Page of ms. S: 310R ესე სიტყუანი არიან, რომელთა ეტყოდა მოსე ყოველსა ისრაელსა წიაღ იორდანესა, უდაბნოსა მას დასავალით კერძო, მახლობელად ერჳთრაჲსა ზღჳსასა, შორის ფარანს და ტოფოლს და ლობონს და ესეროთს და სადა-იგი ოქრო იყო,
ათერთმეტ დღის სავალით ქორებით მთად სეირად ვიდრე კადეს ბარნედ.
და იყო, მეორმეოცესა მას წელსა ათერთმეტსა მას თთუესა პირველსა მას თთჳსასა ეტყოდა მოსე ყოველთა მათ ძეთა ისრაელისათა მცნებათა, Page of ms. S: 310V რომელ ამცნო მას უფალმან.
რაჟამს დასცა მან მეფე იგი ამორეველთა, რომელ-იგი დამკჳდრებულ იყო ესებონს, და ოგ მეფე იგი ბასანისა, რომელ-იგი დამკჳდრებულ იყო ასტაროთს და ედრაინს,
წიაღ იორდანესა, ქუეყანასა მას მოაბელთასა იწყო მოსე თხრობად შჯულისა და თქუა:
უფალი ღმერთი ჩუენი გუეტყოდა ჩუენ ქორებს და თქუა. კმა-იყავნ თქუენდა დგომა მთასა მას.
მიიქეცით თქუენ, აჰკიდეთ, წარიძრენით და მივედით, შევედით მთასა მას ამორეველთასა და ყოველთა მათ გარემო მკჳდრთა არაბიელთასა. რომელნი-იგი დამკჳდრებულ არიან ველთა და მთათა და ღელეთა და სამხრით კერძო ზდჳს კიდესა მას ქანანელთასა და ყოველსა მას მთის პირსა ლიბანით კერძო ვიდრე მდინარედ დიდადმდე ევფრატად.
აჰა ეგერა, მიმიცემიეს თქუენდა ქუეყანა იგი, შევედით და დაიმკჳდრეთ ქუეყანა იგი, რომლისათჳს ეფუცა უფალი მამათა მათ თქუენთა-აბრაჰამს, ისაკს და იაკობს -- და ნათესავსა მათსა შემდგომად მათსა.
გეტყოდე თქუენ და გარქუ მას ჟამსა შინა, ვითარმედ ვერ დაგითმო თქუენ მარტომან.
რამეთუ უფალმან ღმერთმან თქუენმან განგამრავლნა თქუენ ვითარცა ვარსკულავნი ცისანი სიმრავლითა.
უფალმან ღმერთმან მამათა თქუენთამან შეგძინა თქუენ, ვითარცა-ეგე ხართ ათას წილ, და გაკურთხენინ თქუენ, ვითარცა-იგი Page of ms. S: 311R გეტყოდა თქუენ.
აწ მე ვითარ შეუძლო თავს-დებად ურვასა მაგას თქუენსა და სიმძიმესა და ჴდომასა სასჯელისასა განგებად?
აწ მომცენით მე კაცნი ბრძენნი და გონიერნი და მეცნიერნი ნათესავთაგან თქუენთა, რაჲთა დავადგინნე იგინი მთავრად და განმგებელად თქუენ ზედა.
და მომიგეთ მე და მარქუთ: კეთილ არს სიტყუაჲ ეგე, რომელსა მეტყოდე ჩუენ ყოფად ეგე.
და მოვიყვანენ თქუენგან კაცნი ბრძენნი, გონიერნი და მეცნიერნი და დავადგინენ იგინი წინამძღურად თქუენდა. ათასისთავებად და ასისთავებად და ერგასისთავებად და ათისთავებად, და მწიგნობარნი -- საშჯელისა განმგებელად ნათესავთა თქუენთა.
და ვამცენ მსაჯულთა თქუენთა მას ჟამსა, და ისმინეთ შორის ძმათა და საჯეთ სიმართლით შორის კაცისა და ძმისა მიმართ თჳსისა და მწირისა მიმართ თჳსისა.
