და ეტყოდა უფალი მოსეს და ჰრქუა:
შური-იგე შურისგებაჲ ძეთა ისრაელისათა მადიამელთაგან და მერმე შეეძინო ერსა შენსა.
და ეტყოდა მოსე ერსა მას და ჰრქუა: შეჭურენით თქუენგანნი კაცნი განწყობად წინაშე უფლისა მადიამელთა მიმართ, მიგებად შური უფლისაჲ მადიამელთა ზედა;
ათასი ნათესავისაგან ყოველთა ტომთა ისრაელისათა და ათასი ნათესავისაგან ლევისა, და მიავლინეთ წყობად.
და აღრაცხეს ათასეულთაგან ისრაელისათა, ათასი ნათესავისაგან, ათორმეტი ათასი შეჭურვილი წყობად.
და წარავლინნა იგინი მოსე: ათას-ათასი თითოეულისაგან ნათესავისა ძალითურთ მათით და ფინეზ, ძე ელიაზარისი, ძისა აჰრონ მღდელისა, და ჭურჭელი იგი წმიდაჲ და საყჳრები სასწაულთა ჴელთა მათთა.
და ეწყვნეს მადიამელთა, ვითარცა უბრძანა Page of ms. S: 298v უფალმან მოსეს, და მოსრეს ყოველი წული.
და მეფენი მადიამისანი მოსწყჳდნეს წყლულთა მათთა თანა: ევი და სურ და როკომ და ურ და რობოკ -- ესე ხუთნი მეფენი მადიამისანი, და ბალაამ, ძე ბეორისი, მისანი, მოკლეს მახჳლითა წყლულთა მათ თანა;
და წარმოსტყუენნეს დედანი მადიამისნი და ჭურჭელი მათი და საცხოვარი და ყოველი მონაგები მათი და ძალი მათი წარმოიღეს;
და ყოველი ქალაქები მათი სამკჳდრებელთაგან მათთა და სახლები მათი მოწუეს ცეცხლითა;
და წარმოიღეს ყოველი იავარი და ყოველი ნატყუენავი კაცითგან საცხოვრადმდე:
და მოიღეს იგი მოსესა და ელიაზარ მღდელისა ყოველთა ძეთა ისრაელისათა და ნატყუენავი იგი და იავარი და ყოველი ტყუე ბანაკად არაბოთს მოაბისასა, რომელ არს კიდესა იორდანისასა, იერიქოთ კერძო.
და განვიდა მოსე და ელიაზარ მღდელი და ყოველნი მთავარნი კრებულისანი შემთხუევად მათა გარეშე ბანაკსა.
და განრისხნა მოსე მოღუაწეთა მათ ზედა ერისათა -- ათასისთავთა და ასისთავთა, რომელნი-იგი მოსრულ იყვნეს წყობისა მისგან ბრძოლისა,
და ჰრქუა მათ მოსე: რაისათჳს აც\ხოვნეთ Page of ms. S: 299r ყოველი დედაკაცი?
რამეთუ ეგენი იყვნეს საცთურ ძეთა ისრაელისათა, სიტყჳსა მისებრ ბალამისა, განდგომად და უგულებელ-ყოფად სიტყჳსა უფლისასა ფოგორისთჳს, რომლისათჳს წყლულებაჲ იგი იქმნა წინაშე უფლისა.
და აწ მოსართ ყოველი წული ყოვლისაგან ბანაკისა და ყოველი დედაკაცი, რომელმან იცის საწოლი მამაკაცისაჲ, მოჰსართ.
და ყოველი დედაკაცი, რომელმან არა იცის საწოლი მამაკაცისა, განარინეთ.
და თქუენ დაიბანაკეთ გარემოს შჳდ დღე, ყოველმან რომელმან მოკლას სული და ყოველი რომელი შეხებულ არს წყლულსა, განწმიდენ სამ დღე და მეშჳდედ დღედმდე თჭუენ და ყოველი ნატყუენავი თქუენი.
და ყოველი სამოსელი და ყოველი ჭურჭელი ტყავისა და ყოველი საქმარი თხისაგანი და ყოველი ჭურჭელი ძელისაჲ განწმიდეთ.
და ელიაზარ მღდელმან ჰრქუა კაცთა მათ ძლიერებისათა, [რომელ] იყუნეს ბრძოლისა მისგან: ესე სამართალი არს შჯულისა, რომელი ამცნო უფალმან მოსეს.
თჳნიერ ოქროსა და ვეცხლისა, რვალისა და რკინისა, ბრპენისა და, ტყჳვისა,
ყოველივე საქმარი, რომელი შევიდეს ცეცხლსა , განწმიდნეს, არამედ წყლითაცა განწმედილისათა განწმიდნეს; და ყოველი, რომელი არა შევალს ცეცხლსა, შევიდეს წყალსა.
და განირცხეთ Page of ms. S: 299v სამოსელი დღესა მეშჳდესა და განწმიდენით და ამისა შემდგომად შემოხჳდეთ ბანაკად.
