და ეტყოდა უფალი მოსეს დასავალით კერძო მოაბსა, იორდანესა ზედა, იერიქოთ კერძო და ჰრქუა:
ამცენ ძეთა ისრაელისათა და სცენ ლევიტელთა ნაწილისაგან სამკჳდრებელისა მათისა ქალაქები საყოფელად და აგარაკები ქალაქებისა გარემოს მათსა მისცენ ლევიტელთა.
და იყვნენ ქალაქნი იგი საყოფელად მათა, და გარემოს მათსა იყოს საცხოვრისა მათისა და ოთხფერჴისა მათისათჳს.
და საბრძანებელი ქალაქთა, რომელ მისცეთ ლევიტელთა ზღუდითგან ქალაქისათ გამართ, ორ ათას წყრთა გარემოს.
და დაჰზომო გარეშე ქალაქსა აღმოსავალით კერძო ადგილი ორ ათას წყრთა და ბღოვარით კერძო ორ ათას წყრთა და ზღჳთ კერძო ორ ათას წყრთა და ჩრდილოთ კერძო ორ ათას წყრთა. ესე იყავნ თქუენდა და საზღვარნი ქალაქ[თა]ნი.
და ქალაქნი, რომელ მივსცნეთ ლევიტელთა, ექუსნი Page of ms. S: 307v იგი ქალაქნი შესაოტებელნი, რომელ მისცნეთ შევლტოლად მუნ კაცისმკულელისა, და მათ თანა ორმეოცდაორ ქალაქ,
ყოველი ქალაქები, რომელ მისცეთ ლევიტელთა, ორმეოცდარვა ქალაქ, იგი და დაბნები მისი.
და ქალაქები, რომელ სცეთ სამკჳდრებელისაგან ძეთა ისრაელისათასა, უდიდესთაგან დიდად და მცირეთაგან მცირედ, თითოეულმან მსგავსად სამკჳდრებელი თჳსი, რომელ დაიმკჳდრონ, სცენ ქალაქთაგან ლევიტელთა.
და ეტყოდა უფალი მოსეს და ჰრქუა:
ეტყოდე ძეთა ისრაელისათა და არქუ მათ: თქუენ წიაღ-ხუალთ იორდანესა ქუეყანად ქანაანისა,
და განაკუთნეთ თქუენდად ქალაქნი შესავედრებელად, იყვნენ იგინი თქუენდა შევლტოლად მუნ კაცისმკლველისა, ყოველმან, რომელმან მოკლას კაცი არანებსით;
და იყვნენ თქუენდა ქალაქ[ნ]ი იგი შესავედრებელად მიმღებელისაგან სისსლისასა, და არა მოკუდეს კაცისმკულლი იგი ვიდრე წარდგომადმდე წინაშე კრებულისა საშჯელად.
და ქალაქნი იგი, რომელ მისცნეთ, ექუსნი ქალაქნი შესავედრებლად იყვნენ თქუენდა:
სამნი იგი ქალაქნი მისცნეთ წიაღ იორდანესა და სამნი იგი ქალაქნი მისცნეთ ქუეყანასა ქანანისასა.
შესავედრებელად იყვნენ Page of ms. S: 308r ძეთა ისრაელისათა და მოქცეულთა და მსხემთა, რაჟამს იყვნენ თქუენ შორის, იყვნენ ექუსნი ესე ქალაქნი შესავედრებელად მუნ ყოვლისა კაცისმკლველისა არანებსით.
უკუეთუ ჭურჭლითა რკინისათა სცეს და მოკუდეს, კაცისმკლვლ არს, სიკუდილით მოკუედინ მკლველი იგი;
უკუეთუ ქვაჲ ვინმე აღიღოს ჴელითა, რომელსა შინა მოკუდეს და მით სცეს მას და მოკუდეს, კაცისმკლველ არს, სიკუდილით მოკუედინ მკლველი იგი.