და ნუ თუალ-აღებთ საშჯელსა და ნუ მიჰხედავთ სიკნინით და სიმდიდრით. ნუ თუალ-აღებთ პირსა კაცისა, რამეთუ სასჯელი ღმრთისაჲ არს, და სიტყუაჲ, რომელ ფიცხელ იყოს და ვერ შესაძლებელ იყოს თქუენდა განგებად, ჩემდა მოაწიეთ და მე განვაგო.
და მას ჟამსა შინა გამცენ თქუენ და გარქუ, ვითარმედ: ყოველთა მაგათ მცნებათა, რომელთა გამცნებდი, ჰყოფდით.
და წარვიძრენით ჩუენ ქორებით, განვლეთ ჩუენ უდაბნო იგი დიდი და საშინელი, რომელ თქუენ თჳთ იხილეთ, გზა Page of ms. S: 311V იგი მთისა ამის ამორეველთასა, ვითარცა გჳბრძანა ჩუენ უფალმან ღმერთმან ჩუენმან, და მოვედით ვიდრე კადეს ბარნედმდე.
და გარქუ თქუენ: ეგერა, მოწევნულ ხართ თქუენ მთასა მას ამორეველთასა, რომელი-იგი უფალმან ღმერთმან თქუენმან მოგცა თქუენ.
იგულეთ, რამეთუ მოგცა თქუენ უფალმან ღმერთმან თქუენმან წინაშე პირსა თქუენსა ქუეყანა ეგე მათი. შევედით და დაიმკჳდრეთ, ვითარცა გრქუა უფალმან ღმერთმან მამათა თქუენთამან თქუენ: ნუ გეშინინ, ნუცა შესძრწუნდებით.
და მოვედით ჩემ წინაშე და სთქუთ. წარვავლინნეთ კაცნი წინასწარ ჩუენსა და მოვლონ, მოისტუანონ ქუეყანა იგი და მოვიდენ, მოგჳთხრან ჩუენ საზომი გზისა მის, რომელსა აღვიდეთ, და ქალაქთა მათ. რომელთა შევიდეთ დამკჳდრებად მათ შინა.
და* სათნო-მიჩნდა ჩემ წინაშე სიტყუაჲ ეგე და მოვიყვანენ თქუენგანნი კაცნი ათორმეტნი, თითო კაცი ნათესავად.
და წარვავლინენ იგინი მსტურად ქუეყანისა მის. და წარვიდეს იგინი მთით კერძოსა მას და მიიწინეს იგინი ვიდრე ჴევადმდე ტევნისა და მოისტუანეს ქუეყანა იგი ყოველი.
და მოიდეს ჴელითა მათითა ნაყოფისაგან მის ქალაქისასა და მომართუეს ჩუენ და მრქუეს ჩუენ: კეთილ არს ქუეყანა ეგე, რომელსა უფალი ღმერთი ჩუენი მოგუცემს ჩუენ.
და თქუენ არა ინებეთ აღსლვა, არამედ ურჩ-\ექმნენით Page of ms. S: 312R სიტყუასა მას უფლისა ღმრთისა თქუენისასა
და სდრტჳნევდით ბანაკსა შინა თქუენსა და იტყოდით, რამეთუ: ვსძულდით ჩუენ უფალსა, ამისთჳს გამოგჳყვანნა ჩუენ უფალმან ქუეყანისა მისგან ეგჳპტელთაჲსა მიცემად ჩუენდა ჴელთა ამორეველთასა, რაჲთა მოგუსრნენ ჩუენ.
აწ ვიდრე აღვიდეთ ჩუენ, მერმე ძმათავე თქუენთა განდრიკნეს გულნი თქუენნი და იტყოდეს, ვითარმედ: ნათესავი დიდი და უძლიერესი თქუენსა და ქალაქები დიდ-დიდები და ზღუდეები მაღალი ვიდრე ცადმდე, არამედ ნაშობნი გმირთანიცა ვიხილენით მუნ.
ხოლო მე გარქუ თქუენ, ვითარმედ: ნუ გეშინინ, ნუცა შესძრწუნდებით მათგან.
