და საცხოვარი ფრიად იყო ძეთა რუბენისთა და ძეთა გადისთა, სიმრავლე დიდი ფრიად; და იხილეს Page of ms. S: 301r სოფელი იგი იაზერისი და გალადისი, და იყო ადგილი საცხოვართა.
და მოუჴდეს ძენი რუბენისნი და ძენი გადისნი და ჰრქუეს მოსეს და ელიაზარს მღდელსა და მთავართა კრებულისათა და ჰრქუეს:
ასტაროთი და დებონი და იაზერი და ნამბრამი და ესებონი და ელიალე და სებემა და ნაბამი და ბეანი,
ქუეყანაჲ, რომელი მოსცა უფალმან წინაშე ძეთა ისრაელისათა, ქუეყანა საცხოვარისა მზრდელი არს და მონათა შენთა საცხოვარი ფრიად არს.
და იტყოდეს: უკუეთუ ვპოვეთ მადლი წინაშე შენსა, მოეცინ ქუეყანაჲ ესე მონათა შენთა სამკჳდრებელად და ნუ წიაღ-გჳყუანებ ჩუენ იორდანესა.
და ჰრქუა მოსე ძეთა რუბენისთა და ძეთა გადისთა: ძმანი თქუენნი განვლენ ბრძოლად, თქუენ დასხედით მანდა?
და რაჲსათჳს გარდააქცევთ გონებათა ძეთა ისრაელისათა არა წიაღ-სლვად ქუეყანასა მას, რომელსა უფალი მოსცემს მათ?
არა ეგრე ყვესა მამათა თქუენთა, რაჟამს წარვავლინენ იგინი კადეთ-ბარნესათ განმსტრობად ქუეყანისანი?
და აღვიდეს იგინი ღელესა მას ტევნისასა და განიხილეს ქუეყანაჲ იგი და განადგინნეს გულნი ძე\თა Page of ms. S: 301v ისრაელისათანი, რაჲთა არა შევიდენ ქუეყანასა მას, რომელი მოსცა მათ უფალმან.
და განრისხნა გულისწყრომით უფალი მას დღესა შინა, ფუცა და თქუა:
უკუეთუ იხილონ კაცთა ამათ, რომელნი აღმოვიდეს ეგჳპტით, ოცით წლითგანმან და უზეშთაესმან, რომელთა იციან კეთილი და ბოროტი, ქუეყანაჲ, რომლისათჳს ვეფუცე აბრაჰამს, ისაკს და იაკობს, რამეთუ არა შემომიდგეს მე შემდგომად კუალსა ჩემსა,
გარნა ქალებ, ძე იეფონესი, განყენებული მათგან, და ისუ, ძე ნავესი, რამეთუ შეუდგეს კუალსა უფლისასა.
და განრისხნა გულისწყრომით უფალი ისრაელსა ზედა და მიაქცინა იგინი უდაბნოდ ორმმოც წელ, ვიდრემდე აღჴოცა ყოველი იგი ნათესავი, რომელთა ქმნეს ბოროტი წინაშე უფლისა.
და აჰა თქუენ აღსდეგოთ მამათა თქუენთა წილ და შეჰკერბით კაცნი ცოდვილნი შეძინებად რისხვისა, გულისწყრომისა უფლისა ისრაელსა ზედა.
რამეთუ განსდეგით მისგან შეძინებად მერმე დატევებად მისა უდაბნოსა ზედა და უსჯულო იქმენით ყოველსა ამას კრებულსა ზედა.
და მოვიდეს მისა და ჰრქუეს: საყოფელი ცხოვართა ვაშენოთ აქა ცხოვართა ჩუენთათჳს და ქალაქნი ჭურჭელთა ჩუენთათჳს.
და ჩუენ შეჭურვილნი წინასწარ საჴმილავსა უპირატეს ძეთა ისრაელისათა ვიდოდით, Page of ms. S: 302r ვიდრემდე შევიყუანნეთ იგინი ადგილსა მას მათსა, და დაემკჳდროს მონაგები ჩუენი ქალაქთა შინა მოზღუდვილთა მკჳდრთათჳს მის ქუეყანისათა.
და არა მოვიქცეთ სახიდ ჩუენდა, ვიდრემდე განიყო6 ძეთა ისრაელისათა კაცადკაცადმან სამკჳდრებელი თჳსი,
და არღარა დავიმკჳდროთ ჩუენ წიაღ იორდანესა და მიერ კერძოჲ, რამეთუ მოგჳღებიეს ჩუენ ნაწილი ჩუენი ამიერ იორდანესა, მზის აღმოსავალით.
