და მოვიდეს მთავარნი ნათესავისა ძეთა გალადისთანი, ძისა მაქირისნი, ნათესავისაგან ძეთა იოსებისთანი, და იტყოდეს წინაშე მოსესა და წინაშე ელიაზარ მღდელისასა და წინაშე მთავართასა სახლებისა ტომთა ძეთა ისრაელისათასა,
და თქუეს: უფალსა ჩუენსა ამცნო უფალმან მოცემად ქუეყანისა მის სამკჳდრებელისა წილით ძეთა ისრაელისათა, და უფალსა ჩუენსა უბრძანა უფალმან მიცემად სამკჳდრებელი სალპადისი, ძმისა ჩუენისა, ასულთა მისთა.
და ცოლ-ეყვნენ იგინი ერთსა ნათესავსა ძეთა ისრაელისათასა, და Page of ms. S: 309v აღიღოს ნაწილი იგი მათი სამკჳდრებელისაგან მამათა ჩუენთასა და შეეძინოს სამკჳდრებელსა მას ნათესავისასა, რომელსაცა ეცოლნენ, და ნაწილისაგან სამკჳდრებელისა ჩუენისასა განეყენ[ნ]ნენ.
უკუეთუ მიტევებაჲ იყოს ძეთა ისრაელისათა, და შეეძინოს სამკჳდრებელი იგი მათი სამკჳდრებელსა ამას ნათესავისასა, რომელსაცა-იგი ეცოლნენ, და სამკჳდრებელისაგან ნათესავისა ტომისა ჩუენისასა მიიღოს სამკჳდრებელი იგი მათი.
და ამცნო მოსე ძეთა ისრაელისათა ბრძანებითა უფლისაჲთა და ჰრქუა: ესრე იტყჳნ ნათესავი ძეთა იოსეფისთა.
ესე სიტყუაჲ, რომელ უბრძანა უფალმან ასულთა სალპადისთა და ჰრქუა: სთნავს თუ წინაშე მათსა, ცოლ-ეყუნედ იგინი, ტომსა მამისა მათისასა ეცოლნენ იგინი.
და არა გარდაიქცეს სამკჳდრებელი ძეთა ისრაელისათა ნათესავითი-ნათესავად, არამედ კაცად-კაცადი სამკჳდრებელსა ნათესავისა მამულისა თჳსისასა შეიკრძალნენ ძენი ისრაელისანი.
და ყოველი ასული, რომელ ეძიებდეს სამკჳდრებელსა ნათესავისაგან ძეთა ისრაელისათა, ერთტომსა მამისა თჳსისასა ცოლ-ეყოს, რაჲთა გამოიძიონ ძეთა ისრაელისათა კაცად-კაცადმან სამკჳდრებელი მამული თჳსი,
და არა გარდაიცვალოს ნაწილი ნათესავითინათესავად სხუად, არამედ თითოეულად სამკჳდრებელსა თჳსსა შეუდგენ ძენი ისრაელისანი.
ვითარცა უბრძანა უფალმან მოსეს, ეგრე ყვეს ასულთა სალპადისთა.
და ცოლ-ეყუნეს თერსა და ეგლა და მელქა და ნუა და მაალა -- ასულნი სალპადისნი მამის ძმისწულთა მათთა,
ტომისაგან მანასესთა ძეთა იოსებისთა ცოლ-ეყუნეს იგინი, იყო სამკჳდრებელი მათი ნათესავსა თანა ტომისა მამისა მათისასა.
ესე არიან მცნებანი და სამართალნი და განკითხვანი, რომელ ამცნო უფალმან ჴელითა მოსესითა დასავალით მოაბსა, იორდანესა ზედა, იერიქოთ კერძო.
