მერმე მო[ვ]იქეცით მუნვე უდაბნოდ კერძო გზასა მას ერჳთრისა ზღუასა. ვითარცა მეტყოდა მე უფალი. და დავადგერით მთასა მას სეირისა მრავალ დღე.
სიტყუად იწყო ჩემდა უფალმან და მრქუა:
კმა-იყავნ თქუენდა გარემოდგომა მთისა მაგის სეირისა. აწ მიიქეცით თქუენ სამხრით კერძო.
და ერსა მაგას ამცენ და არქუ: ეგერა, განხუალთ საზღვარსა ძმათა თქუენთასა, ძეთა მათ ესავისთა, რომელ-იგი დამკჳდრებულ Page of ms. S: 313V არიან სეირს, რამეთუ შეშინებულ და შეძრწუნებულ არიან თქუენგან ფრიად.
ხოლო თქუენ ნუ ბრძოლა-სცემთ მათ, რამეთუ არა მიმიცემიეს ქუეყანისა მის მათისაგანი თქუენდა, არცადა წარსადგმელ ერთ ფერჴის, რამეთუ ნაწილად მკჳდრობისა მიმიცემიეს მთა იგი სეირი ესავსა.
არამედ საჭმელი იყიდეთ მათგან და ჭამეთ და წყალი იყიდეთ მათგან და სუთ.
რამეთუ უფალმან ღმერთმან შენმან გაკურთხა შენ ყოველთა შინა საქმეთა ჴელთა შენთასა, განიგულე გონებასა შენსა, ვითარ განჰვლე შენ უდაბნო იგი დიდი და საშინელი. ესე მეორმეოცე წელი არს, უფალი ღმერთი შენი შენ თანა არს, არაჲთ ნაკლულევან-გყოს შენ.
და თანა-წარვჰჴედით ჩუენ ძმათა ჩუენთა, ძეთა მათ ესავისთა, რომელნი-იგი დამკჳდრებულ იყვნეს სეირს გზასა ამას არაბიელთასა ელათით და გასიონ-გაბერით, და მოვაქციეთ, განვლეთ ჩუენ უდაბნო იგი მოაბელთა.
მერმე სიტყუად იწყო ჩემდა უფალმან და თქუა: ნუ ემტერებით მოაბელთა მაგათ და ნუცა აღადგინებთ მაგათ მიმართ ღუაწლსა ბრძოლისასა, რამეთუ არა მიგეც თქუენ ქუეყანა ეგე მაგათი ჴელთა თქუენთა, რამეთუ ძეთა ლოთისთა მიმიცემიეს იგი ნაწილად მკჳდრობისა მათისა.
რამეთუ პირველად ომინელნი იგი დამკჳდრებულ იყვნეს მას ზედა, ნათესავი დიდი, მრავალი Page of ms. S: 314R და ძლიერი (11S) და ვითარცა აკიმრაფსიელნი იგი.
შეირაცხნეს ეგრეცა ესენი, რომელ აკიმს არიან, ეგრეცა მოაბელნი იგი სახელდებულ არიან ნოემიად.
და სეირსა პირველად ქორეველი იგი დამკჳდრებულ იყო და ძეთა მათ ესავისთა აღჴოცეს, წარწყმიდეს იგი პირისაგან მათისა და დაემკჳდრნეს იგინი მათ წილ. ვითარცა ისრაელმან ყო ქუეყანა იგი მკჳდრობისა მათისა, რომელ-იგი მისცა მათ უფალმან.
აწ აღდეგით და წარვედით ჴევსა მას ზარედისასა.
და დღენი, ვინაჲთგან წარვედით ჩუენ კადეთ ბარნედ ვიდრე მოსლვადმდე ჴევსა მას ზარედისასა, (15B) ოცდაათურამეტ წელ, ვიდრე დასრულებადმდე ყოვლისა ნათესავისა კაცთა მათ მბრძოლთასა ბანაკისა მისგან ისრაიტელთასა, ვითარცა ეფუცა მათ უფალი.
და იყო ჴელი უფლისაჲ მათ ზედა მოსპოლვად მათა ბანაკისა მისგან, ვიდრე მოსპოლვადნდე მათა.
და მოისრა ყოველი იგი კაცი მბრძოლი სიკუდილითა შორის ერსა მას.
სიტყუად იწყო ჩემდა უფალმან და მრქუა:
შენ განჰვლო დღეს საზდვარი იგი მოაბელთა აროერი.
და მახლობელად წარჰჴდეთ თქუენ ძეთა მათ ამორისთა. ნუ ემტერებით მათ და ნუცა აღადგინებთ მათა მიმართ ღუაწლსა ბრძოლისასა, რამეთუ არა მიგცე თქუენ ქუეყანა იგი ძეთა მათ ამონის\თა, Page of ms. S: 314V რამეთუ ნაწილად ძეთა მათ ლოთისთა მიმიცემიეს.
ქუეყანა იგი ჰრაფაიმი, რამეთუ ჰრაფაიმელნი იგი დამკჳდრებულ იყვნეს მუნ პირველად, ამანიტელთა მათ სახელი ჰრქჳან ზომზომინ.