და ჰრქუა მათ მოსე: უკუეთუ ჰყოო სიტყჳსა მაგისებრ და შეიჭურნეთ წინაშე უფლისა ბრძოლად,
და განვიდეს ყოველი ჭურვილი თქუენი იორდანესა წინაშე უფლისა, ვიდრემდე შეიმუსრნენ მტერნი მისნი წინაშე მისა.
და იუფლოს ქუეყანა წინაშე უფლისა. და ამისა შემდგომად მოიქცეთ და იყვნეთ თქუენ უბრალო წინაშე უფლისა და ისრაელისაგან, და იყოს ქუეყანაჲ ესე თქუენდა სამკჳდრებელ წინაშე უფლისა.
უკუეთუ არა ჰყოთ ესრეთ, სცოდოთ წინაშე უფლისა და სცნათ ცოდვა თქუენი, რაჟამს გეწიოს თქუენ ბოროტი.
არამედ იშენეთ ქალაქები ჭურჭელთა თქუენთათჳს და საყოფლები საცხოვართა თქუენთათჳს, და რომელეგე გამოვიდა სიტყუაჲ პირისაგან თქუენისა, ყავთ.
და ეტყოდეს ძენი რუბენისნი და ძენი გადისნი მოსეს და ჰრქუეს: მონათა Page of ms. S: 302v შენთა ყონ, ვითარცა უფალსა ჩუენსა უბრძანებიეს,
მონაგები ჩუენი და ცოლნი ჩუენნი და საცხოვარი ჩუენი იყუნედ ქალაქებსა გალადისასა.
ხოლო მონანი შენნი წარვიდენ შეჭურვილნი და განწესებულნი წინაშე უფლისა ბრძოლად, ვითარცა უფალი იტყჳს.
და შეატყუნა იგინი მოსე ელიაზარს მღდელსა და ისუს, ძესა ნავესსა. და მთავართა მათ მამათასა ნათესავისა ძეთა ისრაელისათა,
და ჰრქუა მათ მოსე: უკუეთუ წიაღ-ჴდენ თქუენ თანა ძენი რუბენისნი და ძენი გადისნი იორდანესა, ყოველნივე შეჭურვილნი ბრძოლად წინაშე უფლისა, და ეუფლნეთ ქუეყანასა წინაშე თქუენსა, მიეცით მაგათ ქუეყანაჲ გალადისაჲ სამკჳდრებელად.
უკუეთუ არა წიაღ-ჴდენ თქუენ თანა შეჭურვილნი ბრძოლად წინაშე უფლისა. წიაღ-იყვანეთ მონაგები და ცოლნი მაგათნი და საცხოვარი უწინარეს თქუენსა ქუეყანად ქანანისა, და თქუენ თანა დაიმკჳდროს ქუეყანასა ქანანისასა.
მიუგეს ძეთა რუბენისთა და ძეთა გადისთა და ჰრქუეს: რაოდენსა უფალი ჩუენი ეტყჳს მსახურთა თჳსთა, ვყოთ ეგრე ჩუენ,
წიაღ-ვჴდეთ იორდანესა შეჭურვილნი წინაშე უფლისა ქუეყანად ქანანისა და მოგუეცით სამკჳდრებელი ჩუენი ამიერ იორდანესა.
და მისცა მოსე ძეთა Page of ms. S: 303r რუბენისთა და ძეთა გადისთა და კერძოსა ნათესავსა მანასესსა და ძეთა იოსებისთა სამეუფო სეონისი, მეფისა ამორეველთასა, და სამეუფო ოგისი, მეფისა ბასანისა, ქუეყანა და ქალაქები საზღურითურთ მისით, ქალაქები მის ქუეყანისა გარემოჲ.
და იშენეს ძეთა გადისთა დებონი და ასტაროთი
და სოფარი და იაზერი და აღამაღლნეს იგინი,
და ამბრაამი და ბეთორანი -- ქალაქნი მოძნელებულნი და საყოფელნი საცხოვართათჳს.
და ძეთა რუბენისთა აღაშენეს ესებონი და ელიალე და კარიათემი
და ბეელმონი გარე-მოზღუდვილად და სებამა და დასდვეს სახელებისა მისებრვე მათისა სახელები ქალაქთა მათ, რომელ აღაშენნეს.
და წარვიდა ძე მაქირისი, ძისა მანასესი, გალაადდ და დაიპყრა იგი და წარწყმიდა ამორეველი, რომელი დამკჳდრებულ იყო მას შინა.
და მისცა მოსე გალაადი მაქირს, ძესა მანასესსა, და დაემკჳდრა მუნ.
და იარ, ძე მანასესი, წარვიდა და დაიპყრა ქალაქები მათი და დასდვა მათ სახელები "იაირის".
და ნაბავ წარვიდა და დაიპყრა კანათა და დაბნები მისი და უწოდა მას "ნაბავ", სახელი თჳსი.
