო აღსავალთა მათ საკურთხეველისა ამის უფლისა ღმრთისათა და ჴორცი იგი შესჭამო.
დაიცევ და ისმინენ ესე სიტყუანი, რომელსა-ესე მე გამცნებ შენ, რაჲთა კეთილი გეყოს შენ და შვილთა შენთა შენ თანა უკუნისამდე, ჰყო თუ კეთილი და სათნოება წინაშე უფლისა ღმრთისა შენისა.
უკუეთუ მოსრნეს უფალმან ღმერთმან* Page of ms. S: 336R შენმან ნათესავნი იგი, რომელსა-იგი მიხუალთ დამკჳდრებად ქუეყანისა მათისა წინაშე პირსა შენსა, დაიმკჳდრნე იგი და დაეშენო ქუეყანასა მათსა,
იგულე თავი შენი, ნუუკუე გამოიძიებდე მიდევნებად მათა შემდგომად მოსრვისა მის მათისა პირისაგან შენისა, ნუუკუე ეძიებდე კერპთა მათთა და სთქუა: ვითარცა-იგი მათ ნათესავთა ყვიან კერპთა მიმართ მათთა, ეგრეცა მე ვყო.
ხოლო შენ არა ეგრე ჰყო უფლისა მიმართ ღმრთისა შენისა ყოველივე საძაგელება, რომელ წინავე სძულდა უფალსა, ყვეს კერპთა მიმართ მათთა, რამეთუ ძეთაცა მათთა და ასულთა მათთა დასწუვიდეს წინაშე კერპთა მათთა.