და ეტყოდა უფალი მოსეს და ჰრქუა:
მოიღე თავ-თავი ნატყუენავთაჲ ტყუენულისა მის კაცითგან საცხოვარადმდე შენ და ელიაზარ მღუდელმან და მთავართა მათ ტომთა კრებულისათა,
განიყავთ ნატყუენავი შორის მბრძოლთა მათ, რომელნი-იგი გამოსრულ იყვნეს წყობად, და შორის ყოვლისა კრებულისა.
და მოიღეთ ზუერი უფლისაჲ კაცთა მათგან მბრძოლთა, რომელნი გამოსრულ იყვნეს წყობად, ერთი კაცი ხუთასისაგან -- კაცთაგანი და კარაულთა და ზროხათა და ცხოვრისა და ვირთა.
და ზოგისაგანი მოიღეთ მაგისი და მიეც ელიაზარს მღდელსა შესაწირავად უფლისა,
და ზოგისაგან ძეთა ისრაელისათა მოიღე ერთი ერგასისაგანი და ზროხათა და ცხოვართა და ვირთა და ყოველთაგან პირუტყუთა და მისცე იგი ლევიტელთა, რომელნი სცვენ საცავსა მას კარავსა მას უფლისასა.
და ყვეს ეგრე მოსე და ელიაზარ მღდელმან, ვითარცა უბრძანა უფალმან მოსეს.
და იყო ნამეტნავი იგი ნატყუენავისა, რომელი ტყუენეს კაცთა მათ მბრძოლთა, Page of ms. S: 300r ცხოვართაგანი ექუსას სამეოცდაათხუთმეტ ათას,
ზროხა სამეოცდაათორმეტ ათას,
ვირები სამეოცდაერთ ათას,
ყოველი კაცი და დედაკაცი, რომელთა არა იცოდეს საწოლი მამაკაცისა, ყოველი სული ოცდაათორმეტ ათას.
და იყო ზოგი ნაწილი განსრულთა მათ ბრძოლად რიცხჳსაგან ცხოვართასა სამას ოცდაათჩჳდმეტ ათას და ხუთას;
და იყო ზუერად უფლისა ცხოვარი ექუსას სამეოცდაათხუთმეტ;
ზროხა ოცდაათექუსმეტ ათას;
ვირები ოცდაათ ათას და ხუთას და სამეოცდაერთ;
სული კაცთა ათექუსმეტ ათას და ზუერად უფლისა ოცდაათორმეტ სულ.
და მისცა მოსე ზუერი იგი უფლისაჲ შესაწირავად ღმრთისა ელიაზარს მღდელსა, ვითარცა უბრძანა უფალმან მოსეს.
და ზოგისაგან ძეთა ისრაელისათა, რომელი-გი განყო მოსე კაცთა მათგან მბრძოლთა,
და იყო ზოგისა მისგან კრებულისა ცხოვართაგან სამას ოცდაათჩჳდმეტ ათას;
და ზროხაჲ ოცდაათექუსმეტ ათას;
და ხუთას;
და სულები კაცთა ათექუსმეტ ათას.
და მოიღო მოსე ზოგისა მისგან ძეთა ისრაელისათა ერთი ერგასისაგანი კაცთა და საცხოვრისაჲ და მისცა იგი ლევიტელთა, მცველთა Page of ms. S: 300v მათ საცოსა კარვისა უფლისათა, ვითარცა უბრძანა უფალმან მოსეს.
და მოვიდეს მოსესა ყოველნი იგი დადგინებულნი ათასისთავებსა მას ძლიერებისასა, ათასისთავები,
და ჰრქუეს მოსეს: მონათა შენთა მოიღეს რიცხჳ კაცთა მათ მბრძოლთა, რომელნი იყვნეს ჩუენ თანა, და არავინ გუაკლს მათგანი არცა ერთი.
და მოვიღეთ ძღუნად უფლისა, კაცმან რომელმან პოვა ჭურჭელი ოქროსაჲ: მანიაკი და სავლტე და ბეჭედი და მარჯუენით-საცუმელი და სამკაული სალხინებელად ჩუენთჳს წინაშე უფლისა.
და მოიღეს მოსე და ელიაზარ მღდელმან ოქრო იგი მათგან, ყოველი ჭურჭელი ქმნული.
და იყო ყოველი იგი ოქროჲ შესაწირავად, რომელი შეწირეს უფლისა, ათექუსმეტ ათას და შჳდას და ერგასის სასწორ ათასისთავთა მათგან და ასისთავთა.
და კაცთა მათ მბრძოლთა იტყუენეს კაცად-კაცადმან თავისა თჳსისა.
და მოიღეს მოსე და ელიაზარ მღდელმან ოქროჲ იგი ათასისთავთა მათგან და ასისთავთა და შეიღეს იგი კარვად საწამებელისა საჴსენებელად ძეთა ისრაელისათა წინაშე უფლისა.