ნათესავი დიდი და მრავალი და უძლიერესი, ვითარცა-იგი აკიმელნი, და წარწყმიდნა იგინი უფალმან პირისაგან მათისა. და დაიმკჳდრეს იგი და დაეშენნეს მუნ მათ წილ მოდღენდელად დღედმდე
ვითარცა-იგი უყო ძეთა მათ ესავისთა, რომელ-იგი დამკჳდრებულ არიან სეირს, ვითარცა-იგი აღჴოცა ქორეველი იგი პირისაგან მათისა და დაიმკჳდრეს იგი და დაეშენნეს მუნ მოდდენდელად დღედმდე,
და ეგრეცა ეველი იგი, რომელ-იგი დამკჳდრებულ იყო ასეროთს გაზადმდე. და კაბადუკნი იგი, რომელ გამოვიდეს კაბადუკიათ, მოსრნეს იგინი და დაეშენნეს იგინი მათ წილ.
აწ თქუენცა აღდეგით, განვლეთ ჴევი იგი არნუნისაჲ, რამეთუ, ეგერა, მიმიცემიეს იგი ჴელთა თქუენთა სეონ მეფე იგი ამორეველთა, რომელ-იგი დამკჳდრებულ არს ესებონს. და ქუეყანა იგი მათი იწყედ დამკჳდრებად. და იწყე მისა მიმართ ღუაწლი ბრძოლისა.
დღეს დღითგან (26B) დავდევ ზარი და შიში შენი პირსა ზედა ყოველთა წარმართთასა, რომელნი არიან პირსა ქუეშე ცისასა, რაჲთა ყოველთა, Page of ms. S: 315R რომელთა ესმეს სახელი შენი, შეძრწუნდენ და სალმობამან შეიპყრნეს იგინი პირისაგან შენისა.
და წარვავლინენ მოციქულნი უდაბნოთ კადემოთით სეონისა მეფისა მის ესებონელთასა სიტყჳთა მშჳდობისათა და ვარქუ, ვითარმედ:
განვლო ქუეყანა ეგე შენი, მგზავრ ვიდოდი, არა მივაქციო მარჯულ და არცა მარცხლ.
საჭმელი ვეცხლითა ჩემითა ვიყიდო და ვჭამოთ, და წყალი ვეცხლითა ვიყიდო და ვსუათ, გარნა გზა ხოლო განვლოთ ფერჴითა ჩუენითა.
განვლეთ ქუეყანა იგი ძეთა მათ ესავისთა, რომელნი დამკჳდრებულ იყვნეს სეირს, და ვითარცა განვლეთ ქუეყანა იგი მოაბელთა, რომელნი-იგი დამკჳდრებულ არიან აროერს, ვიდრე წიაღ-ვლო მე იორდანე, მივიწიო ქუეყანასა მას, რომელ-იგი უფალმან ღმერთმან ჩუენმან მომცეს ჩუენ.
და არა ინება მეფემან მან ესებონელთამან განსლვა ჩუენი მიერ, რამეთუ განაფიცხნა უფალმან ღმერთმან ჩუენმან სული მისი და განამტკიცა გული მისი, რაჲთა მოგცეს ჴელთა შენთა დღეს დღე.
და სიტყუად იწყო უფალმან მოსესა და ჰრქუა. აჰა ესერა, მიწყიეს მე მიცემად წინაშე შენსა სეონ მეფე ესებონისა ამორეველი იგი. აწ იწყე განაწილებად და დამკჳდრებად ქუეყანა იგი მისი.
და გამოვიდა სეონ მეფე იგი ამორეველთა და ყოველი იგი ერი მისი მის Page of ms. S: 315V თანა შემთხუევად ჩუენდა ღუწად ბრძოლისა.
და განწირა იგი უფალმან ღმერთმან ჩუენმან წინაშე პირსა ჩუენსა და მოვსართ იგი და ძენი მისნი და ყოველი ერი მისი.
და მოვიპყართ ყოველი ქალაქები მისი მას ჟამსა შინა და მოვსართ ყოველი ქალაქები მისი ერთბამად და მოვწყჳდეთ ცოლი და შვილი მისი და ყოველივე, რაჲცა იყო; არა განერა ერთიცა კაცი ცოცხალი.
გარნა საცხოვარი მათი ტყუედ წარმოვიღეთ და ნატყუენავი ქალაქთა მათთა წარმოვიღეთ.
აროერით, რომელ-იგი არს კიდესა ზედა მდინარისა მის არნონისა, და ქალაქი იგი ძნელოვანი, რომელ დაშენებულ იყო ჴევსა მას, ვიდრე მთადმდე გალადისა, და არა იყო ქალაქი, რომელიმცა განერა ჴელთაგან ჩუენთა, არამედ ყოველი იგი ქალაქი მოგუცა ჩუენ უფალმან ღმერთმან ჩუენმან ჴელთა ჩუენთა,
ხოლო ქუეყანასა მას ძეთა მათ ამონისთასა არად შევეხენით, საზღვართა მათთა ნაღუარევთასა იაბოკისთა და ყოველი იგი ქალაქები მთით კერძო დავიცევთ, ვითარცა გუამცნო ჩუენ უფალმან ღმერთმან ჩუენმან.
