ესე მცნებანი არიან და სამართალნი და მსჯავრნი, რომელ-იგი გამცნო თქუენ უფალმან ღმერთმან თქუენმან, რაჲთა ისწაოთ და ჰყოთ ესე ქუეყანასა მას, რომელსა-ეგე თქუენ შეხუალთ დამკჳდრებად მუნ,
რაჲთა გეშინოდის შენ უფლისა ღმრთისა შენისა და დაიცვნე შენ მცნებანი და სამართალნი მისნი, Page of ms. S: 324R რომელთა-ესე მე გამცნებ შენ დღეს დღე, შენ და შვილთა შენთა და შვილისშვილთა შენთა ყოველთა დღეთა ცხორებისა შენისათა, რაჲთა დღეგრძელ იყო შენ.
ისმინე, ისრაელ, და ეკრძალე ყოფად ყოველთა ამათ მცნებათა, რაჲთა კეთილი გეყოს შენ და განჰმრავლდე ფრიად, ვითარცა ეტყოდა უფალი ღმერთი მამათა მათ შენთა მიცემად შენდა ქუეყანა იგი, რომელსა გამოსდის სძე და თაფლი.
ესე სამართალნი და მსჯავრნი არიან, რომელ-იგი ამცნო მოსე ძეთა მათ ისრაელისათა უდაბნოსა შინა, რაჟამს გამოვიდოდეს იგინი ქუეყანით ეგჳპტით. (4S) გესმოდენ ისრაელსა: უფალი ღმერთი შენი მხოლოჲ უფალი არს.
და შეიყუარო უფალი ღმერთი შენი ყოვლითა გულითა შენითა და ყოვლითა გონებითა შენითა და ყოვლითა ძალითა შენითა.
და იყვნენ სიტყუანი ესე. რომელთა მე გამცნებ შენ დღეს დღე, გულსა შენსა და გონებასა შენსა.
და ასწავნე ეგე შვილთა მათ შენთა და ეტყოდი მაგათ ჯდომასა სახლსა შინა შენსა და სლვასა გზასა შენსა და სასუენებელსა ზედა შენსა და აღდგომასა შენსა.
შეაბნე ესე სასწაულად ჴელსა შენსა და იყვნედ ეგე შეურყეველად წინაშე თუალთა შენთა.
და დასწერნე იგინი ზღურბლთა სახლისა შენისათა, წირთხლთა ბჭეთა შენთასა.
და იყოს, რაჟამს შეგიყვანოს შენ უფალმან ღმერთმან შენმან ქუეყანასა მას, რომელ-იგი ეფუცა მამათა მათ შენთა -- აბრა\ჰამს, Page of ms. S: 324V ისაკს და იაკობს -- მიცემად შენდა ქალაქებისა მის დიდ-დიდებისა და შუენიერებისა, რომელ შენ არა აღაშენენ,
და სახლებისა მის სავსისა ყოვლითა მით კეთილითა, რომელ შენ არა აღავსენ, ჯურღმულისა მის აღმოქმნულისა, რომელ არა შენ აღმოჰქმნენ, ვენაჴებისა მის და ზეთისხილებისა, რომელ არა შენ დაჰნერგე. (12S) შჭამდე რაჲ უკუე და განსძდე,
ეკრძალე თავსა შენსა, ნუუკუე დაივიწყო უფალი ღმერთი შენი, რომელმან გამოგიყვანა შენ ქუეყანით ეგჳპტით სახლისა მისგან კირთებისასა.
უფლისა ღმრთისა შენისა გეშინოდენ და მას მხოლოსა ჰმსახურებდე და მას მხოლოსა ესვიდე და სახელსა მისსა ჰფუცვიდე.
არა შეუდგე შენ კუალსა ღმერთთა უცხოთა, კერპთა მათ წარმართთასა, რომელნი-იგი გარემო იყვნენ თქუენსა.
რამეთუ ღმერთი მოშურნე არს და უფალმან ღმერთმან შური იძიოს შენგან. ნუუკუე განრისხნეს უფალი ღმერთი შენ ზედა და მოგსპოს შენ პირისაგან ქუეყანისა.
არა განსცადო შენ უფალი ღმერთი შენი. ვითარცა-იგი განსცადეთ დღესა მას განცდისასა.
დამარხვით დაიმარხნეთ მცნებანი უფლისა ღმრთისა თქუენისანი, წამებანი მისნი და სამართალნი მისნი. რომელ-იგი გამცნო შენ. ჰყო კეთილი და სათნოება წინაშე უფლისა ღმრთისა, რაჲთა კეთილი გეყოს შენ და შეხჳდე და დაიმკჳდრო ქუეყანა იგი კეთილი, რომელთა-იგი ეფუცა უფალი მამათა მათ შენთა,
განდევნად მტერთა Page of ms. S: 325R მათ შენთა პირისაგან შენისა, ვითარცა იტყოდა უფალი.
იყოს, რაჟამს გკითხვიდენ შენ შვილნი შენნი ხვალე-ზეგე და გრქუან: რაჲ არიან წამებანი ესე სამართალნი და მსჯავრნი, რომელ-ეგე გამცნო შენ უფალმან ღმერთმან ჩუენმან?
მიუგო შვილსა მას შენსა და ჰრქუა: დაკირთებულ ვიყვენით ჩუენ ფარაოჲსა ვიჳპტეს და გამოგჳყვანნა ჩუენ უფალმან ეგჳპტით ჴელითა მტკიცითა და მკლავითა მაღლითა.
და ყო უფალმან ნიშები და სასწაულები დიდ-დიდები და ბოროტები ფარაოსა ზედა და ყოველსა სახლსა მისსა წინაშე თუალთა ჩუენთა.
და ჩუენ გამოგჳყვანნა მიერ, რაჲთა შემომიყვანნეს და მომცეს ჩუენ ქუეყანა ესე, რომელ აღუთქუა მიცემად მამათა ჩუენთა.
და მამცნო ჩუენ უფალმან ყოფად ყოველთა მათ სამართალთა მისთა და რაჲთა გუეშინოდის უფლისა ღმრთისა ჩუენისა და კეთილი გუეყოს ყოველთა დღეთა ცხორებისა ჩუენისათა და ვცხონდეთ, ვითარცა-ესე დღეს დღე.
და შეწყალებულ ვიყვნეთ, და-თუ-ვიცვნეთ ყოველნი მცნებანი მისნი წინაშე უფლისა ღმრთისა ჩუენისა, ვითარ-იგი მამცნო ჩუენ.