უკუეთუ ჭურჭლითა რვალისათა ჴელითა სცეს ვინმე მას და მოკუდეს, კაცისმკულელ არს, სიკუდილით მოკუედინ მკლველი იგი;
მეძიებელმან მან სისხლისამან მოკლას მკლველი იგი; რაჟამს შეემთხჳოს მას, ამან მოკლას იგი.
უკუეთუ მტერობით უგმიროს მას და დაუტეოს მის ზედა ყოველი ჭურჭელი ზაკვით, და მოკუდეს,
ანუ მანკიერებით სცეს მას ჴელითა თჳსითა და მოკუდეს, სიკუდილით მოკუედინ მცემელი იგი, კაცისმკლველ არს; მეძიებელმან მან სისხლისამან მოკლას მკლველი იგი, რაჟამს შეემთხჳოს მას იგი.
უკუეთუ მყის არამტერობით უგმიროს მას, ანუ მიაგდოს მის ზედა ყოველი ჭურჭელი, არა უმზირდა მას,
არცაღა ყოვლითა ქვითა, რომლითა მოკუდეს მით არა Page of ms. S: 308v მეცნიერებით და დაეცეს მის ზედა და მოკუდეს, ხოლო იგი არა მტერ იყო მას, არცაღა ეძიებდა ბოროტის-ყოფად მისა,
და საჯოს კრებულმან შოვრის მცემელისა მის და შოვრის მეძიებელისა სისხლისასა მსგავსად ამის საშჯელისა:
და განარინოს კრებულმან მან მკლველი იგი მეძიებელისა მისგან სისხლისასა და შეიყვანოს კრებულმან მან ქალაქსა მას შესავედრებელსა და დაეშენოს მუნ ვიდრე მოსიკუდილადმდე მღდელისა მის დიდისა, რომელსა სცხეს საცხებელითა წმიდითა.
უკუეთუ გამოვიდეს მკლველი იგი საზღვართა მის ქალაქისათა, რომელსა შეევედრა მუნ,
და პოოს იგი მეძიებელმან სისხლისამან გარეშე საზღვართა ქალაქისა მის შესავედრებელისა მისისათა და მოკლას მეძიებელმან სისხლისამან მკლველი იგი, არა თანამდებ იყოს,
არამედ ქალაქსა მას შესავედრებელსა შენ იყავნ, ვიდრემდის მოკუდეს მღდელი იგი დიდი, და შემდგომად სიკუდილისა მღდელისა მის დიდისასა მიიქცეს მკლველი იგი ქუეყანად სამკჳდრებელად თჳსა.
და იყოს ესე თქუენდა სამართალ საშჯელისა ნათესავთა თქუენთა ყოველთა სამკჳდრებელთა თქუენთა.
ყოველმან, რომელმან სცეს კაცსა, მოწამით მოკლას მკლველი იგი, და მოწამემან ერთმან არა წამოს Page of ms. S: 309r კაცისათჳს მოსიკუდიდ.
და არა მოიღო საჴსარი სულისათჳს მკლველისაგან, რომელი სიკუდილის თანამდებ იყოს, არამედ სიკუდილით მოკუდეს;
არა მოიღოთ საჴსარი ოტებად მისა ქალაქთა შესავედრებელთა, რაჲთამცა შენ იყო იგი კუალად ქუეყანასა ზედა ვიდრე მოსიკუდიდმდე მღდელისა მის დიდისა.
და არა მოსრათ ქუეყანაჲ, რომელსა ზედა თქუენ შენ ხართ, რამეთუ სისხლმან მოსრა ქუეყანაჲ, და ვერ განერეს ქუეყანად სისხლისა მისგან, რომელ დაითხია მას ზედა, არამედ მას სისხლსა ზედა, რომელმან დასთხია იგი.
და არა შეაგინოთ ქუეყანაჲ, რომელსა ზედა მკჳდრ ხართ თქუენ და რომელსა ზედა დამკჳდრებულ ვარ მე თქუენ შორის, რამეთუ მე ვარ უფალი, რომელ დამკჳდრებულ ვარ შორის ძეთა ისრაელისათა.