უფალი ღმერთი თქუენი წარგიძღუეს წინაშე პირსა თქუენსა და იგი ჰბრძოდის თქუენ წილ მსგავსად ყოვლისა მის, რომელ-იგი ყო ჩუენთჳს ქუეყანასა მას ეგჳპტელთასა წინაშე თუალთა თქუენთა
და უდაბნოსაცა მას, რომელ-ესე თქუენ იხილეთ. ვითარ-იგი გუზრდიდა ჩუენ უფალი ღმერთი ჩუენი, ვითარცა-იგი ზრდინ კაცი შვილსა თჳსსა, ყოველთავე გზათა თქუენთა, რომელთაცა ხჳდოდეთ თქუენ, ვიდრე მოსლვად-მოწევნადმდე ადგილსა მას.
და ამითცა სიტყჳთა არავე ერწმუნნეთ თქუენ უფალსა ღმერთსა თქუენსა,
რომელცა-იგი გიძღოდა თქუენ ყოველთავე გზათა თქუენთა და გირჩევდა თქუენ ადგილთა და გიძღოდა თქუენ სუეტითა ცეცხლისათა ღამე და გიჩუენე\ბდა Page of ms. S: 312V თქუენ გზასა, რომელსა ხჳდოდეთ, და ღრუბლითა -- დღისი.
რომელცა-იგი გიძღოდა თქუენ წინაშე გზით გამორჩევად თქუენდა ადგილი გზის სლვასა თქუენსა ცეცხლითა ღამე და გიჩუენებდა თქუენ გზასა, რომელსა ხჳდოდეთ, და ღრუბლითა -- დღისი.
და შეესმა უფალსა ჴმაჲ სიტყჳსა თქუენისა და განრისხნა, ფუცა და თქუა:
ვერვინ იხილოს ამათ კაცთაგანმან ქუეყანა იგი კეთილთა, რომელ ვეფუცე მამათა თქუენთა.
გარნა ქალებ, ძემან იეფონესმან, იხილოს იგი და მას მივსცე ქუეყანა იგი, რომელსა მიიწია და შევიდა, და შვილთა მისთა, რამეთუ სათნო-ეყო უფალსა.
და ჩემთჳსცა განრისხნა უფალი თქუენ გამო და მრქუა მე: ვერცაღა შენ შეხჳდე მუნ.
გარნა ისუ, ძე იგი ნავესი, მსახური იგი შენი, იგი შევიდეს ქუეყანასა მას აღთქუმისასა. განაძლიერე იგი, რამეთუ მან დაუმკჳდროს იგი ისრაელსა.
და ერისა თქუენისაგანმან ყრმამან ჩჩჳლმან, რომელმან არა იცის დღე კეთილი და ბოროტი, იგი შევიდეს მუნ. და მათ მივსცე მუნ იგი და მათცა დაიმკჳდრონ იგი.
და თქუენ მიიქეცით და დაიბანაკეთ უდაბნოსა მას გზასა ევრჳთრით ზდჳთ კერძოსა.
და მომიგეთ და მარქუთ მე: ვცოდეთ წინაშე უფლისა ღმრთისა ჩუენისა. აწ აღვიდეთ ჩუენ და ბრძოლა-ვსცეთ ჩუენ, ვითარცა გჳბრძანა ჩუენ უფალმან ღმერთმან ჩუენმან. Page of ms. S: 313R და შეიჭურენით თითოეულად საჭურველი თქუენი, შეჰკერბით და აღხუედით მთასა მას.
სიტყუად იწყო ჩემდა უფალმან და მრქუა: ეტყოდე მაგათ და არქუ: ნუ აღხუალთ. ნუცა ჰბრძავთ მაგათ, რამეთუ მე არა თქუენ თანა ვარ.
და გეტყოდე თქუენ და თქუენ არა ისმინეთ ჩემი და გარდაჰჴედით ბრძანებასა მას უფლისასა და ურჩ-ექმნენით და აღხუედით მთასა მას.
და გამოვიდა ამორეველი იგი, რომელ დამკჳდრებულ იყო მთასა მას, შემთხუევად თქუენდა და წარგიქცინა თქუენ მეოტად და შეგიცუნეს თქუენ. ვითარცა ფუტკართა. და გჩხუეპდეს თქუენ სეირითგან მი-ჰერმადმდე.
და დასხედით და სტიროდეთ წინაშე უფლისა. და არა ისმინა უფალმან ჴმისა თქუენისა და არცა მოგხედა თქუენ.
და დაადგერით თქუენ კადეს მრავალ დღე, რავდენცა იყვენით მუნ.
